سه‌رۆك نێچيرڤان بارزانى سه‌ردانى قه‌ته‌ر ده‌كات

پاشنيوه‌ڕۆى ئه‌مڕۆ شه‌ممه‌ 2021/10/16 به‌ڕێز نێچيرڤان بارزانى، سه‌رۆكى هه‌رێمى كوردستان، به‌ سه‌ردانێكى فه‌رمى به‌ره‌و ده‌وحه‌ى پايته‌ختى قه‌ته‌ر به‌ڕێكه‌وت.

له‌ سه‌ردانه‌كه‌يدا سه‌رۆك نێچيرڤان بارزانى له‌گه‌ڵ به‌ڕێز خاوه‌نشكۆ شێخ ته‌ميم بن حه‌مه‌د ئال سانى، ميرى قه‌ته‌ر و ژماره‌يه‌ك له‌ به‌رپرسانى ديكه‌ى قه‌ته‌رى كۆده‌بێته‌وه‌.

له‌ كۆبوونه‌وه‌كاندا بره‌ودان به‌ په‌يوه‌ندييه‌كانى هه‌رێمى كوردستان و عيراق له‌گه‌ڵ قه‌ته‌ر، دۆخى عيراق و ناوچه‌كه‌ به‌گشتى و چه‌ند پرسێكى جێى بايه‌خى هاوبه‌ش، تاوتوێ ده‌كرێن.

 

https://presidency.gov.krd/president-nechirvan-barzani-visits-qatar/

نازم دەباغ: دەبێت كورد بە وریاییەوە بەرەی ئەمریكا و کەنداو یان ئێران هەڵبژێرێت

نوێنەری حكومەتی هەرێم لە تاران دەڵێت، هەڵبژاردنی ئەمجارە دووبەرە دەركەوتووە بەرەیەكیان ئەوەیە كە دەدرێتە پاڵ ئێران، بەرەیەكی دیكەش ئەوانەن كە دەدرێنە پاڵ ئیمارات و قەتەر و سعودییە و ئەمریكاییەكان، هەوڵێكیش هەیە هاوشێوەی پێشوو كوتلەی گەورە تر دروست بكرێت بەمەش سیناریۆكەی ئەیاد عەلاوی دووبارە دەبێتەوە، كە زۆرترین كورسی بەدەستهێنا بەڵام مالكی حكومەتی پێكهێنا، لەمەشدا كورد دەبێت بە وریایی مامەڵە بكات.

نازم دەباغ، نوێنەری حكومەتی هەرێم لە تاران بە پۆڵەتیك پرێسی راگەیاند: ئەم هەڵبژاردنە بە بڕوای من پرۆسەی دەنگدانەكەی پرۆسەیەكی رێكوپێك بوو، دەكرێت بڵێین یەكەم پرۆسەیە بەمشێوازە بەڕێوەچوو، بەڵام دەمێنێتەوە دواتر چۆن دەنگەكان ژمێردراون، دوای ئەوەی تانە لە ئەنجامی هەڵبژاردنەكە دراوە، ئەگەر كۆمسیۆن بەرەوای نەزانییایە نەدەكەوتە ژماردنی دەستی دەنگەكان، حەشدی شەعبی وەكو بەشێك لەو هێزە چەكدارانەی كە سەر بەلایەنە سیاسییە شیعەكانن، ئەمانە خۆیان بە غەدرلێكراو دەزانن وە لە رووی ژمارەشەوە ژمارەیان دیارە بەڵام ئایا هەموویان دەنگیانداوە یان نا.

نازم دەباغ وتی: من بە ئاسانی نابینم ئەم پرۆسەیە بەڕێگەی چەك چارەسەربكرێت بەڵكو ئەم پرۆسەیە پێویستی بەوەهەیە بەرێگایەكی عاقڵانە و سیاسی چارەسەربكرێت، پێشم وایە هەوڵ و كۆشش هەیە بۆئەوەی بەو رێگایەدا نەڕوات كە كێشەی ناخۆیی لێبكەوێتەوە چونكە بوونی كێشە لەدوای هەڵبژاردن هۆكارێكی دروستبوونی نائەمنییە كە پێم وایە هیچ وڵاتێك لەوانەی خۆیان بە دۆستی عێراق دەزانن پێیان خۆش بێت رێگا بەوە بدەن.

