مەنسوور جیھانی  ـ   "نێچیرڤان بارزانی" سەرۆک وەزیرانی حکوومەتی ھەرێمی کوردستان لە سێیەمین خولی فیستیڤاڵی نێودەوڵەتی فیلمی "دھۆک" چاوی له‌ فیلمی سینەمایی "بیرەوەرییەکانی سەر بەرد" لە دەرھێنانی "شەوکەت ئەمین کورکی" کرد.

سێیەمین خولی فیستیڤاڵی نێودەوڵەتی فیلمی "دھۆک"Duhokبە نمایشی فیلمی سینەمایی "بیرەوەرییەکانی سەر بەرد"Memories On Stonلە دەرھێنانی سینەماکاری کورد "شەوکەت ئەمین کورکی" و لە بەرھەمھێنانی "مەمەد ئەکتاش" فیلمی ھەڵبژاردەی وڵاتی عێراق بە ھەشتا و ھەشتەمین خولی ڕێوڕەسمی خەڵاتە سینەماییەکانی ئاکادیمیای ئۆسکار لە ساڵی ٢٠١٦ لە وڵاتی ئەمەریکا بە ئادەبوونی "نێچیرڤان بارزانی" سەرۆک وەزیرانی حکوومەتی ھەرێمی کوردستان لە ڕێوڕەسمی دەسپێکی ئەم فیستیڤاڵە و لە بەشی پێشبڕکێی "سینەمای کوردیی" ئەم فیستیڤاڵە و لە ڕۆژی ڕێزلێنانی سینەماکاری ناوداری کورد "یەڵماز گونای" دەرھێنەری براوەی چڵە بەڕووی فیستیڤاڵی نێودەوڵەتی فیلمی "کان" لە وڵاتی فەڕەنسا لە ساڵ ١٩٨٢ لە ھۆڵی "کۆنگرە"ی زانکۆی شاری دھۆک لە ھەرێمی کوردستان دەستی پێکرد.

"نێچیرڤان بارزانی" سەرۆک وەزیرانی حکوومەتی ھەرێمی کوردستان جگە لە بەخێرھێنانی بەشدار و میوانانی فیستیڤاڵ بە گشتی و بە تایبەتی ئەوانەی لە ژمارەیەکی زۆری وڵاتانی جیھانەوە ھاتوون، دووپاتی کردەوە کە بەشداریان پشتگیرییەکی گەورەیە بۆ خەڵکی کوردستان کە لەبەرامبەر ھێزی تاریکپەرست وەستاوە و بەرگریی لە باوەڕ و پرنسیپەکانی مرۆڤایەتی و جیھانی شارستانی دەکات و ھیوای خواست لەکاتی گەڕانەوەیاندا ببنە دەنگ و باڵیۆز بۆ کوردستان.

ھەروەک بە پشتگیرییەکی گەورەی بۆ خەڵکی بادینان بە شێوەیەکی گشتی زانی کە بەوپەڕی مرۆڤدۆستییەوە پێشوازیان لە زیاتر لە ملیۆنێک و پێنجسەد ھەزار ئاوارە و پەنابەری دەستی تیرۆر لە ھەموو پێکھاتە نەتەوەیی و ئایینییەکان کردووە و بە ھەموو شێوەیەک جێگەی حەوانەوەیان بۆ دابین کردووە.

ئەوەیشی خستەڕوو: گەلی کوردستان گەلێکی ژیان دۆست و مرۆڤ دۆستە و تەنیا لە کاتە زۆر سەختەکانیشدا ئەم سیمایەی خۆی پاراستووە. گەر ناچاربووبێت بە دەستێک چەک ھەڵگرێت بەمەبەستی خۆپاراستن، بەردەوام بە دەستەکەی دیکە داھێنانی کردووە و ھەوڵی داوە لە جیھانی ئەدەبیات و ھوونەر و وەرزش و ھەموو بوارەکانی دیکە پاشنەکەوێت و حکوومەتی ھەرێمی کوردستانیش بەردەوام لە ھەوڵی ئەوەدا بووە ئەم بوارانە پێشبکەوێت و ببێتە خاوەنی بەرھەمێک لە ئاستی بەرھەمە جیھانییەکان.

بارزانی ھەر لە گوتەکەیدا باسی لە گرنگی و کاریگەریی سینەما کرد کە بەھۆی بارودۆخی کوردستان شانسێکی وا بۆ ئەو ھونەرە لە کوردستان دروست نەبووە و لەبەر پێویستی بوارەکانی دیکەی ژیانی خەڵکی کوردستان، حکوومەت ناچاربووە وەک پێویست گرنگی بە ھونەری سینەما نەدات، بەڵام لەگەڵ ئەمەشدا ھەر لەگەڵ دامەزراندنی حکوومەتی ھەرێمی کوردستان و بەگوێرەی ئەو توانایەی کە ھەیە، حکوومەت ھەوڵی داوە گرنگی بەو ھونەرە گەورەیە بدات و پشتگیریی کارە سینەماییەکان بکات و ھونەرمەند و سینەماکارانی کوردستانیش شاھێدی ئەم قسەیەن ئەمە جگە لەوەی بەشداری ژمارەیەک لەو بەرھەمانە لە ڤیستیڤاڵە جیھانییەکاندا و بەدەستھێنانی خەڵاتی گەورە، بەڵگەیەکی دیکەی پشتگیریی حکوومەتی ھەرێمی کوردستانە بۆ کار و بەرھەمە سینەماییەکان.

سەرۆکی حکوومەتی ھەرێمی کوردستان ھەر لەسەر گرنگیی ڕۆڵی سینەما، ئاماژەی بەوە دا کە سینەما دەنگی زۆرێک لە گەلانی مافخوراوی جیھانی گەیاندوە و بەسەرھاتەکانی گەلی کوردستانیش ماددەی زۆر باش و بەھاداری ھونەری سینەمایین، گەر وەک گەلانی دیکەی جیھان گەلی کورد شانسی ھەبا و بارودۆخەکەی ھاوکار با، ئێستا بە سەدان و ھەزاران لە چیرۆکەکانی گەلی کورد وەک ڕاپەڕین و شۆڕشە دێرینەکانی کوردستان، ئەنفال و کیمیاباران، داستان و قارەمانێتییەکانی ھێزی پێشمەرگە، کۆچکردن و ئاوارەبوون، چیرۆکی خۆشەویشتی، چیرۆکی ھەر خوشکێکی ئێزدی کە لەلایەن تیرۆرستانەوە ڕفێتنراون و بەسەرھاتی ئالانی جوانەمەرگ، بابەتی گەلێک لە شاکارە سینەماییەکانی جیھان دەبوون.

