ئەمڕۆ شەممە 21ـی 2ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە جەك ڕید سێناتۆری ویلایەتی ڕۆدئایڵەند لە پارتی دیموكراتی ئەمەریكا و ئەندامی كۆمیتەی بەرگریی ئەنجوومەنی پیرانی ئەمەریكا و شاندێكی یاوەری كرد كە پێكهاتبوون لە ستیوارت جۆنز باڵیۆزی ئەمەریكا لە عێراق و ژۆزێف پێنینگتۆن كونسوڵی ئەمەریكا لە هەولێر و ژمارەیەك ئەفسەر و ڕاوێژكاری سیاسی و سەربازی ئەمەریكایی.

لە دیدارەكەدا سێناتۆر جەك ڕید سوپاسی سەرۆك بارزانی كرد بۆ ڕەخساندنی ئەم دیدارە و هەروەها لە گوتەیەكدا پێزانینی خۆی نیشاندا بۆ ڕۆڵی سەرۆك بارزانی لە سەركردایەتییكردنی شەڕی دژی تیرۆر و هەروەها ئازایەتیی پێشمەرگە و قوربانیدانی هێزی پێشمەرگە و گەلی كوردستان لە شەڕی دژی تیرۆریستان و سوپاسی دەستكراوەیی و بەخشندەیی خەڵكی كوردستانیشی كرد كە لە بارودۆخێكی زۆر سەختدا سەدانهەزار ئاوارەیان لەباوەش كردووە و دەیانپارێزن. لە درێژەی قسەكانیدا سێناتۆر ڕید ئەوەیشی خستەڕوو كە پێویستە هێزی پێشمەرگەی كوردستان لەڕووی دابینكردنی چەك و پێداویستی زیاتر هاوكاری بكرێت و وڵاتەكەی كار بۆ ئەم بابەتە دەكات. هەروەها جەختیشی لە بەردەوامی و پەرەپێدانی پەیوەندیی نێوان گەلی ئەمەریكا و گەلی كوردستان كردەوە.

لەبەرانبەردا سەرۆك بارزانی بەخێرهاتنی شاندی میوانی كرد و سوپاسی پشتیوانیی گەل و حكوومەتی ئەمەریكای كرد بۆ هەرێمی كوردستان و وێڕای ئاماژەدان بە سەركەوتنەكانی پێشمەرگە و بارودۆخی مەیدانیی بەرەكانی شەڕ هێمای بەوەدا كە كوردستان ئەوەی لەدەستی هاتووە لەشەڕی تیرۆریستان و هاوكاریكردنی لێقەوماوان كردوویەتی و ئەوەی دووپاتكردەوە كە بۆ مامەڵەكردن لەگەڵ تیرۆریستانی داعش تەنیا یەك ڕێگە هەیە ئەویش شەڕكردن و شكاندنیەتی و ئەوەیشی خستەڕوو كە ئەم شەڕە بەتەنیا شەڕی كوردستان و هاوپەیمانان نییە بەڵكو پێویستە شەڕی هەموو لایەك بێت لەگەڵ تیرۆریستان و ئەوەی ئازادی و كەرامەتی مرۆڤی دەوێ پێویستە لەم شەڕەدا بەشدار بێت. هەروەها بۆ ڕووبەڕووبوونەوەی تیرۆریستان تەنیا ڕێگەچارەی سەربازی كافی نییە بەڵكو لەڕووی فكری و ئابوورییەوە دەبێ شەڕی تیرۆریستان بكرێت و و ڕێگە لە هاتوچۆیان بگرن و پێویستە وڵاتان كار بۆ نەهێشتنی ئەو ناوەندانە بكەن كە تێیدا هزی تیرۆر و توندڕۆیی بڵاو دەكرێت.

سەرۆك بارزانی ئاماژەی بەو ناوچانەدا كە لەژێر دەستی داعش ڕزگاركراون و ئەوەی باسكرد كە پێشمەرگە یارمەتیی ئەو خەڵكانەی داوە كە دەستیان لەگەڵ داعش نەبووە و ئەوەی دووپاتكردەوە كە چارەنووسی ئەو كەسانەی یارمەتیی داعشیان داوە و لەگەڵ داعش ڕۆییشتوون بە چارەنووسی داعش بەستراوەتەوە و هەمان چارەنووسی داعشیان دەبێت.

هەر لەم دیدارەدا ئاستی هەماهەنگیی نێوان هێزی پێشمەرگە و هێزی هاوپەیمانان قسەی لەبارەیەوە كرا و ئامادەكارییەكانی پڕۆسەی ئازادكردنی موسڵیش خرایە بەر باس.

