فه‌ره‌نسا، جه‌خت له‌ پشتگيريى هه‌رێمى كوردستان ده‌كاته‌وه‌

ئێواره‌ى رۆژی یەکشەممە 29/8/2021 به‌ڕێز نێچيرڤان بارزانى، سه‌رۆكى هه‌رێمى كوردستان له‌ نووسينگه‌ى خۆى له‌ هه‌ولێر، له‌گه‌ڵ به‌ڕێز مه‌سروور بارزانى، سه‌رۆك وه‌زيرانى هه‌رێمى كوردستان و خاتوو ڕێواز فايه‌ق سه‌رۆكى په‌رله‌مانى كوردستان، پێشوازى له‌ به‌ڕێز ئيمانوێل ماكرۆن سه‌رۆكى فه‌ره‌نسا و شاندى ياوه‌رى كرد.

له‌ كۆبوونه‌وه‌يه‌كدا، بارودۆخی گشتيی عێراق و ناوچەکە، كۆنگره‌ى هاريكارى و هاوبه‌شى له‌ به‌غدا كه‌ دوێنێ به‌ به‌شداريى ژماره‌يه‌ك له‌ سه‌ركرده‌ و به‌رپرسانى باڵاى وڵاتانى دراوسێ عيراق و ناوچه‌كه‌ و سه‌رۆك ماكرۆن به‌ڕێوه‌ چوو، پەرەپێدانی پەیوەندییەکانی هەرێمی کوردستان و فەرەنسا و بواره‌كانى هاريكاريى هاوبه‌ش، مه‌ترسييه‌كانى تيرۆر و هه‌ڕه‌شه‌كانى داعش و به‌ره‌نگاربوونه‌وه‌ى، هه‌ڵبژاردنه‌كانى داهاتووى عيراق، دۆخى سووريا و پرسى كورد له‌وێ، تاوتوێ كران.

سەرۆک ماكرۆن وێڕاى ئاماژه‌ به‌ په‌يوه‌ندييه‌ له‌مێژينه‌كانى فه‌ره‌نسا و گه‌لى كوردستان، بەردەواميی پشتگیری و هاوکاریی وڵاتەکەی بۆ هەرێمی کوردستان دووپات کردەوه‌، هه‌روه‌ها ستايشى هه‌رێمى كوردستان و ڕۆڵى پێشمه‌رگه‌ و سه‌رۆك مه‌سعوود بارزانى لە تێکشکاندنی داعشدا کرد.

لە كۆبوونه‌وه‌كه‌دا ستایشی پشتگیریى به‌رده‌وامى فه‌ره‌نسا له‌ هەرێمی کوردستان كرا و جه‌خت لە گرنگیی كاركردن و هەماهەنگی له‌گه‌ڵ فه‌ره‌نسا و كۆمه‌ڵگه‌ى نێوده‌وڵه‌تى كرايه‌وه‌ بۆ چاره‌سه‌ركردنى كێشه‌كانى عێراق بەگشتی و کێشەكانى هەرێمی کوردستان و حکوومەتی فیدراڵی عيراق بەتایبەتی، هەروەها ڕۆڵی ئەرێنيی فەرەنسا و هه‌وڵه‌كانى له‌پێناو ئاسایش و سه‌قامگيريى ناوچه‌كه‌دا، بەرز هه‌ڵسه‌نگێنرا.

دۆخى ئاواره‌ و په‌نابه‌ران و پێكهاته‌كان له‌ هه‌رێمى كوردستان و عيراق، گرنگیی جێبەجێکردنی ڕێککەوتنی شه‌نگال و زەمینەخۆشکردن به‌مه‌به‌ستی گەڕانەوەی ئاوارەکان بۆ ناوچەکانیان، ته‌وه‌رێكى ديكه‌ى كۆبوونه‌كه‌ بوو كه‌ تيايدا به‌ڕێزان جێگرانى سه‌رۆكى هه‌رێمى كوردستان، جێگرى سه‌رۆك وه‌زيران و ژماره‌يه‌ك له‌ به‌رپرسان و به‌رپرسى فه‌رمانگه‌ى په‌يوه‌ندييه‌كانى ده‌ره‌وه‌ و نوێنه‌رى حكوومه‌تى هه‌رێمى كوردستان له‌ فه‌ره‌نسا، له‌ لايه‌نى فه‌ره‌نسيش به‌ڕێز وه‌زيرى ده‌ره‌وه و ژماره‌يه‌ك له‌ به‌رپرسان و ڕاوێژكارانى ديپلۆماسى و سه‌ربازى و باڵيۆزى فه‌ره‌نسا له‌ به‌غدا و كونسوليى گشتيى فه‌ره‌نسا له‌ هه‌رێمى كوردستان، به‌شدار بوون.

دواى كۆبوونه‌وه‌كه‌ش هه‌ردوو سه‌رۆك نێچيرڤان بارزانى و ئيمانوێل ماكرۆن، له‌ لێدوانێكى ڕۆژنامه‌وانيى هاوبه‌شدا بۆ ڕۆژنامه‌نووسان، باسيان له‌ ناوه‌ڕۆكى كۆبوونه‌وه‌كه‌ كرد. سه‌رۆك نێچيرڤان بارزانى گوتى:

ئێواره‌تان باش،

خۆشحاڵین كه‌ لە هەولێر پێشوازی لە سەرۆک ماکرۆن دەکەین. به ‌ناوى گه‌لى كوردستانه‌وه‌ به‌ گه‌رمى به‌خێرهاتنی جه‌نابتان ده‌كه‌ین بۆ عێراق و هه‌رێمی كوردستان.

جه‌نابى سەرۆک زۆر به‌ خێر بێن.

له‌ كۆبوونه‌وه‌كه‌ماندا ئه‌مڕۆ باسمان لە په‌يوه‌ندييه‌كانی هەردوولا کرد، دۆخى سياسى و ئه‌منى له‌ عيراق و هه‌رێمى كوردستان و هه‌ڵبژاردنه‌كانى داهاتووى عيراقمان تاوتوێ کرد. ده‌رباره‌ى دوايين پێشهاته‌كانى ناوچه‌كه‌ به‌گشتى و پێشبينييه‌كان بۆ داهاتوو، بيروڕامان گۆڕييه‌وه‌. جه‌ختمان كرده‌وه‌ له‌ بره‌ودان به ‌په‌يوه‌ندييه‌كانمان و فراوانكردنى هاوبەشی و هاريکاری و به‌رده‌واميى پشتگيريى فه‌ره‌نسا بۆ عيراق و هه‌رێمى كوردستان له‌ شه‌ڕى دژى تيرۆردا.

له‌م دۆخه‌ هه‌ستياره‌دا و له‌ كاتێكدا کە عێراق بەرەو پێنجەمین خولی هەڵبژاردنی نیشتمانی دەڕوات، سه‌ردانى سه‌رۆك ماكرۆن بۆ به‌غدا و هه‌ولێر زۆر مانابه‌خشه‌ و په‌يامێكى ڕوونى به‌رده‌واميى پشتگيريى فه‌ره‌نسايه‌ بۆ پرۆسەی دیموکراسی لە عيراق و هه‌رێمى كوردستان. ئێمه‌ به‌ پێزانين و بايه‌خێكى زۆره‌وه‌ له‌م سه‌ردانه‌يان ده‌ڕوانين.