نوێنەری حكومەتی هەرێم لە تاران وتیشی: بەداخەوە لەم هەڵبژاردنە دووبەرە دەركەوتووە بەرەیەكیان ئەوەیە كە دەدرێتە پاڵ ئێران، بەرەیەكی دیكەش ئەوانەن كە دەدرێنە پاڵ ئیمارات و قەتەر و سعودییە و ئەمریكاییەكان، لێرەدا میانگیری كردن ئاسان نییە كە كامیان بەراست دەزانیت و كامیان بە سەركەوتوو دەزانیت، بەڵام لە ئاستی بەربرسیارێتی عێراق و هەرێمیش دەبێت زیرەكانە بیر لە چارەسەركردنی كێشەكان بكەنەوە، بۆئەوەی حەشدی شەعبی رێگایەكی خراپ نەگرێتە بەر كە رێگای چەك و شەڕە.

باسی لەوەشكرد، ئەو ئەزمونەمان هەیە پێشتر كاتێك عەلاوی گەورەترین كوتلەی سەركەوتووبوو، بەڵام ئەو لایەنەی دیكە مالیكی هێناو كوتلەی گەورەیان بۆ دروستكرد و مالكی بوو بە سەرۆكی ئەنجومەنی وەزیران، ئەو سیناریۆیە نزیكە جارێكی دیكە دووبارە ببێتەوە.

روونیشیكردەوە، پێم وایە برێت مەكگۆرك هەمیشە لە رابردوو رۆڵی هەبووە لە هاتنە ناو كێشەكان، بۆ دۆزینەوەی رێگایەك، پێم وایە مەكگۆرگیش یەكێك بێت لەوانەی لایەنگری رێگای سیاسی بێت ، هەریەكە لە ئێران و ئەمریكاش لە هەوڵی ئەوەدان مەترسییەكان كەم بكرێنەوە و كێشەكان چارەسەربكرێن، دەبێت چاوەڕوانی داهاتویش بكەین بزانین چی دەبێت.

ئەوەشی خستە روو، پرۆسەی كۆتایی هاتنی ئەنجامەكانی هەڵبژاردن و پێكهێنانی حكومەتی نوێی عێراق بۆی هەیە درێژە بكێشێت چونكە لەكۆتاییدا ئەگەر رەزامەندی هەمووی لەسەر نەبێت ئەبێت سازانی زۆرینەی لەسەربێت، كە سازانی زۆرینە بۆ كورد مەترسیدارە، بەهۆی ئەوەی ئایا كورد دەكەوێتە كام بەرەیان، ئەزمونی رابردووش ئەوەی دەرخستووەتە هەر بەرەیەك لەو بەرانە وەكو پێویست بە دەنگ كوردەوە نەهاتوون، بۆیە پێویستە سەركردایەتی سیاسی كورد زۆر وریابێت لە پشتیوانی كردن یان چوونە ناو كوتلەی گەورەتر، تەنها بە مەرجی ئەوەنەبێت گرەنتیەكی تەواو بۆ ئاییندەی هەرێمی كوردستان و مافەكانی كورد هەبێت، نەك بە بەڵێن، چونكە چەندین هەڵبژاردن كراوە و تووشی ئەم كێشانە بووین، بەڵێنمان وەرگرتووە و تەنانەت رێككەوتنیش كراوە بەڵام بەداخەوە دواتر لەپێناوی چەند دەستكەوتێك لایەنێك لایەنەكە دیكەی فرۆشتووە، ئومێد دەكەم ئەوە روونەدات.

نازم دەباغ، جەختی كردەوە، باشترین گرەنتی بۆ دابینكردنی مافەكانی گەلی كورد یەكریزی كوردە لە بەغدا، پێم وایە ئەگەر كورد نەتوانێت لەناوخۆدا یەكریزبێت و لە بەغداش یەكدەنگ نەبێت، هەرلایەنێك بە ئامانجی دابین كردنی بەرژەوەندییەكانی خۆی بچێتە بەغدا، ئەمجارە ئەزمونەكەمان لەهەموو كاتێك زیاتر مەترسی لەسەر دەبێت، وە روونتر بیڵێم پێویستە ئەزمونەكەمان نەگۆڕدرێتەوە بە چەند كورسییەك و بەرپرسیارێتییەك كە لەبەغدا وەری بگرن و ئەمەش جێگای پرسیار و زیانگەیاندنە لە ئاییندەی كورد لە بەغدا.

 

https://politicpress.com/70074/

سه‌رۆک نێچیرڤان بارزانی: هه‌مووان براوه‌ن، هه‌موومان یه‌کڕیز، ته‌با و پێکه‌وه‌ بین.

