slideshow

slideshow

بە خۆشحاڵییەوە ڕۆژی سێشەممە ٣١ـى کانوونی یەکەم، ئەنجوومەنی وەزیرانی عێراق پڕۆژە یاسای بە پارێزگابوونی هەڵەبجەی شەهیدی پەسند کرد و خواستێکی ڕەوای خەڵکی خۆشەویستی هەڵەبجە هاتەدی کە ماوەیەکی زۆر بوو کارمان بۆی دەکرد.

بەم بۆنەیەوە پیرۆزبایی لە خەڵکی خۆڕاگری هەڵەبجەی شەهید دەکەم، خۆشحاڵم کە لە کۆتاییدا ئەو بەڵێنەی بە ئێوەم دابوو هاتەدی. لەماوەی ڕابردوودا هەوڵی زۆرمان دا بۆ ئەوەی بەزووترین کات ئەو کارە ڕێوشوێنە یاساییەکانی تەواو بکات، هەربۆیە ڕۆژی سێشەممە ‏‏24/12/2013 لە نامەیەكی فەرمیدا بۆ سەرۆكایەتیی ئەنجوومەنی وەزیرانی حكوومەتی هەرێمی كوردستان داوام کرد لە وردەكاریی ئەو رێوشوێن و ‏هەنگاوانە ئاگادارم بكەنەوە كە حكوومەتی هەرێمی كوردستان و حكوومەتی عێراقی فێدراڵ بەمەبەستی بە پارێزگاكردنی ‏هەڵەبجەی شەهید گرتوویانەتەبەر، ئەوەبوو ڕۆژی 25/12/2013، پڕۆژە یاساى به‌پارێزگاكردنى هه‌ڵه‌بجه‌ى شەهید لەلایەن سەرۆکی ئەنجوومەنی وەزیرانی هەرێمی کوردستانەوە به‌ فه‌رمى ڕاده‌ستى سه‌رۆك وه‌زیرانى عێراقى فیدرال کرا.

ئەگەرچی وەدیهاتنی ئەم دەستکەوتە گرینگە بۆ شاری هەڵەبجەی شەهید ماوەیەکی زۆری پێ چوو، بەڵام دەبوایە ڕێکارە یاساییەکانی تەواو بکات و پڕۆژە یاساکە لە بەغدا پەسند بکرێت.

هەڵەبجەی شەهید سەمبولی قوربانیدانی گەلی کوردە و گرێی بەختی کوردی کردەوە و شایستەی ئەوەیە زۆرترین خزمەتی پێشکەش بکرێت. هیوادارم دوای ئەم بڕیارە گرینگە، شاری هەڵەبجە ببێتە شاری خۆشی و سەمبولی ئاشتی بۆ هەموو جیهان.

خەڵکی ئەو شارە ئازیزە ناخۆشیی زۆریان بینیوە و پێویستە برینەکانیان ساڕێژ بکرێت، بۆیە هیوادارم ئەو ئیدارە نوێیەی لەوێ دادەمەزرێت بە دڵی خەڵکی ناوچەکە بێت و خزمەتێکی شایستەیان پێشکەش بکات.

پیرۆز بێت لە هەڵەبجە، پیرۆز بێت لە کوردستان.



مسعود بارزانی

سەرۆکی هەرێمی کوردستان

١/١/٢٠١٤

 

 

 

 

جوانترین و گه‌رمترین پیرۆزبایى به‌ بۆنه‌ى جه‌ژنى سه‌رى ساڵى نوێى زایینییه‌وه‌ پێشكه‌ش به‌ هه‌موو هاووڵاتیانى كوردستان و عیراق و جیهان ده‌كه‌ین، هیوادارین ساڵى نوێ، ساڵى سه‌ركه‌وتن و به‌دیهاتنى خۆزگه‌ و خه‌ونه‌كانى كوردستانیان بێت و به‌ هه‌وڵ و هیممه‌ت و به‌شداریى هه‌موو لایه‌نه‌كان، حكوومه‌تى داهاتووى هه‌رێمى كوردستان له‌ ئارامى و سه‌قامگیرییه‌كى تۆكمه‌تردا؛ خزمه‌ت و خۆشگوزه‌رانیى باشتر و زیاتر پێشكه‌ش به‌ هاووڵاتیان بكات.

