نوێنه‌ری کوردستانی عێڕاق له ئێران وێڕای ئاماژه به ئاکامه‌کانی هه‌ڵبژاردنی په‌رله‌مانی عێراق ده‌ڵێت: به‌ڕای من هه‌ر حکومه‌تێک له عێراق پێک بێت، ناتوانێت رۆڵ و کاریگه‌ری کۆماری ئیسلامی ئێران له‌به‌رچاو نه‌گرێت چونکه کۆماری ئیسلامی ئێران و عێراق بابه‌ت و به‌رژه‌وه‌ندی هاوبه‌شی زۆریان هه‌یه. نازم ده‌باغ له‌م وتووێژه‌دا له‌گه‌ڵ رۆژنامه‌ی "خراسان" سه‌باره‌ت به داهاتووی په‌یوه‌ندییه‌کانی نێوان ئێران و عێراق دوای هه‌ڵبژاردنی په‌رله‌مانی عێراق وتی: په‌یوه‌ندی ئێران له‌گه‌ڵ عێراق ده‌بێت به‌رده‌وام بێت چونکه ئاسایش و هێمنی عێراق په‌یوه‌سته به دۆستایه‌تی و پاراستنی هێمنی دراوسێیه‌تی له‌گه‌ڵ ئێراندا.

نوێنه‌ری کوردستانی عێراق له ئێران سه‌باره‌ت به ئاستی په‌یوه‌ندی ئه‌و ته‌حالوفانه‌ی له هه‌ڵبژاردنی عێراقدا سه‌رکه‌وتوون ده‌ڵێت: زۆربه‌ی ئه‌و لایه‌ن و ته‌حالوفانه‌ی له هه‌ڵبژاردندا سه‌رکه‌وتوون، په‌یوه‌ندی نزیک و باشیان له‌گه‌ڵ کۆماری ئیسلامی ئێران هه‌یه. ئه‌و هه‌روه‌ها ده‌ڵێت: "موقته‌دا سه‌در" ئه‌گه‌ر نه‌ڵێم نزیک، به‌ڵام له‌گه‌ڵ کۆماری ئیسلامی ئێران په‌یوه‌ندی هه‌یه. هه‌رچه‌ن وادیاره که ئه‌م په‌یوه‌ندییه نزیک نه‌بێت، به‌ڵام واش نییه که له‌گه‌ڵ ئێران دوژمنی بکات یان بیه‌وێت ئه‌م په‌یوه‌ندییه که‌م بکاته‌وه.

 

 سادق خودادادی قایم‌مه‌قامی سولاسی باوه‌جانی له وتووێژێکدا له‌گه‌ڵ په‌یامنێری ئاژانسی ایسنای ئێرانی وێڕای ئاماژه به داخستنی خاڵی سنووری شیخ سله له زستانی رابردوودا وتی: به‌رپرسانی عێراقی ساڵی رابردوو یه‌کلایه‌نه و به هۆی کۆمه‌ڵێک کێشه‌ی ناوخۆییه‌وه ئه‌م خاڵه سنوورییه‌یان داخست و به هه‌وڵ و کۆشش و دانوستانه‌کانی پارێزگار و جێگری پارێزگاری کرماشان له رێگای وه‌زاره‌تی ناوخۆ و ده‌ره‌وه‌، حکومه‌تی عێراق ره‌زامه‌ندی خۆی له‌سه‌ر کردنه‌وه‌ی ئه‌م خاڵه سنوورییه‌ راگه‌یاند.

 قایم‌مه‌قامی سولاسی باوه‌جانی وێڕای ئاماژه به‌وه‌ی که حکومه‌تی عێراق له رۆژی ٢٣/٥ه‌وه کردنه‌وه‌ی ئه‌م سنووره‌ی راگه‌یاندووه وتی: ئاڵوگۆڕی بازرگانی له رۆژی ٢٤/٥ه‌وه ده‌ستی پێکردووه.

به وته‌ی ئه‌م به‌رپرسه موبه‌ڕیده، چیپس و شتومه‌کی پلاستیکی گرنگترینی ئه‌و شتومه‌کانه‌ن که له‌م خاڵه سنوورییه‌دا له رۆژی یه‌که‌مدا هه‌نارده کراوه.

 

 نوێنه‌ری حكومه‌تی هه‌رێمی كوردستان له‌تاران جه‌خت له‌وه‌ ده‌كاته‌وه‌ كه‌ ده‌سه‌ڵاتدارانی ئێستای ئێران سورن له‌سه‌ر پشتیوانیكردنی هه‌رێمی كوردستان، به‌ڵام له‌چوارچێوه‌ی یه‌ك پارچه‌یی خاكی عێراق‌و یه‌كریزیی هه‌مو پێكهاته‌كانه‌وه‌.

