مەنسوور جیهانی ـ کورتە فیلمی کوردی "ماڵ و کلیل" لە دەرهێنانی سینەماکاری کورد "شوان عەتووف" خەڵاتی باشترین فیلمی نێودەوڵەتیی نۆیەمین خولی فیستیڤاڵی نێودەوڵەتیی فیلمی "ئاریکا ناتیوا" لە وڵاتی چیلی بەدەستهێنا.

ڕاگەیەنراوی فەرمی کۆمپانیای "ئای لۆف فیلم" لە باشووری کوردستان و وڵاتی بەریتانیا ڕایدەگەیەنێت کە کورتە فیلمی چیرۆکی "ماڵ و کلیل" Home & Key لە نووسین و دەرهێنانی سینەماکاری کورد "شوان عەتووف" و بەرهەمی بەڕێوەبەرایەتی هونەری سینەمای سلێمانی لە نوێترین بەشداری نێونەتەوەیی خۆیدا لە بەشی پێشبڕکێی نێودەوڵەتیی نۆیەمین خولی فیستیڤاڵی نێودەوڵەتیی فیلمی "ئاریکا ناتیوا" Arica Nativa لە وڵاتی چیلی نمایشکرا و توانی خەڵاتی باشترین فیلمی ئەم فیستیڤاڵە بەدەستبێنێت.

"ماڵ و کلیل" بۆ بەدەستهێنانی ئەم خەڵاتە گرینگە لەگەڵ کۆمەڵێک فیلم لە وڵاتانی ئیسپانیا، ڕووسیا، ئەمەریکا، مەکزیک، ئەڕژانتین، ڤێنزۆئێلا و چەندین وڵاتی دیکە لە ڕکابەریدا بوو. 

ئەم فیستیڤاڵە بە بەشداری کورتە فیلمەکانی چیرۆکی، ئەنیمەیشنی و دیکۆمێنتاری لە سینەماکارانی وڵاتانی جۆراوجۆری جیهان لە چەندین بەشی پێشبڕکێی لە ڕۆژانی 9 تا 19ی تەشرینی یەکەم / ئۆکتۆبەری 2014 لە وڵاتی چیلی بەڕێوەچوو.

ئەم کورتە فیلمە کوردییە تا ئێستا لە چەندین فیستیڤاڵی نێودەوڵەتیی فیلم لە ئاستی جیهاندا بەشداری کردووە و خەڵاتی باشترین فیلم لە لایەن ئەندامانی لێژنەی دادوەران و هەروەها خەڵاتی باشترین فیلمی لە لایەن بینەرانی بەشی پێشبڕکێی سەرەکی کورتە فیلمەکانی فیستیڤاڵی نێودەوڵەتیی فیلمی "فۆئێنکالینتێ رۆرال" لە وڵاتی ئیسپانیا و هەروەها خەڵاتی باشترین فیلم لە لایەن ئەندامانی لێژنەی دادوەرانی بەشی پێشبڕکێی سەرەکی کورتە فیلمی "بەهرە نوێیەکان" لە 26ـەمین خولی فیستیڤاڵی نێودەوڵەتیی فیلمی "گیرۆنا" لە وڵاتی ئیسپانیای بەدەستهێناوە.

"ماڵ و کلیل" هەروەها لە بەشی پێشبڕکێی سەرەکی 14ـەمین خولی فیستیڤاڵی نێودەوڵەتیی فیلمی ماڵی هونەریی ڤیدیۆیی "ئۆاهم" لە شاری مەدرید لە ئیسپانیا، لە بەشی پێشبڕکێی سەرەکی فیستیڤاڵی نێودەوڵەتیی فیلمی "ئێست" لە شاری لەندەن لە وڵاتی بەریتانیا، لە بەشی پێشبڕکێی سەرەکی فیستیڤاڵی نێودەوڵەتیی فیلمی "کراتکۆفیل پلووس" لە شاری بانجالۆکا لە بۆسنی و هێرزێگۆڤین، لە بەشی پێشبڕکێی سەرەکی فیستیڤاڵی نێودەوڵەتیی فیلمی "ئاندگراوند"ی لە شاری مۆنیخ لە وڵاتی ئەڵمانیا، لە فیستیڤاڵی نێودەوڵەتیی فیلمی "ئۆکسێ" لە شاری هامبوورگ لە وڵاتی ئەڵمانیا، لە بەشی پێشبڕکێی سەرەکی فیستیڤاڵی نێودەوڵەتیی فیلمی "شوناس" لە شاری باڕشلۆنە لە وڵاتی ئیسپانیا، لە فیستیڤاڵی فیلمی "هال ئۆف لایت" لە وڵاتی کۆلۆمبیا، لە فیستیڤاڵی نێودەوڵەتیی فیلمی "ڤیمبڵدۆن" و لە فیستیڤاڵی نێودەوڵەتیی فیلمی "شۆرتە بیلۆ" لە وڵاتی بەریتانیا، لە فیستیڤاڵی نێودەوڵەتیی فیلمی "فینە کۆرتییە" لە وڵاتی ئیتاڵیا، لە فیستیڤاڵە نێودەوڵەتییەکان فیلمی"ئیڤام ئام"، "کوترا کۆرتینی" و "ماربیلا پێرلا یدنستات" لە وڵاتی ئیسپانیا، و هەروەها چەندین فیستیڤاڵی دیکە چۆتە سەر پەردەی سینەماکان.

ئەم کورتە فیلمە 15 خولەکییە هەروەها لە ڕۆژانی 19 تا 22ی تەشرینی دووەم / نۆڤەمبەری 2014 لە بەشی پێشبڕکێی سەرەکی فیستیڤاڵی نێودەوڵەتیی کورتە فیلمی "ئۆ کورت" O Curt لە شاری ناپۆلی لە وڵاتی ئیتاڵیا نمایش دەکرێت.