هاتنى ساڵى نوێ، قۆناغى‌ نوێش له‌گه‌ڵ خۆیدا ده‌هێنێت كه‌ تیایدا هه‌رێمى كوردستان پێویستى به‌ یه‌كڕیزى و یه‌كهه‌ڵوێستى و هه‌ماهه‌نگى و كارى پێكه‌وه‌ییى هه‌موو لایه‌ن و پێكهاته‌كانى كوردستان هه‌یه‌، بۆ ئه‌وه‌ى بتوانرێ ئارامى و سه‌قامگیریى باشتر و ئاوه‌دانى و خزمه‌تگوزارى و خۆشگوزرانیى زیاتر بۆ هه‌موو هاووڵاتیانى كوردستان دابین بكرێت و هه‌نگاوى گه‌وره‌ به‌ره‌و پێشكه‌وتن و گه‌شه‌پێدان و بنیاتنانى وڵات له‌ هه‌موو ڕوویه‌كه‌وه‌ بنرێت.

ساڵى نوێ له‌ هه‌موو كوردستانیان پیرۆز بێت، هیواى شادى و سه‌ركه‌وتن و ساڵێكى خۆش و ئارام بۆ هه‌موو لایه‌ك ده‌خوازین.

ئه‌نجومه‌نى وه‌زیرانى هه‌رێمى كوردستان
31ى دیسه‌مبه‌رى 2013

 

 

 

 

 

 

 

سەنتەرى لێکۆلینەوەى ستراتیژى رۆژهەڵاتى ناوەراست، بە ئامادەبوونی دوو مامۆستای زانکۆکانی ئەنقەرە لە وڵاتی تورکیا سیمینارێکى لەسەر رووداوەکانى ئەم دواییەى ناوچەکە بەرێوەبرد.

گرووپی خوێندنەوەکانی کێشمەکێش و هاوکاری لە رۆژهەڵاتى ناوەراست و گرووپی تورکیاناسی و سەنتەرى لێکۆلینەوەى ستراتیژى رۆژهەڵاتى ناوەراست، سیمینارێکى بە ناوەرۆکی "ئێران و تورکیا و گۆڕانکارییەکانی رۆژهەڵاتى ناوەراست" بە ئامادەبوونى دکتۆر "بایرام سینکایا" مامۆستای زانستی سیاسی زانکۆی بیازیتی ئەنقەرە، دکتۆر "محەمەت شاهین" مامۆستای پەیوەندییە نێودەوڵەتییەکانی زانکۆی غازی ئەنقەرە، ئاغاى عباس نووریان توێژەری مەسەلەکانی ناوچەی رۆژهەڵاتى ناوەراست و دکتۆر ئەحمدیان لە کاتژمێر 5 تا 7ی دوانیوەڕۆی رۆژى دووشەمە 9ی ئەیلوول / سێپتەمبەری 2013 (18 شەهریوەری 1392)، لە هۆڵی کۆبوونەوەکانی سەنتەرى لێکۆلینەوەى ستراتیژى رۆژهەڵاتى ناوەراست لە شاری تاران ساز کرد.

دکتۆر "حەمید ئەحمەدی" قائم مقامی سەرۆکی سەنتەرى توێژینەوە و بەرپرسی گرووپی خوێندنەوەکانی کێشمەکێش و هاوکاری لە رۆژهەڵاتى ناوەراست سەرۆکایەتی ئەم سیمینارەی لە ئەستۆ بوو کە دکتۆر ئەحمدیان وتارى خۆی لە سەر گۆرانکاریەکانى سیاسەتى دەرەوەى تورکیا سەبارەت بە هەرێمى کوردستان پێشکەش کرد و هەروەها دکتۆر سینکایا و ئاغاى نووریان سەبارەت بەم بابەتە قسەیان کرد.