په‌یامی به‌ڕێز نێچیرڤان بارزانی، سه‌رۆکی هه‌رێمی کوردستان به‌بۆنه‌ی سه‌رکه‌وتنی هه‌ڵبژاردنی ئه‌نجومه‌نی نوێنه‌رانی عیراقه‌وه‌:

هاووڵاتييانى خۆشه‌ويست،

هێز و لايه‌نه‌ سياسييه‌كان له‌ هه‌رێمى كوردستان و عیراق

پيرۆزباييى سه‌ركه‌وتنى هه‌ڵبژاردنى گشتيى ئه‌نجومه‌نى نوێنه‌ران له‌ هه‌موو لايه‌ك ده‌كه‌م. ئيتر عيراق و هه‌رێمى كوردستان له‌ قۆناغێكى تازه‌دان‌ و ئه‌نجامه‌كانى كۆتايى هه‌ر چۆن يه‌كلايى ببنه‌وه‌، هه‌مووان براوه‌ن، هه‌موومان پێكه‌وه‌ ده‌بێ خۆمان بۆ ئه‌رك و به‌رپرسياريه‌تيى هاوبه‌ش و ته‌حه‌دييه‌كانى قۆناغى داهاتوو، ئاماده‌ بكه‌ين.

يه‌كڕيزى، ته‌بايى و پێكه‌وه‌يى، كليلى سه‌ركه‌وتنمانه‌ كه‌ ده‌سته‌به‌رى مافه‌ ده‌ستوورييه‌كانى هه‌رێمى كوردستان ده‌كات، ده‌سكه‌وته‌كان و سيستمى فيدراڵى و قه‌واره‌ سياسييه‌كه‌ى ده‌پارێزێت. ئه‌ركى هه‌موو هێز و لايه‌نه‌ سياسييه كوردستانييه‌كانه‌ پێكه‌وه‌، ته‌با و يه‌كڕيز، كار بۆ ئێستا و داهاتوويه‌كى باشتر بۆ هه‌رێمى كوردستان و عيراق بكه‌ين، بۆ ئه‌م مه‌به‌سته‌ش له‌گه‌ڵ هێز و لايه‌نه‌ عيراقييه‌كان هاوكار بين.

ئه‌ركى هه‌موومان له‌ هێز و لايه‌نه‌ سياسييه‌كانى عيراق ئه‌وه‌يه‌ به‌ ڕوانگه‌ و خوێندنه‌وه‌ و تێگه‌يشتنێكى تازه‌ و واقعبينييه‌وه‌، به‌ سوودوه‌رگرتن له‌ ئه‌زموون و هه‌ڵه‌كانى ڕابردوو، له‌سه‌ر بنه‌ماى ده‌ستوور كێشه‌كانى وڵات چاره‌سه‌ر بكه‌ين. كار بۆ عيراقێكى سه‌قامگير و خۆشگوزه‌ران بكه‌ين كه‌ تيايدا مافه ده‌ستوورييه‌كانى هه‌موو پێكهاته‌كان مسۆگه‌ر و پارێزراو بن، متمانه‌، پێكه‌وه‌يی، هاوچاره‌نووسی، هاریکاریی هاوبه‌ش، به‌رژه‌وه‌نديى گشتيى وڵات، هاوبه‌شیی ڕاسته‌قینه‌، سازان و یه‌کسانی، هه‌موومان كۆبكاته‌وه‌.

سوپاسى هاووڵاتييان، هه‌موو هێز و لايه‌نه‌ سياسييه‌كان، داموده‌زگا ئیداری و ئه‌منیيه‌كان، ميديا و كۆمه‌ڵگه‌ی مه‌ده‌نی ده‌كه‌م كه‌ له‌ سه‌رخستنى هه‌ڵبژاردندا هاوكار بوون. سوپاس و ده‌ستخۆشى بۆ ئه‌رك و ماندووبوونى كۆمسيۆنى باڵاى سه‌ربه‌خۆى هه‌ڵبژاردنه‌كانى عيراق، بۆ چاودێرانى ناوخۆيى و بيانى و تيمه‌كانى نه‌ته‌وه‌ يه‌كگرتووه‌كان به‌تایبه‌تی سه‌رۆک و تیمی یوونامی له‌ عیراق و يه‌كێتيى ئه‌ورووپا و كۆمكاری عه‌ره‌بی كه‌ چاودێريى پرۆسه‌ى ده‌نگدانيان كرد و پرۆسه‌كه به‌ ئارامى به‌ڕێوه‌ چوو. ئه‌مه‌ هه‌نگاوێكى گرنگه‌ له‌سه‌ر ڕێگه‌يه‌گى ڕاست. به‌شداريمان له‌ هه‌ڵبژاردنى نوێنه‌رانمان له‌ به‌غدا، پابه‌نديمانه‌ به‌ بنه‌ماكانى ديموكراسييه‌وه‌.