 ئاوێنه‌: به‌پێی‌ هه‌واڵی‌ میدیاكانی‌ یه‌كێتی‌، نازم ده‌باغ نوێنه‌ری حكومه‌تی هه‌رێم له‌ئێران باسی‌ له‌په‌یوه‌ندییه‌كانی‌ نێوان هه‌رێم‌و كۆماری‌ ئیسلامی‌ ئێران كردوه‌و رایگه‌یاندووه‌، ده‌سه‌ڵاتدارانی ئێران سورن له‌سه‌ر پشتیوانیكردنی هه‌رێمی كوردستان، به‌ڵام له‌چوارچێوه‌ی یه‌ك پارچه‌یی خاكی عێراق‌و یه‌كریزیی گه‌لانی عێراقدا به‌هه‌مو پێكهاته‌و ئایین‌و نه‌ته‌وه‌ جیاوازه‌كانه‌وه‌.

 به‌وته‌ی‌ ئه‌و، ده‌سه‌ڵاتدارانی ئێستای ئێران به‌هه‌مو شێوه‌یه‌ك ئاماده‌یی خۆیان پیشانداوه‌ بۆ هاوكاریكردنی هه‌رێمی كوردستان‌و چاره‌سه‌ر كردنی كێشه‌كانیان له‌گه‌ڵ به‌غدا.

 نازم ده‌باغ به‌پێویستی‌ ده‌زانێت كه‌ هه‌رێمی‌ كوردستان پێداچونه‌وه‌ به‌په‌یوه‌ندییه‌كانیدا بكات له‌گه‌ڵ هه‌مو وڵاتانی جیهان، “به‌تایبه‌تی كار بۆ به‌هێز كردنه‌وه‌ی په‌یوه‌ندییه‌ ئابوریی‌و بازرگانییه‌كانمان له‌گه‌ڵ وڵاتی ئێران بكه‌ین”.

 نوێنه‌ری حكومه‌تی هه‌رێم له‌ئێران راشیگه‌یاندووه‌، ئه‌ندازه‌ی به‌شداریكردن‌و په‌ره‌پێدانی جموجۆڵی بازرگانی نێوان هه‌رێمی كوردستان‌و كۆماری ئیسلامی ئێران 8 ملیار دۆلاره‌، له‌ئێستادا حكومه‌تی ئێران‌و وه‌به‌رهێنه‌ران‌و سه‌رمایه‌گوزارانی ئێرانیی له‌پلانیاندایه‌ كه‌ چه‌ندین پڕۆژه‌ی ستراتیژی‌و بوژاندنه‌وه‌ی ژێرخانی ئابوریی له‌ناوچه‌ جیاجیاكانی هه‌رێمی كوردستان ئه‌نجامبده‌ن.

 

نازم ده‌باغ له‌گه‌ڵ بەڕێوەبەر و راوێژکاری بەشی بازرگانی باڵیۆزخانەی بێلجیکا لە تاران دیداریی کرد

 "نازم ده‌باغ" نوێنه‌رى حکوومه‌تى هه‌رێمى کوردستان له‌ شاری تاران، له‌گه‌ڵ خاتوو "نوشین ره‌هگوز‌ه‌ر" بەڕێوەبەر و راوێژکاری بەشی بازرگانی باڵیۆزخانەی بێلجیکا لە تاران کۆبۆوه.

 خاتوو "نوشین ره‌هگوز‌ه‌ر" بەڕێوەبەر و راوێژکاری بەشی بازرگانی باڵیۆزخانەی بێلجیکا لە تاران رۆژی سێشەممە 22/05/2018 سەردانی نوێنەرایەتی حکوومەتی هەرێمی کوردستان له‌ تارانی کرد و لە لایەن "نازم عومەر ده‌باغ" نوێنەری حکوومه‌تى هه‌رێمى کوردستان له‌ تاران پێشوازی لێکرا.

 بەڕێوەبەر و راوێژکاری بەشی بازرگانی باڵیۆزخانەی بێلجیکا لە تاران، دەستخۆشی پێشوازی و میواندارییەکەی کرد و پرسیاریی دەربارەی پەیوەندیی بازرگانی، سەردانی شاند، کار و چالاکی، سەرمایەگوزاری و وەبەرهێنان له نێوان وڵاتی بێلجیکا و حکوومەتی هەرێمی کوردستانی کرد.

 له درێژه‌ی دیداره‌که‌دا نوێنەری حکوومه‌تى هه‌رێمى کوردستان له‌ تاران پێشوازیی کرد لە هەنگاوەکانی خاتوو "نوشین ره‌هگوز‌ه‌ر" بۆ پەیوەندیی زیاتری بازرگانی و هاتنی سەرمایەگوزار و کۆمپانیای بیانی بۆ ئاوەدانکردنەوە و وەبەرهێنان و کاری پرۆژەکان له هه‌رێمى کوردستان.

 له به‌شێکی دیکه‌ی ئه‌م کۆبوونه‌وه‌یه‌دا "نازم ده‌باغ" بە وردی ڕوونیکردەوە کە باری ئەمنی و ئاسایشی کوردستان، زۆر زۆر لەبار و گونجاوە بۆ کۆمپانیا بیانییەکان و گوتی: هەروەها جیگای خۆشحالی ئێمەیە بتوانین پەیوەندیی شاندەکانی سەرمایەگوزاری و بازرگانی زیاتر بەرقەرار بێت و بازاری هەرێمی کوردستان جێگای ئیش کردنی زۆرە بۆ کۆمپانیا بیانی.    