هەڤاڵ دکتۆر محمد سدیق (جگەرخوێن) جێگرى نوێنەرى حکومەتى هەرێمی کوردستان لە تاران کە میوانى دانیشتنەکە بوو چەند روونکردنەوەیەکى سەبارەت بە ووتارەکان پێشکەش کرد و وەڵامى پرسیارى ئامادەبووانى دایەوە.

هەر دوو مامۆستاى تورکی زانکۆکانی ئەنقەرە، لەم سیمینارەدا بەرگرییان کرد لە سیاسەتى تورکیا و ئەو گۆرانکاریانەى لەماوەى چەند ساڵى رابردوودا هاتوونەتە پێش و بوونەتە هۆى تێروانینى دیموکراتیانەى دەوڵەتى تورکیا سەبارەت بە وڵاتانى دراوسێ و ناوچەکە و بە تایبەتى هەرێمى کوردستان و خوێندنەوەى باش و بە پێزیان بوو سەبارەت بە هەرێمى کوردستان.

لە وەڵامدانەوەى قسەکانى ئەو و چەند پرسیارى تری ئامادەبوواندا، هەڤاڵ جگەرخوێن وێرای دەربڕینى سوپاسی خۆی بۆ هەر دوو مامۆستاى زانکۆی ئەنقەرە بۆ ووتە زانستى و بێلایەن و بەنرخەکانیان سەبارەت بە کێشەى کورد گووتى: هەر مافێک کە کورد لە عێراق بەدەستیهێناوە بەرهەمى خەبات و تێکۆشانى نزیکەى یەک سەدەى گەلی کورد بووە و چەند بەرانبەرى ئەوەى بەدەستى هێناوە قوربانى بۆ داوە.

دکتۆر جگەرخوێن هەروەها لە درێژەى ووتارەکەیدا تیشکى خستە سەر ووتەکانى جەنابی سەرۆک بارزانى و راگەیاندنى سەرۆکایەتى هەرێم و حکومەتى هەرێمی کوردستان کە کۆنگرەى نەتەوەیی کورد دژى هیچ لایەک نیە و پەیامى ئاشتى و برایەتی دەبێت بۆ هەموو گەلانى ناوچەکە.

 

 

 

 

 

 

 

وەزارەتی نەوتی کۆماری ئیسلامی ئێران لە نامەیەکدا سوپاس و پێزانینی ئاراستەی بەڕێز "نازم دەباغ" نوێنەری حکوومەتی هەرێمی کوردستان لە ئێران کردووە بۆ ناردنی پەیامی پیرۆزبایی بۆ بەڕێز ئەندازیار "بیژەن نامدار زەنگەنە" بە بۆنەی وەرگرتنی دەنگی متمانە لە مەجلیسی شۆڕای ئیسلامی ئێران و هەڵبژاردنیان بۆ پۆستی وەزیری نەوتی ئێران.

دەقی ئەم پەیامە لە خوارەوە هاتووە:

 

بەڕێز ئاغای دەباغ

نوێنەری بەڕێزی حکوومەتی هەرێمی کوردستانی عێراق لە کۆماری ئیسلامی ئێران

 

سڵاو و ڕێز

پەیامی پیرۆزبایی بەڕێزتان بە بۆنەی وەرگرتنی دەنگی متمانە لە مەجلیسی شۆڕای ئیسلامی بۆ بەڕێز ئەندازیار زەنگەنە بە دەستمان گەیشت.

بێجگە لە ڕێز و پێزانین و سوپاسی پلەی بەرزی وەزارەت، لە خودای میری مەزن بۆ بەڕێزتان بەختەوەری و سەرکەوتن ئاواتەخوازم.

