وتاری نازم دەباغ ؛ سیاسه‌تی ئابووری و با فرۆشتن

زۆرجار وا پێش دێت رووداوه‌كانی رابردوو له‌گه‌ڵ هه‌ندێ قۆناغ و رووداوی سه‌رده‌م یه‌كده‌گرنه‌وه‌ و ده‌بێته‌ په‌ندێكی پێشینان.

ده‌گێرنه‌وه‌ ( كه‌ راستیشی تێدایه‌ له‌به‌ر هه‌ستیاری شوێنه‌كه‌ ناوی ناهێنم) له‌ ناوچه‌یه‌كی هه‌رێمی كوردستان كوێخای دێیه‌ك هه‌بووه‌، هه‌ستی كرد ده‌توانێت یاریه‌ك له‌گه‌ل دانیشتوانی دێكه‌دا بكات، له‌ وه‌رزی زستاندا دانیشتوانی دێكه‌ كۆده‌كاته‌وه‌ و پێیان ده‌ڵێت: بیرۆكه‌یه‌كم هه‌یه‌، هه‌ندێ پاره‌م كۆكردۆته‌وه‌ و ده‌مه‌وێت خێره‌كه‌شی به‌ ئێوه‌ بگات، ده‌مه‌وێت ئه‌مساڵ بای دێكه‌ له‌ ئێوه‌ بكرم. دیاره‌ دانیشتوانی دێكه‌ ده‌بێته‌ مشتومڕیان و گاڵته‌ پێ كردن.... ده‌ڵێن كوێخا كاری وا چۆن ده‌بێت....؟ با چۆن ده‌فرۆشرێت؟.
كوێخا سوور ده‌بێت له‌سه‌ر داواكه‌ی خۆی و ده‌ڵێت ئێوه‌ چیتان به‌سه‌ره‌وه‌یه‌ ئه‌وه‌ با و ئه‌مه‌ش پاره‌، بۆ هه‌ر ماڵێك بڕێك دیاری ده‌كه‌ین و ده‌چینه‌ مزگه‌وت لای مه‌لای دێ به‌شه‌رع و شاهید. له‌  مزگه‌وتی ماڵی خوا رێككه‌وتن نامه‌كه‌ ده‌نووسین و هه‌ركه‌سێكیش په‌شیمان بێته‌وه‌ ده‌بێت چه‌ند به‌رابه‌ر برێك پاره‌ بدات، دانیشتوانی دێكه‌ ده‌ڵێن كه‌واته‌ بابڕۆین و كاره‌كه‌ ئه‌نجام بده‌ین و ناوی خوای لێ بهێنین.
زستان رۆیی و به‌هار هات كه‌وتنه‌ مانگی دروێنه‌ و شه‌ن كردنی خه‌رمانه‌كانیان....
رۆژێ كوێخا هات و چووه‌ سه‌ر خه‌رمانه‌كان و ئاگاداری كردنه‌وه‌ نابێت خه‌رمان شه‌ن بكه‌ن! چونكه‌ باكه‌ هی ئه‌وان نه‌ماوه‌ هی كوێخایه‌...! ده‌بێت پاره‌ی شنه‌باكه‌ بده‌ن.
هه‌مووانی ئاگادار كرده‌وه‌ به‌ پێی رێكه‌وتنكه‌ش كه‌س بۆی نیه‌ بای دێكه‌ به‌كار بهێنێت ده‌نا گوناهبار ده‌بن به‌ شاهیدی مه‌لای دێ( له‌گه‌ڵ مه‌لای دێكه‌ كاكه‌براله‌یه‌كیان هه‌بوو.. جۆرێك له‌ رێككه‌وتن ) .... ناچار دانیشتوانی دێكه‌ له‌گه‌ڵ كوێخا رێكده‌كه‌ون و چه‌ند به‌رابه‌ر پاره‌ی فرۆشتنی باكه‌ ده‌ده‌نه‌وه‌ كوێخا و مافی با به‌كارهێنان بۆخۆیان ده‌گێرنه‌وه‌.....
ئه‌گه‌ر سه‌یری بارودۆخی ئه‌مرۆكه‌ی ئابووری كوردستان بكرێت له‌و گێژاوی قه‌یرانی دارایی كه‌ تێی كه‌وتووه‌ و كه‌وتۆته‌ ژێر فشاری حكومه‌تی ناوه‌ند و هه‌روه‌ها قه‌رزێكی زۆر و بارگران به‌دڵنیاییه‌وه‌ پێویستی به‌ هه‌نگاوێكی زیره‌كانه‌ و بوێرانه‌ هه‌یه‌، دیاره‌ بریاری ئابووری سه‌ربه‌خۆ  و نه‌وت فرۆشتن بۆ ئاینده‌ی ده‌مه‌زراندنی سه‌ربه‌خۆیی كوردستان، پرسێكی گرنگ و بوێرانه‌یه‌، ئه‌و بریاره‌ش ته‌نها بریاری تاك لایه‌ن نه‌بووه‌، به‌ڵكو بڕیاری هه‌موو هێز و لایه‌نه‌ سیاسیه‌كانی كوردستان و به‌ناو راوێژكاران و شاره‌زایانی بواری ئابووری بووه‌، بێ ئه‌وه‌ی وه‌كو خۆی سنووری جوغرافیای كوردستان و دوژمنه‌ ستراتیژی ومێژووییه‌كانی گه‌لی كورد ڕه‌چاو بكه‌ن، بزانن كێ ده‌یه‌وێت كورد له‌سه‌ر پێی خۆی راوه‌ستێت. ئه‌مڕۆكه‌ وا ده‌بینرێت پرۆسه‌ی ئابووری سه‌ربه‌خۆ و نه‌وت فرۆشتن وه‌كو ئه‌و په‌ندی لێ هات كه‌ با مان لێ كڕا و پێشمان ده‌فرۆشرێته‌وه‌.........!!

نازم عومه‌ر ده‌باغ
نوێنه‌ری حكومه‌تی ھه‌رێمی كوردستان له‌ تاران

 

https://www.pukmedia.com/KS_Direje.aspx?Jimare=144094

Read کد خبر: 2241

دوایین هەواڵەکان

بە دوا چوون لە تۆڕە کۆمەڵایەتییە کان

راپۆرتە پڕ بینەرەکان

حالت های رنگی