پاشنیوەڕۆی ئەمڕۆ یەكشەممە 10 - 1 - 2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەرێز لۆدڤایك ئاشەر جێگری سەرۆك وەزیرانی هۆڵەندا و شاندێكی یاوەری كرد كە لە بەڕێزان خاتوو ژەنین هێنس پلاشخارت وەزیری بەرگری و سوپاسالار و باڵیۆزی هۆڵەندا لە عێراق و ژمارەیەك ڕاوێژكاری سەربازی و دیپلۆماسی پێكهاتبوون.

لە دیدارێكدا كە بەڕێزان جێگری سەرۆك وەزیران و ژمارەیەك لە وەزیرانی حكوومەتی هەرێم ئامادەی بوون، جێگری سەرۆك وەزیرانی هۆڵەندا خۆشحاڵیی خۆی بە سەردانی هەرێمی كوردستان دەربڕی و سوپاسی خەڵك و حكوومەت و پێشمەرگەی كوردستانی كرد كە توانیویانە ڕووبەڕووی دڕندەترین ڕێكخراوی تیرۆرستیی جیهان ببنەوە و هەموو پێكهاتە و نەتەوەكان بێ جیاوازی لە ترسی تیرۆر بپارێزن و سەركەوتن بەسەر تیرۆردا تۆمار بكەن.

هەروەها سوپاسی خەڵك و حكوومەتی هەرێمی كوردستانی كرد كە سەرەڕای قەیرانی دارایی و ئابووری، پێشوازیان لە ژمارەیەكی یەكجار زۆر ئاوارە و پەنابەرانی دەستی تیرۆری كردووە و ئامادەییی وڵاتەكەیشی بۆ بەردەوامیی هاوكارییە سەربازی و مرۆییەكانی بۆ كوردستان دەربڕی. هەروەها دەستخۆشی لەو هەنگاوانەی چاكسازی كرد كە بەم دواییانە حكوومەت لە بواری ڕێكخستنەوەی داراییدا دەستی پێ كردووە و بۆ ئەم مەبەستەش ئامادەییی وڵاتەكەی بۆ هەر هاوكارییەك پیشان دا.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانە و هاوكارییە سەربازی و مرۆییەكانی هۆڵەندای بۆ هەرێمی كوردستان كرد و تیشكی خستە سەر قەیرانی ئابووری و ڕایگەیاند بۆ چارەسەركردنی ئەم قەیرانە حكوومەت دەستی بە كۆمەڵێك ڕێكار كردووە و هیوای خواست وڵاتە دۆستەكان لەم ڕووەوە هاوكار بن.

هەروەها سوپاسی هۆڵەندا و هاوپەیمانی كرد بۆ ناردنی هاوكارییە مرۆییەكان و هیوای خواست كۆمەڵگەی نێودەوڵەتی هاوكاریی زیاتر بۆ ئاوارە و پەنابەران بنێرێت. بەڕێزیان جەختی لەوەش كردەوە كە هەرێمی كوردستان دەخوازێت كێشەكانی لەگەڵ بەغدا بە ڕێگەی دیالۆگ و گفتوگۆ چارەسەر بكات. ئەوەشی ئاشكرا كرد كە بۆ ڕزگاركردنی ئەو ناوچانەی تا ئێستا لەژێر دەستی تیرۆرستانی داعشدا ماونەتەوە، هەرێمی كوردستان هاوكار دەبێت

بە بەشداریی بەرێزان نێچیرڤان بارزانی سەرۆك وەزیران و قوباد تاڵەبانی جێگری سەرۆك وەزیرانى هه‌رێمى كوردستان، ئەمڕۆ شەممە 23 - 1 - 2015 حكوومەتی هەرێمی كوردستان وۆركشۆپێكی یەكڕۆژی بەمەبەستی ئامادەكردنی پلانێك بۆ چۆنیەتیی ڕووبەڕووبوونەوە و تێپەڕاندنی قەیرانی دارایی لە هەرێمی كوردستان، ڕێكخست.