له‌ لايه‌كى ديكه‌وه‌ ڕێژه‌ى به‌شدارى له‌ ده‌نگداندا په‌يامێكى ڕوونى هاووڵاتييانه‌ كه‌ چاويان له‌ ژيان و گوزه‌ر‌ان و خزمه‌تگوزاريى زياتره و مافى خۆيانه‌‌. ئه‌مه‌ بۆ هه‌موومان له‌ حكوومه‌ت و هێز و لايه‌نه‌ سياسييه‌كانى عيراق و هه‌رێمى كوردستان، ده‌بێ په‌ند و وانه‌يه‌ك بێت بۆ پێداچوونه‌وه‌ى جددى و بنياتنانه‌وه‌ى متمانه‌، هه‌روه‌ها ببێته‌ هانده‌رى كار و خزمه‌تى زياتر.

ئيتر كاتى ئه‌وه‌يه‌ پێكه‌وه‌ كار بكه‌ين بۆ دامه‌زراندنی حکوومه‌تێکی نیشتمانيی فيدراڵى که‌ ڕه‌نگدانه‌وه‌ی خواست و‌ چاوه‌ڕوانییه‌کانی هاووڵاتی بێت، ده‌ستوور جێبه‌جێ بكات، دامه‌زراوه‌كانى ده‌وڵه‌ت به‌هێز بكات، گرووپ و هێزه‌ چه‌كداره‌كانى ده‌ره‌وه‌ى ياسا كۆنترۆڵ بكات‌، له‌سه‌ر بنه‌ماى ده‌ستوور و هاوبه‌شيى هه‌موو پێكهاته‌كانى عيراق، پرۆسه‌ى سياسى ڕاست بكاته‌وه و به‌ره‌و داهاتوويه‌كى باشتر بۆ هه‌مووان، وڵات به‌ڕێوه‌ ببات.

هيواى سه‌ركه‌وتن بۆ هه‌مووان ده‌خوازم.

نێچيرڤان بارزانى

سه‌رۆكى هه‌رێمى كوردستان

2021/10/12

سه‌رۆكى هه‌رێمى كوردستان له‌گه‌ڵ نوێنه‌رى تايبه‌تى سكرتێرى گشتيى UN كۆبووه‌‌وه

ئێواره‌ى پێنجشه‌ممه‌ 2021/10/14 به‌ڕێز نێچيرڤان بارزانى، سه‌رۆكى هه‌رێمى كوردستان له‌گه‌ڵ خاتوو جينين پلاسخارت نوێنه‌رى تايبه‌تى سكرتێرى گشتيى نه‌ته‌وه‌ يه‌كگرتووه‌كان له‌ عيراق، كۆبووه‌وه‌.

له‌ كۆبوونه‌وه‌كه‌دا به‌ڕێوه‌چوونى پرۆسه‌ى ده‌نگدان بۆ هه‌ڵبژاردنى ئه‌نجومه‌نى نوێنه‌رانى عيراق و ئه‌نجامه‌كانى، دۆخى عيراق به‌گشتى و پێشبينييه‌كان بۆ داهاتووى پرۆسه‌ى سياسى له‌ وڵات، تاوتوێ كران.

هه‌ردوولا هيوايان خواست ئه‌نجامه‌كانى هه‌ڵبژاردن، دامه‌زراندنى حكوومه‌تێكى لێ بكه‌وێته‌وه‌ كه‌ وه‌ڵامده‌ره‌وه‌ى خواست و هيوا و چاوه‌ڕوانييه‌كانى ته‌واوى پێكهاته‌كان بێت و ئارامى و سه‌قامگيرى و خزمه‌تگوزارى بۆ عيراقييه‌كان دابين بكات، هه‌روه‌ها هاوڕا بوون كه‌ پێويسته‌ هه‌ر تانه‌ و تێبينييه‌ك له‌سه‌ر ئه‌نجامه‌كانى هه‌ڵبژاردن، به‌ ڕێكاره‌ ياسايييه‌كان يه‌كلا بكرێنه‌وه‌.

