ئه‌رمه‌نستان كونسلخانه‌یه‌كى گشتى له هه‌ولێر ده‌كاته‌وه
نیوه‌ڕۆى ئه‌مڕۆ سێشه‌ممه 2015/2/3 به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له به‌ڕێز كارین گرێگۆریان باڵیۆزى كۆمارى ئه‌رمه‌نستان له عیراق و شاندێكى یاوه‌رى كرد.
له دیدارێكدا به‌ره‌وپێشبردنى په‌یوه‌ندییه‌كانى هه‌رێمى كوردستان و كۆمارى ئه‌رمه‌نستان تاوتوێ كران و تیشك خرایه سه‌ر نزیكیى كه‌لتوورى و كۆمه‌ڵایه‌تیى نێوان خه‌ڵكى كوردستان و ئه‌رمه‌نستان و داكۆكى له‌سه‌ر خواستى دوولایه‌نه بۆ بره‌ودان به په‌یوه‌ندییه‌كان له بوارى جیادا كرایه‌وه. هه‌ر له‌مباره‌یه‌وه به‌ڕێز باڵیۆزى ئه‌رمه‌نستان له عیراق ڕایگه‌یاند: مانگى حوزه‌یرانى داهاتوو كونسلخانه‌یه‌كى گشتیى ئه‌رمه‌نستان له هه‌ولێر ده‌كه‌نه‌وه و به‌ر له‌وه‌ش له كۆتاییى ئه‌م مانگه‌وه، هه‌فتانه دوو جار گه‌شتى ئاسمانیى ڕاسته‌وخۆ له نێوان هه‌ولێر و یه‌ریڤانى پایته‌ختدا، ئه‌نجام ده‌ده‌ن.
لاى خۆیه‌وه به‌ڕێز نێچیرڤان بارزانى، خۆشحاڵیى خۆى بۆ ئه‌م هه‌نگاوانه‌ى كۆمارى ئه‌رمه‌نستان ده‌ربڕى و هه‌موو هاوكارى و پشتگیرییه‌كى حكوومه‌تى هه‌رێمى كوردستانى بۆ به‌جێگه‌یاندنى ئه‌م بڕیارانه نیشان دا. دووپاتیشى كرده‌وه كه هه‌رێمى كوردستان به خۆشحاڵییه‌وه پێشوازى له خواستى سه‌رمایه‌داران و وه‌به‌رهێنه‌رانى ئه‌رمه‌نستان بۆ كاركردن و وه‌به‌رهێنان له هه‌رێمى كوردستان ده‌كات و هه‌موو ئاسانكارییه‌كیان پێشكه‌ش ده‌كات.
جێگری سەرۆکی حکومەت و باڵیۆزی ئەرمینیا لە عیراق، پەرەپێدانی پەیوەندییەکانی نێوان هەرێم و ئەرمینیایان باسکرد
ئەمرۆ لە کۆبوونەوەی نێوان قوباد تاڵەبانی جێگری سەرۆکی حکومەتی هەرێمی کوردستان و کارین گریگۆریان باڵیۆزی ئەرمینیا لەعیراق، باڵوێزی ئەرمینیا رایگەیاند کە بەم نزیکانە هێلی ئاسمانی نێوان وڵاتی ئەرمینیا و هەرێمی کوردستان بکرێتەوە.
لە دیدارێکدا کە فەلاح مستەفا بەرپرسی پەیوەندییەکانی دەرەوەی هەرێمی کوردستان تییایدا ئامادەببوو، گفتوگۆ لەبارەی پەرەپێدانی پەیوەندییەکانی هەرێمی کوردستان و وڵاتی ئەرمینیا کرا و هەروەها باس لە هەماهەنگی زیاتری نێوان هەردوولا کرا.
هەر لەو کۆبوونەوەیەدا کە لە تەلاری ئەنجومەنی وەزیران بەرێوەچوو، جێگری سەرۆکی حکومەتی هەرێمی کوردستان، سوپاسی هەوڵەکانی وڵاتی ئەرمینیای بۆ کردنەوەی کونسوڵخانەی گشتیی ئەرمینیا لە هەولێر کرد.
