ئه‌مڕۆ هه‌ینی 26/12/2014 له شاری دهۆك به‌ڕێز مسعود بارزانی سه‌رۆكی هه‌رێمی كوردستان له‌گه‌ڵ ئه‌ثیل ئه‌لنجوجێفی پارێزگاری نه‌ینه‌وا كۆبۆوه.
له‌م كۆبوونه‌وه‌یه‌دا پارێزگاری نه‌ینه‌وا پیرۆزبایی له سه‌رۆك بارزانی كرد به‌بۆنه‌ی سه‌ركه‌وتنه‌كانی پێشمه‌رگه له ئۆپه‌راسیۆنی ئازادكردنی ده‌ڤه‌ری زوممار و ره‌بیعه و شنگال و رایگه‌یاند، ئازادكردنی ده‌ڤه‌ری شنگال و سه‌ركه‌وتنی پێشمه‌رگه هاوكێشه‌كانی گۆڕی و هیوای دانیشتوانی پارێزگای نه‌ینه‌وای به‌رزكرده‌وه. هه‌روه‌ها ستایشی رۆڵ و ئاماده‌بوونی سه‌رۆك بارزانی له به‌ره‌كانی جه‌نگ كرد و به كاریگه‌ر وه‌سفی كرد.
هه‌ر له‌م كۆبوونه‌وه‌یه‌دا بارودۆخی شاری مووسڵ تاوتوكرا و باس له پلانی ئازادكردنی مووسڵ له‌ژێر ده‌ستی داعش كرا و جه‌خت له به‌شداری دانیشتوانی شاری مووسڵ له ئازادكردنی ئه‌م شاره له ده‌ستی تیرۆریستانی داعش كرایه‌وه.