لاى خۆيه‌وه‌ سه‌رۆك نێچيرڤان بارزانى، سوپاس و ده‌ستخۆشى له‌ خاتوو پلاسخارت و نێرده‌ى نه‌ته‌وه‌ يه‌كگرتووه‌كان له‌ عيراق (يوونامى) كرد بۆ ڕۆڵى به‌رچاويان له‌ چاودێريكردنى پرۆسه‌ى ده‌نگدان و يارمه‌تيدان و پشتگيريكردنى عيراق.

 

https://presidency.gov.krd/the-president-of-the-kurdistan-region-meets-with-the-special-representative-of-the-secretary-general-of-the-united-nations-2/

سەرۆکی حکومەتی هەرێمی کوردستان پێشوازی لە نوێنەری تایبەتی سکرتێری گشتی نەتەوە یەکگرتووەکان لە عێراق دەکات

هەولێر، هەرێمی کوردستان، عێراق (GOV.KRD)- ئەمڕۆ پێنجشەممە ١٤ىئۆکتۆبەری ٢٠٢١مەسرور بارزانی سەرۆکی حکومەتی هەرێمی کوردستان، پێشوازی لە جینین هێنیس-پلاسخارت نوێنەری سکرتێری گشتی نەتەوە یەکگرتووەکانی لە عێراق کرد.
لە کۆبوونەوەکەدا گفتوگۆ دەربارەی دوا پەرەسەندنەکانی عێراق و پرۆسەی هەڵبژاردنی ئەنجومەنی نوێنەران کرا و ڕۆڵی چاودێرانی نێودەوڵەتی و نەتەوە یەکگرتووەکانی لە پشتگیریکردن و سەرخستنی پرۆسەی هەڵبژاردن بەرز نرخاند. هەردوولا خوازیاربوون کە حکومەتی داهاتووی عێراق، حکومەتێکی گشتگیر بێت و بەبێ جیاوازی خزمەتی هەموو پێکهاتەکان و هاووڵاتییانی عێراق بکات.

 

 

 

https://gov.krd/government/the-prime-minister/activities/posts/2021/october/%D8%B3%DB%95%D8%B1%DB%86%DA%A9%DB%8C-%D8%AD%DA%A9%D9%88%D9%85%DB%95%D8%AA%DB%8C-%D9%87%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86-%D9%BE%DB%8E%D8%B4%D9%88%D8%A7%D8%B2%DB%8C-%D9%84%DB%95-%D9%86%D9%88%DB%8E%D9%86%DB%95%D8%B1%DB%8C-%D8%AA%D8%A7%DB%8C%D8%A8%DB%95%D8%AA%DB%8C-%D8%B3%DA%A9%D8%B1%D8%AA%DB%8E%D8%B1%DB%8C-%DA%AF%D8%B4%D8%AA%DB%8C-%D9%86%DB%95%D8%AA%DB%95%D9%88%DB%95-%DB%8C%DB%95%DA%A9%DA%AF%D8%B1%D8%AA%D9%88%D9%88%DB%95%DA%A9%D8%A7%D9%86-%D9%84%DB%95-%D8%B9%DB%8E%D8%B1%D8%A7%D9%82-%D8%AF%DB%95%DA%A9%D8%A7%D8%AA/

هەولێر پەیامێکی دڵنیایی دەداتە تاران

 هه‌رێم پەیامی بۆ ئێران ناردووە، بەهیچ شێوەیەک رێگە نادەن خاکی هەرێم بۆ هێرشکردنە سەر ئێران بەکاربهێنرێت