گوتیشی: بەردەوامی ئەم ڤیستیڤاڵە لە دھۆک لە بارودۆخی ئەمڕۆی ھەرێمی کوردستان کە بە ژمارەیەک کێشە و قەیرانی سیاسی و ئابووری و دارایی تێدەپەڕێت و شەڕێکی گران بەسەر کوردستاندا سەپێنراوە، جێگەی خۆشحاڵییە و بەڵگەیەکی حاشا ھەڵنەگریشە کە گەلی کوردستان سەرەڕای ھەموو سەختییەکان، گەلێکی زیندووە و دەستبەرداری پێشکەوتن و خۆشەویستی بۆ ژیان نابێت.

"نێچیرڤان بارزانی" لە کۆتایی گوتەکەیدا ھیوای سەرکەوتنی بۆ سێیەمین خولی فیستیڤاڵی نێودەوڵەتی فیلمی "دھۆک" خواست و ھەروەک ھیوای خواست بارودۆخەکە باشتر ببێت بۆئەوەی چ وەک حکوومەت یان کەرتی تایبەت، زیاتر گرنگی بەو ھونەرە گەورەیە بدەن.

لە سێیەمین خولی فیستیڤاڵی نێودەوڵەتی فیلمی "دھۆک" کۆمەڵێک فیلم لە سینەماکارانی وڵاتانی ئەڵمانیا، فەڕەنسا، تورکیا، ئێران، ئیسپانیا، ئەمەریکا، پورتوگاڵ، ڕۆمانیا، ئەڕژەنتین، شیلی، کرۆواسیا، کێنیا، کەنەدا، کووبا، بێلارووس، بۆسنی و ھێرزێگۆڤین، ڕووسیا، بەریتانیا، نۆڕوێژ، پۆڵەندا، دانیمارک، ئەفریقیای باشوور، مووریتانی، کۆماریی دۆمێنیکەن، ئیتاڵیا، لوبنان و ھەروەھا ھەرێمی کوردستان بۆ ماوەی ٨ رۆژ نمایشکران. لە دەسپێکی نمایشی ھەر فیلمێکدا سەرەتا ستافی ئامادەبووی ئەم فیلمە لەبەرچاوی کامێڕاکانی دەزگاکانی ڕاگەیاندندا بەسەر مافوورەی سووری ئەم فیستیڤاڵەدا تێدەپەڕین و پاشان نمایشی ھەر فیلمێک کۆڕی ڕەخنە و ھەڵسەنگاندن لە لایەن کارناسی کۆڕەکە و ھەروەھا بینەرانەوە بەڕێوەدەچوو.

لە بەشی پێشبڕکێی "سینەمای کوردیی" سێیەمین خولی فیستیڤاڵی نێودەوڵەتی فیلمی "دھۆک"بێجگە لە فیلمی سینەمایی "بیرەوەرییەکانی سەر بەرد" لە دەرھێنانی "شەوکەت ئەمین کورکی" چەندین فیلمی دیکە لە سینەماکاری کورد نمایشکران، ھەندێک لەو فیلمە کوردیانەی کە لەم بەشەی فیستیڤاڵەدا نمایشکران بریتین لە: "نامەیەک بۆ پاشا" لە دەرھێنانی "ھیشام زەمان"، فیلمی سینەمایی "سەمای ئەسپەکان" لە دەرھێنانی "سەردار خەلیل"، فیلمی سینەمایی "ماڵئاوا دیجیتاڵ" لە دەرھێنانی "ھیوا ئەمین نژاد" و چەندین فیلمی سینەمایی دیکە.

ئەندامانی لێژنەی دادوەرانی بەشی پێشبڕکێی "سینەمای کوردیی" سێیەمین خولی فیستیڤاڵی نێودەوڵەتی فیلمی "دھۆک" بریتین لە: سەرۆکی لێژنەی ناوبژیوان "ئان دێمی گێرۆ" Anne Démy-Geroe  مامۆستای زانکۆ، شارەزا لە بواری سینەما و بەرپرسی ھونەریی خەڵاتەکانی ئیسکرین "ئاسیا پەسیفیک" ASIA PACIFIC ناسراو بە "ئۆسکاری ئاسیا" APSA  و چەندین فیستیڤاڵی سینەمایی دیکە لە وڵاتی ئۆستوڕاڵیا، "مارینا کابا ڕاڵ" Marina Caba Rall  دەرھێنەر و ڕۆژنامەنووس لە ئیسپانیا، سینەماکاری ناوداری کورد "عەلی بەدرخان" دەرھێنەر لە وڵاتی میسر، "گیبلیا دووبرێ" Giulia Dobre ڕەخنەگری سینەما و مامۆستای زانکۆ لە وڵاتی ڕۆمانیا و ھەروەھا نووسەر و ڕۆمانووسی کورد "عەتا نەھایی" لە وڵاتی ئێران.

ئەندامانی لێژنەی دادوەرانی بەشی پێشبڕکێی "سینەمای جیھان"ی ئەم فیستیڤاڵەش بریتین لە: سەرۆکی لێژنەی ناوبژیوان "وێرنێر رۆزیکا" Werner Ruzicka بەرپرسی فیستیڤاڵی نێودەوڵەتی فیلمی "دۆیسبۆرگ" Duisburg و مامۆستای زانکۆ لە ئەڵمانیا، "فرێدی ئۆلسۆن" Freddy Olson بەرھەمھێنەر و بەرنامەداڕێژی فیستیڤاڵەکان لە سوید، "عایشە پۆلات" Ayse Polat نووسەر و دەرھێنەر لە ئەڵمانیا، "جانی بوردایس" Jany Bourdais بەرپرسی ئەنستیتۆی فەڕەنسی لە ھەولێر لە فەڕەنسا و "سوپۆم سوھن" Soopum Sohn دەرھێنەر و مامۆستای زانکۆ لە ئەمەریکا.