جەنابی سەرۆك، ئێوە ڕۆڵی سەرەكی و یەكلاكەرەوەتان هەبوو لە كۆكردنەوەی سەركردەكان و ئەنجامدان و سەرخستنی كۆنگرەی لووتكەی بەغدا. زۆر سوپاس بۆ ئەم دەستپێشخەرییە گرنگە و بۆ پشتگیریی جەنابتان لە عیراق. هیوادارین ئەنجامى كۆنگرەكە ببنە هۆی سەقامگیری و ئارامی بۆ عیراق و ناوچەكە بە شێوه‌یه‌كی گشتی و بە بەردەوامیی هەوڵ و پشتگیریی جەنابتان، ناكۆكی و كێشەكانی ناوچەكە، هیوادارین چارەسەر ببن.

وەک بیرهێنانەوەیەکی پێویست، زۆر سوپاسى هه‌ڵوێست و ڕۆڵى سه‌رۆك ماكرۆن ده‌كه‌م له‌ چاره‌سه‌ركردنى ئاڵۆزييه‌كانى پاييزى 2017 له‌گه‌ڵ به‌غدا و كردنه‌وه‌ى ده‌رگای گفتوگۆى سياسى و ديپلۆماسى به‌ڕووى هه‌رێمى كوردستاندا‌. به‌ هاوكاريى جه‌نابيان، هه‌ولێر و به‌غدا گفتوگۆيان ده‌ست پێكرده‌وه‌ و لێكگه‌يشتن و ئارامى دروست بوو.

ئێمه‌ له‌ عيراق پێويستيمان به ‌يارمه‌تييه‌ بۆ به‌ره‌نگاربوونه‌وه‌ى داعش كه‌ هێشتا له‌ عيراق و ناوچه‌كه‌ و له‌ جيهانيش، مه‌ترسييه‌كى ڕاسته‌قينه‌يه‌. پێويستيمان به‌ يارمه‌تى بۆ چەسپاندنی سه‌قامگيرى، بۆ به‌هێزكردنى ديموكراسى و کاراکردنی دامه‌زراوه‌كانى ده‌وڵه‌ت، بۆ چاكسازى و پێشكه‌وتن، بۆ به‌شدارى و هاوبه‌شيى پێكهاته‌كان له‌ ده‌سه‌ڵات و به‌ڕێوه‌بردنى وڵاتدا هه‌یه‌، بۆ پته‌وكردنى پێكه‌وه‌ژ‌يان و بۆ ئه‌وه‌ى هه‌موو پێكهاته‌كان به‌تايبه‌تى كريستيان و ئێزدييه‌كان هه‌ست به‌ متمانه‌ و دڵنيايى بكه‌ن له‌م وڵاته‌دا.

بۆیە چاومان له‌ به‌رده‌واميى كارى پێكه‌وه‌يى و پشتگيريى فه‌ره‌نسايه‌ وه‌ك هێزێكى كاريگه‌ر و ئه‌ندامى هه‌ميشه‌يى له‌ ئه‌نجومه‌نى ئاسايشى نێوده‌وڵه‌تى كه‌ پێگه‌ و ڕۆڵێكى‌ كارا‌ى هه‌يه‌ لەسەر ئاستی جیهان له‌ به‌ره‌نگاربوونه‌ى تيرۆر و كاريگه‌رييه‌كانى گۆڕانى كه‌شوهه‌وا.

له‌ بواره‌كانى ئابوورى و وزه‌ و بازرگانى، كولتووری، ئەكادیمی و زانستی و پێویستییەکانی دیكه‌ی وڵاتدا، عيراق و هه‌رێمى كوردستان ده‌توانن هاوبه‌شێكى باشی فه‌ره‌نسا بن. كۆمپانيا فه‌ره‌نسييه‌كان ده‌توانن به‌شداريى به‌هێز بكه‌ن له ‌په‌ره‌پێدان و پێشخستنى كار و پرۆژه‌كاندا له‌ هه‌رێمی كوردستان و عیراق و ده‌توانن وه‌به‌رهێنان و سه‌رمايه‌گوزارى بكه‌ن، لەمباره‌يەشەوە هه‌موو پشتگيرى و ئاسانكاری له‌ هه‌رێمى كوردستدا دابین ده‌كرێت.

دووباره‌ جه‌نابى سه‌رۆك زۆر به‌ خێر بێی بۆ هه‌رێمی كوردستان و عێراق.

مێرسى.

پاشان سه‌رۆك ماكرۆن له‌ لێدوانه‌كه‌يدا گوتى:

سوپاس.. زۆر سوپاس بۆ ئەم گفتوگۆیە، لەگەڵ جەنابتان و سەرۆکی پەرلەمان و سەرۆک وەزیران و جێگرانی سەرۆکی هەرێم. زۆر سوپاس بۆ هەموو لایەک. بە ڕاستی بەلامەوە گرنگ بوو کە لەگەڵ ئێوەدام و خۆشحاڵیشم لە هەولێرم.

دۆستایەتییەکی تایبەتی لەنێوان فەرەنسا و کوردستاندا هەیە. گەلی کورد دۆستایەتییەکی بەهێزی لەگەڵ گەلی فەرەنسا هەیە. ئەم پەیوەندییە کۆمەڵایەتی و کولتوورییە خۆی هەبوو، بەتایبەتیش کاتێک سەربازانی ئێمە هاتنە ئێرە و هاوشانی هێزی پێشمەرگە و ئاسایشی عێراق بوون و هاوئاهەنگییان کرد، ئەو پەیوەندییانە بەهێزتر بوون.

دەتوانم بڵێم سەربازانمان لەگەڵ هەسەدەش ڕۆڵێکی باشیان گێڕا. ئەمڕۆ جارێکی دیکە هاوسۆزیی گەلی فەرەنسام بۆ سەرۆک بارزانی دووپات کردەوە و دڵنیاییم دا لە بەردەوامبوونمان لە هاوکاریکردن لە شەڕی دژی داعش، بۆئەوەی داعش لە سنوورەکانی عێراق و سووریا سەرهەڵنەداتەوە، چونکە ئەم شەڕە پەیوەندیدارە بە ئاسایشی هەرێمی کوردستان و عێراق و ناوچەکە و ئەورووپاش.

هەرێمی کوردستان جوامێریی پیشاندا بەرامبەر بەو ئاوارە و پەنابەرانەی لە سووریا و ناوچەکانی دیکەی عێراقەوە لە ئێزدی و سوورییەکان ڕوویان لە ناوچەکە کرد. فەرەنساش لەگەڵ ئێوەدا بوو لە یارمەتیدانی ئاوارەکان. فەرەنسا جوامێر بوو لەو هاوکاریکردنە و لە ڕۆژانی داهاتووشدا هاوکاریی حکوومەت دەگەیه‌نێتە نەخۆشخانەی قوربانییانی کیمیابارانی هەڵەبجە. لەمبارەیەوە هاوئاهەنگیمان بەردەوام دەبێت.

دوێنێش بۆ سەرۆک وەزیرانی عێراق دووپاتم کردەوە کە پێویستە پەیوەندییەکانمان بە ئاراستەی بەرژەوەندیی خەڵک بێت، بەتایبەتیش هەموو هەوڵێک بدەین لەپێناو ئاوارە و پەنابەرانی ئێرەدا. لە بابەتی شنگالیشدا هەرێمی کوردستان لەسەر هێل بوو، جا لەگەڵ حکوومەتی عێراقیش بە هەموومان لە هەوڵی دروستکردنی زەمینەیەکی وەهاین کە ئەو خەڵکە بگەڕێنینەوە زێدی خۆیان. بۆ کریستیانەکانیش بە هەمان شێوە، ئەوەی لەدەستمان بێت ئەنجامی دەدەین بۆ گەڕانەوەیان. لە بابەتی ڕۆژئاڤاش بە هەمان شێوە لەگەڵتان دەبین بۆ ئەوەی ئەو خەڵکە بگەڕێتەوە سەر زێدی خۆی. بەگشتییش گرنگە کەشێکی ئاشتەوایی لە ناوچەکەدا دروست بکەین. ئێمە لەگەڵ سەقامگیریی ناوچەکەداین و لەگەڵ ئەوەداین ئاشتی بەدەست بهێندرێت.