بوارنيوز، تايبه‌ت // 
حکومەتی هەرێمی کوردستان پەیامێکی دڵنیایی ئاراستەی حکومەتی ئێران کردووە، کە پەیوەندی بە هەڕەشەکانی ئەم دواییەی تارانەوە بۆ سەر پارتە کوردییەکانی رۆژهەڵاتی کوردستانەوە هەیە.
بەپێی ئەو زانیارییانەی لەسەرچاوەیەکی ئاگادارەوە دراوە بەبوارنیوز، حکومەتی هەرێمی کوردستان لەماوەی رابردوو لەڕێگەی پەیوەندییەکانی خۆیەوە پەیامی ئەوەی بۆ حکومەتی ئێران ناردووە، بەهیچ شێوەیەک رێگەنادەن خاکی هەرێمی کوردستان بۆ هێرشکردنە سەر ئێران بەکاربهێنرێت.
ئەم پەیامەی حکومەتی هەرێمی کوردستان لەکاتێکدایە، لەماوەی رابردوو حکومەتی ئێران چەند جارێک پەیامی هۆشداری‌و هەڕەشەی ئاراستەی هەولێر کرد، بەوەی چیتر قبووڵ ناکات، پارتە کوردییەکانی رۆژهەڵاتی کوردستان لەناو خاکی هەرێم بارەگای سەربازی‌و چالاکی چەکداریان هەبێت.
هەر بەپێی زانیارییەکان لەدوای هەڕەشەکانی ئێران، حکومەتی هەرێمی کوردستان دەستی بەگفتوگۆ لەگەڵ لایەنە کوردییەکانی رۆژهەڵاتی کوردستان کردووەو داوای لێکردوون، نابێت بەهیچ شێوەیەک خاکی هەرێمی کوردستان بۆ هێرشکردنە سەر ئێران بەکاربهێنن.
لەو بارەوە بوارنیوز پەیوەندی بە نازم دەباغ نوێنەری حکومەتی هەرێم لەتاران کردو ناوبراو لەمیانی لێدوانێکی پشتراستیکردەوە، حکومەتی هەرێم دڵنیایی داوەتە حکومەتی ئێران، چیتر رێگە بەچالاکی لایەنە کوردییەکان نادات.
نازم دەباغ وتیشی: پەیامەکەی حکومەتی هەرێم ئەوە بووە، ئەوان ئیدانەی هەر هێرشێک دەکەن لەخاکی هەرێمەوە بکرێتە سەر ئێران‌و هەموو هەوڵێکی خۆشیان دەدەن، خاکی هەرێم بۆ هێرشکردنە سەر ئێران بەکارنەهێنرێت.
لەبارەی هۆکاری هەڕەشەکانی ئەم دواییەی لایەنی ئێرانی نازم دەباغ وتی: ئێران جاری یەکەم نییە هەڕەشە دەکات‌و جاری کۆتایش نابێت، بەتایبەتی کاتێک ئەو پارتە کوردییانە چالاکییەکانیان زیاد دەکەن.
نوێنەری حکومەنی هەرێم لەتاران جەختیکردەوە، دەبێت پارتە کوردییەکانیش ئەوە بزانن، نابێت خاکی هەرێم بۆ هێرش بەکاربهێنن‌و وتیشی: لەسەر هەردوو حکومەتی هەرێم‌و ئێرانیشە، کە پارێزگاری لەسنوورەکانیان بکەن، بەتایبەتی سنوورە هاوبەشەکانیان.
لەبارەی هەڵوێستی لایەنە کوردییەکان لەسەر هەڕەشەکانی ئێران‌و وەڵامیان بۆ پەیامەکەی حکومەتی هەرێم، نازم دەباغ وتی: ئەوەندەی من زانیاریم هەبێت، هەڵوێستی لایەنە کوردییەکانی رۆژهەڵاتی کوردستان ئەرێنی بووەو ئەو پەیامەیان بەهەولێر داوە، هەوڵ دەدەن کۆنتڕۆڵی هێزە چەکدارییەکانیان بکەن.
ساڵانێکە چەند پارت‌و لایەنێکی رۆژهەڵاتی کوردستان لەناو خاکی هەرێمی کوردستان بارەگایان هەیەو بەردەوامیش ئەوە لایەنی ئێرانی نیگەران کردووە، بۆیە هەمیشە فشار لەحکومەتی هەرێم دەکات، کە رێگە بەبوونی ئەو بارەگایانە نەدات لەسەر خاکەکەی.

 سەرچاوە : https://www.facebook.com/103964691628391/posts/264433532248172/ 

سەرۆکى هەرێمى کوردستان پێشوازى لە باڵیۆزى قەتەر کرد

ئێوارەى ئەمڕۆ پێنجشەممە 2021/9/30 بەڕێز نێچیرڤان بارزانى، سەرۆکى هەرێمى کوردستان، پێشوازى لە بەڕێز خالد بن حەمەد ئەلسولەیتى، باڵیۆزى قەتەر لە عیراق کرد.

لە دیدارێکدا برەودان بە پەیوەندییەکانى عیراق و هەرێمى کوردستان لەگەڵ قەتەر، بەتایبەتى لە بوارى ئابوورى و بازرگانیدا و هاندانى سەرمایەگوزارى و وەبەرهێنانى قەتەرى لە بوارە جیاکاندا لە عیراق و هەرێمى کوردستان خرانە بەر باس.