لە وۆركشۆپەكەدا كە وەزیرە بەرێزەكان و ژمارەیەكی بەرچاوی بەڕێزان بەڕێوەبەرانی گشتیی پەیوەندار و ڕاوێژكاران و پسپۆڕانی دامودەزگاكانی حكوومەتی هەرێمی كوردستان و سه‌رۆكى فراكسیۆنه‌كان و ئەندامانی پەرلەمانی كوردستان و شارەزایانی بیانی و بەرپرسانی ژمارەیەك لە دەزگاكانی ڕاگەیاندن لە هەرێمی كوردستان ئامادە بوون، وۆركشۆپه‌كه‌ بەسەر پێنج ژووردا دابەش كرا كە بریتی بوون لە ژوورەكانی داتا، خەرجییەكان، چاكسازی، داهات و ڕاگەیاندن.

لە هەریەك لەم ژوورانەدا ژمارەیەك لە بەرپرسان و پسپۆڕانی بوارە جیاجیاكانی داتا، خەرجی، چاكسازی، داهات و ڕاگەیاندن بە دوور و درێژی دۆخی داراییی ئەمڕۆی هەرێمی كوردستانیان تاوتوێ كرد و كۆمەڵێك ڕاسپارده‌ و پێشنیار و تێبینی و ڕێگەچارە بۆ چارەسەركردن و تێپەڕاندنی قەیرانی داراییى ئێستای هەرێمی كوردستان خرانە ڕوو كە هەموو تێبینی و ڕێگەچارەكان لەسەر بنەمای ڕێژەی داهات و خەرجییەكان بنیات نرا بوون، بەو واتایەی كە ئەو داهاتانەی لەم دۆخەدا لە فرۆشی نەوت و داهاتەكانی ناخۆی هەرێمی كوردستانەوە دەستی حكوومەت دەكەوێت، چۆن بۆ پێدانی مووچە و بەڕێوەبردنی دامودەزگاكانی حكوومەت خەرج بكرێت؟، هاوكات پلانێكى تۆكمه‌ى چاكسازیش بخرێته‌ بوارى جێبه‌جێكردنه‌وه‌.

بەشداریی بەرپرسانی دەزگاكانی ڕاگەیاندن لەم وۆركشۆپەدا بۆ ئەوە بوو كە ئایا میدیا لە هەرێمی كوردستان چۆن دەتوانێت هاوكاریی حكوومەتی هەرێمی كوردستان لە گەیاندنی زانیاریى دروست و دید و بۆچوون و پلانی حكوومەت بۆ چارەسەركردنی ئەم قەیرانە بكات و پلان و پەیامی حكوومەت لە ڕێگەی ڕاگەیاندنەوە بە هاوڵاتیان و ڕای گشتیی هەرێمی كوردستان بگه‌یه‌نرێت.

لە ژووری داتادا، هەموو ئەو داتایانەی پێویست بوون دەربارەی تەواوی داهات و خەرجییەكانی هەرێمی كوردستان و چۆنییەتیی خەرجكردنیان، بەردەست بوون. هەروەها لە ژووری چاكسازیش تەواوی ئەو ڕێگەچارە و ڕاسپارده‌ و پێشنیارانە گفتوگۆیان لەسەر كرا كە لەگەڵ گرتنەبەری ڕێكارەكان بۆ چارەسەركردن و تێپەڕاندنی ئەم قەیرانە، بۆ ئەنجامدانی پرۆسەیەكی چاكسازیش پێویستن بۆ ئەوەی لە ئەنجامدا هاوسەنگییەك لەنێوان داهات و خەرجییەكان لە هەرێمی كوردستاندا دروست ببێت.

نیوەڕۆی ئەمڕۆ دووشەممە 30/11/2015 بەرێز نێچیرڤان بارزانی سەرۆك وەزیرانی هەرێمی كوردستان، پێشوازی لە شاندێكی ئەنجومەنی پیرانی ئەمەریكا بە سەرۆكایەتی جۆن مەككین سەرۆكی كۆمسیۆنی بەرگریی ئەنجومەنی پیران و شاندێكی دیپلۆماسی و سەربازیی یاوەریان كرد.

لە دیدارێكدا كە بەڕێز قوباد تاڵەبانی جێگری سەرۆك وەزیران و ژمارەیەك لە وەزیرانی حكوومەتی هەرێمی كوردستان ئامادەیبوون، بەڕێز مەككین دەستخۆشی لە خەڵك و حكوومەتی هەرێمی كوردستان و هێزی پێشمەرگە كرد كە توانیویانە ناوچەیەكی زۆر فراوان لە دەستی تیرۆرستانی داعش ڕزگار بكەن بە تایبەتی ڕزگاركردنی شەنگال و سەرەخۆشیی خۆیشی بۆ شەهید و قوربانیانی دەستی تیرۆرستانی داعش پیشان دا و دووپاتی كردەوە كە ئەمەریكا لە پێشكەشكردنی هاوكارییەكانی بۆ هێزی پێشمەرگە بەردەوام دەبێت.