 

کەریم زەمانی

ڕاوێژکاری وەزیر و بەرپرسی گشتیی

3/6/1392  

 

 

 

 

 

نەفتنا ـ بەسیم لالە: هەفتەی ڕابردوو وەزیری نەوتی عێراق لە لووتکەی ئۆپێک ڕایگەیاند کە هەناردەکردنی نەوتی ئەم وڵاتە لە ساڵی داهاتووی زایینی دەگاتە 3 میلیۆن و 200 هەزار بەرمیل لە ڕۆژدا و بەشی کوردستان لەم ڕێژەیە 400 هەزار بەرمیلە. لە لایەکی دیکەوە نوێنەری پەڕڵەمان و ئەندامی کۆمیسیۆنی وزەی عێراق ڕایگەیاندووە بەرهەمی ئەم وڵاتە لە ساڵی داهاتوو دەگاتە زیاتر لە 4 میلیۆن بەرمیل. ئەوە لە حاڵێکدایە کە هێشتا گرفتەکانی هەرێم لەگەڵ دەوڵەتی ناوەندی لەسەر فرۆشی نەوت درێژەی هەیە و هەرێم ئامادەی قەبووڵکردنی بەشی سەتا 5/16 نییە و بەردەوام هەوڵدەدات گرێبەستی نەوتی لە دەرەوەی فۆڕمی پێناسەکراوی بەغداد ببەستێت و تەواوی گرێبەستەکانی بە پێی هاوبەشی لە بەرهەمهێنان لەگەڵ کۆمپانیا نەوتییەکان دەبەستێت و بە گشتیی، کوردستان هیچ جۆرە هەواهەنگی لە بەرهەمهێنان و دەرهێنانی نەوت و غاز لەگەڵ دەوڵەتی ناوەندییدا نییە ... .

لەم چوارچێوەیەدا، نازم دەباغ نوێنەری هەرێمی کوردستانی عێراق لە ئێران لە وتووێژ لەگەڵ پەیامنێری نەفتنا سەبارەت بە هەناردەکردنی نەوتی عێراق لە ساڵی داهاتووی زایینی جەغت لەسەر وتەکانی النەعیمی وەزیری نەوتی عێراق دەکات و سەبارەت بە تواناکانی هەناردەکردنی نەوتی ئەم هەرێمە گوتی: بە لەبەرچاوگرتنی خەزێنە گەورە نەوتیی و غازییەکان کە لە هەرێمی کوردستان بوونی هەیە، هەناردەکردنی ڕۆژانە 400 هەزار بەرمیل کارێکی سرووشتییە و هەرێم ئەو تواناییەی هەیە کە ساڵی داهاتووی زایینی ئەم ڕێژەیە هەناردە بکات.

ئەو لە درێژەدا ئاماژەی بە تێستی سەرکەوتووانەی هێڵی بۆڕی نەوتی جەیحووندا و گوتی: لە ئێستادا ئەم هێڵە بۆڕە نەوتییە بە تەنیایی توانایی هەناردەکردنی 400 هەزار بەرمیل لە ڕۆژێکدا هەیە و دەتوانێت نەوتی هەرێمی کوردستان ڕاستەوخۆ بە بەندەری جەیحوونی تورکیا بگوازێتەوە.

نوێنەری هەرێمی کوردستان لە تاران گوتیشی: لە ساڵی 2015 ئەم ڕێژەیە دەگاتە یەک میلیۆن بەرمیل. تا پێش دامەزراندنی ئەم هێڵە بۆڕە نەوتییە، هەرێمی کوردستان ڕۆژانە 40 هەزار بەرمیل نەوتی لە ڕێگای تەنکییەکانەوە هەناردە دەکرد.

دەباغ لە درێژەدا ئاماژەی بە ئیرادەی دەوڵەتی هەرێم کرد لە درێژەپێدان بە وەبەرهێنانی سەرمایە لە بەشی نەوت و وزرەدا و گوتی: هەرێم بەنیازە سەرمایەی نوێی لە بواری کارەباشدا دابنێت و دەوڵەتی هەرێمی کوردستان دەیهەوێت کە داهاتی فرۆشی نەوت بکاتە سەرمایە لە پلانەکانی نەوت و بنەڕەتیدا و لەم لایەنەشەوە هەوڵدەدات کە گرفتەکانی خەڵکی هەرێم چارەسەربکات.