ھەروەھا ئەندامانی لێژنەی دادوەرانی بەشی پێشبڕکێی کورتە فیلمەکانی سێیەمین خولی فیستیڤاڵی نێودەوڵەتی فیلمی "دھۆک" بریتین لە: سەرۆکی لێژنەی ناوبژیوان "پیتێر ئوت" Peter Ott نووسەر و دەرھێنەر لە ئەڵمانیا، "پیتێر بۆی" Peter Boe بەرھەمھێنەر و دەرھێنەر لە نۆڕوێژ، "سەھیم عومەر خەلیفە" Sahim Omar Kalifa نووسەر و دەرھێنەر لە ھەرێمی کوردستان و بەلژیکا، "بنویسە بریڤان" Binevsa Berivan دەرھێنەر لە بەلژیکا و "دیمیتری گلۆبنیچی" Dmitriy Golubnichiy بەرھەمھێنەر لە ڕووسیا.

یەکێک لە خاڵە بەرچاوەکانی ئەم خولەی فیستیڤاڵی نێودەوڵەتی فیلمی "دھۆک"، نمایشی بەرھەمە بەرچاوەکانی ئەمساڵ و ساڵی پاری سینەمای جیھان بوون کە ھەڵگریی خەڵاتە گرینگەکانی سینەمابوون لەوانە: ئۆسکار، گۆلدێن گلۆب، بەڕلینالە، ڤێنیز و ... کە لە بەشی پێشبڕکێی "سینەمای جیھان" نمایشکران، لەوانە: فیلمە سینەماییەکانی "ئایدا" IDA لە پۆڵەندا، "لۆڤیاتان" Leviathan لە ڕووسیا، "مەدیتەرانە" Meditteranea لە ئیتاڵیا، ئەمەریکا و فەڕەنسا، "تیمبۆکتۆ" Timbuktu لە موریتانی، "ئفریم!" Aferim! لە ڕۆمانیا، "سیواس" لە تورکیا و چەندین بەرھەمی دیکە.

فیستیڤاڵی نێونەتەوەیی فیلمی دھۆک لە لایەن بەڕێوەبەرایەتی گشتیی ھونەریی سینەمای دھۆک سەر بە وەزارەتی رۆشنبیری و لاوانی حکوومەتی ھەرێمی کوردستان و بە بەڕێوەبەریی ھونەریی "مەمەد ئەکتاش" و بە بەشداریی بەرھەمی وڵاتانی ئەڵمانیا، فەڕەنسا، تورکیا، ئێران، ئیسپانیا، ئەمەریکا، پورتوگاڵ، ڕۆمانیا، ئەڕژەنتین، شیلی، کرۆواسیا، کێنیا، کەنەدا، کووبا، بێلارووس، بۆسنی و ھێرزێگۆڤین، ڕووسیا، بەریتانیا، نۆڕوێژ، پۆڵەندا، دانیمارک، ئەفریقیای باشوور، مووریتانی، کۆماریی دۆمێنیکەن، ئیتاڵیا، لوبنان و ھەروەھا ھەرێمی کوردستان لە ھۆڵی کۆنگرێسی زانکۆی شاری دھۆک و هه‌روه‌ها سێ هۆڵی سینه‌مایی ناوه‌ندی "مازی مۆڵ" لە شاری دھۆکلە ھەرێمی کوردستان بەڕێوەدەچێت.

بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز سەلیم جبووری سەرۆكی ئەنجومەنی نوێنەرانی عێراق كرد.

لە دیدارێكدا سەرەتا دۆخی سیاسی و ئەمنی و سەربازیی عێراق و دوایین پێشهاتەكانی شەڕی دژی تیرۆرستانی داعش لە ناوچە جیاجیاكانی عێراق و هەرێمی كوردستان تاوتوێ كرا و داكۆكی لەسەر گرنگیی بەردەوامیی هاوكاری و پشتگیریی هاوپەیمانیی نێودەوڵەتی بۆ عێراق و هەرێمی كوردستان لە شەڕی دژی تیرۆردا كرایەوە، هەروەها تیشك خرایە سەر گرنگیی هاوكاری و هەماهەنگیی زیاتری نێوان هەردوو حكوومەتی هەرێمی كوردستان و فیدرالی عێراق لە ڕووبەڕووبوونەوەی تیرۆردا.

لە بەشێكی دیكەی دیدارەكەدا دۆخی ئەمڕۆی هەرێمی كوردستان و بە تایبەتیش ئەو ناكۆكییە سیاسییانەی كە ماوەیەكە لە هەرێمی كوردستان سەریان هەڵداوە، تاوتوێ كرا و لەمبارەیەوە ڕێزدار نێچیرڤان بارزانی دووپاتی كردەوە ئەو ڕێكارانەی لە هەرێمی كوردستان گیراونەتەبەر، بۆ ڕێگری بووە لە تەشەنەكردن و ئاڵۆزبوونی زیاتری دۆخەكە و جەختی لەوەش كردەوە كە بڕوایان وایە هەموو كێشە و ناكۆكییە سیاسییەكان دەكرێ لە ڕێگای دیالۆگ و گفتوگۆوە چارەسەر بكرێن.

هەروەها سوپاسی هەوڵ و خەمخۆریی بەڕێز سەرۆكی ئەنجومەنی نوێنەرانی عێراقی كرد بۆ چارەسەركردنی كێشەكان كە بۆ ئەم مەبەستە بە نیازە لەگەڵ لایەنەكانی هەرێمی كوردستان دیدار و چاوپێكەوتن ساز بكات، هەروەك چۆن چەند لایەن و كەسایەتییەكی دیكەی عێراقیش هەمان ڕۆڵ دەبینن و ئەو ڕۆڵەی ئەوانیشی بەرز نرخاند.

لە دوایین بەشی دیدارەكەدا بەرێز سەرۆكی ئەنجومەنی نوێنەرانی عێراق سوپاسی پشتگیری و هاوكارییەكانی حكوومەتی هەرێمی كوردستانی كرد بۆ ئەو ئاوارانەی كە لە بەشەكانی دیكەی عێراقەوە ڕوویان لە هەرێمی كوردستان كردووە پێشوازییەكی باشیان لێكراوە و كۆمەك و هاوكاری كراون. لەمبارەیەشەوە بەرێز سەرۆك وەزیرانی هەرێمی كوردستان هیوای خواست كە حكوومەت و پەرلەمانی عێراق كێشەی ئاوارەكان جددیتر وەربگرن و هەموو هەوڵێك بدەن بۆ ئەوەی حكوومەتی عێراق و وڵاتانی عەرەبیش هاوكاریی زیاتری ئاوارەكان بكەن چونكە لە دۆخێكدان كە پێویستییان بە هەموو پشتگیری و هاوكارییەكە.