گرنگە ئەکتەرەکانی ئەو ناوچەیە بۆ ئەم مەبەستە پێكه‌وه‌ کار بکەن، ئەوانەی دوێنێ لە کۆنفرانسەکەدا بەشدار بوون، سەرۆک وەزیرانی عێراق و بەرپرسانی دیکەی وڵاتان، بە گرنگییەوە هاوئاهەنگی بۆ بەرەنگاربوونەوەی تیرۆر بکرێت و ڕۆڵی کوردیش لەبەرچاو بگیرێت کە ئێوە ڕۆڵێکی گرنگتان لەم بوارەدا هەیە. زۆر خۆشحاڵ بووین کە ئەمڕۆ لەگەڵ سەرۆک نێچیرڤان بارزانی و سەرۆک وەزیران مەسروور بارزانی کۆبووینەوە.

لە ماوەیەکی نزیکیشدا لەگەڵ هێزەکانی پێشمەرگە کۆدەبمەوە، دەمەوێت دڵنیاتان بکەمەوە لە وەفای فەرەنسا بۆ ئێوە و دۆستەکانی، بەگشتی بۆ کوردەکان.

زۆر سوپاس سەرۆکی هەرێم. زۆر سوپاس بۆ ئێوه‌.

 

سه‌رۆك ماكرۆن گه‌يشته‌ هه‌ولێر

هه‌ولێر 2021/8/29

دره‌نگانى شه‌وى ڕابردوو به‌ڕێز ئيمانوێل ماكرۆن، سه‌رۆكى فه‌ره‌نسا گه‌يشته‌ هه‌رێمى كوردستان و له‌ ڕێوڕه‌سمێكدا له‌ فڕۆكه‌خانه‌ى نێوده‌وڵه‌تيى هه‌ولێر له‌لايه‌ن به‌ڕێز نێچيرڤان بارزانى، سه‌رۆكى هه‌رێمى كوردستانه‌وه‌ پێشوازى لێكرا.

دواى به‌خێرهێنان، سه‌رۆك نێچيرڤان بارزانى، تا شوێنى حه‌وانه‌وه‌ى، ياوه‌ريى سه‌رۆك ماكرۆنى كرد و ئه‌مڕۆ يه‌كشه‌ممه‌ 2021/8/29 ديدار و كۆبوونه‌وه‌كانى له‌ هه‌ولێر به‌ڕێوه‌ ده‌چن.

https://presidency.gov.krd/president-macron-arrived-in-erbil/

پەیامی سەرۆکی حکومەتی هەرێمی کوردستان لە ساڵیادی ئەنفالی بادینان

هەولێر، هەرێمی کوردستان، عێراق ( GOV.KRD )- لە سی و سێیەمین ساڵیادی ئەنفالی بادیناندا، بە ڕێز و شکۆوە یادی قوربانییانی ئەو تاوانە دڕندانەیە دەکەینەوە، کە لە دوا قۆناغی شاڵاوی بەدناوی ئەنفالدا، ڕژێمی بەعسی عێراق، پرۆسەی ئەنفالکردنی دەڤەری بادینانی دەست پێکرد و لە ئەنجامدا، هەزاران مرۆڤی بێتاوانی لە پێکهاتە جیاوازەکانی ناوچەکە، شەهید و بێسەروشوێن کرد، سەدان گوندی وێران و دەیان هەزار کەسیشی ئاوارە و دەربەدەر کرد.

لەم یادە خەمناکەدا، جارێکی دیکە جەخت دەکەینەوە، کە پێویستە حکومەتی عێراق، قەرەبووی کەسوکاری قوربانییانی تاوانی جینۆسایدی ئەنفال بکاتەوە، لە هەوڵەکانیشمان بەردەوام دەبین بۆ بەجینۆسایدناساندنی ئەنفال لەلایەن کۆمەڵگەی نێودەوڵەتی. هەروەها حکومەتی هەرێمی کوردستان، پابەندبوونی خۆی بە خزمەتکردنی زیاتری کەسوکاری شەهیدان و ئەنفالکراوان دووپات دەکاتەوە.
دروود بۆ گیانی پاکی قوربانییانی جینۆسایدی ئەنفال و سەرجەم شەهیدانی کوردستان.

مەسرور بارزانی
سەرۆکی حکومەتی هەرێمی کوردستان

25 ئاب 2021
 
https://gov.krd/government/the-prime-minister/activities/posts/2021/august/%D9%BE%DB%95%DB%8C%D8%A7%D9%85%DB%8C-%D8%B3%DB%95%D8%B1%DB%86%DA%A9%DB%8C-%D8%AD%DA%A9%D9%88%D9%85%DB%95%D8%AA%DB%8C-%D9%87%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86-%D9%84%DB%95-%D8%B3%D8%A7%DA%B5%DB%8C%D8%A7%D8%AF%DB%8C-%D8%A6%DB%95%D9%86%D9%81%D8%A7%D9%84%DB%8C-%D8%A8%D8%A7%D8%AF%DB%8C%D9%86%D8%A7%D9%86/

پەیامی حکومەتی هەرێمی کوردستان بەبۆنەی ساڵیادی ئەنفالی بادینان

هەولێر، هەرێمی کوردستان، عێراق ( GOV.KRD )- لەدوا قۆناغی جێنۆسایدی ئەنفال و ٣٣ ساڵ بەر لە ئێستا، دەڤەری بادینان قوربانییەکی دیکەی گەورە تاوانەکانی ڕژێمی بەعسی ڕووخاو بوو کە هەزاران کەسی بێتاوانی، شەهید و بێسەروشوێن و ئاوارە بوون و سەدان گوندیشی خاپوور کران.

ئەنفال کە تاکە ڕێگەیەکی دیکتاتۆریەتی بەعس بوو بۆ مانەوەی خۆی و لەنێوبردنی بزاڤی ڕزگاریخوازی کورد لە باشووری کوردستان، خەون و خەیاڵێک بوو کە نەهاتەدی و هەرگیز بۆ هیچ کەسی دیکەش نایێتە دی.
ئێستا کە یادگار و پاشینان و نەوەی شەھیدە سەربەرزەکانی ئەنفال، سەرقاڵی بنیاتنان و ئاوەدانکردنەوەی کوردستانن، شکۆدارانە یادی قوربانی و شەهیدەکانمان دەکەینەوە و گرنگە حکومەتی فیدراڵی عێراقیش ئەرک و بەرپرسیاریەتی خۆی بەرامبەر بە کەسوکاری قوربانیان جێبەجێ بکات و قەرەبووی ماددی و مەعنەوییان بکاتەوە.

حکومەتی هەرێمی کوردستانیش وەک هەمیشە خزمەتی زیاتری کەسوکاری سەربەرزی شەهیدان و ئەنفالکراوان دەکات و بە ئەرکی خۆی دەزانێت خزمەتگوزاریی زیاتر بگەیێنێتە هاونیشتمانیانی خۆشەویستی هەرێمەکەمان.