پەیوەندیی نێوان لایەنە سیاسییەكانی عێراق و قۆناغی دوای داعش تەوەرێكی دیكەی ئەم دانیشتنە بوو.

ئەمڕۆ دووشەممە 16ـی 2ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە فڕانك باكر باڵیۆزی بریتانیا لە عێراق و شاندێكی یاوەری كرد.

لە دیدارێكدا بارودۆخی سیاسی و ئەمنیی عێراق و هەروەها پەیوەندییەكانی هەرێم و بەغدا خرایە بەر باس و قسەیش لەبارەی پەیوەندییەكانی نێوان هەرێمی كوردستان و بریتانیا كرا.

هەر لەم كۆبوونەوەیەدا باڵیۆزی بریتانیا لە عێراق پاڵپشتیی وڵاتەكەی بۆ هەرێمی كوردستان و هێزی پێشمەرگە دووپات كردەوە.

ئەمڕۆ دووشەممە 16ـی 2ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ئادمیڕاڵ پیێڕ دی ڤیلیڕس سوپاسالاری فەڕەنسا و شاندێكی یاوەری كرد كە پێكهاتبوو لە جەنەڕاڵ دی سێت كوێنتین فەرماندەی ئۆپڕاسیۆنە تایبەتەكانی سوپای فەڕەنسا و ئاڵێن جوپڕێت كونسوڵی فەڕەنسا لە هەولێر و ژمارەیەك ئەفسەر و ڕاوێژكاری سوپای فەڕەنسا.

لە دیدارەكەدا سوپاسالاری فەڕەنسا ستاییشی ڕۆڵی پێشمەرگەی كرد لە ڕووبەڕووبوونەوەی تیرۆریستان و پەیوەندی و هەماهەنگیی نێوان هێزەكانی وڵاتەكەی و هێزی پێشمەرگەی بە باش وەسفكرد و ئەوەیشی دووپاتكردەوە كە شەڕی تیرۆریستان شەڕێكی هاوبەشی هەموومانە و سوپای فەڕەنساییش بەردەوام دەبێ لە یارمەتیدان و هاوكاری و مەشقپێكردنی پێشمەرگە و وڵاتەكەی هەتا لەناو بردنی داعش پابەندی ئەو هاوبەشی و یارمەتیدانە دەبێت. هەروەها جەختی لەوەیش كردەوە كە ئەو میتۆدەی تیرۆریستان بانگەشەی بۆ دەكەن بە هیچ شێوەیەك قابیلی قبوڵ نییە.

لەبەرانبەردا سەرۆك بارزانی سوپاسی گەل و سەرۆك و سوپای فەڕەنسای كرد و ئاماژەی بە هاتنی سەرۆك هۆڵاند بۆ كوردستان كرد و ئەو سەردانە كە لە كاتێكی زۆر هەستیاردا ئەنجامدرا بە دووپاتكردنەوەی دۆستایەتیی گەلی فەڕەنسا و هەرێمی كوردستانی لەقەڵەمدا ئەوەیشی خستەڕوو كە گەلی كوردستان بۆیان دەركەوت كە دۆستێكی مەزنی وەك فەڕەنسایان لە پشتە. سەرۆك بارزانی وێڕای ئاماژەدان بە ڕووداوە تیرۆریستییەكانی پاریس و كۆپێنهاگن و شوێنەكانی دی جەختی لەوە كردەوە كە تیرۆر هەڕەشەیەكی جیهانییە و تیرۆریستان لە هەر شوێنێك دەرفەتیان بۆ بڕەخسێت دەست لە وەحشیگەری ناپارێزن بۆیەشە ڕووبەڕووبوونەوەی ئەو دیاردەیە ئەركی هەموو لایەكە. لە درێژەی قسەكانیدا سەرۆك بارزانی باسی سەرەتاكانی سەرهەڵدانی داعش و چۆنییەتی گەشەكردن و پەلاماردانیان بۆ سەر كوردستان كرد و ئەوەی خستەڕوو كە لە سایەی قارەمانێتیی پێشمەرگە پەلاماری تیرۆریستان تێكشكا و پێشمەرگە ئوستوورەی داعشی شكاند و 15000 كیلۆمەتری چوارگۆشەی لەژێر دەستی تیرۆریستانی داعش ڕزگار كردووە. سەرۆك بارزانی هێمای بە كردەوە قێزەوەنەكانی تیرۆریستان دا و ئەوەی بۆ شاندی میوان باس كرد كە تیرۆریستانی داعش پشت بە هزری تەكفیری و جیهادی و هزری شۆڤینی دەبەستن و ئەم جۆرە بیركردنەوەیە نامرۆڤانەیە هیچ ئاییندەیەكی نییە.