مەنسوور جیهانی ـ فیلمی سینەمایی کوردی "بیرەوەرییەکانی سەر بەرد" لە دەرهێنانی سینەماکاری کورد "شەوکەت ئەمین کورکی" خەڵاتی مرواریی ڕەشی باشترین فیلمی جیهانی عەڕەبی بەشی پێشبڕکێی سەرەکی هەشتەمین خولی فیستیڤاڵی نێودەوڵەتیی فیلمی ئەبووزەبی لە بەدەستهێنا و ئەم خەڵاتەی پێشکەش کرد بە یادەوەری منداڵانی شەهید و قوربانی شەڕ دژی گرووپی تیرۆریستی داعیش.

فیلمی سینەمایی "بیرەوەرییەکانی سەر بەرد" Memories On Stone نوێترین بەرهەمی "شەوکەت ئەمین کورکی"، بە نوێنەرایەتیی لە هەرێمی کوردستان و بە ئامادەبوونی ئەم سینەماکارە کوردە، "مەمەد ئەکتاش" بەرهەمهێنەر و سیناریۆنووسی کورد و هەروەها "ئەیووب ڕەمەزان" بەڕێوەبەری گشتیی ڕۆشنبیری و هونەری پارێزگای دهۆک، لە چوارەمین بەشداری نێودەوڵەتیی خۆیدا لە دوو سانسی جیاوازدا لە بەشی پێشبڕکێی سەرەکی هەشتەمین خولی فیستیڤاڵی نێودەوڵەتیی فیلمی ئەبووزەبی لە وڵاتی ئیماڕات چووە سەر پەردەی سینەماکان و توانی خەڵاتی مرواریی ڕەش بۆ باشترین فیلمی جیهانی عەڕەبی بەشی پێشبڕکێی سەرەکی ئەم فیستیڤاڵە بەدەستبێنێت.

"شەوکەت ئەمین" دوای وەرگرتنی خەڵاتی مرواریی ڕەشی فیستیڤاڵی نێودەوڵەتیی فیلمی ئەبووزەبی لە وتووێژ لەگەڵ دەزگاکانی ڕاگەیاندنی عەڕەبییدا ئەم خەڵاتەی پێشکەش کرد بە یادەوەری شەهیدان و قوربانیانی شەڕ دژی گرووپی تیرۆریستی داعیش و بە تایبەت منداڵانی شەهید و قوربانی ئەم کارەساتە و هەروەها خۆڕاگریی خەڵکی کوردستان بەرانبەر بە داعیش.

ئەندامانی لێژنەی دادوەرانی بەشی پێشبڕکێی سەرەکی هەشتەمین خولی فیستیڤاڵی نێودەوڵەتیی فیلمی ئەبووزەبی، کە بریتی بوون لە: ئەکتەری ناوداری هیندستانی "عیرفان خان" ـ سەرۆکی لێژنەی دادوەران، "وکینی لریدج" ـ نووسەر لە ئەلجەزایر، "ئێستیون شاینبێرگ" ـ بەرهەمهێنەر و دەرهێنەر لە بەریتانیا، "کیت شۆرتلەند" ـ نووسەر و دەرهێنەر لە ئوستوڕاڵیا و "عەلی سولەیمان" ـ ئەکتەر لە فەلەستین، دوای بینین و هەڵسەنگاندنیی 18 فیلمی ئەم بەشەی فیستیڤاڵ، خەڵاتی تەندیسی مرواریی ڕەشیان بە براوەکانی بەشە جۆراوجۆرەکانی ئەم فیستیڤاڵە پێشکەش کرد، لەوانە: باشترین فیلمی نێودەوڵەتیی، باشترین دەرهێنانی نێودەوڵەتی، باشترین فیلمی جیهانی عەڕەب، باشترین دەرهێنانی جیهانی عەڕەب، باشترین ئەکتەری ڕۆڵی یەکەمی پیاو، باشترین ئەکتەری ڕۆڵی یەکەمی ئافرەت و هەروەها خەڵاتی تایبەتی ئەندامانی لێژنەی دادوەران.

هەروەها لە بەشێکی دیکەی ڕێوڕەسمی کۆتایی هەشتەمین خولی فیستیڤاڵی نێودەوڵەتیی فیلمی ئەبووزەبیدا، ئەندامانی لێژنەی دادوەرانی بەشی پێشبڕکێی "ئاسۆی نوێی"، بەشی پێشبڕکێی "فیلمە بڵیندە دیکۆمێنتارییەکان" و بەشی تازە دامەزراویی "چاودێری لە منداڵان"، خەڵاتی تەندیسی مرواریی ڕەشیان بە براوەکانی بەشە جۆراوجۆرەکانی ئەم فیستیڤاڵە پێشکەش کرد.

لە بەشێکی دیکەی ئەم ڕێوڕەسمەشدا، خەڵاتی "نێتپەک"، خەڵاتی فیدڕاسیۆنی نێودەوڵەتیی ڕەخنەگرانی فیلم واتە "فیپڕشی" و هەروەها خەڵاتی "باشترین فیلم لە ڕوانینی بینەرانەوە" بە براوەکانی ئەم بەشانە پێشکەش کرا.  

هەشتەمین خولی فیستیڤاڵی نێودەوڵەتی فیلمی ئەبووزەبی بە نمایشی 197 فیلم لە سینەماکارانی 61 وڵاتی جۆراوجۆری جیهان لە چەندین بەشی پێشبڕکێی و دەرەوەی پێشبڕکێی، لەوانە: بەشی "پێشبڕکێی سەرەکیی"، بەشی پێشبڕکێی "ئاسۆی نوێی"، بەشی پێشبڕکێی "فیلمە بڵیندە دیکۆمێنتارییەکان"، بەشی "نمایشی سینەمای جیهان"، بەشی پێشبڕکێی "کورتە فیلمە چیرۆکی و دیکۆمێنتارییەکان"، بەشی پێشبڕکێی "فیلمە ئیماڕاتییەکان"، بەشی پێشبڕکێی "چاودێری لە منداڵان"، بەشی "نمایشی تایبەتی کۆمەڵە فیلمەکانی سینەماکاری ناوداری سینەمای جیهان فڕانسوا تڕۆفۆ"، بەشی "نماشی فیلمە کلاسیکییەکان"، "چەندین کۆبوونەوەی پسپۆڕانە سەبارەت بە هونەری سینەما" و هەروەها "کۆڕی ڕخنە و هەڵسەنگاندیی فیلمەکان" لە ڕۆژانی 23ی تەشرینی یەکەم / ئۆکتۆبەر تا 1ی تەشرینی دووەم / نۆڤەمبەری 2014 لە هۆڵی گەورەی کۆشکی ئیمارات و هەروەها ناوەندی سینەمایی "مارینا ماڵ" لە شاری ئەبووزەبی لە وڵاتی ئیماڕات یەکگرتووی عەڕەبی بەڕێوەچوو.