د.جوتیار عادل
وتەبێژی حکومەتی هەرێمی کوردستان
٢٠٢١/٨/٢٥

 

https://gov.krd/news-and-announcements/posts/2021/august/%D9%BE%DB%95%DB%8C%D8%A7%D9%85%DB%8C-%D8%AD%DA%A9%D9%88%D9%85%DB%95%D8%AA%DB%8C-%D9%87%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86-%D8%A8%DB%95%D8%A8%DB%86%D9%86%DB%95%DB%8C-%D8%B3%D8%A7%DA%B5%DB%8C%D8%A7%D8%AF%DB%8C-%D8%A6%DB%95%D9%86%D9%81%D8%A7%D9%84%DB%8C-%D8%A8%D8%A7%D8%AF%DB%8C%D9%86%D8%A7%D9%86/

په‌يامى سه‌رۆكى هه‌رێمى كوردستان بۆ يادى ئه‌نفالى بادينان

ئه‌مڕۆ يادى 33 ساڵه‌ى ئه‌نفالى بادينان ده‌كه‌ينه‌وه‌ و به‌ ڕێز و شكۆوه‌ شه‌هيدان به‌ بير ده‌هێنينه‌وه‌ كه‌ له‌ هه‌ڵمه‌ته‌كانى 25ى ئاب تا 6ى ئه‌يلوولى 1988 و له‌ دوا قۆناغى ئه‌نفاله‌كاندا، به‌ پێنج فيرقه‌ى سه‌ربازيى عيراق به‌رامبه‌ر خه‌ڵكى سڤيلى بادينان ئه‌نجام دران.

تاوانكاران له‌ به‌رده‌واميى ئه‌و شاڵاوه‌دا، زۆر به‌ دڕنده‌يى له‌ تاوانێكى بێهاوتادا له‌ گه‌رميانه‌وه‌ تا دوايين دێهاته‌كانى بادينان (182) هه‌زار هاووڵاتيى كوردستانيان به‌ره‌و بيابانه‌كانى مه‌رگ له‌ باشوورى عيراق ڕاكێش كرد و وه‌ك چۆن له‌ بادينان كرديان، بێ جياوازى، مزگه‌وت و دێر و ماڵ و خانوو و ڕه‌ز و باخى هه‌موو پێكهاته‌كانى ناوچه‌كه‌ و سروشت و ژينگه‌ى كوردستانيان پێكه‌وه‌ ڕووخاند و سووتاند.

ئه‌نفالى بادينان و هه‌موو ئه‌و تاوانانه‌ى به‌رامبه‌ر به‌ گه‌لى كوردستان ئه‌نجام دران، زام و برينى هه‌ميشه‌ كراوه‌ن، هه‌رگيز له‌ بير ناچنه‌وه‌ و نيشانه‌ى سته‌ملێكراويى گه‌لێكى ئاشتيخوازن كه‌ ته‌نيا داواى ژيان و ئازادى و مافى خۆيان كردووه‌. ئه‌م ياده‌ و مێژووى پڕ له‌ كاره‌سات و مه‌ينه‌تيى گه‌لى كوردستان، وه‌ك هه‌ميشه‌ بۆ گه‌يشتن به‌ خه‌ون و ئاواته‌كانى، مكوڕترى ده‌كات.

يادى شه‌هيدان و ڕه‌نج و قوربانييه‌كانى گه‌لى كوردستان هانمان ده‌دات كه‌ بۆ تێپه‌ڕاندنى سه‌ختييه‌كانى ئێستا و له‌پێناو داهاتوويه‌كى باشتردا بۆ هه‌موو پێكهاته‌كانى كوردستان، يه‌كڕيزيى و ته‌بايى و پێكه‌وه‌ييمان پته‌وتر بكه‌ين. له‌م ياده‌دا جه‌خت ده‌كه‌ينه‌وه‌ كه‌ حكوومه‌تى فيدراڵى عيراق ده‌بێ بڕياره‌كانى دادگاى باڵاى تاوانه‌كانى عيراق بۆ قه‌ره‌بۆكردنه‌وه‌ى قوربانييان جێبه‌جێ بكات، له‌ هه‌رێمى كوردستانيش خزمه‌تى زياتر به‌ كه‌سوكارى شه‌هيدان و ئه‌نفالكراوان بكرێت.

ده‌بێ كارى جددى بۆ به‌دۆكيوومێنتكردنى تاوانه‌كان و ناساندنيان به‌ جينۆسايد له‌سه‌ر ئاستى نێوده‌وڵه‌تى بكرێت و هه‌موو هه‌وڵێك بخرێته‌ گه‌ڕ تا ڕێگه‌ له‌ دووباره‌بوونه‌وه‌ى تاوانكاريى وا له‌ هه‌موو شوێنێكى سه‌رزه‌مين بگيرێت و مرۆڤايه‌تى هه‌رگيز تاوانى وا نه‌بينێته‌وه‌.

سوپاس و ڕێز و پێزانين بۆ خه‌ڵكى جوامێرى هه‌ولێر و به‌حركه‌ كه‌ به‌ هاناى لێقه‌وماوانى ئه‌نفالى بادينانه‌وه‌ هاتن، يارمه‌تييان دان و ئامێزى ميهره‌بانييان بۆ كردنه‌وه‌. يادى شه‌هيدانى ئه‌نفال و ته‌واوى شه‌هيدانى كوردستان هه‌ميشه‌ به‌ خێر و سڵاو و دروود له‌ گيانى پاكيان.

نێچيرڤان بارزانى

سه‌رۆكى هه‌رێمى كوردستان

2021/8/25

 

https://presidency.gov.krd/statement-by-the-president-of-the-kurdistan-region-on-the-anniversary-of-anfal-bahdinan/

لەسەر بانگهێشتی فەرمیی حکومەتی ئێران، شاندێکی باڵای هەرێمی کوردستان سەردانی ئەو وڵاتە دەکات و ئامادەیی ڕێوڕەسمی سوێندخواردنی سەرۆک کۆماری نوێی ئێران دەبن.

نازم دەباغ نوێنەری حکومەتی هەرێم لە تاران بەپۆڵەتیك پرێسی ڕاگەیاند، ئێران بە فەرمی بانگهێشتنامەی بۆ هەرێمی کوردستان ناردووە تا شاندێکی لە ڕێوڕەسمی سوێندخواردنی سەرۆک کۆماری نوێی ئەو وڵاتەدا بەشداربن و بۆ ئەو مەبەستە شاندێک لە هەرێمەوە سەردانی تاران دەكات.

نوێنەری حکومەتی هەرێم لە تاران ئاماژەی بەوەشكرد، شاندەکەی هەرێم بە سەرۆکایەتیی نێچیرڤان بارزانی سەرۆكی هەرێمی كوردستان و کوێستان محەمەد، وەزیری کارو کاروباری کۆمەڵایەتی، پشتیوان سادق، وەزیری ئەوقاف، حەمەی حەمەسەعید، وەزیری ڕۆشنبیری و وەزیری حکومەت بۆ کاروباری پەرلەمان و سەفین دزەیی بەرپرسی فەرمانگەی پەیوەندییەكانی دەرەوەی حكومەتی هەرێم سەردانی تاران دەكەن، هەریەك لەنوێنەری حكومەتی هەرێم لەتاران و بەرپرسی پەیوەندییەكانی ئێران لەهەولێر یاوەری شاندەكە دەبن.

ئاماژەی بەوەشكرد، شاندەكە ژمارەیەك دیدارو كۆبوونەوە لەگەڵ بەرپرسانی باڵای ئێران ئەنجام دەدەن.

بڕیارە لەچەند رۆژی  داهاتوودا، ئیبراهیم رەئیسی، وەکو سەرۆککۆماری نوێی ئێران ئاڵوگۆڕیی دەسەڵات لەگەڵ حەسەن رووحانی، سەرۆککۆماری ئێستای ئێران بکات , وەک هەشتەمین سەرۆک کۆماری ئێران، سوێندی یاسایی بخوات.