 

 

"نازم دەباغ" نوێنەری حکوومەتی هەرێمی کوردستان لە تاران گوتی: لە ئێستاوە دەنگووباسی زۆر سەبارەت بە پێکهێنانی فراکسیۆنی یەکپارچە لە داهاتوودا بوونی هەیە، بەڵام سەرەکیترین ئیحتمال کە بوونی هەیە پێکهێنانی هاوپەیمانییەکە کە لە دوو لایەنی ڕەوتی سەر بە "موقتەدا سەدر" و "حەیدەر عیبادی" پێکدێت و هاوپەیمانییەکەی دیکەش لە سێ لایەنی سەر بە "هادی العامری" (حەشدی شەعبی)، "نووری مالکی" و "عەمار حەکیم" پێکدێت.

 

بە پێی راپۆڕتی گرووپی سیاسی ئاژانسی هەواڵی "بوڕنا"، چەند رۆژێکە کە دەرئەنجامی هەڵبژاردنەکانی پەڕڵەمانی عێراق بڵاوبۆتەوە، لە سەرەتادا وڵاتانی ناوچە و تەنانەت دەرەوەی ناوچەش چاوەڕوانی بەڕێوەچوونی هەڵبژاردنەکانی پەڕڵەمانی لە لوبنان و عێراق بوون. هەندێک لە کارناسان و لێکۆلەرانی مەسەلەکانی رۆژئاوای ئاسیا لەوبڕوایەدابوون دەوڵەتانی رۆژهەڵاتی ناوەڕاست زۆربەی کردەوە و بڕیارەکانی خۆیان خستۆتە دوای ئەم دوو هەڵبژاردنەوەوە. دوای راگەیاندنیی دەرئەنجامی هەڵبژاردنەکانی پەڕڵەمانی لوبنان دەرکەوت کە بەرەی خۆڕاگریی و بەتایبەت حیزبوڵڵا و هاوپەیمانەکانی کاری دژواریان بۆ پێکهێنانی دەوڵەت نییە و بە کەمێک هەوڵ و بەدەستهێنانی متمانەی هەندێک لە نوێنەرانی پەڕلەمان، دەتوانن دەوڵەتی هاوپەیمانی پێکبێنن کە قورساییەکەی بەرەو لایەنگرانی سەید "حەسەن نەسروڵڵا" بێت.

 

لە عێراق، باروودۆخ بە تەواویی لەگەڵ لوبنان جیاوازە. لە قۆناغی یەکەمدا بینیمان کە بەشداریی عێراقییەکان لە هەڵبژاردنی پەڕڵەمانی، لە بەراورد لەگەڵ ساڵانی 2010 و 2014 بە رێژەیەکی زۆر، کەمی کردووە و ئەوە لە حاڵێکدایە کە شکستی داعش و دەرکردنی ئەوان لە عێراق، دڵخۆشکەر بوو بۆ بەشداریی زۆرینە لەم هەڵبژاردنانەدا. هۆی ئەم بەشدارییە لاوازە دەتوانین لە قسەکانی ئایەتوڵڵا سیسیتانی، سەرەکیترین رێبەری گەورەی شیعەکان لە عێراق بدۆزینەوە. ئەو لە دوایین پەیامی خۆی پێش لە دەسپێکی هەڵبژاردنەکان، داوای لە خەڵکی عێراق کرد کە "کەسانی لێهاتوو هەڵبژێرن و لە هەڵبژاردنی کەسانی دۆڕاو و گەندەڵ خۆبپارێزن کە لە تاقیکردنەوە میلەتدا دەرنەچوون. 

 

بێگومان، گەندەڵی سیاسی و ئابووری ئەو چەند ساڵەی دوایی لە عێراق و دڵساردبوونی خەڵک لە کەسە سیاسییەکان و بەرپرسانی دووپاتبوو کە نەیانتوانیوە گۆڕانکاریی بەسەر باروودۆخی عێراقدا لە دوای دەرچوونی ئەمەریکییەکان بەدیبێنن، هۆی سەرەکی بەشداریی کەمی عێراقییەکان لەسەر سەندووقەکانی دەنگدان بووە.

 

بەدەر لەم مەسەلەیە کە رێژەی بەشداریی لە عێراق بە چ ڕادەیەک بووە، چۆنییەتی بەدەستهێنانی کورسییەکانی پەڕڵەمانی لە لایەن گرووپە سیاسییەکانیش خۆی لەخۆیدا بێوێنەیە. لیستی "سائێرون" بە رێبەی "موقتەدا سەدر" لە هەڵبژاردنەکانی پێشوودا سەرکەوتنی ئەوتۆی بۆ بەدەستهێنانی کورسییەکانی پەڕڵەمان بۆخۆی مسۆگڕ نەکردبوو، ئەمجارە توانی پشت بە 54 کورسی ببەستێت و زۆرترین کورسی بە بەراورد لەگەڵ رکابەرەکانی بەدەستبێنێت. بەڵام نزیکبوونی کەمی دەنگەکان لەگەڵ گرووپە سیاسییەکانی دیکەدا بۆتە هۆی ئەوەی کە دەوڵەتی داهاتووی عێراق ببەسترێتەوە بە هاوپەیمانی چەند گرووپی سیاسیی. لەڕاستیدا جۆری بەدەستهێنانی دەنگەکان بە شێوەیەکە کە تەواوی گرووپە سیاسییەکان و تەنانەت تاکە کورسییەکانیش دەتوانن لە پێکهێنانی دەوڵەتی داهاتوودا کاریگەربن.