دواتر باسی لە مەبەستی سەردانەكەیان بۆ هەرێمی كوردستان كرد كە بۆ لە نزیكەوە ئاگاداربوون لە ڕەوشی بەرەكانی جەنگ و پێداویستییە هەنووكەییەكانی هەرێمی كوردستانە و ئاشكرایكرد كە ئەو پێداویستیانەی هەرێمی كوردستان پێشكەش بە ئیدارەی حكوومەتی ئەمەریكا دەكەن بۆئەوەی گفتوگۆی لەسەر بكرێت و هەوڵی دابینكردنیان بدرێت. هەروەك هەوڵەكانی خەڵك و حكوومەتی هەرێمی كوردستانی لە بواری پێشوازی كردن لە ژمارەیەكی زۆری ئاوارە و پەنابەرانی دەستی تیرۆری بەرز نرخاند كە بە باشترین شێوە شوێنی حەوانەوە و خزمەتگوزاری پێشكەش كردوون.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی كرد و هاوكارییەكانی ئەمەریكایشی لە بواری سەربازی و مەشق و ڕاهێناندا بۆ هێزی پێشمەرگەی كوردستان بەرز نرخاند و هیوای خواست هاوكاریی زیاتری هەرێمی كوردستان بكرێت بۆئەوەی بتوانرێت مەترسیی تیرۆر بە یەكجاری بنبڕ بكرێت.

لە بەشێكی دیكەی قسەكانیدا بەڕێزیان ئاماژەی بە هاتنی ئەو ژمارەی زۆرەی ئاوارە و پەنابەران كرد كە لە ترسی تیرۆر ڕوویان لە هەرێمی كوردستان كردووە لە كاتێكدا حكوومەتی هەرێم بە قەیرانێكی دارایی قورسدا تێدەپەڕێت و هیوای خواست هاوكاریی زیاتری هەرێمی كوردستان بكرێت بۆئەوەی بتوانن ژیانی ئاوارە و پەنابەران باشتر بكەن.

سەبارەت بە پەیوەندییەكانی نێوان هەولێر و بەغداش، بەڕێز نێچیرڤان بارزانی دووپاتی كردەوە كە هەرێمی كوردستان دەخوازێت باشترین پەیوەندی لەگەڵ حكوومەتی عێراق هەبێت و ئامادەیی حكوومەتی هەرێمیشی بۆ هەر گفتوگۆ و دیالۆگێك بە مەبەستی چارەسەركردنی كێشەكان دەربڕی.

ئاڵوگۆڕكردنی بیروڕا لەسەر چەند بابەتێكی پەیوەندیدار و تاوتوێكردنی بارودۆخی ڕۆژهەڵاتی ناوەڕاست، لایەنێكی دیكەی دیدارەكە بوو.

پاشنیوەڕۆی ئەمڕۆ دووشەممە 30/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز هاندریك ڤان دیڤێلدا باڵیۆزی بەلجیكا لە ئوردن كرد كە هاوكات باڵیۆزی وڵاتەكەیەتی بۆ عێراق بەڵام لە ئوردن كاروبارەكانی بەڕێوەدەبات.

لە دیدارێكدا خۆشحاڵیی خۆی بە سەردانی هەرێمی كوردستان دەربڕی و دەستخۆشیی لە هێزەكانی پێشمەرگە كرد بۆ ئەو سەركەوتنانەی لە بەرامبەر تیرۆر بەدەستی هێناوە بە تایبەتی لە ڕزگاركردنی شاری شنگال لە چنگی داعش. لە هەمان كاتدا هەوڵ و تەقەلاكانی حكوومەتی هەرێمی بۆ هاوكارییكردنی ئەو ژمارە زۆرەی ئاوارە و پەنابەران بەرز نرخاند كە لە ترسی تیرۆر ڕوویان لە هەرێمی كوردستان كردووە.

