دوو شەممە, 20 کانونی یەکەم 2021 21:10

نازم ده‌باغ له تاران له‌گه‌ڵ محه‌مه‌دى حاجى مه‌حموود دیداریی کرد

"نازم دەباغ" نوێنەری حکومەتی هەرێمی کوردستان لە ئێران، لەگەڵ "محه‌مه‌دی حاجی مه‌حموود" سکرتیری حیزبی سۆسیالیست دیمۆکڕاتی کوردستان دیداریی کرد.

 

"نازم دەباغ" نوێنەری حکومەتی هەرێمی کوردستان لە ئێران، به هاوڕێیه‌تی له‌گه‌ڵ "سه‌‌لام عارف روشدی" جێگری نوێنەری حکوومەتی هەرێمی کوردستان‌ لە تاران و "هیوا ڕه‌سووڵ ڕه‌شید" ئەندامی نوێنەرایەتی حکوومەتی هەرێمی کوردستان، ڕۆژی دووشه‌مه ٢٠ى دیسه‌مبه‌ریى 20٢١، سه‌ردانی  "محه‌مه‌دى حاجى مه‌حموود" سکرتیری حیزبی سۆسیالیست دیمۆکڕاتی کوردستان له‌ شوێنى تایبه‌تى خۆى له‌ تارانى پایته‌ختى ئێرانیان کرد که "مه‌لا لوقمان" به‌ر‌پرسى مه‌کته‌بى په‌یوه‌ندییه‌کانى تارانى حزبى سۆسیالیست دیموکراتى کوردستان تیایدا ئاماده‌بوو.

 

لە سه‌ره‌تای ئه‌م دیداره‌دا به تایبه‌ت باس لە باروودۆخی هەڕێمی کوردستان و عێراق و دوایین هه‌ڵبژاردنه‌کانی عێراقی فیدڕال و هه‌روه‌ها بە گشتی باس لە باروودۆخی ناوچەکە کرا.

 

له درێژه‌ی ئه‌م کۆبوونەوەیه‌دا، نوێنەری حکومەتی هەرێمی کوردستان لە ئێران، باسی باروودۆخی هەرێمی کوردستان و عێراقی کرد و له‌م باره‌یه‌وه بیرووڕای خۆی سەبارەت بە باروودۆخی ناوچه‌کە خستەروو.

بەیانیى ئەمڕۆ سێشەممە2021/12/21 بەڕێز نێچیرڤان بارزانى، سەرۆکى هەرێمى کوردستان پێشوازى لە بەڕێز ئیرەج مەسجدى، باڵیۆزى کۆمارى ئیسلامیى ئێران لە عیراق کرد.

لە دیدارێکدا پەیوەندییەکانى عیراق و هەرێمى کوردستان لەگەڵ کۆمارى ئیسلامیى ئیران و برەودان بە بوارەکانى هاریکاریى هاوبەش، دوایین هەنگاوەکانى پرۆسەى سیاسى لە عیراق و هەوڵەکان بۆ پێکهێنانى حکوومەتى تازەى عیراق، پەیوەندییەکانى هەولێر ـ بەغدا و بەردەوامیى گفتوگۆى چارەسەرکردنى کێشەکانى نێوانیان، مەترسییەکانى تیرۆر و هێرش و پەلامارەکانى ئەم دوایییەى داعش، تاوتوێ کران.

هەردوولا هاوڕا بوون لەسەر گرنگیى کارکردن بۆ پاراستنى ئارامى و سەقامگیریى ناوچەکە و برەودان بە پەیوەندییەکانى وڵاتانى ناوچەکە لەسەر بنەماى دۆستایەتى و بەرژەوەندیى هاوبەش، هەروەها جەختیان لە پەرەپێدانى پەیوەندییەکانى هەرێمى کوردستان و کۆمارى ئیسلامیى ئیران کردەوە.

https://presidency.gov.krd/president-nechirvan-barzani-receives-iranian-ambassador-to-iraq

ئەمەریكا لە پشتگیریكردنی عیراق و هەرێمی كوردستان بەردەوام دەبێت

لە میانی كۆبوونەوەیدا لەگەڵ بەڕێز نێچیرڤان بارزانی، سەرۆكی هەرێمی كوردستان، بەڕێز برێت مەكگورگ ڕێكخەری كاروباری ڕۆژهەڵاتی ناوەڕاست و باكووری ئافریكا لە كۆشكی سپی، دووپاتی كردەوە كە ئەمەریكا لە پشتگیریكردنی عیراق و هەرێمی كوردستان بەردەوام دەبێت و بۆ ڕووبەڕووبوونەوە و تێكشكاندنی یەكجاریی داعش، دەتوانن پشتی پێ ببەستن، هەروەها پرسە و سەرەخۆشی پێشكەش بە خانەوادەی شەهیدانی پێشمەرگە كرد كە ئەم دوایییە لە بەرەنگاربوونەوەی داعشدا شەهید بوون.

لە كۆبوونەوەكەدا كە نیوەڕۆی ئەمڕۆ دووشەممە 2021/12/13 لە هەولێر بەڕێوە چوو، سەرۆك نێچیرڤان بارزانی كاتی سەردانی بەڕێز مەكگورگی بۆ عیراق و هەرێمی كوردستان بە گرنگ لە قەڵەم دا و دووپاتی كردەوە كە لە سەروبەندی گۆڕانی ئەركی هێزەكانی ئەمەریكا و هاوپەیمانان لە عیراق، دووپاتكردنەوەی بەردەوامیی پابەندیی ئەمەریكا بە پشتگیریكردنی عیراق و هەرێمی كوردستانەوە، پەیامێكی گرنگە.