"نێچیرڤان بارزانی" سەرۆك وەزیرانی هەرێمی كوردستان و شاندیی هاوڕێی به‌شدارییان لە پرسەی سیاسەتمەداری عێراقی خوالێخۆشبوو "ئەحمەد چەلەبی" کرد.

پێشنیوەڕۆی ڕۆژی شەممە 7/11/2015 شاندێكی باڵای هەرێمی كوردستان بە سەرۆكایەتیی بەڕێز "نێچیرڤان بارزانی" سەرۆك وەزیرانی هەرێمی كوردستان و ئەندامیەتیی بەڕێزان "قوباد تاڵەبانی" جێگری سەرۆك وەزیران، "فازل میرانی" سكرتێری مەكتەبی سیاسی، د. "ڕۆژ نوری شاوەیس" و "ئازاد بەرواری" ئەندامانی مەكتەبی سیاسیی پارتی دیموكراتی كوردستان، "دەرباز کۆسرەت ڕەسووڵ" وەزیری ئـاوەدانکردنەوە و نیشتەجێکردن، "سەفین دزەیی وتەبێژی" حکوومەت و "فەرهاد ئەترووشی" پارێزگاری دهۆك، بۆ بەشداریكردن لە پرسەی سیاسەتمەداری عێراقی خوالێخۆشبوو ئەحمەد چەلەبی، گەیشتنە بەغدای پایتەختی عێراق.

دوای بەشداریكردن و پێشكەشكردنی پرسە و سەرەخۆشی بە خانەوادە و كەسوكاری خوالێخۆشبوو چەلەبی، بەڕێز نێچیرڤان بارزانی بە نوێنەرایەتیی بەڕێز مەسعوود بارزانی سەرۆكی هەرێمی كوردستان، پرسە و سەرەخۆشی و هاودەردی و هاوخەمیی سەرۆك بارزانی بۆ کۆچی دواییی خوالێخۆشبوو د. ئـەحمەد چەلەبی، گەیاندە خانەوادە و كەسوكار و دۆست و هەڤاڵانی.

ئێوارەی ڕۆژی شەممە 7/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە شاندێكی كۆنگرێسی ئەمەریكا بە سەرۆكایەتیی كۆنگرێسمانان دانا رۆهربێچەر و ستیڤ كینگ، كرد.

لە دیدارێكدا شاندی میوان سوپاس و پێزانینی خۆیان بۆ خەڵك و حكوومەت و پێشمەرگەی كوردستان دەربڕی بۆ خۆڕاگرییان لە بەرامبەر تیرۆر و كێشەی بڕینی بودجە لە لایەن بەغداوە و پێشوازیكردن لە ژمارەیەكی زۆری ئاوارە و پەنابەرانی دەستی تیرۆر و هاوكارییكردنیان، لەمبارەیەشەوە سوپاسگوزاریی خەڵكی ئەمەریكایان بۆ هێزی پێشمەرگە و خەڵك و حكوومەتی هەرێمی كوردستان پیشان دا.

دووپاتیشیان كردەوە كە لای خۆیانەوە هەوڵ دەدەن كۆمەڵگەی نێودەوڵەتی بە گشتی و بە تایبەتی ئەمەریكا لە پێشكەشكردنی هاوكاریی سەربازی بۆ هێزی پێشمەرگە بەردەوام بن. هەروەها ئاشكرایان كرد كە ئەوان ڕەشنووسی پڕۆژەیاسایەكیان پێشكەش بە كۆنگرێسی وڵاتەكەیان كردووە بۆ ئەوەی ئەو كارەساتە گەورەیەی بەسەر ئێزدییەكان و كرستیانەكان هاتووە، وەك جینۆساید بناسێنرێ.

لای خۆیەوە بەڕێز سەرۆك وەزیرانی هەرێمی كوردستان سوپاسی هەڵوێستی شاندی میوان و وڵاتانی بەشدار لە هاوپەیمانیی دژی تیرۆرستانی داعش بە گشتی و ئەمەریكا بە تایبەتی  كرد، كە لەگەڵ هێرش و هەڕەشەی داعش هاوكاریی هێزی پێشمەرگەیان كرد، بەڵام بۆ بنبڕكردنی یەكجاریی ئەم مەترسییە پێشمەرگە پێویستی بە ڕاهێنان و چەكی زیاتر و نوێتر هەیە و هیوای خواست هاوكاریی زیاتری هێزی پێشمەرگە و خەڵكی كوردستان بكرێت، چونكە تەنیا پێشمەرگەیە لەسەر ئەرزی واقع شكستی بە گشت پیلانەكانی تیرۆرستان هێناوە.

هەروەها دەستخۆشی لە ڕەشنووسی پڕۆژەیاسای بەجینۆسایدناساندنی ئەو كارەساتانەی بەسەر ئێزدی و كرستیانەكان هاتوون، كرد و ئاماژەی بەوە دا ئەمە یەكێكە لە داخوازە هەرە سەرەكییەكانی حكوومەتی هەرێمی كوردستان. هەروەك جەختی لە بەردەوامیی پاراستن و هاوكاریكردنی هەموو ئەو ئاوارە و پەنابەرانە كردەوە كە لە ترسی تیرۆر ڕوویان لە هەرێمی كوردستان كردووە، بەڵام بە هۆی قەیرانی داراییەوە حكوومەتی هەرێمی كوردستان پێویستی بە پشتگیری و هاوكاریی نێودەوڵەتی هەیە بۆ ئەوەی خزمەتی زیاتریان پێشكەش بكرێت.

تاوتوێكردنی پەیوەندییەكانی نێوان هەرێمی كوردستان و وڵاتانی ناوچەكە و بە تایبەتی پەیوەندییەكانی نێوان هەولێر و بەغدا، لایەنێكی دیكەی دیدارەكە بوو.

"نێچیرڤان بارزانی" سەرۆكی حكوومەتی هەرێمی كوردستان، بەبۆنەی كۆچی دواییی د. ئەحمەد چەلەبی، كەسایەتیی نێوداری عێراقی و سەرۆكی كۆنگرەی نیشتمانیی عێراق و سەرۆكی لیژنەی داراییی پەرلەمانی عێراق، پەیامێكی سەرەخۆشی ڕاگەیاند.