هەر لەم كۆبوونەوەیەدا پێداویستییەكانی هێزی پێشمەرگە و چۆنییەتی پەرەپێدانی هەماهەنگی و هاوكاریی نێوان هێزی پێشمەرگە و سوپای فەڕەنسا بۆ شەڕی دژی تیرۆریستان تاوتوێ كرا.

جێگەی ئاماژەپێكردنە لەم دانیشتنەدا مەسرور بارزانی ڕاوێژكاری ئەنجوومەنی ئاساییشی هەرێم و مستەفا سەید قادر وەزیری پێشمەرگە و فواد حوسێن سەرۆكی دیوانی سەرۆكایەتیی هەرێم و فەلاح مستەفا بەرپرسی فەرمانگەی پەیوەندییەكانی حكوومەت و ئەنوەر حاجی عوسمان بریكاری وەزارەتی پێشمەرگە و جەعفەر شێخ مستەفا و فەریق شێروان عەبدوڵڕەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم ئامادە بوون.

رۆژی سێشەممە 17ـی 2ـی 2015، بەڕێز مسعود بارزانی سەرۆكی هەرێمی كوردستان، بەمەبەستی لە نزیكەوە ئاگاداربوون لە بارودۆخی سیاسی و ئەمنی و ئیداری شاری كەركووك و ئاگاداربوون لە بارودۆخی مەیدانیی بەرەكانی شەڕ لەم میحوەرە سەردانی كەركووكی كرد.

لە یەكەم وێستگەی سەردانەكەیدا، سەرۆك بارزانی لەگەڵ فەرماندەكانی هێزی پێشمەرگە و بەرپرسی میحوەرەكانی پێشمەرگە لەو ناوچانە كۆبووەوە. لەو كۆبوونەوەیەدا،كە بە ئامادەبوونی بەڕێز كۆسرەت رەسوڵ عەلی جێگری سەرۆكی هەرێمی كوردستان، مەسرور بارزانی راوێژكاری ئەنجوومەنی ئاسایشی هەرێمی كوردستان، مستەفا سەید قادر وەزیری پێشمەرگە، فواد حوسێن سەرۆكی دیوانی سەرۆكایەتی هەرێمی كوردستان و نەجمەدین كەریم پارێزگاری كەركووك و بەرپرسانی ئەمنی و سیاسی و ئیداری شارەكە بەڕێوەچوو، سەرۆك بارزانی وتەیەكی پێشكەش كرد كە تێیدا دەستخۆشی لە پێشمەرگە قارەمانەكان كرد كە كەركووكیان پاراستووەو شكستیان بە تیرۆریستان هێناوە لە میحوەری كەركووك. هەروەها جەختی لەوەش كردەوە كە نابێت بە هیچ شێوەیەك تیرۆریستان بگەنە شاری كەركووك.

لەبارەی پێشمەرگە بەدیلگیراوەكانیش، سەرۆك بارزانی خانەوادەكانیانی لەوە دڵنیاكردەوە كە هەرچییەكیان لەدەست بێت بۆیان دەكەن و ئەوەشی خستەڕوو ئەگەر هەر شتێك بەسەر ئەو پێشمەرگانە بێت ئەوە باجەكەی قورس دەبێت بۆ تیرۆریستان.

لەبارەی هاتنی حشدی شەعبی بۆ كەركووك، سەرۆك بارزانی رایگەیاند كە سوپاسی هەر كەس و لایەنێك دەكەین كە شەڕی تیرۆریستان بكەن یاخود هاوكاری ئێمە بكەن لەو شەڕەدا، تا ئێستایش نە هەرێمی كوردستان داوای هاتنی حشدی شعبییان كردووە و نە حەشدی شەعبیش داوایان كردووە بێن و هاتنی هەر هێزێكیش دەبێ بە بڕیار و لەسەر داوای ئێمە بێت. سەبارەت بە پەیوەندی نێوان هەرێم و بەغدا، سەرۆك بارزانی باسی لەوە كرد كە ئێمە حەز دەكەین رێككەوتنی نێوان هەرێم و بەغدا جێبەجێ بكرێت و سوپاسی خەڵكی كوردستانیشی كرد كە تەحەمولی دۆخێكی دژوار و سەختیان كردووە بەڵام لەگەڵ ئەوەشدا، لەبەر ئەوەی لە جەنگێكی سەختداین پێویستە خەڵك لە خۆڕاگریان بەردەوام بن و تەفەهومی بارودۆخەكە بكەن و داواشی لە حكوومەتی هەرێمی كوردستان كرد پێداچوونەوە بە ئەدای كاری خۆیدا بكات بۆ كەمكردنەوەی كاریگەری قەیرانەكە. لە كۆتاییشدا، ستایشی ئەو یەكڕیزی و یەكهەڵوێستییەی كرد كە لەنێوان لایەنەكاندا هەیە.