فیلمی سینەمایی "بیرەوەرییەکانی سەر بەرد" لە دوایین بەشداری نێونەتەوەیی خۆیدا لە سەرەتای مانگی تەشرینی یەکەم / ئۆکتۆبەری 2014 لە بەشی دەرەوەی پێشبڕکێی بە ناونیشانی "پەنجەرەیەک بەرەو سینەمای ئاسیا" لە میانەی نۆزدەیەمین فیستیڤاڵی نێودەوڵەتیی فیلمی پووسان لە وڵاتی کۆریای باشوور نمایشکرا.

مەنسوور جیهانی ـ کۆمپانیای بڵاوکەرەوە جیهانییەکانی فیلم داوادەکەن فیلمی سینەمایی "مەردان" لە دەرهێنانی "بەتین قوبادی" لە ئاستی جیهاندا بڵاوبکەنەوە.

فیلمی سینەمایی "مەردان" نوێترین بەرهەمی سینەماکاری کورد "بەتین قوبادی" کە لە لایەن وڵاتی عێراقەوە، بۆ هەشتاو حەوتەمین خولی ڕێوڕەسمی خەڵاتە سینەماییەکانی ئاکادیمیای ئۆسکار لە ساڵی 2015 دەستنیشانکراوە، کۆمپانیا بەناوبانگەکانی بڵاوکەرەوە جیهانییەکانی فیلم، لەوانە: "ئێم.کەی 2" 2MK، "وایلدبانچ" Wildbunch، "وێرسیتالە فیلمز" Versatile films و چەندین کۆمپانیای ناوداری جیهانی دیکە داوادەکەن ئەم فیلمە کوردییە لە ئاستی جیهاندا لە ئاستی جیهاندا بڵاوبکەنەوە.

دوای بڵاوبوونەوەی هەواڵی دەستنیشانکردنی فیلمی "مەردان" وەکوو فیلمی هەڵبژاردەی وڵاتی عێراق بە 87ـەمین خولی ڕێوڕەسمی خەڵاتە سینەماییەکانی ئۆسکاری 2015، ئەم هەواڵە لە دەزگاکانی ڕاگەیاندنیی وڵاتانی ناوچەکە و جیهاندا ڕەنگدانەوەی جۆراوجۆری دایەوە، بۆ نموونە لە دەزگاکانی ڕاگەیاندنیی تورکیادا لەوانە: میلییەت Milliyet، هەبەر تورک HABERTÜRK، زەمان Zaman، پۆسۆلە هەربەر Pusula Haber، بینفیکر سینەما Binfikir Sinema، گۆڤاری کات Cut Magazine، یۆرتگۆندێمی Yurt Gündemi، دیها DHA و چەندین دەزگای ڕاگەیاندنیی دیکە، ڕەنگدانەوەی جۆراوجۆری بەدواوەبوو.

تا ئێستا وڵاتانی جۆراوجۆر داواکای نمایشی ئەم فیلمە لە سینەماکانی خۆیان بوون و هەروەها فیستیڤاڵەکانی نێودەوڵەتیی فیلم لە ئاستی دنیادا خوازیاری بەشداری فیلمی سینەمایی "مەردان" لە بەشەکانی پێشبڕکێی و دەرەوەی پێشبڕکێی خۆیان بوون.

مەنسوور جیهانی ـ بە ئامادەبوونی سینەماکارانی کورد "شەوکەت ئەمین کورکی"، "مەمەد ئەکتاش"، "هیشام زەمان" و بەڕێوەبەری گشتیی ڕۆشنبیری و هونەری پارێزگای دهۆک "ئەیووب ڕەمەزان"، هەشتەمین خولی فیستیڤاڵی نێودەوڵەتیی فیلمی ئەبووزەبی لە وڵاتی ئیماڕات دەستی پێکرد.

بە ئامادەبوونی سینەماکارانی کورد "شەوکەت ئەمین کورکی"، بەرهەمهێنەر و سیناریۆنووسی کورد "مەمەد ئەکتاش"، دەرهێنەری کورد "هیشام زەمان" و بەڕێوەبەری گشتیی ڕۆشنبیری و هونەری پارێزگای دهۆک "ئەیووب ڕەمەزان"، کەسایەتییەکانی بەرچاوەکانی کەلتووری و هونەری وڵاتی ئیماڕات، "عەلی ئەلجابری" بەڕێوەبەری هەشتەمین خولی فیستیڤاڵی نێودەوڵەتیی فیلمی ئەبووزەبی، ئەکتەرە ناودارەکانی سینەما و تەلەڤیزیۆنی ئیماڕات و وڵاتانی عەڕەبی و هەروەها بە نمایشی فیلمی سینەمایی "لە ئەلفەوە تا بێی" From A To B لە دەرهێنانی سینەماکاری ئیماڕاتی "عەلی مستەفا" و بەرهەمی وڵاتی ئیماڕات، هەشتەمین خولی فیستیڤاڵی نێودەوڵەتیی فیلمی ئەبووزەبی کاتژمێر 9ی شەوی هەینی 23ی تەشرینی یەکەم / ئۆکتۆبەری 2014 لە هۆڵی گەورە و بەشکۆی کۆشکی ئیماڕات لە شاری ئەبووزەبی لە وڵاتی ئیماڕات دەستی پێکرد.