لە بەشێكی دیكەی قسەكانیدا باسی لە ئاڵۆزییەكانی ناوچەكە و ڕووداوەكانی ئەم دواییەی پاریس و بەلجیكای كرد و جەختی لەوە كردەوە كە پێویستە هەموو لایەك زیاتر هاوكار و هەماهەنگ بن بۆئەوەی ڕێگری لە دووبارە بوونەوەی ئەو ڕووداوانە بكرێت و هەوڵەكان بە ئاراستەی بنبڕكردنی مەترسیی تیرۆر لەسەر ناوچەكە و ئاسایشی جیهان بن. هەروەك ئاماژەی بەوەش دا كە لە گەشتەكەیدا سەردانی كەمپەكانی ئاوارە و پەنابەران لە هەرێمی كوردستان دەكات بۆئەوەی لە نزیكەوە ئاگادری ڕەوش و پێداویستییەكانیان بێت و هەوڵیش دەدات لە ڕێگەی ڕێكخراوی یونسێفەوە هاوكاریی زیاتر بگەیەنرێتە ئاوارە و پەنابەران.

لای خۆیەوە بەڕێز سەرۆك وەزیرانی هەرێمی كوردستان سوپاسی سەردانی بەرێزیانی كرد و لە هەمان كاتدا باسی لە گرینگیی هاوپەیمانی و هەماهەنگی بۆ بنبڕكردنی مەترسیی تیرۆر كرد كە سەرتاسەری جیهانی گرتووەتەوە.

لە لایەكی دیكەی قسەكانیدا بەرێز نێچیرڤان بارزانی باسی لە بارودۆخی هەرێمی كوردستان و گرفتی ئاوارە و پەنابەران و ئەو قەیرانە دارایی و ئابوورییە كرد كە ڕووبەڕووی هەرێمی كوردستان بووەتەوە. هەروەك پتەوتر كردنی پەیوەندییەكانی هەرێمی كوردستانی لەگەڵ هەموو وڵاتانی جیهان بە تایبەتی بەلجیكا، دووپات كردەوە.

نیوەڕۆی ئەمڕۆ 2015/12/8 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە بەڕێز فرانك ڤاڵتەر شتاینمایەر وەزیری دەرەوەی ئەڵمانیا و شاندێكی دیپلۆماسیی یاوەری كرد.

لە دیدارێكدا كە بەرێزان قوباد تاڵەبانی جێگری سەرۆك وەزیران و ژمارەیەك وەزیر و كاربەدەستانی حكوومەتی هەرێمی كوردستان ئامادەیبوون، بەڕێز شتاینمایەر دڵخۆشیی خۆی بە سەردانی هەرێمی كوردستان و ڕزگاركردنی شەنگال لەلایەن هێزی پێشمەرگەی كوردستانەوە دەربڕی و پشتگیریی خۆی و خەڵك و حكوومەتی ئەڵمانیای بۆ خەڵك و حكوومەتی هەرێمی كوردستان و پێشمەرگە پیشان دا و بەردەوامی هاوكارییە سەربازییەكانی وڵاتەكەی بۆ پێشمەرگە دووپات كردەوە.

هەروەها باسی لە قەیرانی ئابووری و هاتنی ژمارەیەكی زۆری ئاوارە و پەنابەرانی دەستی تیرۆر بۆ هەرێمی كوردستان كرد و ئاماژەی بەوە دا كە وڵاتەكەی هەوڵ دەدات كۆمەڵگەی نێودەوڵەتی لە سوككردنی ئەو بارگرانییە، هاوكاریی هەرێمی كوردستان بكات. سەبارەت بە پەیوەندییەكانی نێوان هەولێر و بەغدا و كێشە ناوخۆییەكانی هەرێمی كوردستانیش، پشتگیریی خۆی و وڵاتەكەی بۆ چارەسەركردنی سەرجەم كێشەكان بە ڕێگەی گفتوگۆ و دیالۆگ پیشان دا.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی كرد و هاوكارییە سەربازی و مرۆییەكانی ئەڵمانیای بۆ هێزی پێشمەرگە و ئاوارە و پەنابەران لە هەرێمی كوردستان بەرز نرخاند و هیوای خواست هاوكارییە سەربازییەكان بۆ پێشمەرگە بەپێی قۆناغی ئێستای شەڕی دژی تیرۆرستانی داعش بێت چونكە دوای ئازادكردنی شەنگال، شێوازی شەڕ گۆڕانی بەسەردا هاتووە. بە پێویستیشی زانی هاوپەیمانی نێودەوڵەتی و تەنانەت وڵاتانی دەرەوەی هاوپەیمانییەكەش زیاتر هاوكاری و هەمانگیی یەكتری بكەن بۆئەوەی بتوانرێت مەترسی تیرۆر بە یەكجاری بنبڕ بكرێت و ئاسایش و ئارامی بۆ ناوچەكە بگەڕێتەوە.

