لە لێدوانێكی تایبەتدا بۆ ماڵپەڕی حكوومەتی هەرێمی كوردستان بەڕێز سەفین دزەیی گوتەبێژی فەرمیی حكوومەتی هەرێمی كوردستان بە ناوی حكوومەتی هەرێمەوە ئیدانەی كارە تیرۆرستییەكەی شاری پرسوسی توركیای كرد و ڕایگەیاند حكوومەتی هەرێمی كوردستان بە توندی ئەو كارە تیرۆریستییەی پرسوس كە ژمارەیەك خەڵكی سڤیلی كردە ئامانج، ئیدانە دەكات و پرسە و سەرەخۆشی لە كەس و كاری شەهیدان دەكات و هیوای زوو چاكبوونەوەش بۆ برینداران دەخوازێت.
بەڕێز دزەیی هەروەها گووتی ئەو كارە تیرۆرستییە ترسنۆكە سەلماندی كە تیرۆر هیچ سنوورێك ناناسێت و لە هەركوێیەك بۆی بلوێت دەستی ڕەشی خۆی دەوەشێنێت، ئەمەش گرنگیی بەرەی دژی تیرۆر لە هەر شوێنێك پشتڕاست دەكاتەوە.
بەڕێز سەفین دزەیی دووبارە هاوسۆزی و هاوخەمیی خۆی لەگەڵ كەس و كاری شەهیدان و برینداربووانی هێرشە تیرۆریستییەكە دووپات كردەوە.