لە كۆبوونەوەكەدا كە بەڕێز باڵیۆزی ئەمەریكا لە عیراق و كونسولی گشتییان لە هەولێر ئامادەی بوون، هەڵبژاردن و ئەنجامەكانی و پێشبینی بۆ داهاتووی پرۆسەی سیاسی لە عیراق، گفتوگۆی نێوان هێز و لایەنە عیراقییەكان، هەوڵەكان بۆ دامەزراندنی حكوومەتی نوێی فیدراڵ، دۆخی ئەمنی و سەربازی و ئابووریی وڵات، هێرش و پەلامارەكانی داعش، هاریكاری و هەماهەنگیی نێوان پێشمەرگە و سوپا، پەیوەندییەكانی هەولێر ـ بەغدا، گفتوگۆی ستراتیژیی عیراق ـ ئەمەریكا و دەرفەتەكانی برەودان بە پەیوەندییەكانی هەردوولا تاوتوێ كران.

هەردوولا هاوڕا بوون كە داعش مەترسییەكی ڕاستەقینەیە و بۆ ڕووبەڕووبوونەوە و تێكشكاندنی، هێشتا عیراق پێویستی بە بەردەوامیی پشتگیریی هاوپەیمانیی نێودەوڵەتی هەیە، هەروەها هاریكاری و هەماهەنگیی هێز و لایەنە عیراقییەكانیان بە پێویست زانی بۆ ئەوەی بتوانن حكوومەتێكی كۆكەرەوە لە وڵات پێك بهێنن كە وەڵامدەرەوەی داواكارییەكانی هاووڵاتیانی عیراق بێت و ئارامی و سەقامگیریی بپارێزێت.

دۆخی ناوخۆی هەرێمی كوردستان، پەیوەندییەكانی عیراق لەگەڵ وڵاتانی ناوچەكە و جیهان، دۆخی ناوچەكە بەگشتی، دوایین پێشهاتەكانی سووریا و پرسی كورد لەو وڵاتە و چەند بابەتێكی دیكەی جێی بایەخی هاوبەش، تەوەرێكی دیكەی كۆبوونەوەكە بوو.

 

https://presidency.gov.krd/america-will-continue-to-support-iraq-and-the-kurdistan-region/

وێستگە نیوز - محەمەد عـەلی 
 
نوێنەری حکومەتی هەرێمی كوردستان لە ئێران دەڵێت، تاران بە ڕوونی بە بەرپرسانی عێراقی ووتوە ئەیەوێ دراوسێیەكی باش و پڕ لە ئاسایش و ئارامی ھەبێت، بۆ ئەو مەبەستەش داوای لە عێراق كردووە تا زووە پەلەبكەن لە پێكھێنانی حكومەتی نوێی عێراق. دەشڵێت، ''پێموانییە ھەروا بە ئاسانی ئەمریکا عێراق بەجێبھێڵن بەتایبەت لە ئێستادا دووبارە ڕێكخراوی داعش سەری ھەڵداوەتەوەو بەبەردەوامی ھێرش دەكەنە سەر سوپای عێراق و هێزەکانی پێشمەرگە.''
 
ئەمڕۆ پێنجشەممە 9ی کانوونی یەکەمی 2021، نازم دەباغ نوێنەری حکومەتی هەرێمی كوردستان لە ئێران لە چاوپێكەتنێكدا لەگەڵ وێستگە نیوز ڕایگەیاند، "دواكەوتن و پەسەند نەكردنی ئەنجامەكانی ھەڵبژاردنی ئەنجومەنی نوێنەرانی عێراق بە دڵنیایەوە كاردانەوەی كۆماری ئیسلامی ئێرانی بەدواوە دێت، ھەرچەندە ئێران لە ھەوڵی خۆیدایە لە ڕێگەی دۆستەكانیەوە بۆ ئەوەی بەرپرسانی عێراق بگەنە ڕێكەوتن و ئەنجامی ھەڵبژاردنەكان قبوڵ بكەن، بۆ ئەوەی لە ناوچەكە پشێوی دروست نەبێت لەبەر ئەوە پێویستە حكومەتی ئایندەی عێراق لە ماوەیەكی كەمدا پێكبھێنرێت و كۆتایی بە ناكۆكیەكانی نێوان ھێزو پێكھاتەكانی عێراق بێت، چونكە ناكۆكی نێوان ھێزو پێكاھاتەكان دەبێتە ھۆی دروست بوونی نەبوونی ئەمنی لە عێراق، دروست بوونی نا ئارامیش لە عێراقی پەیوەندی بە ئەمنیەتی ئێرانەوە ھەیە."
 
سەبارە بە دواكەوتن و پێکھێانی حکومەت چ كاریگەریەكی دەبێت لە ناوچەكە، نوێنەری حكومەتی ھەرێم لە تاران ووتی، "ئێران بە ڕوونی بە بەرپرسانی عێراقی ووتوە ئەیەوێ دراوسێیەكی باش پڕ ئاسایش و ئارامی ھەبێت، بۆ ئەو مەبەستەش داوای لە عێراق كردووە تا زووە پەلەبكەن لە پێكھێنانی حكومەتی نوێی عێراق، چونكە سەقامگیری عێراق بەلای ئێرانەوە گرنگی خۆی ھەیە و ئێران دەیەوێ گفتووگۆكانی 4+1 سەركەوتوو بێت و ئەنجامەكانی بەشێوەیەكی ئیجابی  بێت."
 
ھەر چەندە ماوەیەكە باس لە خراپی پەیوەندییەكانی نێوان ئێران و حكومەتی ھەرێم دەكرێت، بەڵام نوێنەری حكومەتی ھەرێم پێی وایە ئەوەی باسدەكرێت تەنھا قسەن دوورن لە ڕاستیەوە و دەڵێت، ''وەك ھەمیشە ئەگەر پەیوەندی نێوان ئێران و حكومەتی ھەرێم بەرەو پێشەو نەڕۆشتبێت گەڕانەوەی نەبینیووە بە خۆیەوە، لەبەر ئەوە بۆ كۆماری ئیسلامی ئێران، ھەرێمی كوردستان پێگەوگرنگی خۆی ھەیە."
 