 

"نازم دەباغ" نوێنەری حکوومەتی هەرێمی کوردستان لە تاران و کارناسی مەسەلە سیاسییەکانی عێراق لە وتووێژ لەگەڵ ئاژانسی هەواَلی "بوڕنا" گوتی: بە لەبەرچاوگرتنی فیکرە جیاوازەکان و سیاسەتی جۆراوجۆری هیزە سیاسییەکان، هاوپەیمانی هەموو لایەنەکانی شیعەی عێراق زۆر دژوارە. هەر وەکوو لە سەردەمی رکابەریی و پرۆپاگاندای هەڵبژاردنەکاندا ڕووینەدا. بە بوونی ناکۆکی لە نێوان ئەو لایەنانەی کە چوونەتە ناو پەڕڵەمانەوە، پێکهێنانی هاوپەیمانییەکی یەکپارچە دەبێتە هۆی ئەوەی کە ئەوان بە ناچار ناکۆکییەکان وەلابنێن. ئەوەی کە رێگەی ئەم وەرچەرخانە خۆشدەکات، کەمڕەنگبوونی نەتەوە ئایینییە پلە دووەکانە لەو خولەی هەڵبژاردنەکانی عێراقدا لە بەراورد لەگەڵ خولەکانی پێشوودا و دروشمی نەتەوەیی و دوور لە مەزهەبی کەسایەتیی و لیستە دوو بەرەکانە. هەر لە ئێستاوە باسی زۆر سەبارەت بە پێکهێنانی فراکسیۆنی یەکپارچە لە داهاتوودا بوونی هەیە، بەڵام سەرەکیترین ئیحتمال کە بوونی هەیە پێکهێنانی هاوپەیمانییەکە کە لە دوو لایەنی سەر بە "موقتەدا سەدر" و "حەیدەر عیبادی" پێکدێت و هاوپەیمانییەکەی دیکەش لە سێ لایەنی سەر بە "هادی العامری" (حەشدی شەعبی)، "نووری مالکی" و "عەمار حەکیم" پێکدێت.

 

ئەو سەبارەت بە لایەنگریی کوردەکان گوتی: کوردەکان توانیویانە بە گشتیی زیاتر لە 50 کورسی بەدەستبێنن و هەر ئەو مەسەلەیە بۆتە هۆی ئەوەی کە دەوڵەتی داهاتوو ناچاربێت لەگەڵیان هاوپەیمانی پێکبێنێت. لە لایەکی دیکەوە دیارە کە بەرپرسانی کوردستان بەشوێن گەیشتن بە مەبەسەتەکان و مافەکانی خۆیانن لە چوارچێوەی یاسای بنەڕەتی عێراقدا و بێگومان لەگەڵ فڕاکسیۆنێک هاوپەیمانی پێکدێنن کە بتوانێت مافەکانی ئەوان دابینبکات. هەڵبەت لە نێوان تەواوی ئەو لایەنانەی کە توانیویانە لەم هەڵبژاردنانەدا بچنە ناو پەڕڵەمانەوە، لایەنی سەر بە "عەمار حەکیم" پەسندی زیاتریی لەلای کوردەکان هەیە و هەر ئەو مەسەلەیە دەتوانێت رێگەخۆشکەر و کاریگەرتربێت بۆ نوێنەرانی کورد لە داهاتوودا.

 

پەیامنێر: ئەمیرحوسێن چرایی

 

لینکی چاوپێکه‌وتن:

https://www.borna.news/بخش-سیاسی-3/709381-بررسی-احتمالات-گوناگون-در-مورد-دولت-ائتلافی-عراق

 

 

 

نوێنه‌ری‌ حكومه‌تی‌ هه‌رێم له‌تاران ده‌ستپێكردنه‌وه‌ی‌ گه‌شته‌كانی‌ نێوان سلێمانی‌ و كۆماری‌ ئیسلامی‌ ئێران به‌ره‌سمی‌ ئاشكراده‌كات و ده‌ڵێت"25ی‌ ره‌مه‌زان یه‌كه‌م گه‌شت ئه‌نجام ده‌درێت".

نازم ده‌باغ نوێنه‌ری‌ حكومه‌تی‌ هه‌رێم له‌تاران به‌SNNی‌ راگه‌یاند"دوێنێ به‌ره‌سمی‌ رێكه‌وتنێك بۆ ده‌ستپێكردنه‌وه‌ی‌ گه‌شته‌ ئاسمانییه‌كانی‌ نێوان سلێمانی‌ و كۆماری‌ ئیسلامی‌ ئێران واژۆكراوه‌و بڕیاره‌ له‌ 25ی‌ ره‌مه‌زان كه‌ده‌كاته‌ 10ی‌ 6ی‌ 2018 رۆژی‌ یه‌كشه‌ممه‌ ده‌ست به‌گه‌شتی‌ گه‌شتیاری‌ بكرێته‌وه‌".