کۆنفرانسى بەغدا بۆ هاریکارى و هاوبەشى، گرنگیى پەیوەندییەکانى عیراق لەگەڵ وڵاتانى دراوسێ و ناوچەکە، هەڵبژاردنەکانى داهاتووى عیراق و چەند پرسێکى دیکەى جێى بایەخى هەردوولا، تەوەرێکى دیکەى دیدارەکە بوو.

 

سەرۆکی حکومەتی هەرێمی کوردستان پێشوازی لە شاندێکی پەرلەمانتارانی سوید دەکات

 هەولێر، هەرێمی کوردستان، عێراق (GOV.KRD)- ئەمڕۆ یەکشەممە 3ی ئۆکتۆبەری 2021 مەسرور بارزانی سەرۆکی حکومەتی هەرێمی کوردستان، پێشوازی لە شاندێکی پەرلەمانتارانی سوید کرد کە پێکهاتبوو لە هاکان سڤنلینگ و یاسمین بۆسیۆ.
لە کۆبوونەوەکەدا، دوایین پەرەسەندنەکانی هەرێمی کوردستان و پرۆسەی هەڵبژاردنەکانی ئەنجومەنی نوێنەرانی عێراق تاووتوێ کرا.
ڕەوشی پێکهاتەکانی هەرێمی کوردستان و گرنگیی جێبەجێکردنی ڕێککەوتننامەی شنگال و بارودۆخی ئاوارە و پەنابەران و زەمینەخۆشکردن، بۆ گەڕانەوەی ئارەزوومەندانەیان بۆ ناوچەکانیان ، تەوەرێکی دیکەی گفتوگۆکانی کۆبوونەوەکە بوو .



 

سەرۆکی حکومەتی هەرێمی کوردستان پێشوازی لە بەرپرسی ئۆفیسی یەکێتیی ئەوروپا دەکات

 هەولێر، هەرێمی کوردستان، عێراق (GOV.KRD)- ئەمڕۆ یەکشەممە 3 ی ئۆکتۆبەری 2021 مەسرور بارزانی سەرۆکی حکومەتی هەرێمی کوردستان، پێشوازی لە ماری پارێ بەرپرسی ئۆفیسی یەکێتیی ئەوروپا لە هەرێمی کوردستان کرد.
لە دیدارەکەدا، سەرۆکی حکومەت، پیرۆزبایی دەستبەکاربوونی لە بەرپرسی ئۆفیسی یەکێتیی ئەوروپا کرد و هیوای سەرکەوتنی بۆ خواست لە ئەرکی نوێیدا.
سەرۆکی حکومەت، ئاماژەی بە چاکسازییەکانی کابینەی نۆیەمی حکومەتی هەرێمی کوردستان کرد لە هەمەجۆرکردنی سەرچاوەکانی داهات و بنیاتنانی ژێرخانێکی بەهێزی ئابووری و کارکردن لە پێناو خزمەتکردنی زياتری هاووڵاتییان و ئەنجامدانی پڕۆژەی گرنگ و ستراتیجی لە سەرجەم ناوچەکانی هەرێمی کوردستان بە بێ جیاوازی .
بەرپرسی ئۆفیسی یەکێتیی ئەوروپا لە هەرێمی کوردستان، ئامادەیی یەکێتیی ئەوروپای بۆ هاوکاریکردن و هەماهەنگیکردن لە گەڵ حکومەتی هەرێمی کوردستان و پەرەپێدانی هەمەلایەنەی پەیوەندییەکان دەربڕی.
هەڵبژاردنەکانی ئەنجومەنی نوێنەرانی عێراق و میکانیزمەکانی چاودێریکردنی پرۆسەی هەڵبژاردن و پەیوەندییەکانی نێوان هەرێمی کوردستان و حکومەتی فیدراڵی، تەوەرێکی دیکەی گفتوگۆکان بوو.



 

سەرۆک نێچیرڤان بارزانى لەگەڵ شاندێکى ئەمەریکى کۆبووەوە

نیوەڕۆى رۆژی پێنجشەممە 2021/9/30 بەڕێز نێچیرڤان بارزانى، سەرۆکى هەرێمى کوردستان، پێشوازى لە خاتوو جینیفەر گاڤیتۆ، جێگرى یاریدەدەرى وەزیرى دەرەوەى ئەمەریکا بۆ کاروبارى عیراق و ئیران و شاندێکى یاوەرى کرد.