هەر لەو كۆبوونەوەیەدا، بارودۆخی مەیدانی بەرەكانی جەنگ و پێداویستی سەربازیی پێشمەرگەكان تاوتوێ كرا و فەرماندەكانی پێشمەرگە كۆمەڵێك پێشنیار و تێبینییان خستەڕوو.

بۆ بینینی وتەكەی سەرۆك بارزانی، ئێرە دابگرە

پاشنیوەڕۆی ئەمڕۆ سێشەممە 17/2/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز كازویا ناشیدا باڵیۆزی ژاپۆن لە عیراق كرد.

سەرەتای دیدارەكە بەڕێز باڵیۆزی ژاپۆن لە عیراق سوپاس و پێزانینی حكوومەتی وڵاتەكەی بۆ حكوومەتی هەرێمی كوردستان دەربڕی بەرامبەر ئیدانەكردنی تیرۆركردنی هاووڵاتییەكی ژاپۆنی لە لایەن تیرۆریستانی داعشەوە و لە هەمان كاتدا هاوسۆزى و سەرەخۆشیی خۆی لە خانەوادەی ئەو پێشمەرگانە كرد كە لە شەڕی دژی تیرۆردا شەهید بوون.

بەڕێز باڵیۆزی ژاپۆن لە عیراق هەروەها باسی لەوەش كرد كە وەك بەشێك لە هاوكارییەكانیان بۆ هەموو عیراق، حكوومەتی وڵاتەكەی پرۆژەیەكی ژێرخانى تایبەت بە ئاوەڕۆ لە شاری هەولێر پارەدار دەكات كە بەم نزیكانە گرێبەستی پرۆژەكە ڕادەگەیەنن و دووپاتیشی كردەوە كە لەسەر هاوكارییەكانیان بۆ هەرێمی كوردستان بەردەوام دەبن.

لە دیدارەكەدا باس لە ڕەوشی ناوچەكە و عیراق و هەرێمی كوردستان و بەرەكانی شەڕی دژی تیرۆر كرا و لەمبارەیەشەوە ئاماژە بە پێداویستییەكانی هەرێم بۆ ڕووبەڕووبوونەوەی شەڕی دژی داعش، كرا.

لە تەوەرێكی دیكەی دیدارەكەدا دوایین سەرەدانی شاندی هەرێمی كوردستان بۆ بەغدا و ئەو ڕێككەوتنەی كە مانگی 12ی ساڵی 2014 لە نێوان هەولێر و بەغدا كراوە، خرایە ڕوو و لەو میانەشدا ئاماژە بەوە كرا بەغدا بە فەرمی هەرێمی كوردستانی ئاگادار كردۆتەوە كه‌ بەهۆی نەبوونی پارەی كاشەوە، ناتوانن بەشە بودجەی هەرێم وەك چۆن لە ڕێككەوتنەكەدا هاتووە، بنێرن.

لای خۆیەوە بەڕێز نێچیرڤان بارزانی سوپاسی حكوومەتی ژاپۆنی كرد بۆ ئەو پرۆژانەی لە هەرێم ئەنجامی داون و داوای كرد لە چوارچێوەی هاوكارییەكانی داهاتوویان بۆ عیراق، بەشی هەرێمی كوردستان دابین بكەن بە شێوەیه‌ك كە شایستەی هەرێم بێت. هەروەها باسی لە ڕەوشی بەرەكانی شەڕی دژی تیرۆریستانی داعش و سەركەوتن و پێشڕەوییە بەردەوامەكانی هێزی پێشمەرگە و پێداویستییەكانیان لەو شەڕەدا كرد.

ئەمڕۆ یەكشەممە 15ـی 2ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە شاندێكی هاوبەشی سەربازی و سیاسی ئەمەریكا كرد كە پێكهاتبوو لە جەنەڕاڵ ژۆزێف ڤۆتێل فەرماندەی ئۆپڕاسیۆنە تایبەتەكانی سوپای ئەمەریكا و ستیوارت جۆنز باڵیۆزی ئەمەریكا لە عێراق و ژۆزێف پێنینگتۆن كونسوڵی ئەمەریكا لە هەولێر و ژمارەیەك ئەفسەر و ڕاوێژكاری سوپای ئەمەریكا.