نازم دەباغ وتیشی، "پەیوەندی نێوان ئێران و حكومەتی ھەرێم زیاتر پەیوەندی پارتی و یەکێتیە پێش ئەوەی پەیوەندی حكومی بێت لەگەڵ ھەرێم، ھەركات پەیوەندی نێوان حكومەتی ھەرێم و ئێران باش بوو ئەوا پەیوەندی نێوان پارتی و یەكێتی لەگەڵ ئێران لە باشیدایە.'' 
 
لەبارەی كشانەوەی ھێزە شەڕكەرەكانی ئەمریكا لە عێراق لە كۆتایی ئەمساڵدا نوێنەری حكومەتی ھەرێم لە ئێران باسیلەوەكرد، "ئەمریكا بە تەواوی لە عێراق ناكشێتەوە چونكە پێموانییە ھەروا بە ئاسانی ئەمریکا عێراق بەجێبھێڵن، بەتایبەت لە ئێستادا دووبارە ڕێكخراوی داعش سەری ھەڵداوەتەوەو بەبەردەوامی ھێرش دەكەنە سەر سوپای عێراق و هێزەکانی پێشمەرگە.''

 


PM:03:19:09/12/2021

 

https://www.westganews.net/dreja.aspx?=hewal&jmara=108873&Jor=1

چوار شەممە, 08 کانونی یەکەم 2021 04:15

"سەلام رشدی" له‌گه‌ڵ به‌رپرسانی زانکۆی گشتیی زانستی – کاربه‌ری تاران کۆبۆوه

"سەلام رشدی" جێگری نوێنەری حکوومەتی هەرێمی کوردستان لە ئێران، له‌گه‌ڵ به‌رپرسان و مامۆستایانی زانکۆی گشتیی زانستی – کاربه‌ری تاران دیداریی کرد. 

 "سه‌لام عارف رشدی" جێگری نوێنەری حکوومەتی هەرێمی کوردستان لە تاران، روژی سێشه‌مه رێکه‌وتی ۰۶/۱۲/۲۰۲۱ له‌سه‌ر بانگهێشتی فه‌رمی زانکۆی جامع علمی - کاربردی واته "زانکۆی گشتیی زانستی – کاربه‌ری" سه‌ردانی ئه‌م کۆلێژه‌یان کرد و له لایه‌ن به‌رپرسان و مامۆستایانی ئه‌م زانکۆیه‌وه به گه‌رمی پێشوازیان لێکرا که ئه‌م که‌سایه‌تیانه بریتی بوون له: دکتۆر "دلاوه‌ر" به‌ڕێوه‌به‌ری گشتی نێوده‌وڵه‌تی زانکۆ و ڕاوێژکاری سه‌رۆکی زانکۆ، دکتۆر "پێشبین" سه‌رۆکی به‌شی پارێزگاری ڕۆژهه‌ڵاتی تاران، خاتوو دکتۆر "کازمی" سه‌رۆکی به‌شی توێژینه‌وه‌ی زانکۆ، دکتۆر "مووسازاده" به‌ڕێوه‌به‌ری گشتی به‌شی توێژینه‌وه‌ی زانکۆ، ئه‌ندازیار "غه‌فاری" سه‌رۆکی کاروباری ئیداری و هه‌روه‌ها خاتوو "نازرفه‌رد".

 له‌م کۆبوونه‌وه‌یه‌دا باسی توانایی و رێنماییه‌کانی نوێی فێرکردن و پسپۆڕایه‌تی و هه‌ندێک بابه‌تی شاره‌زایانه‌ی کۆلێژی زانکۆی گشتیی زانستی – کاربه‌ری تاران کرا و ئاماده‌یی خۆیان پیشاندا بۆ میوانداریی له زانکۆ‌کانی هه‌رێمی کوردستان و هه‌روه‌ها به‌رپرسانی وه‌زاره‌تی خوێندنی باڵای هه‌رێمی کوردستان و مامۆستایان، پسپۆڕان و شاره‌زایانی بواره جۆراجۆره‌کان.  

 له به‌شێکی دیکه‌ی ئه‌م دیداره‌دا به‌رپرسانی زانکۆی گشتیی زانستی – کاربه‌ری ئێران ئاماده‌یی خۆیان نیشاندا که سه‌ردانی هه‌رێمی کوردستان بکه‌ن و توانایی و پسپۆڕایه‌تی خۆیان بخه‌نه‌ڕوو. هه‌روه‌ها داوایان کرد که هه‌لیان بۆ بڕ‌ه‌‌خسێت که له‌گه‌ڵ زانکۆکانی هه‌رێمی کوردستان وتووێژ بکه‌ن و درگای هاتووچۆیان بۆ بکرێته‌وه. 

 له درێژه‌ی ئه‌م کۆبوونه‌وه‌یه‌دا به‌رپرسانی زانکۆی گشتیی زانستی – کاربه‌ری تاران ئاشکرایان کرد که له چه‌ند مانگی داهاتوودا سێمینارێک ساز ده‌که‌ن و ئاماده‌یی خۆیان ده‌ربڕی بۆ پێشوازیی له وه‌فدێکی زانکۆکانی هه‌رێمی کوردستان تاکوو سه‌ردانی کۆماری ئیسلامی ئیران بکه‌ن و له‌م کۆنفڕانسه‌ زانستییه‌دا ئاماده‌بن. 

 هه‌ر له‌م کۆبوونه‌وه‌یه‌دا به‌رپرسانی زانکۆی گشتیی زانستی – کاربه‌ری تاران چه‌ندین داواکارییان ئاراسته‌ی "سەلام رشدی" جێگری نوێنەری حکوومەتی هەرێمی کوردستان لە ئێران کرد که بریتی بوون له: سه‌ردانی هەرێمی کوردستان بکه‌ن و له‌گه‌ڵ وه‌زاره‌تی خوێندنی باڵا و زانکۆکانی هه‌رێمی کوردستان کۆببنه‌وه، ئاماده‌یی خۆیان نیشاندا که لقێکی زانکۆی گشتیی زانستی – کاربه‌ری له هەرێمی کوردستان بکە‌نه‌وه، ئاماده‌یی خۆیان نیشاندا که میوانداریی وه‌فدی زانستی حکوومەتی هەرێمی کوردستان و هه‌روه‌ها زانکۆکانی هه‌رێمی کوردستان بکه‌ن، ئاماده‌‌ن که له زانکۆکه‌یان خوێندکارانی هەرێمی کوردستان وه‌ربگرن و هه‌روه‌ها چه‌ندین پێشنیاریی دیکه.  