بەبۆنەی كۆچی دواییی د. ئەحمەد چەلەبی، كەسایەتیی نێوداری عێراقی و سەرۆكی كۆنگرەی نیشتمانیی عێراق و سەرۆكی لیژنەی داراییی پەرلەمانی عێراق، بەڕێز "نێچیرڤان بارزانی" سەرۆكی حكوومەتی هەرێمی كوردستان، پەیامێكی سەرەخۆشی ڕاگەیاند و تیایدا سەرەخۆشی لەگەلی عێراق كرد بەبۆنەی لەدەستدانی كەسایەتییەكی گەورەی سیاسی. هەروەها سەرۆكی حكوومەتی هەرێمی كوردستان دەڵێ بەكۆچی دوایی د. ئەحمەد چەلەبی، گەلی كوردستان دۆستێكی گەورە و دڵسۆزی لەدەست دا.
ئەمەش دەقی پەیامی ماتەمینی بەڕێز "نێچیرڤان بارزانی" سەرۆكی حكوومەتی هەرێمی كوردستانە:

بەناوی خوای گەورە و میهرەبانەوە

هەواڵی كۆچی دواییی كەسایەتیی گەورەی عێراقی و دۆستی خۆشەویستمان د. ئەحمەد چەلەبی، ئێمەی لەناخەوە خەمبار كرد. بەم بۆنە خەمناكەوە پرسە و سەرەخۆشی لە بنەماڵە و كەسوكاری خوالێخۆشبوو د. ئەحمەد چەلەبی، گەلی خۆشەویستی عێراق و سەركردایەتیی كۆنگرەی نیشتمانیی عێراق و هەموو هاوكارانی لە پەرلەمانی عێراق دەكەین و هاوخەمیی خۆمان بۆ لەدەستدانی ئەو مرۆڤە خۆشەویستەی عێراق دەردەبڕین.

خوالێخۆشبوو د. ئەحمەد چەلەبی، دۆستێكی گەورە و دڵسۆزی گەلی كوردستان بوو، هەروەها پشتیوانێكی گەورەی مافە ڕەواكانی كورد بوو. ئەو دۆستایەتییەی خوالێخۆشبوو د. ئەحمەد چەلەبی لە پەیوەندیی لەمێژینە و دۆستانەی نێوان بنەماڵەكەی لەگەڵ ڕابەری شۆڕشی كوردستان مەلا مستەفا بارزانی سەرچاوەی گرتبوو، هەروەها خۆیشی دواتر پەیوەندییەكی زۆر بەهێزی لەگەڵ باوكی خوالێخۆشبووم ئیدریس بارزانی هەبوو.

گەلی كوردستان هەوڵەكانی خوالێخۆشبوو د. ئەحمەد چەلەبی لەبیر ناكات بۆ ڕاگرتنی شەڕی ناوخۆ لە نێوان پارتی دیموكراتی كوردستان و یەكێتیی نیشتمانیی كوردستاندا، لە سنوورداركردنی شەڕ و دروستبوونی ئاشتیدا و بەكارهێنانی پەیوەندییەكانی بۆ یارمەتیدانی ئەزموونی هەرێمی كوردستان، ڕۆڵی خوالێخۆشبوو هەمیشە لە بیرەوەریی ئێمەدا بە زیندوویی دەمێنێتەوە.

خوالێخۆشبوو د. ئەحمەد چەلەبی خاوەن ڕۆڵێكی گەورە بوو لە یەكخستنی ئۆپۆزیسیۆنی عێراقی و ڕووخاندنی ڕژێمی بەعسدا لە عێراق و هەروەها جێگەی ئومێد بوو بۆ دروستبوونی ئایندەیەكی گەش و دیموكراسیانە بۆ عێراق، بە گیانی ڕێككەوتنی هەمیشەیی لەگەڵ هەمووان، بەكردەوە هانی یەكڕیزی دەدا لە عێراق. خاوەن پەیوەندییەكی بەهێز بوو لەگەڵ هەموو لایەنەكاندا، پەیوەندییەكی زۆر بەهێزیشی هەبوو لەگەڵ هەردوو سەرۆك كاك مەسعوود بارزانی و مام جەلال تاڵەبانی.

ئەزموونی سیاسیی خوالێخۆشبوو د.ئەحمەد چەلەبی، زۆر دەوڵەمەندە بۆ دروستكردنی دیموكراسی و پێگەوەگونجان، هیوادارین هەموو لایەكمان سوود لە ئەزموونی خوالێخۆشبوو د. ئەحمەد چەلەبی وەربگرین لەپێناو پێكەوەژیانێكی ئاشتیانە و لە خوای مەزن داواكارین جێگەی خوالێخۆشبوو بەهەشت بێت.


نێچیرڤان بارزانی
سەرۆك وەزیرانی هەرێمی كوردستان

3/11/2015 

نیوەڕۆی ئەمڕۆ چوارشەممە 4/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز ئادەم دینگ جێگر و ڕاوێژكاری سكرتێری گشتیی نەتەوە یەكگرتووەكان بۆ ڕێگری لە جینۆساید و شاندێكی یاوەری كرد.

لە دیدارێكدا سەرەتا بەڕێز دینگ خۆشحاڵیی خۆی بە سەردانی هەرێمی كوردستان دەربڕی و ئاماژەی بەو دیدارانەی كرد كە لە هەولێر لەگەڵ خەڵكی ئێزدی و كرستیانەكان ئەنجامی داون و لە نزیكەوە گوێی لەو نەهامەتیانە بووە كە لەسەر دەستی تیرۆرستان بەسەریاندا هێنراون و جەختی لەوەش كردەوە ئەوانە كەیسی بەهێزن لە دادگای تاوانی نێودەوڵەتی دژی تیرۆرستانی داعش بەكار بهێنرێت و ئەوەش جێگیر ببێت كە جینۆساید بەرامبەر ئێزدییەكان ئەنجام دراوە، بەڵام ئەمە پێویستی بە كۆكردنەوەی بەڵگەی زیاترە و بۆ ئەم مەبەستەش باسی لەو هەنگاوانە كرد كە پێویستە حكوومەتی هەرێمی كوردستان لەو كەیسەدا بیانگرێتە بەر و هەموو هاوكارییەكی خۆیشی لەمبارەیەوە ڕاگەیاند.