لە کۆتایی دیدارەکەدا قوباد تاڵەبانی ووتی: نەمانهیشتووە ئەو رەوشە ئەمنییەی لە عیراقدا هەیە ببێتە بەربەستێک لە پرۆسەی گەشەپێدانی ئابووری هەرێمی کوردستان و فراوانتر کردنی پەیوەندیە سیاسی و ئابووریەکانمان لەگەڵ وڵاتانی تر باشترین وەڵامە بۆ ئەوانەی کە بە خەیاڵی خاوی خۆیان دەیانەوێت کوردستان بەرەو دواوە ببەن.
حکوومەتی هەرێمى كوردستان، ئیدانەی کوشتنی فڕۆکەوانە ئوردنییەکە دەکات
زۆر بە توندی سەرکۆنەی کوشتنی فڕۆکەوانی ئوردنی (مەعاز کەساسیبە) دەکەین كه به‌وپه‌ڕى ترسناكى و دڕه‌نده‌یى، به دەستی تیرۆریستانی داعش شه‌هیدكرا. دیارە کوشتنی دیل و بارمتە دژ بە هەموو بنەمایەکی ئایینی و مرۆیی و یاسا نێودەوڵەتییەکانە، بۆیە تاوانەکانی ئەم تیرۆریستانە لە هەموو بنەمایەکی مرۆیی و ئایینی و شارستانییه‌وه دوورن و مەترسییەکانیان بەرۆکی هەموو گەل و وڵاتانی ناوچەکە و دنیای بەبێ جیاوازی گرتووە.
ئه‌م دڕه‌نده‌یییه دیسان ده‌یسه‌لمێنێ كه ئەرکی کۆمەڵگای نێودەوڵەتی و هێزە ئازادیخواز و مرۆڤدۆستەکانی دنیا ئەوەیە، بۆ وشککردنی سەرچاوەکانی وزە و هێزی تیرۆریستان و بنەبڕکردنیان و لەپێناو فەراهەمکردنی دنیایەکی هێمنتر و پڕ لە ئاشتی و ئارامی بۆ گەلانی دنیا و ئایندەی مرۆڤایەتی، هەمووان پێکەوە به شێوه‌یه‌كى زۆر كاراترى هه‌مه‌لایه‌نه، كار بۆ له‌ناوبردنى دڕنده‌كانى داعش بكه‌ن.
بە ناوی حکوومەت و گەلی کوردستانەوە، ئه‌وپه‌ڕى هاوخه‌مى و سەرەخۆشیی خۆمان ئاڕاستەی خانەوادەی فڕۆکەوانی ئوردنی (مەعاز کەساسیبە) و جه‌نابى شا و حکوومەت و گەلی شانشینی ئوردنى دۆست دەکەین. تیرۆریستان دەبێ باجی ئەم تاوانە دڕندانه‌یه و هەموو تاوانە نامرۆییەکانی دیكه‌یان بدەن و له ڕه‌گ و ڕیشاڵه‌وه هه‌ڵبته‌كێنرێن.
ئه‌نجومه‌نى وه‌زیرانى هه‌رێمى كوردستان
2015/2/3
سه‌رۆكی هه‌رێمی كوردستان پێشوازی له سه‌رۆك و ئه‌ندامانی ئه‌نجوومه‌نی پارێزگای نه‌ینه‌وا كرد
ئه‌مڕۆ یه‌كشه‌ممه ٢٥ـی ١ـی ٢٠١٥ به‌ڕێز مسعود بارزانی سه‌رۆكی هه‌رێمی كوردستان پێشوازی له سه‌رۆك و ئه‌ندامانی ئه‌نجوومه‌نی پارێزگای نه‌ینه‌وا كرد.
له دیداره‌كه‌دا شاندی میوان به‌ناوی خۆیان و دانیشتووانی پارێزگای نه‌ینه‌وا پێزانینی خۆیان ئاراستەی سه‌رۆك بارزانی کرد کە خۆی راسته‌وخۆ سه‌رپه‌رشتیی به‌ره‌كانی رووبه‌ڕووبونه‌وه‌ی تیرۆریستانی داعش ده‌كات و سوپاسی پێشمەرگەی کوردستانیان کرد بۆ گیانفیدایی و ئازایەتییان لە وەدەرنانی تیرۆریستان. هه‌روه‌ها پرسه و سه‌ره‌خۆشیی خۆیان ئاراستەی خانه‌واده و كه‌سوكاری شه‌هیدان كرد كه به خوێنی خۆیان شكستیان به داعش هێناوه و ڕایانگەیاند کە ئه‌وان قه‌رزداری پێشمه‌رگه‌ن و هیچ كاتێك ئازایەتیی پێشمەرگە له یاد ناكرێت و مێژوو ئه‌و گیانفیداییه‌ی پێشمه‌رگه تۆمار ده‌كات. سوپاسی گه‌ل و حكوومه‌تی هه‌رێمی كوردستانیشیان كرد بۆ له‌باوه‌ش گرتن و یارمه‌تیدانی ئاواره‌كان.