 زانکۆی گشتیی زانستی – کاربه‌ری یه‌کێکه له زانکۆکانی سه‌ر به وه‌زاره‌تی زانست، توێژینه‌وه و ته‌کنه‌لۆژیای ئێران که به مه‌به‌ستی بردنه‌سه‌رێی ئاستی به‌شه‌ جۆراوجۆره‌کانی ته‌کنیکی، ئه‌ندازیاری، ئابووری، کشتووکاڵ، به‌ڕێوه‌به‌رایه‌تی، کۆمه‌ڵایه‌تی، فه‌رهه‌نگی، هونه‌ری و ... له ساڵی ١٩٩١ دامه‌زراوه‌ و له قۆناغه‌کانی په‌یمانگا و به‌کالوریۆس قوتابی وه‌رده‌گرێت. ‌

یەک شەممە, 05 کانونی یەکەم 2021 08:32

سەلام روشدی لەگەڵ شاندی یه‌کێتی هاورده و ناردنکارانی هه‌رێمی کوردستان کۆبۆوە

"سەلام روشدی" جێگری نوێنەری حکوومەتی هەرێمی کوردستان لە ئێران، لەگەڵ شاندی یه‌کێتی هاورده و ناردنکارانی هه‌رێمی کوردستان / لقی هه‌ولێر له تاران، دیداری کرد.

له‌ درێژه‌ی کار و چالاکییه‌کانی نوێنەرایه‌تی حکوومەتی هەرێمی کوردستان لە تاران، "سەلام عارف روشدی" جێگری نوێنەری حکوومەتی هەرێمی کوردستان لە ئێران، ڕۆژی یه‌کشه‌مه ٥ی دیسه‌مبه‌ری ٢٠٢١ سه‌ردانی شاندی یه‌کێتی هاورده و ناردنکارانی هه‌رێمی کوردستان / لقی هه‌ولێری کرد که له‌سه‌ر بانگهێشتنامه‌ی کۆمپانیای "پارس ڕه‌ستاک" Pars Rastak به‌ڕێوه‌به‌ریی پێشانگا و کۆنفرانسه‌ نێوده‌وڵه‌تییه‌‌ پیشه‌ییه‌کان له ئێران ‌و به مه‌به‌ستی به‌ره‌پێشبردنی ئابووری و بازرگانی هه‌رێمی کوردستان و زیادکردنی جووڵه‌ی بازرگانی سه‌ردانی شاری تارانی پایته‌ختی ئێرانیان کردووه که ئه‌ندامانی شانده‌که پێکهاتبوون له: "گه‌یلان سه‌عید عه‌زیز" سه‌رۆکی لقی هه‌ولێر، "خه‌لیل گۆران" جیگری سه‌رۆکی لقی هه‌ولێر، "عه‌بدوالخالق زرار عه‌بدوڵڵا"، "ڕه‌سووڵ عومه‌ر عه‌بدوڵڵا " و "هوشیار محه‌مه‌د ئیبڕاهیم" ئه‌ندامانی ده‌سته‌ی کارگێری لقی هه‌ولێر و هه‌روه‌ها "خالید سه‌عید ئه‌حمه‌د" بازرگان.

 له‌م سه‌ردانه‌ی جێگری نوێنەری حکوومەتی هەرێمی کوردستان لە ئێران، جه‌خت له‌سه‌ر په‌ره‌پێدانی زیاتری په‌یوه‌ندیی دۆستانه و فراوانکردنی جووڵه‌ی ئابووری و بازرگانی له‌گه‌ڵ کۆماری ئیسلامی ئێران کرا که له پلانی حکوومەتی هەرێمی کوردستان دایه و هه‌نگاوی باشی ناوه بۆ ئه‌و په‌یوه‌ندییه‌ ئابورییه‌ی له‌گه‌ڵ هه‌موو جیهان و هه‌روه‌ها ئێرانیش که پشتیوانی له خاوه‌نکار، سه‌رمایه‌دار و خاوه‌ن پیشه‌کان ده‌کات که له هەرێمی کوردستان پڕۆژه‌کانیان جێبه‌جێی بکه‌ن بۆ بونیادنانی ژێرخانێکی به‌هێز و پته‌و به داهاتووی هەرێمی کوردستان. ‌‌ 

 "سەلام روشدی" له درێژه‌ی ئه‌م دیداره‌دا ده‌ستخۆشی له سه‌ردانی شاندی یه‌کێتی هاورده و ناردنکارانی هه‌رێمی کوردستان بۆ وڵاتی ئێران کرد بۆ ئه‌وه‌ی که سوودوه‌ربگرن له‌و ئه‌زموونه‌ی که هه‌یانه و گواستنه‌وه‌ی بۆ هه‌رێمی کوردستان بۆ جێبه‌جێی کردنی پڕۆژه‌کانی به‌رهه‌مهێنان و پیشه‌سازی.

 له به‌شێکی دیکه‌ی ئه‌م کۆبوونه‌وه‌یه‌دا شاندی یه‌کێتی هاورده و ناردنکارانی هه‌رێمی کوردستان / لقی هه‌ولێر، ئاماژه‌یان به‌وه‌کرد که سوودیان له‌ بیرۆکه‌کانی کۆمپانیا ئێرانییه‌کان وه‌رگرتووه له کاتی سه‌ردانیان بۆ پێشانگا و ناوه‌ندی به‌رهه‌مهێنان و پیشه‌سازی تاران که زانیاریی گرینگیان ئاراسته‌ کردبوون تاکوو بیگوازنه‌وه بۆ هه‌رێمی کوردستان. 