وتیشی‌"هه‌رچه‌نده‌ بڕیاربوو گه‌شته‌كان له‌ 6ی‌6ی‌ 2018ه‌وه‌ ده‌ستپێبكاته‌وه‌، به‌ڵام به‌هۆی‌ مانگی‌ ره‌مه‌زان كه‌ گه‌شتكردن كه‌مه‌، ده‌ستپێكردنه‌وه‌ی‌ گه‌شته‌كان بۆ 10ی‌ مانگ واته‌ نزیك جه‌ژنی‌ ره‌مه‌زانی‌ پیرۆز دواخراوه‌".

له‌باره‌ی‌ ئه‌نجامدانی‌ گه‌شته‌كانیش ئاماژه‌ی‌ به‌وه‌كرد، له‌هه‌فته‌یه‌كدا دووجار گه‌شتده‌كرێت ئه‌وانیش له‌رۆژانی‌ یه‌ك شه‌ممه‌ و  چوار شه‌ممان، هه‌ندێك جاریش فه‌رمانده‌كان به‌وڵاتانی‌ ده‌ره‌وه‌ ده‌به‌سترێته‌وه‌ به‌شێوه‌یه‌ك گه‌شتیاری‌ ئه‌وروپا له‌تارانه‌وه‌ دێنێت و به‌پێچه‌وانه‌شه‌وه‌. 

ده‌ستپێكردنه‌وه‌ی‌ گه‌شته‌ ئاسمانیه‌كانی ئێران له‌گه‌ڵ فڕۆكه‌خانه‌ی نێوده‌وڵه‌تیی سلێمانی له‌كاتێكدایه‌ كه‌دوای‌ ئه‌نجامدانی‌ ڕیفراندۆمه‌كه‌ی‌ باشوری‌ كوردستان كه‌نزیكه‌ی‌ هه‌شت مانگه‌ ئه‌نجامدراوه‌، گه‌شته‌ ئاسمانیه‌كانی سلێمانی‌ تاران  وه‌ستێنراوه‌.

نازم ده‌باغ له‌گه‌ڵ راوێژکاری باڵیۆزخانەی میرنشینی کوێت لە تاران کۆبۆوه

"نازم ده‌باغ" نوێنه‌رى حکوومه‌تى هه‌رێمى کوردستان له‌ شاری تاران، له‌گه‌ڵ "سه‌لاح عه‌بدوالخالق ئه‌لبه‌نای" راوێژکاری باڵیۆزخانەی میرنشینی کوێت لە تاران دیداریی کرد.

"نازم عومەر ده‌باغ" نوێنەری حکوومه‌تى هه‌رێمى کوردستان له‌ تاران کاتژمێر یەک و نیوی دوای نیوەڕۆی ئەمرۆ شەمە ١٩/٥/٢٠١٨پێشوازی کرد لە "سه‌لاح عه‌بدوالخالق ئه‌لبه‌نای" راوێژکاری باڵیۆزخانەی میرنشینی کوێت لە تاران.

لەدانیشتنەکەدا دوو لایه‌ن سه‌باره‌ت به پرۆسەی دەنگدانی پەرلەمانی عێراق و هەروەها ئەگەرەکانی دروستکردنی حکوومەت و چۆنییەتی بەشداری کردنی کورد لە پرۆسەی دروستکردنی حکومەت ئاخاوتنیان کرا. 

"نازم ده‌باغ" راوبۆچوونی حکوومه‌تى هه‌رێمى کوردستان سەبارەت بە چونی کورد بۆ به‌غداد و بەشداریکردن لە حکوومەتی داهاتوی عێراق بۆ راوێژکاری باڵیۆزخانەی میرنشینی کوێت لە تاران خستەڕوو.

"سه‌لاح عه‌بدوالخالق ئه‌لبه‌نای" هیوای خواست کە رۆڵی کورد کاریگەر بێت لە حکوومەتی داهاتووی عێراق و باسی لەوەکرد کە میرنشینی کوێت بە هەندەوە سەیری هەرێمی کوردستان دەکات هەر بۆیە لە پێشەنگی وڵاتان بوو بۆ کردنەوەی قونسوڵگەری لە هەولێر.

ئاکامی کۆتایی هه‌ڵبژاردنی په‌رله‌مانیی عێراق ده‌رکه‌وت و هاووڵاتیانی عێراقی که به رێژه‌یه‌کی که‌م به‌شدارییان کردبوو، هاوپه‌یمانی سائرون به سه‌رۆکایه‌تی موقته‌دا سه‌در توانی زۆرینه‌ به‌ده‌ست بێنێت، ٥٤ کورسی به‌شی لایه‌نگرانی مه‌لای شیعه‌ی توندڕه‌وی عێراقی بوو به‌ڵام ئه‌م ژماره ئه‌وه‌نده نییه که بتوانێت حکومه‌تی پێ پێک بێنێت به‌ڵام دیاره که وه‌زاره‌ته‌کانی به‌رگری، ناوخۆ، ده‌ره‌وه‌ و ئابووری ده‌درێته ئه‌م باڵه.