لە دەستپێکی ئەم ڕێوڕەسمەدا سەرەتا کاتژمێر 6ی ئێوارێی لێژنەی بەڕێوەبەرایەتیی فیستیڤاڵی نێودەوڵەتیی فیلمی ئەبووزەبی لەبەر چاوی کەناڵە جۆراوجۆرەکانی دەزگاکانی ڕاگەیاندنیی جیهانەوە چوونە سەر مافوورەی سووری ئەم فیستیڤاڵە و لە درێژەدا دەستەی دادوەرانی بەشە جۆراوجۆرەکانی فیستیڤاڵ لەوانە: سینەماکاری کورد "هیشام زەمان" وەکوو دەستەی دادوەرانی بەشی پێشبڕکێی فیلمە ئیماڕاتییەکان و پاشان دەرهێنەر، ئەکتەر و هونەرمەندانی وڵاتانی جۆراوجۆر، لەوانە: سینەماکاری کورد "شەوکەت ئەمین کورکی" دەرهێنەری فیلمی سینەمایی "بیرەوەرییەکانی سەر بەرد"، بەرهەمهێنەری کورد "مەمەد ئەکتاش" و سیناریۆنووسی فیلمی سینەمایی "بیرەوەرییەکانی سەر بەرد" و هەروەها "ئەیووب ڕەمەزان" بەڕێوەبەری گشتیی ڕۆشنبیری و هونەری پارێزگای دهۆک و یەکێک لە بەرهەمهێنەرانی ئەم فیلمە بە نوێنەرایەتیی لە هەرێمی کوردستان چوونە سەر مافووری سووری ئەم فیستیڤاڵە.

لە درێژەی ئەم ڕێوڕەسمەدا، سەرەتا "عەلی ئەلجابری" بەڕێوەبەری هەشتەمین خولی فیستیڤاڵی نێودەوڵەتیی فیلمی ئەبووزەبی، بەخێرهاتنی ئامادەبووانی ناو هۆڵی کۆشکی ئیماڕاتی کرد و لە درێژەدا داوای لە ستافی ئامادەکردنی فیلمی سینەمایی "لە ئەلفەوە تا بێی" بەرهەمی وڵاتی ئیماڕات و لە دەرهێنانی "عەلی مستەفا"ی کرد تاکوو بێنە سەر تەختەی شانۆ و دوای ناساندنی ئەوان، سەبارەت بە گرینگیی کردنەوەی ئەم فیستیڤاڵە بە فیلمێکی ئیماڕاتی چەند وتەیەکی پێشکەش کرد و لە درێژەشدا هەر کام لە ستافی ئامادەکردنی ئەم فیلمە وتەیەکی کورتیان پێشکەش کرد و لە کۆتایی یەکەم شەوی فیستیڤاڵدا، فیلمی سینەمایی "لە ئەلفەوە تا بێی" چووە سەر پەردەی سینەما.

ئەندامانی لێژنەی دادوەرانی بەشی پێشبڕکێی سەرەکی هەشتەمین خولی فیستیڤاڵی نێودەوڵەتیی فیلمیئەبووزەبی، کە بریتین لە: ئەکتەری ناوداری هیندستانی "عیرفان خان" ـ سەرۆکی لێێژنەی دادوەران، "وکینی لریدج" ـ نووسەر لە ئەلجەزایر، "ئێستیون شاینبێرگ" ـ بەرهەمهێنەر و دەرهێنەر لە بەریتانیا، "کیت شۆرتلەند" ـ نووسەر و دەرهێنەر لە ئوستوڕاڵیا و "عەلی سولەیمان" ـ ئەکتەر لە فەلەستین، 18 فیلمی سینەمایی ئەم بەشەی فیستیڤاڵ لە سینەماکارانی وڵاتانی جۆراوجۆری جیهان هەڵدەسەنگێنن و خەڵاتی گەورە و تەندیسی "مرواری ڕەش" بە براوەکانی بەشە جۆراوجۆرەکان پێشکەش دەکەن.

فیلمی سینەمایی "بیرەوەرییەکانی سەر بەرد" لە دەرهێنانی سینەماکاری کورد شەوکەت ئەمین کورکی لە دوو سانسی جیاوازدا لە بەشی پێشبڕکێی سەرەکی هەشتەمین خولی فیستیڤاڵی نێودەوڵەتیی فیلمی ئەبووزەبی لە سینەما ڤۆکسی هۆڵی مارینا ماڵی شاری ئەبووزەبی نمایش دەکرێت و بۆ بەدەستهێنانی خەڵاتی ئەم بەشەی فیستیڤاڵ لەگەڵ 17 فیلم لە وڵاتانی فەڕەنسا، ئیتاڵیا، بەریتانیا، ئێران، چین، مۆڕاکۆ، ڕووسیا، کۆریای باشوور، دانیماڕک، هۆنگ کۆنگ، قەتەر، ئیماڕات، مۆریتانی، لوبنان و ئەڵمانیا ڕکابەری دەکات.

ئەندامانی لێژنەی دادوەرانی بەشی پێشبڕکێی فیلمە ئیماڕاتییەکانی هەشتەمین خولی فیستیڤاڵی نێودەوڵەتیی فیلمی ئەبووزەبی، کە بریتین لە: سینەماکاری کوردی دانیشتووی وڵاتی نەرویج "هیشام زەمان"، "فەرید بێنل یەزید" ـ سەرۆکی دەستەی دادوەران لە مۆراکۆ، "ئیبراهیم ئەلحەساوی" ـ ئەکتەر و سیناریۆنووس لە سعوودییە، "فاتیمە ئەڵڕەماهی" ـ بەرهەمهێنەر و دەرهێنەر لە قەتەر و "عەبدوڵڵا ساڵح" ـ ئەکتەر و دەرهێنەر لە ئیماڕات فیلمەکانی ئەم بەشەی فیستیڤاڵ لە سینەماکارانی ئیماڕاتی هەڵدەسەنگێنن و خەڵاتی گەورە و تەندیسی "مرواری ڕەش" بە براوەکانی بەشە جۆراوجۆرەکان پێشکەش دەکەن.