بەرێزیان هەروەها ئاماژەی بەوە دا كە هەرێمی كوردستان پێویستی بە هاوكاریی مرۆیی زیاتر هەیە بە تایبەت كە ژمارەی ئاوارە و پەنابەران ڕۆژ بە ڕۆژ لە زیادبووندایە و پێشبینیش دەكرێت دوای دەستپێكردنی ئۆپەراسیۆنی ڕزگاركردنی مووسڵ، ژمارەیان زیاتر ببێت لە كاتێكدا هەرێم بە قەیرانێكی قورسی دارایی و ئابووریدا تێپەڕ دەبێت كە ئەمە بارگرانییەكی یەكجار زۆر دەبێت بۆ سەر هەرێمی كوردستان.

دەربارەی چارەسەركردنی گرفتەكانی نێوان هەولێر و بەغدا، بەڕێز نێچیرڤان بارزانی ئاماژەی بەوە دا كە پێویستە هەموو كێشەكان بە ڕێگەی دیالۆگ و گفتوگۆ چارەسەر بكرێن. سەبارەت بە ڕەوشی ناوخۆی هەرێمی كوردستانیش ئاشكرایكرد كە دیالۆگی جددی لە نێوان لایەنە سیاسییەكانی هەرێمی كوردستاندا هەیە بە مەبەستی چارەسەر كردنی ئەو كێشە سیاسیانەی بەم دواییانە سەریان هەڵداوە.

تاوتوێ كردنی بارودۆخی ناوخۆی عێراق و ناوچەكە و پوەندییەكانی نێوان هەولێر و بەغدا لەلایەك و هەرێمی كوردستان و وڵاتانی دەوروبەر لە لایەكی دیكە، لایەنێكی دیكەی دیدارەكە بوو.

پاشنیوەڕۆی ئەمڕۆ یەكشەممە 15/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە شاندێكی پەرلەمانتارانی بەریتانیا لە گرووپی دۆستایەتیی هەموو پارتەكانی پەرلەمانی بەریتانیا بۆ پشتگیری لە هەرێمی كوردستان كرد.

لە دیدارێكدا شاندی میوان سوپاس و پێزانینی بەریتانیایان پێشكەش بە خەڵك و حكوومەتی هەرێمی كوردستان كرد كە سەرەڕای قەیرانی دارایی، پێشوازییان لە ژمارەیەكی یەكجار زۆری ئاوارە و پەنابەرانی دەستی تیرۆر كردووە و خزمەتگوزاریی پێویستیان پێشكەش كردوون. ئاماژەیان بەوەش دا كە شانازی بەوەوە دەكەن هاوپەیمانی هەرێمی كوردستانن لە شەڕی دژی تیرۆر و پیرۆزباییان پێشكەش بە خەڵك و حكوومەتی هەرێمی كوردستان كرد بە بۆنەی ئازادكردنی شاری شەنگالەوە لە دەستی تیرۆرستانی داعش كە گرنگییەكی زۆری بۆ كۆمەڵگەی نێودەوڵەتی و مرۆڤایەتی بە شێوەیەكی گشتی هەیە.

هەروەها باسیان لەو هاوكارییانە كرد كە لە ڕابردوو و ئێستادا لەلایەن بەریتانیاوە پێشكەش بە هەرێمی كوردستان كراون و خوازیار بوون پێویستییەكانی قۆناغی ئێستا بزانن بۆ ئەوەی بەپێی پێویستیی قۆناغەكە هەوڵ بدەن هاوكارییەكان بۆ هەرێمی كوردستان دابین بكەن. هەروەك باسیان لە بارودۆخی عێراق بە گشتی و هەرێمی كوردستان بە تایبەتی و پرۆسەی سیاسی لە ناوچەكە و ئەو گرفتانەی لە عێراق هەن، كرد.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی كرد و خۆشحاڵیی خۆی دەربڕی بەوەی پەرلەمانتارانی هەموو پارتە سیاسییەكانی پەرلەمانی بەریتانیا پشتگیری لە هەرێمی كوردستان دەكەن و ئاماژەی بەوە دا كە حكوومەتی هەرێمی كوردستان هاوكارییەكانی بەریتانیا و ئەمەریكا و هەموو وڵاتانی نێو هاوپەیمانیی نێودەوڵەتیی دژی داعش بۆ هەرێمی كوردستان بەرز دەنرخێنێت، بە تایبەتی لەڕووی سەربازییەوە كە كاریگەرییەكی بەرچاویان لە ئازادكردنی دەڤەرەكان بە گشتی و بە تایبەتی ڕزگاركردنی شاری شەنگال لە دەستی تیرۆرستانی داعش هەبووە و هیوای خواست لە ڕووی سەربازی و مرۆییەوە هاوكارییەكان زیاتر بكرێن بۆ ئەوەی بتوانرێت مەترسیی تیرۆر بە یەكجاری لە ناوچەكە بنبڕ بكرێت و وەك پێویستیش هاوكاریی ئاوارە و پەنابەران بكرێت.