 سه‌ردانی شاندی یه‌کێتی هاورده و ناردنکارانی هه‌رێمی کوردستان / لقی هه‌ولێر بۆ وڵاتی ئێران، ٤ ڕۆژ کات ده‌خایه‌نێت و به‌شداری کۆنفرانسی ناساندنی بازار و بازرگانی له‌گه‌ڵ هەرێمی کوردستان ده‌که‌ن و هه‌روه‌ها سه‌ردانی چه‌ندین پێشانگا و ناوه‌ندی به‌رهه‌مهێنان و پیشه‌سازی ده‌که‌ن، له‌وانه: پێشانگای بنه‌مای زانستی، سه‌ردانی سندووقی نوێخوازی و گه‌شه‌پێدانی سه‌رۆک کۆماری، سه‌ردانی ناوه‌ندی به‌رهه‌مهێنان و پیشه‌سازی له پارکی زانست و ته‌کنه‌لۆجیای ئه‌لبورز، سه‌ردانی کۆمپانیاکانی بنه‌مای زانستی، سه‌ردانی پێشانگای ئێران "مێتافۆ" (پۆڵا، کانزا، که‌ره‌سته‌کانی مه‌کینه‌ و ...)، سه‌ردانی گه‌وره‌ترین پێشانگاکانی ئێران له بواری پیشه‌ی پۆڵا و مێتالۆجی، سه‌ردانی ناوه‌ندی IHIT و ...

سەرۆکی حکومەتی هەرێمی کوردستان پێشوازی لە نوێنەری تایبەتیی سەرۆکی ڕووسیا و جێگری وەزیری دەرەوە دەکات

هەولێر، هەرێمی کوردستان، عێراق (GOV.KRD)- ئەمڕۆ چوارشەممە 1ی دیسەمبەری 2021 مەسرور بارزانی سەرۆکی حکومەتی هەرێمی کوردستان، پێشوازی لە شاندێکی باڵای ڕووسی بە سەرۆکایەتیی میخائیل بەگدانۆڤ نوێنەری تایبەتیی سەرۆکی ڕووسیا بۆ کاروباری ڕۆژهەڵاتی ناوەڕاست و ئەفریقا و جێگری وەزیری دەرەوە کرد.
لە دیدارەکەدا دوایین پێشهات و گۆڕانکارییەکانی عێراق و ناوچەکە و برەودان بە پەیوەندییەکانی نێوان هەرێمی کوردستان و ڕووسیا تاووتوێ کرا.
نوێنەری تایبەتیی سەرۆکی ڕووسیا و جێگری وەزیری دەرەوە، سڵاو و ڕێزی سەرکردایەتیی ڕووسیای بە سەرۆکی حکومەت گەیاند و ئاماژەی بە ڕۆڵی دیاری سەرۆک مەسعود بارزانی کرد کە ڕووسیا وەک پێشەوای نەتەوەیی کورد دەیبینێت، ھەروەھا باسی لە پێگەی گرنگیی هەرێمی کوردستان و پەیوەندیی دۆستانە و مێژوویی وڵاتەکەی لە گەڵ هەرێم کرد و جەختی لەوە کردەوە، کە پێویستە بیروبۆچوونەکانی حکومەتی هەرێمی کوردستان، دەربارەی ئاڵوگۆڕ و گۆڕانکارییەکانی هەرێمی و ناوچەکە لە بەرچاو بگیرێت.
سەرۆکی حکومەت، ئامادەیی هەرێمی کوردستانی بۆ پەرەپێدانی زیاتری پەیوەندییەکان لە گەڵ ڕووسیا لە هەموو بوارەکاندا دەربڕی، بەتایبەتی فراوانکردنی دەرفەتەکانی هاریکاری و هەماهەنگیی بۆ ئەو بابەتانەی جێی بایەخی هەردوولان.
لە تەوەرێکی دیکەی دیدارەکەدا، باس لە بارودۆخی سوریا و پرسی کورد لە ناوچەکەدا کرا، سەرۆکی حکومەت، جەختی لە گرنگیی هەبوونی نەخشەڕێگەیەکی سیاسیی بۆ چارەسەرکردنی پرسی کورد لە سوریا کردەوە کە دووربێت لە تاکڕەوی و خۆسەپێنی و نوێنەرایەتیی هەموو لایەنە کوردییەکانی سوریا بکات .

 
 
 
 
 
 
 
 
 
 
 
 
https://gov.krd/government/the-prime-minister/activities/posts/2021/december/%D8%B3%DB%95%D8%B1%DB%86%DA%A9%DB%8C-%D8%AD%DA%A9%D9%88%D9%85%DB%95%D8%AA%DB%8C-%D9%87%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86-%D9%BE%DB%8E%D8%B4%D9%88%D8%A7%D8%B2%DB%8C-%D9%84%DB%95-%D9%86%D9%88%DB%8E%D9%86%DB%95%D8%B1%DB%8C-%D8%AA%D8%A7%DB%8C%D8%A8%DB%95%D8%AA%DB%8C%DB%8C-%D8%B3%DB%95%D8%B1%DB%86%DA%A9%DB%8C-%DA%95%D9%88%D9%88%D8%B3%DB%8C%D8%A7-%D9%88-%D8%AC%DB%8E%DA%AF%D8%B1%DB%8C-%D9%88%DB%95%D8%B2%DB%8C%D8%B1%DB%8C-%D8%AF%DB%95%D8%B1%DB%95%D9%88%DB%95-%D8%AF%DB%95%DA%A9%D8%A7%D8%AA/

سه‌رۆك نێچيرڤان بارزانى پێشوازى له‌ باڵيۆزى ئيتاليا كرد

پاشنيوه‌ڕۆى ئه‌مڕۆ يه‌كشه‌ممه‌ 2021/11/28 به‌ڕێز نێچيرڤان بارزانى، سه‌رۆكی هه‌رێمى كوردستان، پێشوازى له‌ به‌ڕێز برۆنۆ ئه‌نتۆنيۆ باڵيۆزى ئيتاليا له‌ عيراق كرد كه‌ ئه‌ركى ته‌واو ده‌بێت.