 هاوپه‌یمانی "نه‌سر" به سه‌رۆکایه‌تی حه‌یده‌ر العه‌بادی ٥٢ کورسی، "فه‌تح" به سه‌رۆکایه‌تی هادی عامری ٤٩ کورسی، " ده‌وڵه‌تی یاسا" به سه‌رۆکایه‌تی نوری مالکی ٢٥ کورسی، "پارتی دیموکراتی کوردستان" به سه‌رۆکایه‌تی مه‌سعود بارزانی ٢٥ کورسی، " الحکمه" به سه‌رۆکایه‌تی عه‌مار حه‌کیم ٢٢ کورسی، " القرار العراقی" به سه‌رۆکایه‌تی ئوسامه نوجه‌یفی ١٥ کورسی و " یه‌کێتی نیشتمانیی کوردستان" ١٥ کورسییان به‌ده‌ست هێناوه.

دانوستان له‌گه‌ڵ هه‌موو لایه‌نه‌کان جگه له لایه‌نگرانی ئێران!

 به پێی راپۆرتی العربیه ژماره‌یه‌ک له که‌سه‌ نزیکه‌کانی سه‌در رایانگه‌یاندووه که ئیمکانی دانوستان له‌گه‌ڵ هه‌موو لایه‌نه‌کان جگه له ده‌وڵه‌تی یاسا به سه‌رۆکایه‌تی نوری مالکی و فه‌تح به سه‌رۆکایه‌تی هادی عامری کراوه‌یه. ئه‌م دوو گروپه دیارترین تایبه‌تمه‌ندییان نزیکبوونه له ئێران. 

سه‌دریش له توییتێردا باسی له پێکهێنانی حکومه‌تێکی ته‌کنۆکرات کردووه که ئامانجی له‌ناوبردنی هه‌ژاری و گه‌نده‌ڵییه.

هاوکات باس له ده‌ستپێکردنی دانوستان له‌گه‌ڵ الحکمه به سه‌رۆکایه‌تی حه‌کیم و الوطنیه به سه‌رۆکایه‌تی عه‌لاوی له‌گه‌ڵ سائرون کراوه و وادیاره که بارودۆخ بۆ به سه‌رۆک وه‌زیران بوونی دووباره‌ی عه‌لاوی که باڵی شیعه‌ی لیبراڵه ده‌ستی پێکردووه.

عه‌لاوی به‌رده‌وام له ئه‌مریکا نزیک بووه و گرنگترین باسی ساڵی ٢٠١٧ش دیداری نێوان بێن‌سه‌لمان و موقته‌دا سه‌در بوو، ئه‌مه‌ش نیشانی ده‌دات که ئێستاکه بارودۆخی هاوپه‌یمانه‌کانی ئێران له عێراق زۆر باش نییه.

 سنووری دوورودرێژ و نزیکایه‌تی ئایینی و فه‌رهه‌نگی نێوان خه‌ڵکی ئێران و عێراق وایکردووه که له ده‌ره‌وه‌ی رووداوه سیاسییه‌کان له بواره‌کانی کۆمه‌ڵایه‌تی و ئابووریشدا ئه‌م دوو وڵاته له‌ژێر کاریگه‌ری یه‌کتردا بن.

 به هۆی ئابڵۆقه ئه‌تۆمییه‌کانه، زۆربه‌ی به‌رهه‌مهێنه‌رانی ئێرانی له ته‌کنه‌لۆژیای جیهانی دواکه‌وتن و وێڕای ئیمزاکردنی رێکه‌وتنی ئه‌تۆمی هێشتا نه‌تانتوانیوه ئه‌م دواکه‌وتنه قه‌ره‌بوو که‌نه‌وه، که‌واته باشترین بازاڕ بۆ شتومه‌کی مامناوه‌ندی ئێرانی، ئه‌فغانستان و عێراقه، له لایه‌کی دیکه دابه‌زینی بودجه‌ی عێراق بۆ هۆی شه‌ڕی داعش و کێشه‌کانی له‌گه‌ڵ دراوسێی باکووری خۆی واتا تورکیا عێراقی زیاتر به‌لای ئێراندا هانداوه، راستییه‌ک که نازم ده‌باغ نوێنه‌ری هه‌رێمی کوردستان گرنگی پێ ده‌دات.