شاندی میوان جه‌ختیان كرده‌وه، كه هیچ كه‌س و لایه‌نێك ناتوانێ پێكه‌وه‌ژیانی نێوان پێكهاته‌كانی پارێزگای نەینەوا تێك بدات. له به‌شێكی دیكه‌ی دیداره‌كه‌دا باس له قۆناغی دوای وه‌ده‌رنانی داعش و چاره‌سه‌ركردنی ئه‌و درزه كرا، كه داعش به ره‌فتاره نامرۆڤانە‌كانی دروستی كردووه.
له ته‌وه‌رێكی دیكه‌دا، شاندی میوان پوخته‌یه‌كیان له كار و چالاكییه‌كانی خۆیان، پێشكه‌ش به سه‌رۆك بارزانی كرد و ڕایانگەیاند کە هەموو ئەندامانی ئەنجوومەنەکە به دڵ و به گیان وه‌ك یه‌ك تیم كار ده‌كەن، هه‌روه‌ها داوایان له سه‌رۆك بارزانی كرد له پاڵپشتیكردنی هه‌موو پێكهاته‌كان به‌رده‌وام بێت.
لە بەرانبەردا به‌ڕێز سه‌رۆكی هه‌رێمی كوردستان به‌خێرهاتنی شاندی میوانی كرد و كورته‌یه‌كی له باره‌ی سەرەتای پەلاماری ڕێکخراوی تیرۆریستیی داعش باسكرد و ئاماژه‌ی به‌وه‌دا، كه هاتنی داعش زیانێكی گه‌وره‌ی به ئیسلام و هەموو پێکهاتەکان گه‌یاند، بۆیە لەناوبردن و دەرکردنی تیرۆریستان ئەرکی هەمووانە و پێویستە هەموو لایەنەکان تواناکانیان یەک بخەن و ڕێگە نەدەن مەرامی تیرۆریستان بێتەدی و دەبێ دەرکردنی تیرۆریستان ببێتە ئەولەویەتی هەمووان.
سەرۆک بارزانی ڕایگەیاند كه به پێی توانا پاڵپشتی ئه‌و ئه‌نجوومه‌نه ده‌كات، چونكه نوێنه‌رایه‌تیی واقیعی كۆمه‌ڵایه‌تی و سیاسیی ئه‌و پارێزگایه ده‌كات. له‌باره‌ی ژیان و گوزه‌رانی ئاواره‌كانیش، سه‌رۆك بارزانی گوتی: چاره‌سه‌ركردنی بنه‌ڕه‌تی بریتییە لە ڕزگار کردنی ناوچەکانیان و گەڕانەوەی ئاوارە و لێقەوماوان بۆ سه‌ر ماڵ و حاڵی خۆیان. هەروەها جەختیشی کردەوە کە دوای وه‌ده‌رنانی داعش ده‌بێ زیاتر بنه‌ماكانی پێكه‌وه‌ژیان بەهێز بکرێنەوە و نابێ رێگە بدرێت شه‌ڕی داعش ببێته هۆكارێك بۆ دروستكردنی ململانێی نه‌ته‌وه‌یی.
لە کۆتایی دیدارەکەشدا ئەندامانی شاندی میوان پرسیار و سەرنجی خۆیان لەبارەی ڕەوشی ئێستای پارێزگای نەینەوا و پێشڕەوییەکانی پێشمەرگە لەو ناوچەیە خستەڕوو و لەلایەن سەرۆک بارزانییەوە وەڵام درانەوە.
وەڵامی سەرۆك بارزانی بۆ پەیامی جێگری سەرۆكی هەرێمی كوردستان
برای بەڕێز كاك كۆسرەت ڕەسوڵ عەلی جێگری سەرۆكی هەرێمی كوردستان
موژدەی سەركەوتنی هێزی پێشمەرگەی كوردستان لە میحوەری كەركووك بەسەر تیرۆریستانی داعش هەموو كوردستانییەكی خۆشحاڵ كرد. سوپاس بۆ خوای مەزن، سوپاس بۆ پێشمەرگە قارەمانەكانمان و دەستی هەموو لایەك خۆش بێت.