لەلایەكی دیكەی قسەكانیدا بەڕێزیان ئاماژەی بە قەیرانی دارایی و هاتنی ژمارەیەكی یەكجار زۆری ئاوارە و پەنابەرانی دەستی تیرۆر بۆ هەرێمی كوردستان كرد كە بارگرانییەكی زۆری بۆ هەرێم دروست كردووە و هیواخواز بوو لە سووككردنی ئەو بارگرانییە، هاوكاریی زیاتری هەرێم بكەن. دەربارەی بارودۆخی سیاسی و ئەو كێشانەی بەم دواییە لە هەرێمی كوردستان دروست بوون، بەڕێز سەرۆك وەزیران سەرەتا پوختەیەكی لەبارەی ئەو ڕووداوانەوە پێشكەش كرد و دووپاتی كردەوە كە پێویستە سەرجەم كێشەكان لە ڕێگەی گفتوگۆ و دیالۆگەوە چارەسەر بكرێن.

تاوتوێكردنی چەند بابەتێكی دیكەی پەیوست بە هەردوولا، بە تایبەتی پەیوەندییەكانی نێوان هەرێمی كوردستان و بەریتانیا و زیاتر تۆكمەكردنیان لە هەموو ڕوویەكەوە، لایەنێكی دیكەی دیدارەكە بوو.

ئێوارەی ئەمڕۆ یەكشەممە 15/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە خاتوو كرستین وۆرموس جێگری وەزیری بەرگریی ئەمەریكا بۆ كاروباری سیاسی و شاندێكی سەربازی و دیپلۆماسیی یاوەری كرد.

لە دیدارێكدا كە بەڕێز قوباد تاڵەبانی جێگری سەرۆك وەزیرانی هەرێمی كوردستان ئامادەی بوو، شاندی میوان پیرۆزباییان لە خەڵك و حكوومەتی هەرێمی كوردستان كرد بە بۆنەی سەركەوتنی ئۆپەراسیۆنی ئازادكردنی شاری شەنگال و هاوخەمی خۆیان بۆ كەسوكاری شەهیدانی ئەو ئۆپەراسیۆنە دەربڕی و هیوای زوو چاكبوونەوەیان بۆ برینداران خواست. هەروەك ئۆپەراسیۆنەكەشیان بە یەكێك لە دەستكەوتەكانی هاوكاریی نێوان هێزەكانی پێشمەرگە و هاوپەیمانیی دژی داعش بە تایبەتی ئەمەریكا زانی، كە كاریگەری لەسەر لاوازبوونی هێزی داعش لە ناوچەكە و ڕزگاركردنی دڤەرەكانی دیكە، هەیە.

لە بەشێكی دیكەی قسەكانیاندا ئامادەیی خۆیان بۆ هەر هاوكاری و هەماهەنگییەك بەمەبەستی بەهاناوەچوونی ئەو دەڤەرانەی لە دەستی داعش ڕزگار كراون دەربڕی، بە تایبەتی لە بواری ئاوەدانكردنەوەیاندا.

لای خۆیەوە بەڕێز سەرۆك وەزیرانی هەرێمی كوردستان سوپاسی سەرۆك و خەڵك و حكوومەتی هەرێمی كوردستانی پێشكەش بە ئەمەریكا و وڵاتانی نێو هاوپەیمانیی دژی داعش كرد كە بەهۆی هاوكارییە سەربازییەكانیانەوە توانرا لە ماوەیەكی زۆر كورتدا شەنگال لە داعش پاك بكرێتەوە و هیوای بەردەوامیی ئەو هەماهەنگییەی خواست بۆ ڕزگاركردنی هەموو دەڤەرەكانی دیكەی عێراق لە تیرۆرستان. ئاماژەی بەوەش دا ئەو دەڤەرانەی ڕزگار دەكرێن پێویستیان بە خزمەتگوزاری و ئاوەدانكردنەوەیە و ئەمەش لە كاتێكدایە كە حكوومەتی هەرێمی كوردستان بە قەیرانێكی قوڵی داراییدا تێدەپەڕێت بۆیە هیوای خواست كۆمەڵگەی نێودەوڵەتی لەو بوارانەدا هاوكاریی حكوومەتی هەرێم بكات.