سەرۆكی نوێی هەڵبژێردراوی ئێران لەهەڵبژاردنی ئەمساڵی ئێران بۆ سەرۆك كۆماری ئێران ڕێژەی 61.95% دەنگی بەشدربووانی ئەو وڵاتەی بە دەستهێنا.

 

https://politicpress.com/62638/

نوێنەری حكومەتی هەرێم لە تاران دەڵێت، بەشداریكردنی شاندی باڵای هەرێمی كوردستان لە مەراسیمی سوێندخواردنی ئیبراهیم رەئیسی، سەرۆككۆماری نوێی ئێران، گرنگی خۆی هەیە، چونكە كۆماری ئیسلامی ئێران لە چوارچێوەی شاندی وڵاتان مامەڵەی لەگەڵ شاندی هەرێم كردووە.

نازم دەباغ، نوێنەری حكومەتی هەرێم لە تاران بە پۆڵەتیك پرێسی راگەیاند: بەشداری شاندی هەرێمی كوردستان كە پێكهاتووە لە نێچیرڤان بارزانی سەرۆكی هەرێم و رێواس فایەق سەرۆكی پەرلەمانی كوردستان و ژمارەیەك لە وەزیرەكانی حكومەتی هەرێم و فەوزی حەریری سەرۆكی دیوانی سەرۆكایەتی هەرێمی كوردستان، لە مەراسیمی سوێندخواردنی سەرۆككۆماری نوێی ئێران گرنگی خۆی هەیە.

نوێنەری حکومەتی هەرێم لە تاران وتی: بڕیارە لە پەراوێزی سەردانەكە و دوای كۆتایی هاتنی مەراسیمی سوێندخواردنی سەرۆككۆماری ئێران، سەرۆكی هەرێم و سەرۆكی پەرلەمانی كوردستان چاویان بكەوێت بە سەرۆككۆماری نوێ و سەرۆكی ئەنجومەنی شورا و بەرپرسانی باڵای كۆماری ئیسلامی ئێران.

وتیشی: گرنگیی ئەم سەردانە لەوەدایە شاندی باڵای هەرێمی كوردستان، لەسەر ئاستی شاندی وڵاتان ئەژماركراوە و مامەڵەی لەگەڵ كراوە، ئەوە نیشانەی ئەوەیە كۆماری ئیسلامی ئێران لە چوارچێوەی سیاسەتی تازە و سەرۆككۆماری تازەش دەیەوێت گەشە بە پەیوەندییەكانی بدات لەگەڵ هەرێمی كوردستان لە هەموو بوارەكاندا.

ئیبراهیم رەئیسی، لە هەڵبژاردنی ئەمساڵی سەرۆكایەتی ئێران سەركەوتنی بەدەستهێنا و رۆژی پێنج شەممە، 5 ی ئاب وەكو هەشتەمین سەرۆك سوێندی یاسایی لەبەردەمی پەرلەمانی ئێران خوارد.

 

https://politicpress.com/63054/

بەپێی سەرچاوە ڕاگەیاندنەکان، وەزارەتی دەرەوەی کۆماری ئیسلامی ئێران ڕۆژی هەینی لە ڕاگەیەنراوێکدا بڵاویکردەوە" دانانی ئاڵای کوردستان لە مەراسیمی پێشوازیکردن لە سەرۆکی هەرێمی کوردستان لە فڕۆکەخانە هەڵەیەکی پڕۆتۆکۆلی بووە، لەم وتووێژەدا نازم دەباغ نوێنەری حکومەتی هەرێمی کوردستان لە تاران لە وەڵامی ئەوەی کێ ئەو ئاڵایەی داناوە وا کۆماری ئیسلامی دەڵێت هەڵەی پڕۆتۆکۆلی بووە، دەباغ دەڵێت"من ئه‌گه‌ر بمزانیایه‌ ده‌موت به‌ڵام له‌گه‌ڵ من په‌یوه‌ندی کرا وه‌کو نوێنه‌ری حکومه‌ت ئایا من چیم ئاگا لێیه‌؟ وتم باشترین ده‌لیل و به‌ڵگه‌ ئه‌وه‌یه‌ خۆتان سه‌یری دووربینه‌کانی فڕۆکه‌خانه‌ (کامێراکانی چاودێری) بکه‌ن ئه‌وانه‌ی ده‌زانن کێ هاتووه‌ و کێ چووه‌ و کێ ئه‌و ئاڵایه‌شی داوه‌ته‌ ده‌ست ئه‌و سه‌ربازه‌، به‌ڵێ لایه‌نی ئێرانی پرسیاریان لێکردم، دەشڵێت"زۆرجار هه‌بووه‌ وڵاتان ئاڵای کوردستانیشیان هه‌ڵداوه‌ به‌ڵام ڕاستگۆ نه‌بوون له‌گه‌ڵ کورد، ئێران له‌سه‌ره‌تاوه‌ هه‌تا ئه‌مڕۆ ڕاستگۆیه‌کی تێدا هه‌بووه‌ به‌رامبه‌ر به‌ کورد وه‌کو پشتیوانی له‌ مافه‌ ڕه‌واکانی به‌ڵام له‌چوارچێوه‌ی ده‌ستوری هه‌میشه‌یی عێراق."

"ئەمە خۆی له‌خۆیدا په‌یامێکی گرنگه‌ "

لەسەرەتای وتووێژەکەدا نوێنەری حکومەتی هەرێمی کوردستان لە تاران دەربارەی بەشداری کردنی شاندی هەرێمی کوردستان لە مەراسیمی سوێندخواردنی سەرۆک کۆماری ئیسلامی نوێی ئێران دەڵێت" من پێموایه‌ له‌ هه‌ر بۆنه‌یه‌کدا به‌تایبه‌تی وڵاتانی دراوسێ به‌گشتیش وڵاتانی دنیا له‌کاتێکدا که‌ مه‌راسیمیان ده‌بێت ئینشائه‌ڵا هه‌مووی ده‌بێت بۆ خۆشی بێت، جا چ خۆشی بێت یان ناخۆشی بێت گرنگه‌ که‌ به‌سه‌رده‌کرێنه‌وه‌ و به‌رپرسان وڵاتیان بانگهێشت ده‌کرێت بۆ مه‌راسیمێکی ئاوا که‌ ده‌یان و سه‌دان جاری واهه‌یه‌ بێگانه‌ی لێیه‌، غه‌یری خه‌ڵکی ئێران ئاماده‌بوونی ئه‌وان گرنگه‌ بۆ گه‌یاندنی بۆ ئه‌وه‌ په‌یامه‌ی یه‌که‌م په‌یوه‌ندییه‌کان باشن، دووه‌میش ئه‌وه‌یه‌ ئه‌م وڵاته‌ ئه‌وانیان له‌بیره‌ که‌ بۆ ئه‌و بۆنانه‌ بانگهێشتیان ده‌کات بۆیه‌ به‌بڕوای من بانگهێشتکردنی سه‌رۆکی هه‌رێمی کوردستان و سه‌رۆکی په‌رله‌مانی کوردستان به‌شاندێک پێکهاتبوون له‌ لایه‌نه‌ سیاسیه‌کانی هه‌رێمی کوردستان ئه‌مه‌ خۆی له‌خۆیدا په‌یامێکی گرنگه‌."