هەشتەمین خولی فیستیڤاڵی نێودەوڵەتی فیلمی ئەبووزەبی بە نمایشی کۆمەڵێک فیلم لە سینەماکارانی وڵاتانی جۆراوجۆری جیهان لە چەندین بەشی پێشبڕکێی و دەرەوەی پێشبڕکێی، لەوانە: بەشی "پێشبڕکێی سەرەکیی"، بەشی پێشبڕکێی "ئاسۆی نوێی"، بەشی پێشبڕکێی "فیلمە بڵیندە دیکۆمێنتارییەکان"، بەشی "نمایشی سینەمای جیهان"، بەشی پێشبڕکێی "کورتە فیلمە چیرۆکی و دیکۆمێنتارییەکان"، بەشی پێشبڕکێی "فیلمە ئیماڕاتییەکان"، بەشی "نمایشی تایبەتی کۆمەڵە فیلمەکانی سینەماکاری ناوداری سینەمای جیهان فڕانسوا تڕۆفۆ"، بەشی "نماشی فیلمە کلاسیکییەکان"، "چەندین کۆبوونەوەی پسپۆڕانە سەبارەت بە هونەری سینەما" و هەروەها "کۆڕی ڕەخنە و هەڵسەنگاندیی فیلمەکان" لە ڕۆژانی 23ی تەشرینی یەکەم / ئۆکتۆبەر تا 1ی نۆڤەمبەری 2014 لە هۆڵی گەورەی کۆشکی ئیماڕات و هەروەها ناوەندی سینەمایی "مارینا ماڵ" لە شاری ئەبووزەبی لە وڵاتی ئیماڕات یەکگرتووی عەڕەبی بەڕێوەدەچێت.

لەم خولەی فیستیڤاڵ فیلمی ئەبووزەبیدا 197 فیلم لە سینەماکارانی 61 وڵاتی جیهان، لەوانە: ئەمەریکا، ئێران، چین، ئیماڕات، فەڕەنسا، عێراق، میسر، ئیتاڵیا، مۆڕاکۆ، کۆریای باشوور، ڕووسیا، ژاپۆن، بەریتانیا، دانیماڕک، لوبنان، ئەڵمانیا، قەتەر، گورجستان، کۆماری چێک، ئیتیۆپی، تایوان، هۆنگ کۆنگ، کەنەدا، هێندستان، ئیسپانیا، ئەلجەزایر، سێربستان، تۆرکیا، ئەردەن، ئیرلەندا، هەنگاریا، فینلەندا، کۆلۆمبیا، سووریا، ئوستوڕاڵیا، کووبا، نەرویج، بەلژیکا، سوید، بڕازیل، یەمەن و هەرێمی کوردستان دەچنە سەر پەردەی سینەماکان.

لە لایەن بەرپرسانی فیستیڤاڵی نێونەتەوەیی فیلمی ئەبووزەبییەوە خەڵاتی 100 هەزار دولاری و تەندیسی "مرواریی ڕەش" بۆ باشترین فیلمی بەشی "پێشبڕکێی سەرەکی"، خەڵاتی 50 هەزار دولاری و تەندیسی "مرواریی ڕەش" بۆ فیلمی دووەمی ئەم بەشە، خەڵاتی 20 هەزار دولاری بۆ باشترین ئەکتەری پیاو و ئەکتەری ئافرەتی ئەم بەشەی فیستیڤاڵ دیاری کراوە و هەروەها کۆمەڵێک خەڵاتی گرینگی نەقدی دیکەش بۆ بەشە جۆراوجۆرەکانی ئەم فیستیڤاڵە دەستنیشان کراوە.

 مەنسوور جیهانی ـ فیلمی سینەمایی "بیرەوەرییەکانی سەر بەرد" لە دەرهێنانی سینەماکاری کورد "شەوکەت ئەمین کورکی" لە 19ـەمین خولی فیستیڤاڵی نێودەوڵەتیی فیلمی پووسان لە وڵاتی کۆریای باشوور نمایشکرا.

فیلمی سینەمایی "بیرەوەرییەکانی سەر بەرد" Memories On Ston لە نووسینی هاوبەشی "شەوکەت ئەمین کورکی" و "مەممەد ئەکتاش" و لە دەرهێنانی سینەماکاری کورد "شەوکەت ئەمین کورکی" کە بەرهەمی ساڵی 2014ی هەرێمی کوردستان و ئەڵمانیایە لە سێیەمین بەشداری نێودەوڵەتیی خۆیدا بە نوێنەرایەتیی لە هەرێمی کوردستان لە سێ سانسی جیاوازدا لە ڕۆژانی 4 و 6 و 9ی تەشرینی یەکەم / ئۆکتۆبەری 2014 لە بەشی دەرەوەی پێشبڕکێی بە ناونیشانی "پەنجەرەیەک بەرەو سینەمای ئاسیا" لە میانەی نۆزدەیەمین خولی فیستیڤاڵی نێودەوڵەتیی فیلمی پووسان لە وڵاتی کۆریای باشوور چووە سەر پەردەی سینەماکان.

ئەم فیستیڤاڵە بە نمایشی 313 فیلم لە سینەماکارانی 79 وڵاتی جۆراوجۆری جیهان لە چەندین بەشی پێشبڕکێی سەرەکی، لەوانە: "ڕەوتە نوێیەکان" و "شەپۆلی نوێی"، بەشی دەرەوەی پێشبڕکێی "پەنجەرەیەک بەرەو سینەمای ئاسیا"، بەشی پێشبڕکێی و دەرەوەی پێشبڕکێی "سینەمای ئەمڕۆی کۆریا"، بەشی تایبەتی "گاڵا"، بەشی دەرەوەی پێشبڕکێی "سینەمای جیهان"، بەشی پێشبڕکێی و دەرەوەی پێشبڕکێی "کورتە فیلم و فیلمی دیکۆمێنتاری و فیلمی منداڵان"، بەشی دەرەوەی پێشبڕکێی "سینەمای کراوە"، بەشی "بەرنامە تایبەتەکان"، بەشی "فیلمە سامناکەکان" و بەشی "ڕێزلێنان لە سینەماکارانی کۆریای باشوور" لە ڕۆژانی 2 تا 11ی تەشرینی یەکەم / ئۆکتۆبەری 2014 لە شاری پووسان لە وڵاتی کۆریای باشوور بەڕێوەچوو.