سڵاو بۆ گیانی پاكی شەهیدە قارەمانەكانمان كە بە خوێنی خۆیان بەرگرییان لە خاك و كەرامەتی كوردستان كرد. هیوای چاكبوونەوە بۆ بریندارانی شەڕەكانی میحوەری كەركووك و هەموو بەرەكانی جەنگی دژی تیرۆریستان دەخوازم.
سوپاس و پێزانینم هەیە بۆ جەنابت و گشت فەرماندە و پێشمەرگە دلێرەكان بۆ ئەو هیمەتەی كردتان لە شكاندن و ڕاوەدونانی تیرۆریستان. دەستتان خۆش بێت.
مسعود بارزانی
سەرۆكی هەرێمی كوردستان
1ـی 2ـی 2015
سەرۆكی هەرێمی كوردستان پێشوازی لە ڕاوێژكاری ئاساییشی نیشتیمانیی عێراق كرد
ئەمڕۆ چوارشەممە 28ـی 1ـی 2015 بەڕێز مەسعود بارزانی سەرۆكی هەرێمی كوردستان پێشوازی لە فاڵح فەیاز ڕاوێژكاری ئاساییشی نیشتیمانیی عێراق كرد.
لە سەرەتای دیدارەكەدا فاڵح فەیاز ڕاوێژكاری ئاساییشی نیشتیمانیی عێراق پیرۆزبایی لە سەرۆك بارزانی كرد بە بۆنەی ئەو سەركەوتنانەی هێزەكانی پێشمەرگەی كوردستان لە بەرەكانی جەنگی دژی ڕێكخراوی تیرۆریستیی داعش بەدەستیانهێناوە و ڕۆڵی سەركردایەتی و ئامادەبوونی سەرۆك بارزانی لە بەرەكانی جەنگ بەرز نرخاند و بە هۆكارێكی یەكلاییكەرەوەی سەركەوتنەكانی پێشمەرگە لەدژی داعش لەقەڵەمدا.
لەم دیدارەدا بارودۆخی مەیدانیی بەرەكانی ڕووبەڕووبوونەوەی تیرۆریستانی داعش و هەروەها سەركەوتنەكانی هێزی پێشمەرگەی كوردستان خرایە بەر باس و قسەیش لەبارەی شكستەكانی ڕێكخراوی تیرۆریستیی داعش لە پارێزگای ئەنبار و دیالی كرا.
هەر لەم كۆبوونەوەیەدا جەخت لە ئازادكردنی سەرجەم ناوچەكانی ژێر دەستەڵاتی داعش و یارمەتیدانی ئاوارەكان بۆ گەڕانەوەیان بۆ شوێنەكانیان كرایەوە.
لە بەشێكی دیكەی ئەم كۆبوونەوەیەدا چۆنییەتی ڕووبەڕووبوونەوەی تیرۆریستان لە قۆناغی داهاتوو و پەیوەندییە سیاسی و هاوكارییە ئەمنی و سەربازییەكانی نێوان هەرێم و بەغدا تاوتوێ كرا.
پەیامی سەرۆك بارزانی بۆ ڕزگاربوونی كۆبانێ لە دەستی تیرۆریستان
ئەمڕۆ هەواڵی ڕزگاركردنی كۆبانێی خۆڕاگرمان پێگەییشت. ئەم هەواڵە دڵی هەموو كوردستانی و ئازادیخوازێك شاد دەكات. بە بۆنەی ئەم سەركەوتنە مەزنە پیرۆزبایی لە تێكڕای گەلی كوردستان دەكەم. ئەو سەركەوتنە سەركەوتنی هەموو گەلی كوردستانە، سەركەوتنی مرۆڤایەتییە بەسەر وەحشیگەریی تیرۆریستان.
شانازییە بۆ گەلی كوردستان بە درێژایی 1500 كیلۆمەتر لەبەرانبەر دڕندەترین ڕێكخراوی تیرۆریستی وەستا و تووشی شكستی كرد. خۆڕاگریی و ڕۆڵی قارەمانانەی شەڕڤانان و پشتگیریی هێزی پێشمەرگەی قارەمان بۆ خوشك و برایانیان لە كۆبانێ زۆر بەرز دەنرخێنم و دەست و چاویان ماچ دەكەم.