 

"ئه‌وه‌ی ئه‌م کاره‌ی کرد هه‌ڵه‌یه‌کی پڕۆتۆکۆلی کردبوو به‌لانی که‌مه‌وه‌ که‌ ئاڵای کوردستانی هه‌ڵده‌کرد ده‌بووایه‌ ئاڵای عێراقیشی له‌ته‌نیشت بووایه‌ "

لە مەراسیمی پێشوازی کردن لە سەرۆکی هەرێمی کوردستان-عێراق، لە فڕۆکەخانەی نێودەوڵەتی تاران ئاڵای کوردستان دانرابوو، بەڵام دواتر وەزارەتی دەرەوەی ئێران لە ڕاگەیەنراوێکدا بڵاویکردەوە کە دانانی ئاڵای هەرێمی کوردستان هەڵەیەکی پڕۆتۆکۆلی بووە"

سەبارەت بەو ڕاگەیەنراوەی وەزارەتی دەرەوەی ئێران کە میدیا لۆکاڵییەکانی هەرێمی کوردستان باسی لێوە دەکەن، نازم دەباغ وتی" به‌ڵێ ئه‌وه‌ی من ئاگاداربووم له‌ ڕۆژی یه‌که‌میشدا که‌ پێشوازی له‌ به‌ڕێز کاک نێچیرڤان کرا ئه‌و مشتومڕه‌ دروستبوو له‌سه‌ر ئاڵای کوردستان به‌ڵام ئه‌وه‌ی ئه‌م کاره‌ی کرد هه‌ڵه‌یه‌کی پڕۆتۆکۆلی کردبوو به‌لانی که‌مه‌وه‌ که‌ ئاڵای کوردستانی هه‌ڵده‌کرد ده‌بووایه‌ ئاڵای عێراقیشی له‌ته‌نیشت بووایه‌."

" لایه‌نی ئێرانی پرسیاریان لێکردم.... "

لە وەڵامی ئەو پرسیارەی ئایا کێ ئەو هەڵە پڕۆتۆکۆلیەی ئەنجامداوە (وەک خۆت دەڵێی)؟ نازم دەباغ دەڵێت" من ئه‌گه‌ر بمزانیایه‌ ده‌موت به‌ڵام له‌گه‌ڵ من په‌یوه‌ندی کرا وه‌کو نوێنه‌ری حکومه‌ت ئایا من چیم ئاگا لێیه‌؟ وتم باشترین ده‌لیل و به‌ڵگه‌ ئه‌وه‌یه‌ خۆتان سه‌یری دووربینه‌کانی فڕۆکه‌خانه‌ (کامێراکانی چاودێری) بکه‌ن ئه‌وانه‌ی ده‌زانن کێ هاتووه‌ و کێ چووه‌ و کێ ئه‌و ئاڵایه‌شی داوه‌ته‌ ده‌ست ئه‌و سه‌ربازه‌؟ به‌ڵێ لایه‌نی ئێرانی پرسیاریان لێکردم."

پێت وایە ئەو ڕاگەیەنراوەی ئێران بۆ ڕازی کردنی دڵی ئەو لایەنانە بوو کە نیگەران بوون لە دانانی ئەو ئاڵایە؟

لەوەڵامدا نازم دەباغ وتی" من پێموایه‌ خۆی له‌خۆیدا بانگهێشت کردن و په‌یوه‌ندییه‌کانی کۆماری ئیسلامی ئێرانی له‌وه‌ گه‌وره‌تره‌ له‌به‌رخاتری چه‌ند لایه‌نێک ستراتیژی خۆی بگۆڕێت چونکه‌ په‌یوه‌ندییه‌کانی له‌گه‌ڵ هه‌رێمی کوردستان له‌چوارچێوه‌ی عێراقێکی یه‌کپارچه‌ و ده‌ستوری عێراقیدایە، هه‌میشه‌ کۆماری ئیسلامی ئێران پشتیوانی کردووه‌ به‌ڵام وتم له‌ڕووی پڕۆتۆکۆلیه‌وه‌ به‌ته‌نها ئاڵای کوردستان مانای ده‌وڵه‌ت بوون ده‌دات بۆیه‌ به‌ هه‌ڵه‌یه‌کی پرۆتۆکۆلی له‌قه‌ڵه‌م ده‌درێت چونکه‌ ئاڵای عێراقی له‌ته‌نیشت نه‌بووه‌، ئه‌وه‌ ده‌به‌سترێته‌وه‌ به‌ سیاسه‌تی کۆماری ئیسلامی ئێرانی له‌ پێشوازیه‌که‌ و شێوازی پێشوازیان نه‌گۆڕی بۆ سه‌رۆکی هه‌رێمی کوردستان چ له‌لایه‌ن سه‌رۆک کۆماره‌وه‌ پێشوازی لێکرا چ له‌لایه‌ن سه‌رۆک په‌رله‌مانه‌وه‌ هه‌روه‌ها لایه‌نه‌ به‌پرسه‌کانی تری کۆماری ئیسلامی ئێرانی له‌ په‌یوه‌ندییه‌کانی هه‌رێمی کوردستانی عێراقدا."

" له‌پرۆتۆکۆلی سه‌رۆکی هه‌رێمی کوردستان ئه‌م داوایه‌ کرابوو "

نوێنەری حکومەتی هەرێمی کوردستان لە تاران ئەوەشی وت"به‌ڵێ له‌پرۆتۆکۆلی سه‌رۆکی هه‌رێمی کوردستان ئه‌م داوایه‌ کرابوو که‌ هه‌رێمی کوردستانیش خاوه‌ن ئاڵایه‌ له‌چوارچێوه‌ی عێراقدا و له‌گه‌ڵ ئاڵای عێراقدا دابنرێت، مشتومڕێک هه‌بوو به‌ڵام ئه‌وه‌ بوو کاتێک که‌ جه‌نابی کاک نێچیرڤان گه‌یشت ئێمه‌ چووین بۆ پێشوازی بینیمان ته‌نها ئاڵاکه‌ی کوردستان هه‌ڵدراوه‌ ده‌ستبه‌جێ دوای چه‌ند سه‌عاتێک نیگه‌رانی لێ دروست بوو به‌ڵام وه‌کو وتم سه‌ردانه‌که‌ گرنگ بوو نه‌ک شێوه‌ شه‌کلیه‌که‌، زۆرجار هه‌بووه‌ وڵاتان ئاڵای کوردستانیشیان هه‌ڵداوه‌ به‌ڵام ڕاستگۆ نه‌بوون له‌گه‌ڵ کورد، ئێران له‌سه‌ره‌تاوه‌ هه‌تا ئه‌مڕۆ ڕاستگۆیه‌کی تێدا هه‌بووه‌ به‌رامبه‌ر به‌ کورد وه‌کو پشتیوانی له‌ مافه‌ ڕه‌واکانی به‌ڵام له‌چوارچێوه‌ی یاسای سه‌ره‌کی عێراقی واته‌ ده‌ستوری هه‌میشه‌یی عێراق، وه‌ پارێزگاری له‌ یه‌کپارچه‌یی عێراق."

بە بۆچونی تۆ کۆماری ئیسلامی ئێران لێکۆڵینەوە دەکات لەوەی کێ ئەو ئاڵایە (ئاڵای کوردستانی) لە مەراسیمی پێشوازی کردن لە سەرۆکی هەرێم دانا؟ نازم دەباغ بەمشێوەیە وەڵامی دایەوە" من نازانم ئه‌وه‌ کاری خۆیانه‌ بیکات یان نه‌یکات."