فیلمی سینەمایی "بیرەوەرییەکانی سەر بەرد" لە دوایین بەشداری نێونەتەوەیی خۆیدا لە بەشی پێشبڕکێی دەیەمین خولی فیستیڤاڵی نێودەوڵەتیی فیلمی یۆرۆئاسیا Eurasia لە وڵاتی کازاخستان نمایشکرا.

ئەم فیستیڤاڵە بە بەشداری 200 فیلم لە سینەماکارانی 30 وڵاتی جۆراوجۆری جیهان لە چەندین بەشی پێشبڕکێی و دەرەوەی پێشبڕکێی لە ڕۆژانی 15 تا 20ی ئەیلوول / سەپتەمبەری 2014 لە شاری ئاڵمائاتی گەورەترین شاری وڵاتی کازاخستان بەڕێوەچوو.

مەنسوور جیهانی ـ فیلمی سینەمایی "بیرەوەرییەکانی سەر بەرد" لە دەرهێنانی سینەماکاری کورد "شەوکەت ئەمین کورکی" لە فیستیڤاڵی نێودەوڵەتیی فیلمی یۆرۆئاسیا لە وڵاتی کازاخستان نمایشکرا.

فیلمی سینەمایی "بیرەوەرییەکانی سەر بەرد" Memories On Ston لە نووسینی هاوبەشی "شەوکەت ئەمین کورکی" و "مەممەد ئەکتاش" و لە دەرهێنانی سینەماکاری کورد "شەوکەت ئەمین کورکی" کە بەرهەمی ساڵی 2014ی هەرێمی کوردستان و ئەڵمانیایە لە دووەمین بەشداری نێودەوڵەتیی خۆیدا بە نوێنەرایەتیی لە هەرێمی کوردستان لە بەشی پێشبڕکێی دەیەمین خولی فیستیڤاڵی نێودەوڵەتیی فیلمی یۆرۆئاسیا Eurasia لە وڵاتی کازاخستان نمایشکرا.

ئەم فیلمە کوردییە لەگەڵ 11 فیلم لە وڵاتانی فەڕەنسا، ئێران، کۆریای باشوور، ئاڵبانیا، ئستونیا، ئیسرائیل، کرۆواسیا، کازاخستان، ژاپۆن و ڕووسیا چووە سەر پەردەی سینەماکان.

ئەم فیستیڤاڵە بە بەشداری 200 فیلم لە سینەماکارانی 30 وڵاتی جۆراوجۆری جیهان لە چەندین بەشی پێشبڕکێی سەرەکی، بەشی "تایبەت بە 30 ساڵ سینەمای کازاخستان"، بەشی تایبەت بە سەدەمین ساڵوەگەڕی لە دایکبوونی فیلمسازی ناوداری کازاخستانی "شاکیم ئیمانۆف"، بەشی "سینەمای کۆریای باشوور"، بەشی "شەوی کورتە فیلم"، بەشی "سینەما پردێک لە نێوان ڕۆژهەڵات و ڕۆژئاوا"، بەشی "ڕووداوە تایبەتەکان" و بەشی "سینەمای وریای کازاخستان" لە ڕۆژانی 15 تا 20ی ئەیلوول / سەپتەمبەری 2014 لە شاری ئاڵمائاتی گەورەترین شاری وڵاتی کازاخستان بەڕێوەچوو.

"یێرمەک ئامانشایۆف" لە ڕێوڕەسمی کردنەوەی دەیەمین خولی فیستیڤاڵی نێودەوڵەتیی فیلمی یۆرۆئاسیا گوتی: ئەم فیستیڤاڵە لە هاوکاری نزیک لە نێوان فیلمسازانی کازاخستانی و وڵاتانی ئەورووپی و ئاسایی بۆتە یەکێک لە گرینگترین ڕووداوەکانی سینەمایی جیهان.

فیلمی سینەمایی "بیرەوەرییەکانی سەر بەرد" لە یەکەمین بەشداری نێونەتەوەیی خۆیدا بە ئامادەبوونی "شەوکەت ئەمین کورکی"، ئەکتەری سەرەکی فیلمەکە "حوسێن حەسەن" و هەروەها نووسەر و بەرهەمهێنەری فیلمەکە "مەمەد ئەکتاش"، بە نوێنەرایەتیی لە هەرێمی کوردستان لە بەشی "ئاسۆکان"ی چل و نۆیەمین خولی فیستیڤاڵی نێودەوڵەتیی فیلمی کاڕڵۆڤی ڤاری لە وڵاتی چیک نمایشکرا و لە لایەن بینەران، ڕەخنەگران و ڕۆژنامەنووسانەوە پێشوازیی لێکرا. 

ئەم فیستیڤاڵە بە نمایشی 173 فیلم لە سینەماکارانی وڵاتانی جۆراوجۆری جیهان لە ڕۆژانی 4 تا 12ی تەمموز / یۆلیۆی 2014 لە شاری کاڕڵۆڤی ڤاری لە وڵاتی کۆماری چیک بەڕێوەچوو.  

مەنسوور جیهانی ـ فیلمی سینەمایی "بیرەوەرییەکانی سەر بەرد" لە دەرهێنانی سینەماکاری کورد "شەوکەت ئەمین کورکی" لە فیستیڤاڵی نێودەوڵەتیی فیلمی کاڕڵۆڤی ڤاری لە وڵاتی چیک نمایشکرا.

فیلمی سینەمایی "بیرەوەرییەکانی سەر بەرد" Memories On Ston لە نووسینی هاوبەشی "شەوکەت ئەمین کورکی" و "مەممەد ئەکتاش" و لە دەرهێنانی "شەوکەت ئەمین کورکی"یە کە بە ئامادەبوونی ئەم سینەماکارە کوردە، ئەکتەری سەرەکی فیلمەکە "حوسێن حەسەن" و هەروەها بەرهەمهێنەری فیلمەکە "مەمەد ئەکتاش"، لە یەکەمین بەشداری نێودەوڵەتیی خۆیدا بە نوێنەرایەتیی لە هەرێمی کوردستان لە بەشی "ئاسۆکان"ی چل و نۆیەمین خولی فیستیڤاڵی نێودەوڵەتیی فیلمی کاڕڵۆڤی ڤاری Karlovy Vary لە وڵاتی چیک لە سێ سانسی جیاوازدا چووە سەر پەردەی سینەماکان.