ئەو لە درێژەدا سەبارەت بە وتەکانی ئەم دوایانەی قاسم محەمەد نوێنەری پەڕڵەمانی عێراق سەبارەت بە زیادکردنی بەرهەمهێنانی نەوتی عێراق لە ساڵی داهاتوو بۆ زیاتر لە 4 میلیۆن بەرمیل گوتی: ئەو داوایە ڕاست نییە و بە کەمێک دروست بینین بۆمان دەرکەوێت کە ئەم وتەیە ڕاست نییە و دەوڵەتی عێراق ناتوانێت بە درێژایی ساڵێک بەم ڕێژەیە بگات چونکە ئەو ڕێژەیە کە هەرێمی کوردستان لە پڕۆژە نەوتییەکاندا سەرمایەی بۆ دانا دەوڵەت نەیتوانی سەرمایەی بۆ وەگەڕبخات و هۆیەکەی دیکەش ئەوەیە گرینگترین گرفتی عێراق لە ئێستادا دابینکردنی کارەبایە و سەرەکیترین ئەرکی دەوڵەت ئەوەیە کە بە پلەی یەکەم سەبارەت بە چارەسەرکردنی ئەم گرفتە هەنگاوهەڵێنێت و پاشان بە فیکری هەناردەکردنی نەوتی خۆیدا بێت. لە ئێستادا خەڵکی عێراق بە درێژایی شەو و ڕۆژ 12 کاتژمێر کارەبایان هەیە و بۆ دابینکردنی کاتژمێرەکانی دیکە لە ماتۆڕەکانی گازائیلی و نەوتی کەڵک وەردەگرن.

نازم دەباغ هەروەها سەبارەت بە تانەی دانا گاز لە هەرێمی کوردستان بۆ وەرگرتنەوەی قەرزی 400 میلیۆنی خۆی گوتی: بەرپرسانی کوردستان لە ڕێگای ئاژانسەکانی هەواڵەوە ئاگاداری ئەو داوایە بوون و هیوادارن هەر وەکوو ساڵانی ڕابردوو کە ئەم کۆمپانیایە شکایەتی کردبوو لە دەرەوەی دادگا بە دانووستان و ئاشتی پێکبگەن.

 

 

 

 

 

ڕۆژی سێشەممە ‏‏24/12/2013 بەڕێز مسعود بارزانی سەرۆكی هەرێمی كوردستان لە نامەیەكی فەرمیدا بۆ سەرۆكایەتیی ئەنجوومەنی وەزیرانی حكوومەتی هەرێمی كوردستان داوا دەكات لە وردەكاریی ئەو رێوشوێن و‏هەنگاوانە ئاگادار بكرێتەوە كە حكوومەتی هەرێمی كوردستان و حكوومەتی عێراقی فێدراڵ بەمەبەستی بە پارێزگاكردنی ‏هەڵەبجەی شەهید گرتوویانەتەبەر.


لەو نامەیەدا سەرۆك بارزانی بایەخدانی زیاتر بە هەڵەبجەی شەهید و بەپارێزگابوونی دووپات كردووەتەوە و جەختیشی لەسەر دابینكردنی خزمەتگوزاری و كەمكردنەوەی ‏كێشەكانی خەڵكی شەهیدپەروەری هەڵەبجە و دەورووبەری كردووە.

 

 

 

 

لەبارەی ئەو دیمانەیەی كە رۆژنامەی (الحیاة) لەگەڵ سەماحەتی سەید موقتەدا سەدر ئەنجامی داوە، سەرۆك مەسعود بارزانی رێز و خۆشەویستییەكی زۆری بۆ سەماحەتی سەید موقتەدا سەدر و خانەوادە بەڕێز و قوربانیدەرەكەی هەیە، كە پێگەیەكی بەرز و هەڵوێستی مێژوویی بەرچاویان لە خەباتی گەلی عێراقدا هەیە.

هەروەها جەنابی سەرۆك بارزانی شانازییەكی زۆر بە پێگە و رۆڵی گرنگی شاری نەجەفی پیرۆز دەكات، پێشتریش سەردانی نەجەفی کردووە و ئامادەیە و حەزیش دەکات لە زووترین کاتی گونجاودا سەردانی بکات.