له‌ ديدارێكدا به‌ڕێز باڵيۆزى ئيتاليا سوپاسى سه‌رۆك نێچيرڤان بارزانى و هه‌رێمى كوردستانى كرد بۆ ئه‌و پشتگيرييه‌ى له‌ ماوه‌ى كاركردنيدا له‌ عيراق لێى كراوه‌ و بۆ داهاتوو هيواى بره‌ودانى زياترى په‌يوه‌ندييه‌كانى هه‌رێمى كوردستانى له‌گه‌ڵ ئيتاليادا خواست.

به‌ڕێزيان هه‌روه‌ها پرسه‌ و سه‌ره‌خۆشى له‌ سه‌رۆك نێچيرڤان بارزانى كرد بۆ ئه‌و پێشمه‌رگانه‌ى شه‌وى ڕابردوو له‌ ڕووبه‌ڕووبوونه‌وه‌ له‌گه‌ڵ تيرۆرستانى داعشدا له‌ سنوورى گوڵه‌جۆ شه‌هيد بوون و خاوخه‌ميى خۆى له‌گه‌ڵ خانه‌واده‌ و كه‌سوكارياندا ده‌ربڕى.

لاى خۆيه‌وه‌ سه‌رۆك نێچيرڤان بارزانى، هيواى سه‌ركه‌وتنى له‌ ئه‌ركى تازه‌يدا بۆ خواست و سوپاسى هه‌وڵ و كاره‌كانى له‌پێناو به‌ره‌وپێشبردنى په‌يوه‌ندييه‌كانى ئيتاليا له‌گه‌ڵ عيراق و هه‌رێمى كوردستاندا و پشتگيرى و يارمه‌تييه‌كانى ئيتالياى بۆ هه‌رێمى كوردستان كرد.

به‌ڕێز سه‌رۆكى هه‌رێمى كوردستان هه‌روه‌ها دووپاتى كرده‌وه‌ په‌لامارى شه‌وى ڕابردووى داعش و شه‌هيدبوونى پۆلێك پێشمه‌رگه‌ى قاره‌مانى كوردستان، ئه‌وه‌ ده‌سه‌لمێنێت كه‌ داعش مه‌ترسييه‌كى ڕاسته‌قينه‌يه‌ و ده‌بێ به‌ هاريكاری و هه‌ماهه‌نگيى هاوبه‌شى سوپاى عيراق و پێشمه‌رگه‌ به‌ پشتگيريى هاوپه‌يمانيى نێوده‌وڵه‌تى، به‌ره‌نگارى ببينه‌وه‌.

دۆخى ناوخۆى هه‌رێمى كوردستان و هه‌وڵه‌كان بۆ يه‌كڕيزى و ته‌بايى له‌نێوان لايه‌نه‌ سياسييه‌كانى كوردستاندا، به‌تايبه‌تيش گرنگيى يه‌كهه‌ڵوێستيى لايه‌نه‌ كوردستانييه‌كان له‌ به‌غدا، دۆخ و پێشهاته‌كانى ناوچه‌كه‌ به‌گشتى، ته‌وەرێكى ديكه‌ى ديداره‌كه‌ بوو.

 

https://presidency.gov.krd/president-nechirvan-barzani-receives-italian-ambassador/

سەرۆكی هەرێمی كوردستان دۆخی عیراق لەگەڵ باڵیۆزی بەریتانیا تاوتوێ دەكات

دەربارەی ئەو ناكۆكییانەی لەسەر ئەنجامەكانی هەڵبژاردنی ئەنجومەنی نوێنەران لەنێوان لایەنە سیاسییەكانی عیراقدا هاتووەتە ئاراوە، سەرۆك نێچیرڤان بارزانی دووپاتی كردەوە كە هەرێمی كوردستان بە هیچ شێوەیەك نابێتە بەشێك لە كێشەكان، بەڵكوو دەبێتە هاوبەشی چارەسەر و لە پشتگیری بۆ سەركەوتنی پرۆسەی سیاسی لە وڵات، بەردەوام دەبێت.

ئەم وتانەی بەڕێز نێچیرڤان بارزانی، سەرۆكی هەرێمی كوردستان لە میانی دیداریدا لەگەڵ بەڕێز مایك برایسۆن ڕیچاردسۆن باڵیۆزی بەریتانیا لە عیراق هاتن كە ئەمڕۆ 2012/11/28 لە هەولێر بەڕێوە چوو.

لە دیدارەكەدا هەروەها برەودان بە پەیوەندییەكانی بەریتانیا لەگەڵ عیراق و هەرێمی كوردستان لە هەموو بوارەكاندا، هەڕەشەكانی تیرۆر و بەرەنگاربوونەی داعش، گرنگیی پتەوكردنی میكانیزمی هاریكاریی هاوبەش و هەماهەنگیی نێوان پێشمەرگە و سوپای عیراق و پەیوەندییەكانی هەولێر ـ بەغدا، تاوتوێ كران.

هەردوولا جەختیان لە خواستی دوولایەنە بۆ برەودان بە پەیوەندییەكان و بوارەكانی هاریكاریی هاوبەش كردەوە و هاوڕا بوون كە پێویستە لایەنە عیراقییەكان بگەنە ڕێككەوتن و حكوومەتێكی عیراقی دابمەزرێت كە بتوانێت سەقامگیریی سیاسی بپارێزێت و داواكاریی هاووڵاتیان لە ئارامی و سەقامگیری و ژیانێكی باشتر و خزمەتگوزاری، ڕەچاو بكات.