ئەم فیلمە کوردییە کە بەرهەمی ساڵی 2014ی هەرێمی کوردستان و ئەڵمانیایە ڕۆژی 6ی تەمموز / یۆلیۆی 2014 لە هۆڵی کۆنگرێس، ڕۆژی 9ی تەمموز / یۆلیۆی 2014 لە ڕۆیچمۆند و هەروەها ڕۆژی 12ی تەمموز / یۆلیۆی 2014 لە سینەما بی B لە میانەی فیستیڤاڵی نێودەوڵەتیی فیلمی کاڕڵۆڤی ڤاری نمایشکرا و لە لایەن بینەرانەوە پێشوازیی لێکرا.

"بیرەوەرییەکانی سەر بەرد" دوای نمایش لەم فیستیڤاڵە لە لایەن ڕخنەگران و ڕۆژنامەنووسانەوە پێشوازیی لێکرا و بەرپرس و ڕێکخەریی چەندین فیستیڤاڵی نێودەوڵەتی فیلم لە ئاستی جیهاندا، دوای ئەم فیلمەیان لە بەرهەمهێنەری فیلمەکە کرد کە لە فیستیڤاڵەکەیاندا بەشداریی پێبکرێت و نمایش بکرێت.

فیستیڤاڵی نێودەوڵەتیی فیلمی کاڕڵۆوی واری گرینگترین فیستیڤاڵی ئەورووپای ناوەندیی و ڕۆژهەڵاتی ئەورووپایە و یەکێکە لە گرینگترین فیستیڤاڵەکانی سینەمای دنیا کە خولی چل و نۆیەمینی بە نمایشی 173 فیلمی سینەمایی، 43 کورتە فیلم و 29 فیلمی دیکۆمێنتاریی لە سینەماکارانی وڵاتانی جۆراوجۆری جیهان و بە ئامادەبوونی 478 فیلمساز و 825 سینەماکاری پیشەگەڕ لە سەرتاسەری دنیا و لە چەندین بەشی پێشبڕکێی سەرەکی، لەوانە: پێشبڕکێی "لە ڕۆژئاواوە و بۆ ڕۆژهەڵات"، پێشبڕکێی "فێررۆم"، پێشبڕکێی "فیلمە دیکۆمێنتارییەکان" و هەروەها بەشی "ئاسۆکان"، "دەرەوەی پێشبڕکێی"، "جۆرێک ڕوانین" و "بەشی تایبەت" لە ڕۆژانی 4 تا 12ی تەمموز / یۆلیۆی 2014 لە شاری کاڕڵۆڤی ڤاری لە وڵاتی کۆماری چیک بەڕێوەچوو.

فیلمی سینەمایی "بیرەوەرییەکانی سەر بەرد" ساڵی 2014 لە لایەن هەرێمی کوردستان و کۆمپانیای میتۆس فیلمی Mitos Film ئەڵمانیی بەرهەم هاتووە و لە ئامادەکردنی ئەم فیلمەدا چەندین کۆمپانیا، دەزگای حکومی، ڕێکخراوە و ناوەندیی هونەری کوردی و نێودەوڵەتیی هاوکارییان کردووە، لەوانە: بەشی سینەمای دهۆک و پارێزگاری دهۆک لە هەرێمی کوردستان، بەڕڵین مێدین بۆرد Berlin Medien Board  لە ئەڵمانیا، پۆست رێپابلیک The Post Republic لە ئەڵمانیا، ڤیژن سود ئیست Visions –Est sud لە ئەڵمانیا، ئەنستیتۆی سینەمای دۆحە Doha film Institute لە قەتەر و هەروەها تەلەڤیزیۆنی کوردستان تی ڤی لە هەرێمی کوردستان.  

سیناریۆی "بیرەوەرییەکانی سەر بەرد" کە لە نووسینی هاوبەشی شەوکەت ئەمین کورکی و مەممەد ئەکتاشە پێشتر خەڵاتی باشترین سیناریۆی لە ئاکادیمیای خەڵاتی ئیسکرینی ئاسیا ـ پەسیفیک APSA لە ئوستوراڵیا، خەڵاتی باشترین سیناریۆی فیستیڤاڵی گوتێبیرگی سویدی و هەروەها خەڵاتی باشترین سیناریۆی لە شازدەیەمین خولی فیستیڤاڵی نێونەتەوەیی فیلمی پوسان لە کۆریای باشوور بەدەستهێناوە.

ستافی ئامادەکردنی فیلمی سینەمایی "بیرەوەرییەکانی سەر بەرد" بریتین لە:

دەرهێنەر: شەوکەت ئەمین کورکی

سیناریۆ: مەمەد ئەکتاش و شەوکەت ئەمین کورکی

بەرهەمهێنەر: مەمەد ئەکتاش

بەڕێوەبەری وێنەگرتن: سالم سەڵەواتی

ڕووناکی: ئەدیب سوبحانی

مونتاژ: ئیبراهیم سەعیدی

دەنگهەڵگر: یوهانس کاسشێک و شەهرام ئەحمەدیان

دیزاینی دەنگ: راینر گێرلاش

میکس: ماتیاس سشواب (پۆست رێپابلیک)

دیزاینی هونەری: فازل ژیان و جەلال ساعیدپەناە

بەڕێوەبەری پۆست پرۆداکشێن: تۆماس کویسلێر

یاریدەدەری یەکەمی دەرهێنەر و بەرنامەداڕێژ: جەلال ساعیدپەناە

یاریدەدەری دووەمی دەرهێنەر: ساڵح عارف

چاودێری سکریپت و ڕاکوار: سروە عەلی وەیسی

ڕاوێژکاری سیناریۆ: کامبووزیا پەرتەوی و دێرک دێربیلۆ

بەڕێوەبەری سێت: شەماڵ سەبری

موزیک: جان گورتلێر و ئۆزگور ئاکگول

کالێر کۆرێکشێن: گریگۆر فۆللێر

سپێشیاڵ ئێفێکت: ژان میشێل بۆبیل

بەڕێوەبەری بەرهەمهێنان: بەنگین عەلی

هاوکاری بەرهەم لە ئێران: محەمەد ئەحمەدی

بەڕێوەبەرایەتیی ڕاگەیاندنیی گشتیی: مەنسوور جیهانی و مەنووچێهر جیهانی

ئەکتەرەکان:

حوسێن حەسەن، نەزمی کریک، شیما مەلایی، سوعاد ئوستا، ڕێکێش شەهباز، بەنگین عەلی، هوشیار زێرۆ، بەڕۆژ ئاکرەیی، سەلاح شێخ ئەحمەدی، مازچین عەزیز، ئەڵڵاموراد ڕەشتیانی، تاهیر عەبدوڵڵا، دیمەن زەند،

عادڵ عەبدولڕەحمان، عەبدولقادر بامەڕنی، ساڵح عارف، محەمەد عەلی ئەترووشی، مەسعوود عارف، بەکر مەعرووف، ئاڵا ریانی، نەرەڤ قەچاخ، ئەکرەم کونگفۆ، نێچیرڤان ئەرگووشی، عەمەر تۆڤی، ئەکرەم سلێمان، سەلمان ئومەر، مێهدی کەرەمی، کۆڤان تارق، نیهاد سلێمان، کامیران بێتاسی، بیرهات حوسێن، تەنیا حیسامی، شیار شەریف، شێرزاد عەبدوڵڵا، بەشیر خورکی، میللەت هەروری، هاشم شاجی، زیاد عابد، سنۆڤا بەندیکس، چیا ئەکتاش، عەبدوسەلام سلێمان، پەری عەبدوڵڵا، بەدرخان یۆنس، مەمەد ئەکتاش، ڕێزان یشیلباش، هەڤاڵ نایف، قاسم ڕەمەزان، هەڵکەت ئیدریس، نەشوان محەمەد، موەفەق ڕوشدی، عابد دهۆکی، ئومێد بەهجەت، زیاد محەمەد و مەجید خەلیل.

مەنسوور جیهانی ـ سینەماکاری کورد "مەمەد ئەکتاش" بە سیناریۆی فیلمی سینەمایی "نامەیەک بۆ پاشا" گەورەترین خەڵاتی نۆڕوێژی بە ناونیشانی "ئاماندا"ی بەدەستهێنا و خەڵاتەکەی پێشکەش بە منداڵانی کوردی ئیزەدی کرد کە لە چیای شنگاڵ گیانی خۆیان بەخت کرد.

سینەماکارانی کورد "مەمەد ئەکتاش" و "هیشام زەمان" بە سیناریۆی فیلمی سینەمایی "نامەیەک بۆ پاشا" Letter to the king لە فیستیڤاڵی نێودەوڵەتیی فیلمی "ئاماندا" AMANDA  لە شاری هاوگسۆن Hevgusan لە وڵاتی نۆڕوێژ بەشدارییان کرد و لە لایەن ئەندامانی لێژنەی دادوەرانی ئەم فیستیڤاڵەوە گەورەترین خەڵاتی نۆڕوێژ بە ناونیشانی "ئاماندا" بەم هونەرمەندە کوردانە بەخشرا.

لە ڕێوڕەسمی کۆتایی ئەم خەڵاتە ساڵانەیەدا "مەمەد ئەکتاش" سیناریۆنووس و هەروەها "هیشام زەمان" دەرهێنەری فیلمی سینەمایی "نامەیەک بۆ پاشا" ئامادەبوون و لە بەشە جۆراوجۆرەکاندا لەوانە: بەشەکانی باشترین فیلمی سینەمایی، باشترین ئەکتەری ئافرەت و پیاو، باشترین فیلمی نۆڕوێژی، باشترین دەرهێنان، باشترین فیلمی منداڵان، باشترین دیکۆمێناری، باشترین کورتە فیلم، باشترین سیناریۆ، باشترین وێنەگرتن، باشترین دیمەنە تایبەتەکان، باشترین موزیک، باشترین دیزاینی دەنگ، باشترین دیزاینی سەحنە و باشترین فیلمی بیانی، خەڵات بەسەر هونەرمەندانی سەرکەوتوو دابەشکرا.

دوای بەدەستهێنانی ئەم خەڵاتە گرینگ و گەورەیە کە بە خەڵاتی ئۆسکاری وڵاتی نۆڕوێژ ناسراوە، "مەمەد ئەکتاش" سیناریۆنووسی فیلمی سینەمایی "نامەیەک بۆ پاشا" هاتە ئاخاوتن و گوتی: ئەم خەڵاتە پێشکەش بە منداڵانی کوردی ئیزەدی دەکەم کە لە چیای شنگاڵ گیانی خۆیان بەخت کرد. هیوادارم ئەوانیش وەکوو کوڕی من "چیا"کە لە نۆڕوێژ دەژی لە وڵاتی خۆیان لە کوردستاندا لە ناو ئازادی و ئاشتیدا بژین.

فیستیڤاڵی نێودەوڵەتیی فیلمی "ئاماندا" بە نمایشی کۆمەڵێک فیلم لە چەندین بەشی پێشبڕکێی لە ڕۆژانی 16 تا 22ی ئاب / ئۆگۆستی 2014 لە شاری هاوگسۆن لە وڵاتی نۆڕوێژ بەڕێوەچوو.

هەر لەم فیستیڤاڵەدا "ژۆلیت بینووش" Juliette Binoche ئەکتەری ناوداری سینەمای جیهان و هەڵگری خەڵاتەکانی ئۆسکار و چڵەبەڕووی کان، بە فیلمی سینەمایی "هەزار جار شەو خۆش" A thousand times good night لە دەرهێنانی "ئێریک پۆپ" توانی خەڵاتی گەورەی باشترین ئەکتەری ئافرەت بەدەستبێنێت.

فیلمی سینەمایی "نامەیەک بۆ پاشا" لە دەرهێنانی هیشام زەمان ساڵی پار لە فیستیڤاڵی فیلمی یۆتۆبری Göteborg لە وڵاتی سوید گەورەترین خەڵاتی باشترین فیلمی باکووری ئەورووپای بەدەستهێنابوو.