 

 هاوپه‌یمانی سه‌در به ته‌نهایی ناتوانێت حکومه‌ت پێک بێنێت

نازم ده‌باغ له وتووێژ له‌گه‌ڵ رویداد٢٤ ده‌ڵێت که به‌ڕێوه‌چوونی هه‌ڵبژاردن و به‌شداری خه‌‌ڵک بۆ دیاریکردنی چاره‌نووسی خۆیان رووداوێکی گرنگ و پیرۆزه و منیش لێی خۆشحاڵم هه‌رچه‌ند ئاکامه‌که‌یم به‌دڵ نییه. راسته که سائرون زۆرینه‌ی به‌ده‌ست هێناوه به‌ڵام ناتوانێت به ته‌نهایی حکومه‌ت پێک بێنێت و ده‌بێت له‌گه‌ڵ گروپه شیعه‌کانی دیکه هاوپه‌یمانییه‌ک پێک بێنێت.

ده‌باغ هه‌روه‌ها ده‌ڵێت: ئه‌ڵبه‌ت هاوپه‌یمانی سائرون له چه‌ند حزب پێکهاتووه که له‌وانه‌یه ته‌نها خاڵی هاوبه‌شیان قبووڵ‌کردنی سه‌در بێت له لایه‌کی دیکه‌وه کێشه له نێوان لایه‌نه کوردییه‌کاندا هه‌یه و ئه‌گه‌ر بیانه‌وێت هاوپه‌یمانییه‌کی به‌هێز پێک بێنن سه‌ره‌تا ده‌بێت له نێوان خۆیاندا رێکه‌ون له راستیدا ئێستاکه که‌مترین رێکه‌وتن له نێوان لایه‌نه سیاسییه‌کاندا بوونی هه‌یه. 

 ئه‌و هه‌روه‌ها رایگه‌یاند: به‌ڵام بابه‌تێک که هیچ شکێکی تێدا نییه ئه‌وه‌یه که هه‌ر حکومه‌تێک به هه‌ر بیرۆکه‌یه‌که‌وه که ده‌سه‌ڵات وه‌ربگرێت ده‌بێت په‌یوه‌ندی ئابووری خۆی له‌گه‌ڵ ئێران بپارێزێت و رێگایه‌کی دیکه‌ی له‌به‌رده‌مدا نییه. پێگه‌ی ژیۆپۆلۆتیکی ئێران وایکردووه ئه‌‌گه‌ر شتێک له ئێران نه‌کڕدرێت دیسان ئه‌م وڵاته رێگای ترانزیتی شتومه‌که.

 

 

 

وێستگه‌ نیوز- پشتیوان جه‌مال

نوێنه‌ری‌ حكومه‌تی‌ هه‌رێمی‌ كوردستان له‌ تاران رایده‌گه‌یه‌نێت، به‌بێ ئێران، هیچ كێشه‌یه‌ك له‌ عیراق وه‌كو خۆی‌ چاره‌سه‌ر ناكرێت و ده‌شڵێت "چه‌ند ژماره‌ی‌ فراكسیۆن زیاتر بێت ئه‌وه‌نده‌ش كێشه‌كان گه‌وره‌تر ده‌بن و كاتی‌ زیاتریشیان ده‌وێت بۆ دروستكردنی‌ حكومه‌تی‌ نوێ".
 
نازم ده‌بباغ، نوێنه‌ری‌ حكومه‌تی‌ هه‌رێمی‌ كوردستان له‌ كۆماری‌ ئیسلامی‌ ئێران به‌ وێستگه‌ نیوزی‌ راگه‌یاند، رابردوو سه‌لماندوویه‌تی‌ به‌بێ ئێران، هیچ كێشه‌یه‌ك له‌ عیراق وه‌كو خۆی‌ چاره‌سه‌ر ناكرێت، بۆیه‌ كۆماری‌ ئیسلامی‌ هه‌م له‌ رابردوودا رۆڵی‌ هه‌بووه‌ و له‌ ئاینده‌شدا رۆڵی‌ ده‌بێت.
 
ناوبراو روونیكرده‌وه‌، ئێستا ده‌بینن ئه‌مه‌ریكاش كه‌وتۆته‌ هه‌وڵه‌كانی‌، بۆیه‌ له‌ كۆتاییدا ده‌بێت رێگه‌چاره‌یه‌كی‌ هاوبه‌ش بدۆزرێته‌وه‌ بۆ پاراستنی‌ به‌رژه‌وه‌ندییه‌كانی‌ هه‌ردوولا له‌ دروستكردنی‌ حكومه‌تی‌ نوێی‌ عیراق.
 
سه‌باره‌ت به‌وه‌ی‌ ئێستا پێكهێنانی‌ حكومه‌تی‌ نوێی‌ عیراق زۆر ناخایه‌نێت، نازم ده‌بباغ وتی‌ "هه‌موو كاتێك كێشه‌كانی‌ عیراق و هه‌رێمی‌ كوردستان دوای‌ هه‌ڵبژاردنه‌كان قوڵتر ده‌بێته‌وه‌، به‌تایبه‌تیش كه‌ ئێستا هیچ فراكسیۆنێك نه‌یتوانیوه‌ ئه‌وه‌نده‌ كورسی‌ بێنێت كه‌ بتوانن به‌ یه‌ك یان دوو فراكسیۆن حكومه‌ت پێك بێنن، كه‌واته‌ چه‌ند ژماره‌ی‌ فراكسیۆن زیاتر بێت ئه‌وه‌نده‌ش كێشه‌كان گه‌وره‌تر ده‌بن و كاتی‌ زیاتریشیان ده‌وێت بۆ دروستكردنی‌ حكومه‌تی‌ نوێ".
 