ئەوەشی بە بەڕێز سەرۆك وەزیران ڕاگەیاند كە لە چوارچێوەی گەشتەكەیدا بۆ هەرێمی كوردستان، سەردانی ئەنجومەنی ڕۆحانیی كوردانی ئێزدی و ئەو كەمپانە دەكات كە ئاوارە و پەنابەرانی دەستی تیرۆر تێیدا جێگیر كراون بۆ ئەوەی لە نزیكەوە ئاگاداری هەموو ئەو نەهامەتییانە بێت كە لە لایەن تیرۆرستانی داعشەوە بەسەریاندا هێنراون و لە كاتی گەڕانەوەشی بۆ نیوویۆرك باس لە هەموو ئەو نەهامەتی و ناحەقیانە دەكات كە بەرامبەر بە ئێزدییەكان ئەنجام دراون. ئەوەشی بەبیر هێنایەوە لە كاتی كیمیابارانكردنی هەڵەبجە لە ساڵی 1988، ئەو یەكێك لەو كەسانە بوو كە لە لە هەوڵی بەردەوامدا بوو ئەو تاوانە گەورەیە بگەیەنێتە كۆمەڵگەی نێودەوڵەتی.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی كرد و تێبینی و سەرنج و پاڵپشتییەكانی بەرز نرخاند و بە پێویستی زانی بەڕێزیان هاوكاریی حكوومەتی هەرێمی كوردستان و ئەو لێژنە تایبەتیە بكات كە لە لایەن حكوومەتەوە بۆ بەجینۆسایدناساندنی ئەو تاوانانەی لە دژی ئێزدییەكان ئەنجام دراون پێكهێنراوە، بۆ ئەوەی بتوانن بە باشترین شێوە كەیسەكە ئامادە بكەن کە كۆمەڵگەی نێودەوڵەتی و دادگای تاوانی نێودەوڵەتی كەیسەكە وەك جینۆساید بناسێنن و ئێزدییەكان هەر هیچ نەبێت لە ڕووی سایكۆلۆژییەوە قەرەبوو بكرێنەوە و تاوانبارانیش بگەنە سزاكانیان، بۆ ئەم مەبەستەش هەموو هاوكاری و هەماهەنگییەكی حكوومەتی هەرێمی كوردستانی پیشان دا.

ئێوارەی ئەمڕۆ چوارشەممە 4/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، لەگەڵ بەڕێز فەرەیدوون سینیرلی ئۆغڵو وەزیری دەرەوەی توركیا، بەشداریان لە پانێڵێكی دیداری مێری لە شاری هەولێر كرد.

لە پانێڵەكەدا بەڕێز سەرۆك وەزیرانی هەرێمی كوردستان وتەیەكی پێشكەش كرد و تیایدا سەرەتا سەرەخۆشیی خۆی ئاراستەی خانەوادەی خوالێخۆشبوو د. ئەحمەد چەلەبی كرد و كۆچی دواییی ئەحمەد چەلەبی بە خەسارەتێكی گەورە بۆ هەموو عێراق زانی، هەروەك سوپاسی داوەتكردنیشی لەو پانێڵەدا و سوپاسی بەشداریی بەڕێز وەزیری دەرەوەی توركیاى لە دیداری مێری لە شاری هەولێر، كرد.

دواتر باسی لە ستراتیژیەتی هەرێمی كوردستان كرد و ئاماژەی بەوە كرد كە ئەو ستراتیژیەتە لەسەر ئەو بنەمایە دامەزراوە كە هەرێمی كوردستان كارەكتەری سەقامگیری بێت لە ناوچەكەدا و پەیوەندییەكی باشی لەگەڵ دراوسێكانیدا هەبێت و هەوڵ بدات پەیوەندییە سیاسی و ئابوورییەكانیشی لەگەڵ وڵاتانی ناوچەكە گەشە پێ بدات و توركیاش یەكێك لەو وڵاتانە بوو كە هەرێمی كوردستان بە گرینگییەوە سەیری ئەو پەیوەندییەی لەگەڵ ئه‌و وڵاته‌ دەكرد، چونكە توركیا دوای ساڵی 1991 كاریگەرییەكی زۆری هەبوو بۆ دانانی ناوچەی دژەفڕین لە هەرێمی كوردستان، بە تایبەتی لە سەردەمی خۆالێخۆشبوو تۆرگۆت ئۆزالی سەرۆكی پێشووتر و پاراستنی هەرێم لە هێرشەكانی ڕژێمی بەعس و لە كاتی پرۆسەی ئەنفالیش ڕێگەی بە ئاوارەكان دا بچنە ناو خاكەكەیەوە و باوەشی بۆ كردنەوە.

هەروەها ئاماژەی بە قۆناغی پێش هاتنی پارتی داد و گەشەپێدان (ئاك پارتی) كرد و بیری هێنایەوە كە لەو قۆناغەدا هێزێكی زۆری سوپای توركیا لەسەر سنوورەكانی هەرێم هەبوو و هەڕەشە لە هەرێم دەكرا، بەڵام دوای هاتنی ئاك پارتی بۆ سەر دەسەڵات، پەیوەندییەكانی نێوان هەرێمی كوردستان و توركیا بە شێوەیەك برەویان پێ درا كە ئێستا دەتوانن بڵێن پەیوەندییەكی ستراتیژییە و ئەمەش لەسەر حسابی هیچ لایەنێك نییە، بەڵكو لە بەرژه‌وەندیی عێراق بە گشتی و بە تایبەتی هەرێمی كوردستاندایە، بۆیە ئەوان لەو بڕوایەدان كە زۆر شت هەیە دەتوانن پێكه‌وه‌ بیكەن.

سەبارەت بە قۆناغی ئێستای عێراقیش، بەڕێزیان دووپاتی كردەوە كە قۆناغی ئێستای عێراق تەواو نوێیە و ئەوان ماوەی 12 ساڵ وەستان تا دەستوورێك جێبەجێ بكرێت، بەڵام نەكرا و ناتوانن زیاتر لەمەش بوەستن بۆ ئەوەی بزانن دەستوور جێبەجێ دەكرێت یان نا و بە هەموو پێوەرێك ئەمڕۆ لە عێراقدا دەبێت بە جددی بیر لەوە بكرێتەوە كه‌ ئەم وڵاتە بە چ شێوەیەك دابڕێژرێتەوە. دووپاتیشی كردەوە كە كورد هەر بژاردەیەك هەڵبژێرێت، بەغدا هەر شەریكی سەرەكیی هەرێم دەبێت و هەرێم هەر بڕیارێك بدات لەوانەش سەربەخۆیی كە مافی خۆیەتی، پەیوەندیی ستراتیژی لەگەڵ بەغدا دەبێت و ئەمە چوارچێوەی سیاسەتی هەرێمی كوردستانە و حەقیقەتێكیشە.