لە دیدارەكەدا فەرماندەیئۆپڕاسیۆنەتایبەتەكانیسوپایئەمەریكاسوپاسی سەرۆك بارزانیی كرد بۆ ڕەخساندنی دیدارەكە و خۆشحاڵیی خۆی نیشاندا بە سەركەوتنەكانی هێزی پێشمەرگە و پێزانینی هەبوو بۆ ئازایەتی پێشمەرگە لە شەڕی دژی تیرۆریستانی داعش. هەروەها ئاماژەیشی بە هەماهەنگیی نێوان هێزی هاوپەیمانان و هێزی پێشمەرگە كرد كە ئەنجامی باشی لێ كەوتووەتەوە و بە بەردەوامیی ئەم هەماهەنگییە لە ئاییندەیشدا بەیەكەوە هەنگاوی باش دەنێن. فەرماندەیئۆپڕاسیۆنەتایبەتەكانیسوپایئەمەریكالە درێژەی قسەكانیدا وێڕای ئاماژەدان بەو بارە قورسەی لە شەڕی تیرۆردا لەسەر شانی پێشمەرگە و هەرێمی كوردستانە ئەوەی دووپات كردەوە كە سوپای ئەمەریكا ئەوەی لە توانای دابێت بۆ یارمەتیدانی پێشمەرگە دەیكات.

لەبەرانبەردا سەرۆك بارزانی وێڕای ئاماژەدان بە گیانفیدایی و قوربانیدانی پێشمەرگە كە توانی لەسەر ئەرز ئوستوورەی داعش تێكبشكێنێت، سوپاسی ئەمەریكا و هێزی هاوپەیمانانی كرد بۆ یارمەتیدانی پێشمەرگە و، پاڵپشتیی ئاسمانیی هێزی هاوپەیمانی بە كاریگەر وەسف كرد. سەرۆك بارزانی هێمای بە مەترسییەكانی تیرۆریستانی داعش دا و ئەوەی خستە ڕوو كە تیرۆر هەڕەشەیەكە بۆ سەر هەموو لایەك و هیچ كەس و لایەنێك ناتوانێ ئەم شەڕە لەخۆی دوور بكاتەوە و لە مەترسییەكانی بەدوور بێت. سەرۆك بارزانی لەبارەی ڕووبەڕووبوونەوەی تیرۆر جەختی لەوە كردەوە كە پێویستە لە تەك چارەسەری سەربازی شەڕی فكری داعش بكرێت و سەرچاوەی داهاتیان وشك بكرێت و ڕێگەی هاتوچوویان بگیرێت و ئازادیی هاتوچووی تیرۆریستان لە نێوان وڵاتان نابێ لەسەر حیسابی ئاساییشی جیهانی بێت.

هەر لەم كۆبوونەوەیەدا هەماهەنگی و هاوكاریی نێوان هەرێم و بەغدا لە شەڕی تیرۆریستان و بارودۆخی مەیدانیی بەرەكانی شەڕ و ئازادكردنی موسڵ و ناوچەكانی دیكەی عێراق و هەماهەنگیی هێزە عێراقییەكان لە شەڕی داعش باسی لەسەر كرا.

لە بەشێكی دیكەی ئەم كۆبوونەوەیەدا ئازادكردنی كۆبانێ و ڕۆڵی هێزی پێشمەرگە لە كۆبانێ خرایە بەر باس و گفتوگۆ و شاندی میوان ڕۆڵی پێشمەرگەی لە ئازادكردنی كۆبانێ و پاڵپشتیكردنی هێز كوردییەكانی كۆبانێی بەرز نرخاند و پاڵپشتیی خۆیان بۆ هێزی پێشمەرگە لە كۆبانێ دووپاتكردەوە.

جێگەی ئاماژەپێكردنە كە لەم كۆبوونەوەیەدا مەسرور بارزانی ڕاوێژكاری ئەنجوومەنی ئاساییش و مستەفا سەید قادر وەزیری پێشمەرگە و فەلاح مستەفا بەرپرسی فەرمانگەی پەیوەندییەكانی دەرەوە و ئەنوەر حاجی عوسمان بریكاری وەزارەتی پێشمەرگە و فەریق شێروان عەبدوڵڕەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم ئامادە بوون.