ده‌رباره‌ی‌ هاتنی‌ شاندی ئێرانیش بۆ عیراق و كوردستان بۆ چۆنیه‌تی‌ دروستكردنی‌ حكومه‌تی‌ عیراق، نوێنه‌ره‌كه‌ی‌ حكومه‌تی‌ هه‌رێم ده‌ڵێت "له‌و باره‌یه‌وه‌ نازانم و زانیاریم نییه‌، به‌ڵام دڵنیات ده‌كه‌مه‌وه‌ وه‌فد هه‌م هاتوون و هه‌میش دێن".
 

 

رۆژی‌ 12ی‌ ئایار هه‌ڵبژاردنی‌ په‌رله‌مانی‌ عیراق به‌ڕێوه‌چوو، به‌ڵام له‌سه‌ر ئاستی‌ عیراق و كوردستان ژماره‌یه‌ك لایه‌ن ئاماژه‌ به‌وه‌ ده‌كه‌ن كه‌ ساخته‌كاری‌ له‌ ئه‌نجامی‌ به‌رایی ده‌نگه‌كانیان كراوه‌.
 
http://westganews.net/dreja.aspx?=hewal&jmara=56387&Jor=1

نوێنەری حکوومەتی ھەرێمی کوردستان لە تاران کە لەسەر پشکی یەکێتیی نیشتمانیی کوردستان لەو پۆستەدایە، ڕەخنەی لە تۆمەتبارکردنی ئێران بە ساختەکاریکردن بۆ یەکێتی گرت و ڕای گەیاند: ”ناحەزانی ئێران هەوڵدەدەن کۆماری ئیسلامی لای خەڵکی کوردستان ناشرین بکەن“.

 نازم دەباغ، نوێنەری حکوومەتی ھەرێمی کوردستان لە تاران، کە لەسەر پشکی یەکێتیی نیشتمانیی کوردستانە، لەبارەی ئەو زانیارییانەی باس لەوە دەکەن، ئێران لە بەرامبەر خیانەتی ١٦ی ئۆکتۆبەردا ساختەکاری بۆ یەکێتی کردووە، بە (باسنیوز)ی ڕاگەیاند: "بابەتی تۆمەت گۆڕینەوە بۆ یەکتر بەبێ بەڵگە بە ناڕاوا دەبینم، ڕێزم بۆ بۆچوونی ھەموو لایەنەکان ھەیە و ئەوانەی کە دەنگیان کەم ھێناوە یان زیاد، بەڵام ھەریەکەیان لە بەرژەوەندیی خۆیدا وەڵام دەداتەوە، بڕوام وایە باشترین شت وەرگرتنی ئەزموونە لە ڕووداوەکان".

 

ئەو بەرپرسەی یەکێتی بە پێویستی دەزانێت، ئارامیی ھەرێمی کوردستان و بەتایبەت سلێمانی بپارێزرێت، چونکە ”چاوی زۆر بۆ تێکدانی سلێمانی ھەیە“. دەشڵێت: ”ئەنجامی ھەڵبژاردنەکان چاوەڕواننەکراو بوو، منیش تێبینم لەسەر شێوازی بڵاوکردنەوەی ئەنجامەکان ھەیە، بۆیە پێویستە ئەو لایەنانەی باسی ساختەکاری و دەستکاریی ئەنجامی ھەڵبژاردن دەکەن، بەڵگەکانی خۆیان بھێنن".

 

ئەو بەرپرسەی یەکێتیی ئاماژەی بۆ ئەوەش کرد: "دەستبەجێ کۆمەڵێک خەڵک پەنجەی تۆمەتیان بۆ کۆماری ئیسلامیی ئێران ڕاکێشاوە، ھەرچەندە لە ھەڵبژاردنی پێشتریشدا ئەم تۆمەتە ئاراستەی ئێران کرابوو، بەڵام من بە گوناھی دەزانم بەبێ بەڵگە و ڕاستەوخۆ ئەم ئۆباڵە بخەینە ئەستۆی ئێران و کەسانی دیکە".

 

بەرپرسەکەی یەکێتی کە نوێنەری حکوومەتی هەرێمی کوردستانە لە ئێران، دووپاتی کردەوە: "تا ئێستا بە فەرمی لە بەرپرسانی یەکگرتوو و گۆڕان و کۆمەڵم نەبیستووە کە ئەم تۆمەتە بخەنە ئەستۆی ئێران، لەگەڵ ئەوەشدا پێویستە ئاگامان لەوە بێت لەم قۆناغەدا ناحەزانی ئێران ڕۆڵیان ھەبێ بۆ ئەوەی ئێران لەلای جەماوەری کوردستان ناشیرین بکەن".

 

پەڕەى 1 لەکۆى 127 پەڕەدا

دوایین هەواڵەکان

بە دوا چوون لە تۆڕە کۆمەڵایەتییە کان

راپۆرتە پڕ بینەرەکان

حالت های رنگی