سەبارەت بە ئەولەویەتی كارەكانی هەرێمی كوردستانیش ئاماژەی بەوە دا كە ئەولەویەتی كارەكان ئێستا ڕووبەڕووبوونەوەی تیرۆرستانی داعشە كە سنوورێكی زیاتر لە هەزار كیلۆمەتری لەگەڵ ئه‌و ڕێكخراوه‌ تیرۆرستییه‌ هەیە و لەو شەڕەدا هه‌رێمى كوردستان تا ئێستا نزیكەی 1300 شەهیدى داوە و 7000 بریندارى هەیە. سوپاسی هەموو ئەو وڵاتانەشی كرد كە لەو شەڕەدا یارمەتیی هەرێمی كوردستانیان داوە كه‌ توركیا و ئێران و وڵاتانی ئەورووپا و لە سەرووی هەمووشیانەوە ویلایەتە یەكگرتووەكانی ئەمەریكا هاوكاریی هەرێمی كردووە و بەردەوامیشە و بێ ئەو یارمەتیانەش ئەستەم بوو مەترسی و هێرشەكانی تیرۆرستانی داعش بوەستێنرێن، چونكە سیاسەتی هەرێمی كوردستان دوای ڕووخانی ڕژێمی بەعس ئەوە بوو كە خەڵكی هەرێمی كوردستان زۆریان بە دەست شەڕ و زوڵم و زۆرەوە چەشت، بۆیە كاتی ئەوە بوو وڵاتە ئاوەدان بكرێتەوە و دامودەزگاكانی دابڕێژرێنەوە و ژێرخانێكی ئابووریی تۆكمەی بۆ دابنرێت و هیچ كاتێك بیرمان لەوە نەكردبووەوه‌ كە ڕووبەڕووی ڕێكخراوێكی تیرۆرستیی وەكوو داعش ببینەوە و هەرێم پێی وابوو ئه‌وه‌ كاری سوپای عێراقە كه‌ سنووره‌كان بپارێزێت، بۆیە گرینگیدانەكان زیاتر بۆ ڕێكخستنی ناوخۆی هەرێم بووە كە لە ماوەیەكی كەمدا شتی زۆر كرا و ئەمەش ئەوە ناگەیەنێت كە كەموكوڕی نەبووە.

بەڕێزیان جەختی لەوەش كردەوە كە ئێستا هەرێم لە قۆناغی ڕاگوزه‌ردایه‌ و ئەمەش پێویستی بە پشوودرێژی هەیە و دیموكراسیەت و دامەزراوەی دەوڵەت و سەروەریی یاسا شتێك نین لە دەرەوە بە دیاری بۆ هەرێمی كوردستان بهێنرێن، بەڵكو ئەم پرۆسەیە پێویستی بە ساڵانێكی زۆرە تا بە شێوەیەكی ڕێكوپێك و وەك خۆی جێبەجێ بكرێن.

سەبارەت بە كێشە ناوخۆییەكانیش بەرێز نێچیرڤان بارزانی ئاماژەی بەوە كرد كە كابینەی هەشتەمی حكوومەتی هەرێمی كوردستان بە بنكەفراوانی دانرا و هەموو لایەنەكانیش بەشداریان تیادا كرد بۆ ئەوەی وەك گرووپێك پێكەوە هەموو كێشەكان چارەسەر بكەن، هەندێك جار بژاردەی وا دروست دەبێت كە دەبێت لە نێوان خراپ و خراپتر یەكێكیان هەڵبژێری و گوتى: به‌ڵام ئێمه‌ خراپمان هەڵبژارد نه‌ك خراپتر، چونكه‌ بژاردەی خراپتریش هەبوو. ئەوەشی نەشاردەوە ئەو ئاڵۆزیانەی كە ئێستا دروست بوون ئەوە ناگەیەنێت كە لایەنەكان لەگەڵ یەكتری دانەنیشن و گفتوگۆ نەكەن، ئەوان لەو باوەڕەدان ئەو كێشانە دەبێت بە گفتوگۆ و لێكگەیشتن چارەسەر بكرێن، بەڵام ئەگەر بژاردە بكەوێتە سەر ئەوەی ئەوان ئارامی و سەقامگیری هەڵبژێرن یان شتێكی دیكە، بێگومان ئەوان ئارامی و سەقامگیری هەڵدەبژێرن و هەموو هەوڵەكانیش هەر بەو ئاراستەیە دەبن، ئەمە بێجگە لە كێشەكانی دیكەی هاتنی ملیۆنێك و حەوتسەد هەزار ئاوارە و پەنابەری دەستی تیرۆر بۆ هەرێمی كوردستان و شەڕی دژی تیرۆرستانی داعش و قەیرانی ئابووری كە ئەولەویەتی كارەكانی حكوومەتی هەرێمی كوردستانن.

سەبارەت بە گفتوگۆ و دانوستان لەگەڵ بەغدا، سەرۆك وەزیرانی هەرێمی كوردستان ڕەتی كردەوە چوون بۆ بەغدا بە مانای ئەوە بێت كە سیاسەتی نەوتی هەرێمی كوردستان سەركەوتوو نەبووە، بەڵكوو پێچەوانەكەی ڕاستە. سەبارەت بە ژێرخانی ئابووریی هەرێمیش، بەرێزیان دووپاتی كردەوە كە دابەزینی بەهای نەوت كاریگەرییەكی زۆر گەورەی لەسەر هەرێمی كوردستان و عێراق بە گشتی هەیە و ئەمەش ئەوە ناگەیەنێت كە ئەو ژێرخانەی دروست كراوە تۆكمە نەبووە، بەڵكو بە پێچەوانەوە ژێرخانی ئابووری بە شێوەیەكی زۆر ڕێكوپێك دانراوە، لێكدانەوەی بەغدا وابوو كە هەرێمی كوردستان ڕێگەی دیكەی نییە، بەڵام ئێستا ئەوانیش تێگەشتوون كە هەرێم ڕێگەی دیكەی هەیە و ئەولەویەتش هەر ئەوەیە ڕێگەچارەیەك بۆ كێشەكانی نێوان هەولێر و بەغدا بدۆزرێتەوە، بەڵام گەر چارە نەبێت دەبێت ڕێگایەكی دیكە بدۆزرێتەوە.