بەپێویستیشی دەزانم بە ناوی خۆم و گەلی كوردستان سوپاسی هاوپەیمانان بكەم كە بە پشتیوانیی بەردەوامی هێزی ئاسمانیی خۆیان، ڕۆڵیان لە خۆڕاگریی شەڕڤانان و ئەو دەستكەوتە پیرۆزە بۆ خەڵكی كوردستان هەبوو. هەروەها سوپاسی وڵاتی توركیایش دەكەم كە ڕێگەیدا هێزی پشتیوانیی پێشمەرگە بگاتە كۆبانێ بۆ ئەوەی یارمەتیی شەڕڤانان بدات.
لەدەستدانی چەند گوند و شار و گەڕەكێك نابێتە شكست، شكست ئەو كاتەیە كە ئیرادەی مانەوە و خۆڕاگری بشكێت. كۆبانێی قارەمان بۆیە نەكەوت چونكە ئیرادەی نەشكا و خۆڕاگر بوو. من لەوە دڵنیا بووم كە بوونی پاڵپشتیی گەلی كوردستان و یارمەتیی دۆستانی گەلی كوردستان و خۆڕاگریی كۆبانێ وا دەكات ئیرادەی گەلی كوردستان لەبەرانبەر دڕندەیی تیرۆریستان نەشكێت و كۆبانێیش نەكەوێت و بە سەربەرزی بمێنێتەوە.
قوربانیدان لەپێناو خاك و نیشتیمان شەرەفێكی مەزنە و ڕۆڵەكانی گەلەكەمان لە شەڕی دژی تیرۆریستاندا بە قوربانیدانی خۆیان قارەمانێتیی بێ وێنەیان نواند. شەهیدبوونی (زێرەڤان)ـی خەڵكی باشوور و پێشمەرگەی هێزی پشتیوانیی لە كۆبانێ و شەهیدبوونی (نێچیرڤان)ـی پێشمەرگەی ڕۆژئاوا لە شەڕی ئازادكردنی دەڤەری ئەسكی موسڵ ئەویش لە یەك ڕۆژدا، هێمای برایەتی و یەكێتی و یەكدەنگیی گەلی كوردستان بوو و نیشانیدا كە تێكڕای گەلی كوردستان خاوەنی یەك دۆزی هاوبەشن.
سڵاو بۆ گیانی پاكی هەموو شەهیدانی ڕێگەی ئازادی
مسعود بارزانی
سەرۆكی هەرێمی كوردستان
26ـی 1ـی 2015
سەرۆكی هەرێمی كوردستان پێشوازی لە فەرماندەی فەرماندەیی ناوەندیی هێزەكانی ئەمەریكا كرد
لە دیدارەكەدا فەرماندەی فەرماندەیی ناوەندیی هێزەكانی ئەمەریكا پیرۆزبایی لە سەرۆك بارزانی كرد بە بۆنەی سەركەوتنەكانی ئەم دواییەی هێزی پێشمەرگەی كوردستان لە بەرەكانی ڕووبەڕووبوونەوەی تیرۆریستان و ڕۆڵی یەكلاییكەرەوەی سەرۆك بارزانی لە مسۆگەركردنی ئەو سەركەوتنانە بەرز نرخاند و پێزانینیشی هەبوو بۆ ئامادەبوونی سەرۆك بارزانی لە بەرەكان و سەركردایەتیكردنی شەڕی دژ بە تیرۆریستانی داعش. هەروەها سەرەخۆشی لە كەسوكاری ئەو پێشمەرگە قارەمانانە كرد كە ئازایانە گیانی خۆیان بەخشیوە و شەهید بوونە و ڕایشیگەیاند هەموو لایەك بەڕێزەوە سەیری سەركەوتنی پێشمەرگە و ڕۆڵی سەرۆك بارزانی دەكات. فەرماندەی فەرماندەیی ناوەندیی هێزەكانی ئەمەریكا وێڕای ئاماژەدان بە پێشڤەچوونی ڕادەی هەماهەنگی و كاری هاوبەشی نێوان پێشمەرگە و هێزی هاوپەیمان هێمای بەوەدا ئەو هەماهەنگییە ئەنجامی زۆر باشی هەبووە و ئەوەیشی دووپاتكردەوە كە وڵاتەكەی بەردەوام دەبێت لە پاڵپشتیكردنی هێزەكانی پێشمەرگە.