 

"ناوەڕۆکی کۆبونەوەکانی سەرۆک کۆماری عێراق و سەرۆکی هەرێم لەگەڵ سەرۆک کۆماری ئێران "

دەربارەی ناوەڕۆکی کۆبونەوەکانی سەرۆک کۆماری ئێران لەگەڵ هەریەکە لە سەرۆک کۆماری عێراق و سەرۆکی هەرێمی کوردستان؟ نازم دەباغ وتی" ناوه‌ڕۆکی ئه‌و کۆبونه‌وانه‌ شتی شاراوه‌ی ئه‌وتۆی تێدا نه‌بووه‌ به‌ڵام په‌یامی تێدابووه‌ به‌وه‌ی که‌ کۆماری ئیسلامی ئێرانی و حکومه‌تی هه‌رێمی کوردستان به‌باشی ده‌زانن و په‌سه‌ندی ده‌که‌ن که‌ په‌یوه‌ندییه‌کان پته‌وبن و به‌هێزبن، وه‌ له‌هه‌موو قۆناغه‌کانی ڕابردوو له‌ ئێستا بۆ ئاینده‌ش له‌سه‌ری به‌رده‌وام ده‌بێت، بۆ ئێمه‌ گرنگه‌ ئه‌من و ئاسایشی ئێران و ئاسایشی هه‌رێمی کوردستان، پاراستنی له‌ به‌رژه‌وه‌ندی هه‌رێمی کوردستان و کۆماری ئیسلامی ئێرانیدایه‌ بۆیه‌ ته‌ئکید له‌سه‌ر ئه‌وه‌ کراوه‌ته‌وه‌ هه‌م له‌لایه‌ن سه‌رۆک کۆماری ئێران و هه‌م له‌لایه‌ن سه‌رۆکی په‌رله‌مان که‌ له‌هه‌موو بواره‌کانی ئه‌منی و ئاسایشی و سیاسی ئه‌و جوگرافیایه‌ی ئێمه‌ هه‌مانه‌ مه‌حکومان ده‌کات به‌وه‌ی که‌ له‌ په‌یوه‌ندیه‌کی باشدا بین هه‌روه‌کو له‌ ڕابردوو ئینشائه‌ڵا بۆ ئاینده‌ش هه‌روا بێت."

لە وەڵامی ئەو پرسیارەی ئایا شاندەکەی هەرێم لەسەردانەکەیاندا بۆ مەراسیمی سوێندخواردنی سەرۆک کۆماری نوێی کۆماری ئیسلامی ئێران باسیان لەو نیگەرانیانە کرد کە هەندێکجار باس لەوەدەکرێت گروپە میلیشیاکانی نزیک لە کۆماری ئیسلامی ئێران بەرپرسن لەو هێرشانەی دەکرێنە سەر هەولێر و چەند ئامانجێکی تر لە شوێنە جیاوازەکانی عێراق؟

لە وەڵامدا نازم دەباغ وتی" به‌گشتی باس له‌وه‌ کراوه‌ که‌ ئه‌و ده‌ستانه‌ی له‌ تێکدانی ئارامی و ئاسایشی وڵاتدا له‌لایه‌ن کۆماری ئیسلامی ئێرانه‌وه‌ ڕه‌تده‌کرێته‌وه‌، من کاتی خۆی له‌ زۆر به‌ربرسی ئێرانیم بیستووه‌ ده‌ڵێن ئه‌مانه‌ له‌ جیاتی ئێمه‌ شه‌ڕ نه‌که‌ن ئه‌گه‌ر شه‌ڕ بکه‌ین خۆمان ده‌یکه‌ین بۆ به‌ موشه‌کێک و پشێوی دروستکردن ئه‌م کاره‌ ده‌کرێت، بۆیه‌ به‌تایبه‌تیش له‌ وتاره‌که‌ی سه‌رۆکی کۆماری ئیسلامی ئێراندا که‌ وتی ئێمه‌ به‌ لاپه‌ڕه‌یه‌کی تازه‌ سیاسه‌تی خۆمان له‌ ناوچه‌که‌ و له‌ نێوده‌وڵه‌تی ده‌که‌ین واته‌ سیاسه‌تێکی میانڕه‌وی نیشاندا بۆ وتوێژکردن و سه‌رکه‌وتنی له‌چوارچێوه‌ی پاراستنی به‌رژه‌وه‌ندییه‌کانی کۆماری ئیسلامی ئێران و ڕێزگرتن له‌ سه‌روه‌رییه‌کانی، وه‌کو وتم ئێران ته‌ئکید له‌سه‌ر ئه‌وه‌ ده‌کاته‌وه‌ له‌گه‌ڵ پاراستنی ئه‌من و ئاسایشی هه‌رێمی کوردستان و عێراق و ئێرانن پێویستمان به‌ هاوکاری به‌رده‌وام هه‌یه‌ که‌ نه‌هێڵن ئه‌م ڕووداوانه‌ ڕووبدات چونکه‌ ئه‌و ڕووداوه‌ بچوکانه‌ خزمه‌ت ناکات، پشێوی دروست ده‌کات به‌ڵام خزمه‌ت ناکات."

سەبارەت بە کاریگەری دەستبەکاربونی سەرۆک کۆماری نوێی ئێران لەسەر پەیوەندییەکانی عێراق و هەرێمی کوردستان لەگەڵ کۆماری ئیسلامی ئێران؟ نوێنەری حکومەتی هەرێمی کوردستان وتی" پێموایه‌ ده‌ستپێکردنی کاری سه‌رۆکی تازه‌ی کۆماری ئیسلامی ئێران ده‌ستپێکێکی تر ده‌بێت بۆ پته‌وکردنی په‌یوه‌ندییه‌کان، به‌دواداچوونی ئه‌و ڕێککه‌وتنه‌ کۆنانه‌ی هه‌بووه‌، وه‌ هه‌وڵیش بدرێت شتی تازه‌ بکرێت بۆ پشتیوانی و پته‌وکردنی په‌یوه‌ندییه‌ کۆنه‌کان ."

 

https://www.dengiamerika.com/a/iran/5995699.html

نوێنەری هەرێمی کوردستان لە ئێران سەبارەت بە پەیوەندی ئێران و هەرێم وتی: ئەم پەیوەندییانە لە سەردەمی ڕەئیسی باشتر دەبێت.

بە پێی ڕاپۆرتی ئاژانسی هەواڵی مێهر، نازم دەباغ، نوێنەری حکومەتی هەرێمی کوردستان لە تاران لەبارەی دەستبەکاربونی سەرۆکی نوێی ئێران بە خەندان-ی راگەیاند: "گۆڕینی کەسەکان لە پۆستەکان لە ئێران هیچ گۆڕانکارییەک لە پەیوەندییەکانی نێوان هەرێمی کوردستان و تاران دروستناکات.

وتیشی: تەنها کاراکتەرەکان کە بەرپرسن لە بەدواداچون و جێبەجێکردن گۆڕانیان بەسەردا بێت، ئەو سیاسەتەی کۆماری ئیسلامی ئێران هەیبو بەرامبەر بە هەرێم بەردەوام دەبێت".

لەبارەی هەڵکردنی ئاڵای هەرێمی کوردستان لەکاتی گەیشتنی نێچیرڤان بارزانی، سەرۆکی هەرێمی کوردستان لە فڕۆکەخانە، نازم دەباغ وتی، "وەزارەتی دەرەوەی کۆماری ئیسلامی ئێران هەڵکردنی ئاڵای هەرێمی کوردستان لە پڕۆتۆکۆڵی پێشوازیکردن بە هەڵەیەکی پڕۆتۆکۆڵی لە قەڵمدا، ئەوەی ئاگاداربوم لە سەرەتاوە رازی نەبون بەوکارە، بەڵام دواتر چۆن رویدا ئێمە ئاگادارنین، ئێستاش وەزارەتی دەرەوە بە بەیانێکی فەرمی ئەوەی راگەیاندوە کە هەڵەیەکی پڕۆتۆکۆڵی بوە".