بەڕێز سەرۆك وەزیرانی هەرێمی كوردستان هەروەها جەختی لەوە كردەوە كە ئاساییە بەغدا ئاگاداری شەفافیەت و نرخ و چۆنییەتیی فرۆشتنی نەوت بێت و زۆر پێیان خۆشە، بەڵام بە هیچ شێوەیەك كۆنترۆڵی نەوتی هەرێمی كوردستان نادەنە دەست بەغدا، چونكە كۆتاییی ساڵی 2014 كاتێك ڕێككەوتن لەگەڵ بەغدا كرا، مانگی یەكەم بودجەكەیان بە كەمی نارد و مانگی دووەمیشیان هەر بە كەمی نارد و ئەوە كێشەیەك نەبوو، بەڵام مانگی سێییەم كە ڕێژەی هەناردەی نەوت بەرز كرایەوە، بە بڕیارێك لە فڕۆكەخانەی بەغدا 50 ملیۆن دۆلاری دیكە لە بودجەی هەرێمی كوردستان كەم كرایەوە بێ ئەوەی هەر باسمان لەگەڵ بكەن، بۆیە ئەوان ناتوانن لەگەڵ ئەو بێ متمانەییە بەردەوام بن. هەروەها سوپاسی توركیای كرد كە دەرگای ئابووری و فرۆشتنی نەوتی بۆ هەرێمی كوردستان كردەوە و تا ئێستاش بەردەوامە و هیوای خواست لەگەل بەغداش بگەنە ئەنجامێكی باش كە لە بەرژوەندیی عێراق و هەرێمی كوردستاندا بێت.

دواتر لە وەڵامی پرسیارێكدا سەربارەت بە بارودۆخی ناوخۆی توركیا و بە تایبەتی شەڕی نێوان سوپای ئەو وڵاتە و پەكەكە، بەرێزیان ئاماژەی بەوە كرد كە ئەوە بابەتێكی ناوخۆییی توركیایە و پێویستە هەر چارەسەرییەك لە چوارچێوەی وڵاتی توركیادا بێت و بەراوردێكی بارودۆخی كوردانی توركیای لە پێش و دوای هاتنی ئاكەپە بۆ سەر دەسەڵاتی ئەو وڵاتە كرد كە ژمارەیەك دەستكەوتی بۆ گەلی كورد هەبوو، لەوانە پرۆسەی ئاشتی و هێوربوونەوەی بارودۆخی ناوچە گەرمەكانی شەڕ. هەروەها هیوای خواست ئەو دۆخەی ئێستا لە وێ دروست بووە بە پێداچوونەوەی هەموو لایەنەكان و دەستپێكردنەوەی پرۆسەی ئاشتی و گفتوگۆ و دیالۆگ، كێشەكان چارەسەر بكەن.

لە وەڵامی پرسیارێكی دیكەشدا سەبارەت بە بارودۆخی ناوخۆی هەرێمی كوردستان، دووپاتی كردەوە كە كابینەی هەشتەمی حكوومەتی هەرێمی كوردستان لەسەر بنەمای تەوافق و باوەڕبوون بە یەكتری دروست كرا بۆ ئەوەی چواری ساڵی ئارام بەڕێ بكرێت، بەڵام كە ئەو بنەمایە پێشێل كرا و دەبێت ڕێگەی دیكە بدۆزرێنەوە و پێداچوونەوەش بە هاوپەیمانییە سیاسییەكان دەكرێت و هیوای خواست ئەو كێشانە بە دیالۆگ و گفتوگۆ چارەسەر بكرێن و ئەو ئیجرائاتانەی كە كراویشن بۆ ئەوە بووە كێشەكە زیاتر تەشەنە نەكات.

سەبارەت بە بارودۆخی سووریاش، بەرێز نێچیرڤان بارزانی دووپاتی كردەوە كە كێشەی سووریا پێویستی بە چارەسەرێكی سیاسی هەیە، بە شێوەیەك هەموو لایەنەكانی ئەو وڵاتە بەیەكەوە لەسەری ڕێك بكەون و نەهامەتییەكانی خەڵكی سووریا بە هەموو پێكهاتەكانییەوە كۆتایی پێ بهێنێت و هیچ چارەسەرێكی دیكەش بێجگە لەوە سەركەوتوو نابێت.

سەرلەبەیانیی ئەمڕۆ سێشەممە 3/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز یان كۆبیش نێردەی تایبەتیی سكرتێری گشتیی نەتەوە یەكگرتووەكان و شاندێكی یاوەری كرد.

لە دیدارێكدا باس لە دوا پێشهاتەكانی ناوچەكە بە گشتی و هەرێمی كوردستان بە تایبەتی و پەیوەندییەكانی نێوان هەولێر و بەغدا كرا و لەمبارەیەوە بەڕێز كۆبیش ئاماژەی بەوە دا كە نەتەوە یەكگرتووەكان پشتگیریی تەواوی دانوستان و گفتوگۆكانی نێوان هەولێر و بەغدا دەكات بەمەبەستی چارەسەركردنی كێشەكان و گەیشتن بە ئەنجامێكی گونجاو كە لە بەرژەوەندیی خەڵكی هەموو عێراقدا بێت و هیوای خواست لە داهاتوودا كۆبوونەوە و دانوستانی نێوان هەردوولا ئەنجام بدرێن.

لە بەردەوامیی قسەكانیدا باسی لە بارودۆخی شەڕی هێزی پێشمەرگە دژی تیرۆرستانی داعش و هەوڵەكانی بنەبڕكردنی ترس و هەڕەشەی تیرۆری كرد و لەمبارەیەشەوە ڕۆڵ و نەبەردی و ئازایەتیی پێشمەرگەی بەرز نرخاند كە توانیویەتی ئەو هەڕەشەیە دوور بخاتەوە و بەسەر تیرۆردا زاڵ بێت. جەختی لەوەش كردەوە كە لەسەر ئاستی نێودەوڵەتی هەوڵی ئەوە دەدات پشتگیریی زیاتری پێشمەرگە بكرێت.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی كرد و هیوای خواست ئەو ڕۆڵە پۆزەتیڤەی نێردەی نەتەوە یەكگرتووەكان كە لە ڕابردوو و ئێستادا هەیبووە، بەردەوام بێت بەتایبەتی بۆ دانوستان و لێكگەیشتنی نێوان هەولێر و بەغدا. هەروەك پوختەیەكی دەربارەی  دوا پێشهاتەكان و بارودۆخی هەرێمی كوردستان و شەڕی پێشمەرگە دژی تیرۆرستانی داش پێشكەش كرد.

تاوتوێكردن و گۆڕینەوەی بیروڕا لەسەر چەند بابەت و تەوەرێك، لایەنێكی دیكەی دیدارەكەبوو.