د. ئومێد سەباح
گوتەبێژی فەرمی سەرۆكایەتی هەرێمی كوردستان
23/12/2013

 

 

 

 

به‌بۆنه‌ی هاتنه‌وه‌ی جه‌ژنى له‌دایكبوونى حه‌زره‌تى عیساى مه‌سیح (سڵاوى خواى لێ بێت)‌، پیرۆزباییه‌كی گه‌رم ئاراسته‌ی سه‌رجه‌م خوشك و برا مه‌سیحییه‌كان له‌ هه‌رێمى كوردستان و عیراق و جیهان به‌ گشتی ده‌كه‌ین، هیوادارین خوشك و برا مه‌سیحییه‌كان به‌ خۆشی و ئارامی ئه‌م جه‌ژنه‌یان بكه‌نه‌وه.
مه‌سیحییه‌كانى هه‌رێمى كوردستان له‌ دێرزه‌مانه‌وه‌ له‌گه‌ڵ موسڵمان و پێكهاته‌ ئایینییه‌كانی دیكه‌ى كوردستان؛ به‌ برایه‌تی و به‌ ڕێز و خۆشه‌ویستییه‌وه‌ له‌گه‌ڵ یه‌كتر ژیاون و له‌ خۆشی و ناخۆشی و قوربانیدان بۆ هێنانه‌دیی ئازادی و ژیانێكی به‌خته‌وه‌ر به‌شدار بوون، بۆیه‌ بنه‌ماى لێبورده‌یی و یه‌كترقبووڵكردن و برایه‌تی؛ بووه‌ته‌ ڕوویه‌كى پرشنگدار و دیارى هه‌رێمى كوردستان و مایه‌ى سه‌رنجى جیهان.
جارێكی دیكه‌ جه‌ژنى له‌دایكبوونى حه‌زره‌تى عیساى مه‌سیح (سڵاوى خواى لێ بێت)‌،  له‌ هه‌موو خوشك و برایانی مه‌سیحی پیرۆز بێت و هه‌ر له‌ خۆشی و شادیدا بن.

ئه‌نجومه‌نی وه‌زیرانی هه‌رێمی كوردستان.
24ى دیسه‌مبه‌رى 2013

 

 

 

پێشنیوەڕۆی ئەمڕۆ سێشەممە 24ـی 12ـی 2013 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە "ڤووك جێریمیك" وەزیری پێشووی كاروباری دەرەوەی وڵاتی سریبا و سەرۆكی پێشووی كۆمەڵەی گشتیی ڕێكخراوی نەتەوە یەكگرتووەكان كرد.

لە دیدارێكدا وەزیری پێشووی كاروباری دەرەوەی سربیا سوپاس و خۆشحاڵیی خۆی بە سەرۆك بارزانی ڕاگەیاند بۆ ڕەخساندنی ئەو دیدارە و سەردانی بۆ كوردستان و، هاوسۆزی و پاڵپشتیی خۆیشی نیشاندا بەرانبەر نەهامەتییەكان و خەبات و كۆڵنەدانی گەلی كورد بۆ وەرگرتنی ماف و داوا ڕەواكانی. سەرۆكی پێشووی كۆمەڵەی گشتیی نەتەوە یەكگرتووەكان هیوای ئەوەیشی خواست كە گەلی كورد بە مافەكانی شاد ببێت و لەسایەی ئاشتی و پێشكەوتندا بژیێت.