لەبەرانبەردا سەرۆك بارزانی بەخێرهاتنی شاندی میوانی كرد و وێڕای ئاماژەدان بە هەماهەنگیی نێوان پێشمەرگە و هێزی هاوپەیمان ئەوەی خستەڕوو كە ئەو هەماهەنگییە سەركەوتنی مەزنی لێ كەتووەتەوە و پێویستە ئەو سەركەوتنانە فراوانتر بكرێن. هەروەها ئەوەیشی باسكرد كە لەم شەڕەدا كوردستان قارەمان و پێشمەرگە و فەرماندەی مەزنی لەدەست داوە بەڵام بەرگریكردن لە كەرامەت و دۆزی ڕەوای گەلەكەمان قوربانی و باجیشی دەوێت.
هەر لەم دیدارەدا بارودۆخی مەیدانیی بەرەكانی ڕووبەڕووبوونەوەی تیرۆریستان و پێداویستییەكانی هێزی پێشمەرگە و هەروەها بارودۆخی شاری موسڵ خرایە بەر باس و گفتوگۆ.
جێگەی ئاماژەپێدانە كە لەم كۆبوونەوەیەدا مەسرور بارزانی ڕاوێژكاری ئەنجوومەنی ئاساییشی هەرێمی كوردستان و مستەفا سەید قادر وەزیری پێشمەرگە و فواد حوسێن سەرۆكی دیوانی سەرۆكایەتیی هەرێم و فەلاح مستەفا بەرپرسی فەرمانگەی پەیوەندییەكانی دەرەوەی حكوومەت و ئەنوەر حاجی عوسمان بریكاری وەزارەتی پێشمەرگە و جەعفەر شێخ مستەفا و فەریق شێروان عەبدولڕەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم ئامادە بوون.
پێشخستنی پەیوەندیەكانی هەرێمی كوردستان وتوركیا دووپاتى لێكرایەوە
قوباد تاڵەبانی جێگری سەرۆكی حكومەتی هەرێمی كوردستان رایگەیاند، "توركیا وڵاتێكی گرنگە بۆ هەرێمی كوردستان وپەیوەندی نێوان هەردوولا چەندین قۆناغی بەخۆیەوە دیوە كە بەشێكیان نهێنی بوون لەسەردەمی سەخت ودژوار وزۆرجاریش گەیشتۆتە رادەی رووبەڕووبوونەوە وهەڕەشە وئەمڕۆش هەرێمی كوردستان پەیوەندی بەهێز وهەمەڕەهەندی لەگەڵ توركیادا هەیە ".
جێگری سەرۆكی حكومەت لەمیانەی وتارێكیدا لەكۆنفڕانسی ئەنستتیوتی رۆژهەڵاتی ناوەڕاست بۆ توێژینەوە (MERI) كە لەبارەی پەیوەندی نێوان هەرێمی كوردستان وتوركیا رێكخرابوو باسكردنی ئەم بابەتەی بە "پرسێكی گرنگ بۆ باسكردنی ئایندەی ناوچەكە لەقەڵەمدا".
قوباد تاڵەبانی نیشانیدا لەنەوەدەكانی سەدەی بیستەم كاتێك سەركردەكانی كورد سەردانی توركیایان دەكرد "بەشێوەیەكی نهێنی ودوور لە چاوی راگەیاندن لەگەڵ سەرۆكی ئەوسای توركیا توركوت ئۆزاڵ كۆ دەبوونەوە وپەیوەندی ئەوكاتی توركیا وسەركردایەتی سیاسی كوردستان لەئاستێكی باشدا بوو بەڵام لەوكاتەدا تەنانەت وشەی كوردستان لەم وڵاتەدا لەخۆیدا تاوانێك بوو بەپێچەوانەی ئێستا كە بەشێوەیەكی زۆر كراوە وراشكاوانە باسی پەیوەندی نێوان هەرێمی كوردستان وتوركیا".