هەوڵ و هەنگاوەكانی چاكسازی لە وەزارەتی پێشمەگە و ڕێكخستنەوەی پێشمەرگە، تەوەرێكی دیكەی دیدارەكە بوو. تیایدا جەخت لە بەردەوامیی بەردواداچوون و پشتگیریی بەریتانیا بۆ پرۆسەكە و سەركەوتنی كرایەوە.

تاوتوێكردنی دۆخ و پێشهاتەكانی ناوچەكە بەگشتی و چەند پرسێكی دیكەی جێی بایەخی هاوبەش، تەوەرێكی دیكەی دیدارەكە بوو.

 

https://presidency.gov.krd/the-president-of-the-kurdistan-region-discusses-the-situation-in-iraq-with-the-british-ambassador/

نازم دەباغ، نوێنەری حكومەتی هەرێم لەئێران بۆ هاوڵاتى: ئێران پشتیوانیی یەكێتی دەكات بۆ پۆستی سەرۆك كۆمار

سازدانی: ئارا ئیبراهیم

نوێنەری حكومەتی هەرێم لەتاران ئەوە دەخاتە روو كە بۆ پۆستی سەرۆك كۆمار ئێران پشتیوانی لەكێتی دەكات بۆ راگرتنی باڵانس لەنێوان پارتی و یەكێتی و دەشڵێت:» پۆستی سەرۆكی هەرێم و حكومەتی هەرێم لای پارتییە و دەیەوێت بۆ ئەم خولەش پۆستی سەرۆك كۆمار بۆ یەكێتی بێت».

نازم دەباغ، نوێنەری حكومەتی هەرێم لەكۆماری ئیسلامی ئێران لەم چاوپێكەوتنەیدا لەگەڵ هاوڵاتى ئاماژە بەوەش دەدات كە ئێران هیچ رۆڵێكی نابێت لەدیاریكردنی سەرۆك وەزیرانی عێراقدا» ئەگەر زۆرینەی لایەنە شیعەكان پشتیوانی لە كاندیدێك بكەن بۆ پۆستی سەرۆك وەزیران ئەویش پشتیوانی دەكات».

هاوڵاتى: دوێنێ سێشەممە كۆمسیۆنی عێراق ئەنجامی كۆتایی هەڵبژاردنی پەرلەمانی عێراقی راگەیاند، پێتانوایە ئێران رۆڵی هەیە لەنێو لایەنە سیاسییەكانی عێراق؟

نازم دەباغ: دیارە رۆڵی ئێران لەعێراقدا رۆڵێكی مێژوویی هەیە كە لەلایەنە سیاسیەكانی عێراق لەعەرەب و كوردو پێكهاتەكانی تر لەپەیوەندی باشداربوون لەقۆناغەكانی ئەوكاتەی كە دژی رژێمی پێشووی عێراق بوون.

ئێران هەمیشە چاوی لەوەیە كە كەمترین كێشە لەعێراقدا هەبێت بۆ ئەوەی كێشەكانی عێراق رەنگدانەوەی نەبێت و نەگوازرێتەوە بۆ ئێران، واتا تێكچونی باری ئەمنی عێراقی بەململانێی نێوخۆی ناوخۆی عێراق كاریگەری دەبێت لەسەر ئێران.

ئێران هەمیشە ئارامی و هاوكاری لەنێوان لایەنە سیاسییەكانی عێراق دەوێت بۆ ئەوەی بتوانن حكومەتێكی سەركەوتوو لە عێراق دروست بكەن.

 '" ئێران لەقۆناغی یەكەمدا كە سەرۆك كۆمار بۆ كورد بێت، چاوەڕوان دەكات بە رەزامەندی هەموو لایەنە كوردییەكان سەرۆك كۆمار یەكێك بێت كە جێگەی پشتیوانی و متمانە بێت بۆ لایەنە سیاسییەكان، هانیشیان دەدات كە سەرۆكی هەرێم و سەرۆكی حكومەتی هەرێم هی پارتییە بۆ راگرتنی هاوسەنگی لەنێوان ئەو دوولایەنە سەرۆك كۆمار بۆ یەكێتی بێت. '"

 

هاوڵاتى: بەڕێزتان ئاگادارن موقتەدا سەدر 73 كورسی بەدەستهێناوەو مالكی 33 كورسی، هادی عامری 16 كورسی، ئایا ئێران رۆڵی دەبێت لە دیاریكردنی سەرۆك وەزیرانی عێراق؟ یان دووبارە ئەگەر كازمی دابنرێتەوە؟

نازم دەباغ: ئێران رۆڵی نییە لە دیاریكردنی كەسێك بۆ سەرۆك وەزیرانی عێراق، بەڵكو بەپێی ئەو دابەشكارییەی لەعێراق هەیە كە سەرۆكی پەرلەمان بۆ سوننەكان و سەرۆك كۆمار بۆ كوردو سەرۆك وەزیران بۆ شیعەكانە.

واتا لەناو شیعە، زۆرینەی شیعە دەتوانێت دەستنیشانی كەسێك بكات بۆ سەرۆك وەزیران، بەدڵنیاییەوە ئەوەی شیعەكان هەڵیدەبژێرێت و كاندیدی دەكات بۆ ئەو پۆستە، لەهەمانكاتدا كە زۆرینەی شیعەكانی لەگەڵ بێت ئێرانیش دەبێتە پشتیوانی.

هاوڵاتى: تاچەند ئێران پشتگیری یەكێتی نیشتمانی كوردستان دەكات بۆ ئەوەی جارێكی تر سەرۆك كۆمار بۆ یەكێتی بێت؟

نازم دەباغ: ئێران لەقۆناغی یەكەمدا كە سەرۆك كۆمار بۆ كورد بێت، چاوەڕوان دەكات بە رەزامەندی هەموو لایەنە كوردییەكان سەرۆك كۆمار یەكێك بێت كە جێگەی پشتیوانی و متمانە بێت بۆ لایەنە سیاسییەكان، هانیشیان دەدات كە سەرۆكی هەرێم و سەرۆكی حكومەتی هەرێم هی پارتییە بۆ راگرتنی هاوسەنگی لەنێوان ئەو دوولایەنە سەرۆك كۆمار بۆ یەكێتی بێت.