لەبەرانبەردا سەرۆك بارزانی بەخێرهاتنی كرد و سوپاسی هاوسۆزی و هەڵوێستی وەزیری پێشووی كاروباری دەرەوەی سربیای كرد لە مەڕ داوا ڕەواكانی گەلی كورد. لەو دیدارەدا سەرۆك بارزانی كورتەیەكی لە مێژووی نەهامەتی و خەباتی گەلی كورد و دڵڕەقیی نەیاران كوردستان بۆ سەرۆكی پێشووی كۆمەڵەی گشتیی نەتەوە یەكگرتووەكان باس كرد و لە بەشێك لە قسەكانیدا گوتی: "گەلی كورد بە زۆری و بە بێ ویستی خۆی دابەشكراوە و دواتریش بۆ ماوەیەكی زۆر دژایەتیی كراوە و نكۆڵی لە بوونی كراوە. ئەگەر گەلی كورد دەستی بۆ شەڕ بردبێت ئەوە، شەڕی بەسەردا سەپێندراوە و شەڕكردنی لەپێناو پاراستنی ناسنامە نەتەوەییەكەی بووە". هەر پەیوەست بە خەبات و دواڕۆژی گەلی كورد لە ناوچەكەدا سەرۆك بارزانی ئاماژەی بەوەدا كە گەلی كورد لە خەبات و هەوڵدان بۆ مسۆگەركردنی مافەكانی بەردەوام دەبێت و بۆ ئەو مەبەستەش پشت بە دیالۆگ و پەیامی ئاشتیخوازانەی خۆی دەبەستێت. سەرۆك بارزانی لە بەشێكی دیكەی قسەكانیدا ئاماژەی بە مێژووی پێكەوەژیانی گەلی كورد لەگەڵ گەلانی دیكەی ناوچەكە كرد و هەروەها لەبارەی قۆناغی پێكەوەژیان لە شۆڕشی ئەیلوولدا گوتی: " بارزانیی نەمر ئێمەی فێر كرد كە شەڕ و كێشەمان لە گەڵ نەتەوەكاندا نەبێ بەڵكو شەڕمان لەگەڵ حكوومەت و سیستەمە سیاسییە دیكتاتۆر و داگیركارەكاندا بێت".

بارودۆخی سیاسیی ناوچەكە و پەیوەندییەكانی نێوان هەرێم و بەغدا تەوەرێكی دیكەی دانیشتنی نێوان سەرۆكی هەرێمی كوردستان و وەزیری پێشووی كاروباری دەرەوەی سربیا بوو. 

 

 

 

 

 

 

 

 

بە ناوی خوای مەزن و دلۆڤان

بە بۆنەی هاتنەوەی جەژنی لە دایكبوونی حەزرەتی مەسیح (سڵاوی خوای لێ‌ بێت)، جوانترین پیرۆزبایی ئاراستەی سەرجەم خۆشك و برایانی خۆشەویستی مەسیحی لە كوردستان و عێراق و جیهان دەكەم و هیوای جەژنێكی پڕ لە خۆشیان بۆ دەخوازم.

ئێستا کە عێراق لە قۆناخی بونیادنانەوە و ڕاستکردنەوەدایە، یەکێک لە ئەرکە سەرەکییەکان پاراستنی پێکەوەژیان و تەبایی پێکهاتە جیاجیا ئایینی و نەتەوەییەکانە و نابێ ڕێگە بدرێت لەژێر هیچ پاساوێکدا ئەو تەبایی و پێکەوەژیانە تێکبدرێت.

بەداخەوە لەم ساڵانەی دواییدا خوشک و برایانی مەسیحی لە عێراقدا کەوتنە بەر هەڕەشە و نکۆڵیکاری، بەڵام مایەی شانازیمانە کوردستان هەمیشە پەناگە و ماڵێکی ئارام بووە بۆ هەموو پێکهاتەکان و ئەرکی سەرەکیی هەموومانە ئەو پێکەوەژیانە بپارێزین.

هیوادارم ئه‌م جه‌ژنه‌ ببێته‌ مایه‌ی خێروخۆشیی زیاتر بۆ ئێوە و هەموو ساڵێک لە سایەی ئارامی و ئازادی و دیموکراسیدا جەژنەکانتان پیرۆز بکەن.

مسعود بارزانی
سەرۆكی هەرێمی كوردستان
24/12/2013

 

 

 

 

پەڕەى 5 لەکۆى 6 پەڕەدا

دوایین هەواڵەکان

هەواڵی زیاتر لە تویتەر

راپۆرتە پڕ بینەرەکان

حالت های رنگی