نیوه‌ڕۆى ئه‌مڕۆ پێنجشه‌ممه‌ 18ى ئه‌یلوولى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له‌ به‌ڕێز "تان بانگلین" نێردراوى وه‌زاره‌تى ده‌ره‌وه‌ى كۆمارى چین كرد، كه‌ وه‌ك كونسلى گشتیى وڵاته‌كه‌ى له‌ هه‌رێمى كوردستان ده‌سته‌به‌كار ده‌بێت.

له‌ دیدارێكدا به‌ڕێز "بانگلین" خۆشحاڵیى خۆى به‌ سه‌ردانى هه‌رێمى كوردستان ده‌ربڕى و دووپاتى كرده‌وه‌ كه‌ حكوومه‌تى وڵاته‌كه‌ى، به‌ تایبه‌تى له‌م بارودۆخه‌دا ئه‌وى ڕه‌وانه‌ى هه‌رێمى كوردستان كردووه‌، بۆ ئه‌وه‌ى له‌ نزیكه‌وه‌ پشتگیریى چین بۆ هه‌رێمى كوردستان و هاوسۆزى له‌گه‌ڵ ئاواره‌ و په‌نابه‌راندا نیشان بدات و له‌وه‌ بكۆڵێته‌وه‌ ئاخۆ چین چۆن ده‌توانێت له‌م بارودۆخه‌دا، هاوكاریى هه‌رێمى كوردستان و ئاواره‌ و په‌نابه‌ران بكات؟.

هه‌روه‌ها ڕایگه‌یاند كه‌ بۆ پته‌وكردنى په‌یوه‌ندییه‌كانى نێوان هه‌رێمى كوردستان و عیراق له‌گه‌ڵ چین، له‌ ماوه‌ى دوو مانگى داهاتوودا كونسلخانه‌ى گشتیى كۆمارى چین له‌ هه‌ولێر ده‌كرێته‌وه‌ و خۆى وه‌ك یه‌كه‌م كونسلى گشتیى چین له‌ هه‌رێمى كوردستان ده‌ستبه‌كار ده‌بێت. جه‌ختیشى له‌وه‌ كرده‌وه‌ كه‌ له‌ ڕێگه‌ى كردنه‌وه‌ى كونسلخانه‌ له ‌هه‌ولێر، هه‌وڵ ده‌ده‌ن ببنه‌ پردێكى پته‌وى نێوان هه‌رێمى كوردستان و چین و، كۆمپانیا چینییه‌كان هان ده‌ده‌ن بۆ ئه‌وه‌ى بێن له‌ هه‌رێمى كوردستان كار بكه‌ن و به‌شدارى له‌ پرۆسه‌ى ئاوه‌دانكردنه‌وه‌ و بنیاتنان و پێشخستنى هه‌رێمى كوردستاندا بكه‌ن.

لاى خۆیه‌وه‌ به‌ڕێز سه‌رۆك وه‌زیران به‌ گه‌رمى به‌خێرهاتنى كرد و به‌ خۆشحاڵییه‌وه‌ ستایش و پێشوازى له‌م هه‌نگاوه‌ى چین كرد، كه‌ له‌م بارودۆخه‌دا ده‌یه‌وێت كونسلخانه‌ى گشتى له‌ هه‌ولێر بكاته‌وه‌ و په‌یوه‌ندییه‌كانى له‌گه‌ڵ هه‌رێمى كوردستان پته‌و بكات. دووپاتیشى كرده‌وه‌ كه‌ ئه‌م هه‌نگاوه‌ى چین له‌م بارودۆخه‌ى ئێستاى هه‌رێمى كوردستان و ناوچه‌كه‌دا، پشتگییرییه‌كى مه‌عنه‌ویى گه‌وره‌یه‌ و هه‌موو هاوكارییه‌كى بۆ كردنه‌وه‌ى كونسولخانه‌كه‌، دووپات كرده‌وه‌.