جێگری سەرۆكی حكومەت تیشكی خستە سەر ڕەهەندی ئابووری لەپەیوەندی نێوان هەردوولا كە لەكۆتایی نەوەدەكانی سەدەی بیستەم پەرەی سەند وژمارەیەكی زۆری كۆمپانیای توركی هاتنە كوردستان هاوكات باسی بارودۆخی ئێستای عیراق كرد لەدوای هێرشەكانی داعش ونیشانیدا "پەراوێزخستنی پێكهاتەی سوننە لەعیراق ئەم بارودۆخەی دروستكرد بۆیە بەرەنگاربوونەوەی ئەم رێكخراوە تیرۆریستیە تەنها بەڕێگەچارەی سەربازی نابێت وئەركی سەرەكی ئەم بەرەنگاربوونەوەیەش دەكەوێتە سەر حكومەتی عیراق بەدروستكردنی كەشێكی سیاسی كەتیایدا هەموولایەك قبووڵی یەكتر بكات لەنێو عیراقدا".
ئاماژەی بەوەشدا توركیا ئێستا لەمەترسیەكانی ئەم بارودۆخە تێگەیشتوە كە ئەگەر بەردەوام بوو "داعش تەنها بەخاكی عیراق وسوریا ولوبنان رازی نابێت بەڵكو بۆ خودی توركیاش دەبێتە هەڕەشە".
هەر لەم رێوڕەسمەدا دلاوەر عەلائەدین سەرۆكی پەیمانگا لەوتەیەكدا دووپاتیكردەوە" بەهۆی بارودۆخی ئێستا بەوپێیەی ناوچەكە بەتەواوی كەوتۆتە نێو هەڕەشەیەكی گەورەوە بەتایبەتی دوای سەرهەڵدانی هێزی توندڕەو كە هیچ نەتەوە ووڵاتێك بەسەلامەتی لێی دەرناچێت ئەگەر رێوشوێنی یەكگرتوو بۆ رووبەڕووبوونەوەی ئەم تیرۆریستانە نەگیرێتەبەر".
هاوكات دووپاتیشیكردەوە لەم كۆنفڕانسەدا "نوخبەیەكی ناسراوی توركیا كە داڕێژەری سیاسەتی ئەم وڵاتەن ولەگەڵ داڕێژەرانی سیاسەت لەهەرێمی كوردستان".
پەیمانگای (MERI) لەمانگی نۆڤەمبەری 2014 دا دیاڵۆگێكی لەبارەی ئاشتەوایی بۆ پێكهاتەكانی ناوچەكە رێكخست وگرنگی تایبەتی بەپەیوەندیەكانی نەتەوەكانی كوردستان وهێزە ناوچەییەكانی وەكو توركیا وئێران وپێكهاتەكانی دیكەی عیراق دا بەباسكردنی كاریگەری سیاسەتی ئەم دەوڵەتانە لەسەر كوردستان وچارەنووسی ئەم هەرێمە.
هەر لەدرێژەی ئەو كۆنفڕانسەدا چەندین دانیشتن وپانێڵ پێشكەشكران بەبەشداری چەندین بەرپرسی سیاسی وئیداری حكومەتی هەرێمی كوردستان وژمارەیەك لەبەرپرس وئەكادیمیستانی توركیا.
جێگری سەرۆکی حکومەت سەردانی دەستەی وەبەرهێنان دەکات
قوباد تاڵەبانی جێگری سەرۆکی حکومەتی هەرێمی کوردستان بە یاوەری وتەبێژی حکومەت و سەرپەرشتیاری ئەنجومەنی ئابوری و سکرتێری ئەنجومەنی وەزیران، سەردانی دەستەی وەبەرهێنانی کرد و لە لایەن رێبوار خەلیل سەرۆکی دەستەکەوە پێشوازی لێکرا.
لە دیدارەکەدا جێگری سەرۆکی حکومەت پشتیوانی سەرۆکایەتی حکومەتی هەرێمی کوردستانی بۆ دەستەی وەبەرهێنان دووپاتکردەوەو رایگەیاند، پێویستە پەرلەمانی کوردستان یاسای وەبەرهێنان بە پێی هەلومەرجی ئێستای هەرێم هەموار بکاتەوە.
دووپاتیشیكردەوە لە ماوەیەکی نزیکدا کۆبونەوەی ئەنجومەنی باڵای وەبەرهێنان ئەنجام بدرێت و رێگەچارەی گونجاو بۆ گرفتەکان دەستنیشان بکرێت.
جێگری سەرۆکی حکومەت بە پیێویستی زانی متمانە بۆ کەرتی وەبەرهێنان بگەڕێندرێتەوە و هاوڵاتیان وەکو پێویست سود لە پرٶژەکانی یەکەی نیشتەجێبوون وەربگرن.