لە کۆبوونەوەیەکدا پەیوەندییەکانى هەرێمى کوردستان و عیراق لەگەڵ ئەمەریکا تاوتوێ کران و لەمبارەیەوە خاتوو گاڤیتۆ دووپاتى کردەوە کە ئەمەریکا بە بایەخەوە لە عیراق دەڕوانێت و پەیوەندیى ئەمەریکا لەگەڵ عیراق و هەرێمى کوردستان پەیوەندیى دۆستانە و هاوبەشییەکى ستراتیژیى درێژخایەنە کە چەندین بوار دەگرێتەوە، هەروەها سەقامگیریى عیراقى بۆ پاراستنى سەقامگیریى ناوچەکە بە گرنگ و پێویست زانى، هەردوولاش هاوڕا بوون کە سەردانەکە بۆ نیشاندانى بایەخدانى ئەمەریکا بە عیراق و هەرێمى کوردستان، گرنگ و لە کاتى خۆیدایە.

خاتوو گاڤیتۆ پابەندیى ئەمەریکاى بە بەردەوامیى پشتگیرى لە چاکسازییەکانى وەزارەتى پێشمەرگە و ڕێکخستنەوەى هێزەکانى دووپات کردەوە و ئاماژەى بەوە دا کە ئەمەریکا لە بوارەکانى دیکەى ئاسایش، وزە، ئابوورى، کولتوورى پەروەردەییشدا دەتوانێت هاوکار و هاوبەشى هەرێمى کوردستان بێت، هەروەها ئاماژەى بە سەردانێکى بۆ قەڵاى هەولێر و بینینى پرۆسەى نۆژەنکردنەوەى قەڵا کرد، جەختیشى لەوە کردەوە کە هانى وەبەرهێنانى ئەمەریکى لە هەرێمى کوردستان دەدەن، بەتایبەتى لە ڕێگەى دامەزراوەى DFCى ئەمەریکییەوە کە پشتگیریى دارایى دەداتە پرۆژەکانى وەبەرهێنان.

لاى خۆیەوە سەرۆک نێچیرڤان بارزانى، وێڕاى پیرۆزبایى لە خاتوو گاڤیتۆ بۆ دەستبەکاربوونى لە پۆستى تازەیدا، سوپاسى بەردەوامیى پشتگیریى ئەمەریکاى لە عیراق و هەرێمى کوردستان کرد و جەختى لە خواستى هەرێمى کوردستان بۆ برەودان بە پەیوەندییەکانى لەگەڵ ئەمەریکا و فراوانکردنى بوارەکانى هاریکاریى نیوانیان کردەوە، هەروەها ئاماژەى بە دەرفەتى زیاترى کار و سەرمایەگوزارى و وەبەرهێنانى ئەمەریکى لە عیراق و هەرێمى کوردستان کرد.

هەردوولا باسیان لە هەڵبژاردن و ئامادەکارییەکانى کرد و جەختیان لە گرنگیى بەڕێوەچوونێکى سەرکەوتووانەى هەڵبژاردن کردەوە. لەمبارەیەوە سەرۆک نێچیرڤان بارزانى هیواى خواست هەڵبژاردن دەرفەتێکى دیکە بداتە هەموو هێز و لایەنە عیراقییەکان بۆ پێکەوە کارکردن و جێبەجێکردنى دەستوور و سیستمى فیدراڵى.

دیالۆگى ستراتیژیى عیراق و ئەمەریکا، دوایین پێشهاتە سیاسى و ئەمنییەکانى عیراق، ئاڵنگارییەکانى بەردەم وڵات، مەترسییەکانى تیرۆر، هەڕەشە و کردارەکانى داعش لە عیراق و ناوچەکە، ئەرکى هاوپەیمانیى نێودەوڵەتى لە عیراق، پەیوەندییەکانى هەولێر ـ بەغدا و چەند پرسێکى جێى بایەخى هاوبەش، تەوەرێکى دیکەى کۆبوونەوەکە بوو کە بەڕێز کونسوڵى گشتیى ئەمەریکا لە هەرێمى کوردستان، ئامادەى بوو.

 

پەڕەى 1 لەکۆى 165 پەڕەدا

هەواڵی زیاتر لە تویتەر

راپۆرتە پڕ بینەرەکان

حالت های رنگی