له‌ كۆتاییى دیداره‌كه‌دا هه‌ردوولا خواستى خۆیان بۆ پته‌وكردنى په‌یوه‌ندییه‌كان له‌ هه‌موو بواره‌كانى ئابوورى و بازرگانى و سیاسى و كۆمه‌ڵاتیدا ده‌ربڕى و، جه‌ختیان له‌سه‌ر پێویستیى هاوكاریكردنى حكوومه‌تى هه‌رێمى كوردستان بۆ ڕووبه‌ڕووبوونه‌وه‌ى تیرۆرستانى داعش، كرده‌وه‌.

به‌ كردنه‌وه‌ى كونسلخانه‌ى كۆمارى چین له‌ هه‌ولێر، له‌گه‌ڵ ئه‌مه‌ریكا، ڕووسیا، فه‌ره‌نسا و به‌ریتانیا، ئیتر هه‌ر پێنج ئه‌ندامى هه‌میشه‌ییى ئه‌نجومه‌نى ئاسایشى سه‌ر به‌ نه‌ته‌وه‌ یه‌كگرتووه‌كان، نوێنه‌رایه‌تیى دیپلۆماسییان له‌ هه‌رێمى كوردستان ده‌بێت.‌

ئەمڕۆ دووشەممە ڕێكەوتی 21/4/2014 فەلاح مستەفا بەرپرسی پەیوەندیەكانی دەرەوە پێشوازیكرد لە شاندێكی پارتی كۆمۆنیستی چینی بە سەرۆكایەتی بەڕێز یانگ یانهوا جێگری بەرێوەبەری گشتی نووسینگەی ڕۆژئاوای ئاسیا و باكوری ئەفریقیا لەگەڵ شاندێكی یاوەری.

لە دیدارێكدا كە خاتوو سیهام جبلی یاریدەدەری بەرپرسی فەرمانگە و ژمارەیەك لە ڕاوێژكار و بەڕێوەبەرانی فەرمانگە ئامادەبوون، بەرپرسی پەیوەندیەكانی دەرەوە بەخێرهاتنی شاندی میوانی كردو تیشكی خستە سەر بایەخی پتەوكردنی پەیوەندیەكانی نێوان هەردوولاو سیاسەتی حكومەتی هەرێم بۆ فراوانكردنی بازنەی پەیوەندیەكان.

دواتر بەڕێز یانگ یانهوا سەرۆكی شاندی میوان مەبەستی سەردانەكەیان بۆ هەرێمی كوردستان ڕوونكردەوە و گووتی ئارەزووی تەواومان هەیە بۆ دروستكردنی پەیوەندی لەنێوان گەلی چین و گەلی كورد لە چوارچێوەی پەیوەندیەكانیان لەگەڵ عێراق و گووتی لە میانەی ئەو سەردانەمان سەرسام بووین بە پێشكەوتنەكانی هەرێمی كوردستان و هەستمان بە پێشوازیەكی گەرم و بەرچاو كرد لەلایەن گەلی كورد بۆ گەلی چین كە هاوبەشیەكی زۆر لەنێوانماندا هەیە.

سەقامگیری كۆمەڵایەتی و سیاسی و بەرقەراربوونی ئاسایش لە هەرێمی كوردستان سەرنجی ئێمەی ڕاكێشا و جێگەی خۆشحاڵیمانە كە ئەوەی پێشكەوتنێكی بەرچاو لە هەرێمی كوردستانە هەیە و پێچەوانەی ئەوەی لە میدیاكاندا هەیە لەسەر عێراق بەگشتی. وە بڕواشمان وایە كە ئەو كەش و هەوا لە بارە و پەیوەندی نێوان گەلی كورد و چین خاڵێكی بەهێزی دەبێت بۆ بەرەوپێش بردنی پەیوەندی ئابوری و بازرگانی و سیاسی و كۆمەڵایەتی لە نێوان هەردوولاماندا.