لەبارەی ئەوەی چاوەڕوان دەکەن لەسەردەمی ئیبراهیم رەئیسی، پەیوەندیەکانی ئێران لەگەڵ عێراق بە گشتی و هەرێمی کوردستان چۆن بێت، نوێنەری حکومەتی هەرێم وتی، "پێمان وایە ئەو پەیوەندیانەی کە ئێستا هەن لەسەردەمی ئاغای رەئیسی لەگەڵ عێراق و هەرێمی کوردستان بەردەوام دەبێت و ئەگەر باشتر نەبێت خراپتر نابێت، چونکە کۆماری ئیسلامی ئێران لەگەڵ عێراق و هەرێمی کوردستان دیدێکی ستراتیژی هەیە بۆ ئایندەی خۆی لە ناوچەکە و هەروەها چەسپاندنی ئەمن و ئاسایش، بۆیە پەیوەندیەکان باشتر دەبێت خراپتر نابێت".

پەیوەست بە سیاسەتی رەئیسی بەرامبەر پرسی پێکهاتەکانی ئێران، نازم دەباغ رونیکردەوە، "سیاسەتی رەئیسی لەگەڵ پێکهاتەکانی ناو کۆماری ئیسلامی وەک لە وتاری سوێندخواردنی وتی، پێموایە زۆر میانڕەوانەبوو و هەوڵدەدات برایەتی و تەبایی و یەکڕیزی بۆ کۆماری ئیسلامی ئێران بەپێی قسەکانی خۆی دابیندەکات، هەروەها بارو بژێوی کۆمەڵانی خەڵک دابیندەکات، ئەوەی گرنگیشە بۆ سیاسەتی دەرەوە ئامادەیی ئاشتی و تەبایی لەگەڵ هەمو لایەکدا نیشانداوە، دیارە بەومەرجەی کە سەروەریەکان و رێز لە سیاسەتی کۆماری ئیسلامی ئێران بگیرێت".

 

https://ku.mehrnews.com/news/38569/%D9%BE%DB%95%DB%8C%D9%88%DB%95%D9%86%D8%AF%DB%8C-%D8%A6%DB%8E%D8%B1%D8%A7%D9%86-%D9%88-%D9%87%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86-%D9%84%DB%95-%D8%B3%DB%95%D8%B1%D8%AF%DB%95%D9%85%DB%8C-%D8%B1%DB%95%D8%A6%DB%8C%D8%B3%DB%8C-%D8%A8%D8%A7%D8%B4%D8%AA%D8%B1-%D8%AF%DB%95%D8%A8%DB%8E%D8%AA

ZNA – ھەولێر: "مەنسوور جیهانی" پەیامنێری ئاژانسی ھەوالی "زاگرۆس" لە تاران دەڵێت: ئێران گرنگی بە پەیوەندییەکانی خۆی دەدات لەگەڵ ھەرێمی کوردستان بە ھۆی ئەوەی سنوورێکی ھاوبەش ھەیە لە نێوانیان و ئەم سەردانەی "نێچیرڤان بارزانی" بۆ تاران گرنگی خۆی ھەبوو؛ چەند رۆژێک پێش ئەم سەردانه دەزگا راگەیاندنەکانی ئێران بە گرنگییەوە باسیان لە ھاتنی سەرۆکی ھەرێمی کوردستان بۆ تاران دەکرد.

 

"مەنسوور جیهانی" پەیامنێری ئاژانسی ھەوالی "زاگرۆس" Zagros لە تاران، ئەوەشی خستەرڕوو: دوای ئەوەی "نێچیرڤان بارزانی" گەیشتە فرۆکەخانەی نێودەوڵەتی مێهرئابادی تاران، نوێنەرانی بەشێکی زۆری له میدیاکانی ئێران لەوانه: که‌ناڵی تەلەفزیۆنی "خەبەر"ی ئێران ئامادەبوون و هه‌روه‌ها ئاژانسی هه‌واڵنێری "ئێران پرێس" Iran Press بە شێوەی راستەخۆ ھاتنی سەرۆکی ھەرێمی کوردستان بۆ تارانی پەخشکرد و زۆربەی ئاژانسە گەورەکانی ئێران، گرنگیان بەو سەردانەدا و لەم بارەیەوە ھەواڵیان بڵاکردەوه.

 

جیهانی له درێژه‌ی قسه‌کانیدا گوتیشی: هه‌روه‌ها سایتی سەرۆک کۆماری ئێران هه‌واڵی دیداریی نێوان سەرۆک کۆماری نوێی ئێران و سەرۆکی ھەرێمی کوردستان بڵاوکرده‌وه، سەرۆک کۆماری ئێران باسی لەوە کردووە که باروودۆخێکی گونجاو بۆ بەھێزکردنی پەیوەندییەکان لە بەشە جۆراوجۆرەکاندا لە ئارادایە بەتایبەتی گرنگیدان بە پەیوەندییە ئابورییەکان. ھەر لەم دیدارە‌دا سەرۆکی ھەرێمی کوردستانیش باسی لەوە کردووە کە ئێمە پێداگرین لە بەھێزکردنی پەیوەندییەکانمان لە ڕووی ئابووریی و سیاسی و کلتورییەوە و ئاماژەشی بەوە کردووە ھیوای وایە بە ھاتنی سەرۆک کۆماری نوێی ئێران پەیوەندییەکان بەرەوپێشوە بچن.

 

پەیامنێری ئاژانسی ھەوالی زاگرۆس لە تاران ئاماژەی بەوەشکرد: ئەمە جاری یەکەم نییە ئاڵای کوردستان لە تاران ھەڵدەدرێت، کاتی سوێندخواردنی "حەسەن روحانی"ش بە ئاڵای کوردستانەوه پێشوازییان لە "نێچیرڤان بارزانی" کرد؛ بەڵام ئەمجارە پێشوازیی لە سەرۆکی ھەرێمی کوردستان لە تاران، وەکوو سەرۆکی دەوڵەتێک ئەمەش گرنگی خۆی ھەبوو، ھەر به زووترین کات لە ده‌زگاکانی ڕاگه‌یاندنی ئێران و ھەرێمی کوردستان و هه‌روه‌ها ‌کەناڵەکانی تێلێگڕامییه‌کانی ئێران بڵاوبوویەوە.

 

"مەنسوور جیهانی" لە کۆتایی قسەکانیدا جه‌ختی کرده‌وه: ئێران و ھەرێمی کوردستان پەیوەندییه‌کی دوور و درێژیان پێکەوە ھەیە ھەر لە دیداریی سەرۆکی ھەرێمی کوردستان و سەرۆک کۆماری ئێران؛ "نێچیرڤان بارزانی" ئاماژەی بەوەدا لەگەڵ ھاتنی سەرۆک کۆماری نوێی ئێران، پەیوەندییەکان بەرەو باشتربوون برۆن و ئاماژه‌ی به‌وه‌ش کرد که ھەرێمی کوردستانیش بە ھۆی ئەوەی که کەشێکی سەقامگیری ھەیە، ئەمەش وایکردووە کەمترین زیان بە ئێران بکەوێت بۆیە پەیوەندیی ھەرێمی کوردستان و ئێران گرنگی خۆی ھەیە.

 

ئا: گۆران ھەرکی

 

لینکی چاوپێکه‌وتن:

http://zagrosn.com/114627-1

پەڕەى 3 لەکۆى 164 پەڕەدا

دوایین هەواڵەکان

هەواڵی زیاتر لە تویتەر

راپۆرتە پڕ بینەرەکان

حالت های رنگی