هاوڵاتى: ئایا ئێرانییەكان هیچ تەحەفوزێكیان هەیە لەسەر بەرهەم ساڵح كە ببێتەوە بە سەرۆك كۆمار؟

نازم دەباغ: تا ئێستا ئەوەی كە لەئێرانم بۆ ئەو خولەی كە تێپەڕی هەستم بەوە نەكردووە كە تەحەفوزو نیگەرانی هەبێت لەوەی كە دكتۆر بەرهەم سەرۆك كۆمار بووە، بۆیە ئێران پێشیخۆشە كە سەرۆك كۆمار بەشێك بێت لەكەمكردنەوەی كێشە ئیقلیمییەكان و هاوكار بێت، بەرهەم ساڵحی پێ خراپ نەبووە.

ئێران لێدەگەرێت بۆ زۆرینەی كورد كە پشتیوانی لەكێ دەكەن، پێموایە دیاری كردنی سەرۆك كۆمار لەعێراقدا پەیوەندی بە یەكێتی نیشتمانی كوردستان و پارتی دیموكراتی كوردستانەوە هەیە، ئەوەی گوێبیست بووم لەیەكێتی، كە سەرۆك كۆمار لە سێ قۆناغی پێشوو خوالێخۆشبوو جەنابی مام جەلال بووەو دواتر كاك دكتۆر فوئاد مەعسوم بووەو و خولی پێشوو كە كاك دكتۆر بەرهەم ساڵح بووە، ئێران پێی باشە ئەم خولەش بۆ پۆستی سەرۆك كۆمار بۆ یەكێتی بێت، تا ئێستا گوێبیست نەبووین كە كەسێكی تر كاندید كرابێت لەجێگەی دكتۆر بەرهەم بۆ سەرۆك كۆمار.

هاوڵاتى: لەماوەی رابردوو وەفدی پارتی سەردانی كۆماری ئیسلامی ئێرانیان كرد، باس لەوە دەكرا بۆ ئەوە چوون كە پشتیوانیان بكات بۆ پۆستی سەرۆك كۆمار، هیچ زانیارییەكتان لەوبارەیەوە هەیە؟

نازم دەباغ:  پێموابێت ئەوەی مەترەح بێت كە سەرۆك كۆمار بۆ كورد بێت، تەبایی لەناو كورد هەبێت بۆ دیاری كردنی سەرۆك كۆمار، وەك پێشتر باسم كرد بۆ راگرتنی باڵانس ئێران پشتیوانی لە یەكێتی دەكات بۆ پۆستی سەرۆك كۆمار.

هاوڵاتى: كورد كورسییەكانی پەرلەمانی عێراقی زیاد كردووە لە 58 كورسییەوە بۆ 64 كورسی، پێتانوایە ئەگەر یەكڕیزی نەبێت زیادبوونی ژمارەی چەند كورسییەك كاریگەری دەبێت لە دابینكردنی مافەكانی گەلی كورد لەعێراقدا؟

نازم دەباغ: وەك یەكێك كە بەشداربووم لە خەباتی سیاسی و بەشداربووم لەخەباتی نیشتمانیشدا ئەوەی كە مافەكانی كورد دەستەبەر بكات تەنها یەكڕیزی ناوخۆیە، چونكە بە 50 و 60 كورسی و 80 كورسی ناتوانی لەسەر حسابی دەنگی زۆرینەو كەمینە مافەكان وەربگیرێت.

هێزی كورد ژمارەی كورد لە یەكڕیزیدایە، بەجوودا بچێت لەگەڵ بەغدا وتووێژ بكرێت و ئەوكاتە دەبێتە دەسكەوتی كەسی و حزبی و مافەكانی كورد ون دەبێت لەجیاتی مافە رەواكانی كورد پرسی ئەوەی كێ دەبێتە وەزیرو سەرۆك كۆمار باس دەكرێت.

واتا زیادبوونی ژمارەی كورسی ژمارەیە، بەڵام یەكێتی ریزەكانی كورد هێزەو ئەو هێزە دەتوانێت پارێزگاری لەمافەكانی گەلی كورد بكات سەركەووتو بێت بەرەو بەغدا بڕوات بۆ زیاتر لەو مافانەی كە هەیە.

هاوڵاتى: پێتانوایە یەكێتی دەتوانێت دەستپێشخەر بێت بۆ یەكڕیزی، یان پارتی كە زۆرترین كورسی هێناوەو زۆرترین ئەركی بەردەكەوێت بۆ ئەوەی یەكڕیزی لەنێوان لایەنەكان پێكبهێنێت؟

نازم دەباغ: بەدڵنیایی نەك یەكێتی،  پارتی و نەوەی نوێ و كۆمەڵ و یەكگرتوو، هەتا ئەوانەی كە كورسیان بەدەستنەهێناوە بەڵام بوونیان لەساحەكە بۆ ئایندە رۆڵیان دەبێت، دەستپێشخەری بۆ هەموو لایەكە لەوەی كە یەكهەڵوێست و یەكڕیز بن.

ئەو هێزەی كورسی زیاتری هەیە لەهەموویان ئەركی زیاترە، ریزەكان یەكبخات یان تێكی بدات كەخەباتی یەكێتی نیشتمانی كوردستان وەكو هاوبەشێكی سەرەكی لەعێراق و هەرێم ببینێت، یەكێتیش دەتوانێت خاوەنی دەستپێشخەری بێت، خاوەنی ئەو دەسەڵاتەش بێت بۆ یەكڕیزی لە بەغدا.

 

https://hawlati.co/page_detail?smart-id=22373

پەڕەى 7 لەکۆى 174 پەڕەدا

هەواڵی زیاتر لە تویتەر

راپۆرتە پڕ بینەرەکان

حالت های رنگی