هاوكات ڕایگەیاند كە خۆشحاڵن كارە فەرمیەكانی كردنەوەی كونسوڵگەری چین لە هەولێر تەواو بووە ئەوەش كاریگەری تەواوی دەبێت لەسەر زیاتر فراوانكردنی پەیوەندیەكان. هیواخوازین كە حكومەتی هەرێمی كوردستان بەردەوام بێت لە پێشكەش كردنی پشتگیری بە كونسوڵگەری كۆماری چین و ئامادەیی تەواومان هەیە بۆ هاندانی كۆمپانیا بەناوبانگەكانی چین بۆ هاتنیان بۆ هەرێمی كوردستان بۆ بەشداریكردن لە بنیات نانەوەی ژێرخانی ئابوری و ئێمە شاری هەولێر وەكو شاری شانگهای چین دەبینین كە گەشەسەندنی زۆری بەخۆیەوە بینیووە.

لە بەرامبەردا بەرپرسی پەیوەندیەكانی دەرەوە بە ناوی حكومەتی هەرێم و فەرمانگەی پەیوەندیەكانی دەرەوە شاندی میوانی بە گەرمی بەخێرهێنا و گووتی ئێمە خۆشحاڵین بە ئاستی پەیوەندیەكانمان لەگەڵ كۆماری چین و پەیوەندیەكی بەردەواممان هەیە لەگەڵ باڵیۆزخانەی چین و دەست خۆشی لەو هەنگاوەی كۆماری چینی میللی  دەكەین بۆ كردنەوەی كونسوڵگەری گشتی لە هەرێمی كوردستان.

دواتر تیشكی خستە سەر كاروچالاكیەكانی فەرمانگەی پەیوەندیەكانی دەرەوە و سیاسەتی كرانەوەی حكومەتی هەرێم بۆ پەرەپێدانی پەیوەندیەكانمان لەگەڵ كۆمەڵگای نێودەوڵەتی لەسەر بنەمای ڕێزگرتن و بەرژوەندی هاوبەش و گووتی كە تاوەكو ئێستا 31 نوێنەرایەتی ووڵاتانی بیانی لە هەرێم هەیە و حكومەتی هەرێمیش 14 نوێنەرایەتی هەیە بە مەبەستی پەرەپێدانی ئابوری و بازرگانی و كەلتوری و فەرهەنگی لەگەڵ كۆمەڵگای نێودەوڵەتی. دواتر پوختەیەكی سەبارەت بە مێژووی هەرێمی كوردستان پێشكەش بە شاندی میوان كرد و سیاسەت و تێڕوانینی ڕوونی سەركردایەتی بۆ ئاییندە بۆتە هۆی پێشكەوتنەكانی هەرێمی كوردستان.

هەر لەم ڕووەوە باس لە میكانیزمی بەرەوپێش بردنی پەیوەندیەكان كرا لە بوارە جیاجیاكان و تیشك خرایە سەر بایەخی ئاڵوگۆڕی سەردان و بونیادنانی پردی پەیوەندی لەنێوان هەردوولادا.
 
لە كۆتاییدا هەردوولا بیروڕیان ئاڵوگۆڕكرد دەربارەی دوا پێشهات و پەرەسەندنەكان پەیوەندیەكانی نێوان هەرێم بەغدا و ناوچەكە گفتوگۆی لەبارەوە كرا و شاندی میوان ئارەزوو ئامادەیی خۆیان نیشاندا بۆ فراوانكردنی پەیوەندیەكان لە گشت بوارەكان لە ئاییندەدا.

حكومەتی هەرێمی كوردستان پێشوازی لە رێكەوتنی بەرایی نێوان كۆماری ئیسلامی ئێران و گروپی ( 5+1 ) ئەمەریكا، بەریتانیا، فەڕەنسا، رووسیا، چین، ئەڵمانیا دەكات و بە هەنگاوێكی ئەرێنی دەزانێت.