لە بەشێكی دیكەی قسەكانیدا بەڕێزیان ئاماژەی بەوە كرد كە لە قۆناغی داهاتوودا پێویستە پێداچوونەوە بە شێوازی هاوكارییەكان بكرێت بە شێوەیەك لەگەڵ قۆناغەكە بگونجێت و كاریگەرییان زیاتر بێت.

تاوتوێكردنی پەیوەندییەكانی نێوان هەولێر و بەغدا لەلایەك و هەولێر و ئەمەریكا لەلایەكی دیكە و چەند بابەتێكی دیكەی پەیوەندیدار، لایەنێكی دیكەی دیدارەكە بوو.

پاشنیوەڕۆی ئەمڕۆ دووشەممە 16/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە بەڕێز فومیۆ ئیوا باڵیۆزی نوێی ژاپۆن لە عێراق و شاندێكی دیپلۆماسیی یاوەری كرد.

لە دیدارێكدا سەرەتا بەڕێز ئیوا سوپاسی ئەو پێشوزاییەی كرد و بەبۆنەی ئازادكردنی شاری شەنگالەوە لە دەستی تیرۆرستانی داعش، پیرۆزبایی ئاراستەی خەڵك و حكوومەتی هەرێمی كوردستان كرد و سەرەخۆشی لە كەسوكاری شەهیدانی ئەو ئۆپەراسیۆنە كرد. جەختی لەوەش كردەوە كە خەڵك و حكوومەتی ژاپۆن بە چاوی ڕێزەوە لە خەڵك و حكوومەتی هەرێمی كوردستان دەڕوانن، چونكە لە بارودۆخێكی ناهەمواردا توانیویانە سەقامگیریی ناوچەكە بپارێزن. هەروەها دووپاتی كردەوە حكوومەتی ژاپۆن لە ناردنی كۆمەك و هاوكارییەكانی بەردەوام دەبێت كە لە داهاتوویەكی نزیكدا بە مەبەستی هاوكاریكردنی ئاوارە و پەنابەران، ڕەوانەی عێراقی دەكات.

ئاماژەی بەوەش دا دوای ئازادیی عێراق لە دەستی دیكتاتۆری، حكوومەتی ژاپۆن نزیك بە حەوت ملیار دۆلاری بۆ ئاوەدانكردنەوەی عێراق تەرخان كردووە كە بەشی هەرێمی كوردستانیشی تێدایە و لە بەشی هەرێم چەند پڕۆژەیەك جێبەجێ دەكرێن وەك ئاوی هەڵەبجە و ئاوەڕۆی هەولێر و بەنداوی دێرەلوك كە لە داهاتوویەكی نزیكدا دەكەونە بواری جێبەجێكردنەوە. هەروەها پشتگیریی خۆی و حكوومەتی وڵاتەكەی بۆ سیاسەتی حكوومەتی هەرێمی كوردستان لە بوارەكانی بووژانەوە و هاوكارییكردنی ئاوارە و پەنابەران دەربڕی.

لای خۆیەوە بەرێز سەرۆك وەزیرانی هەرێمی كوردستان سوپاسی یارمەتی و هاوكارییەكانی خەڵك و حكوومەتی ژاپۆنی بۆ هەرێمی كوردستان كرد و دیاركردنی بەشی هەرێمی كوردستان لەو هاوكارییە داراییە بەرز نرخاند كە بۆ جێبەجێكردنی چەند پرۆژەیەكی خزمەتگوزاری پێشكەش بە عێراقی دەكەن. هەروەها ئاشكرای كرد كە بە بایەخەوە سەیری پەیوەندییەكانی هەرێمی كوردستان و ژاپۆن دەكەن و ئامادەییی هەرێمی كوردستانیشی بۆ بەهێزكردنی زیاتری ئەو پەیوەندیانە لە هەموو بوارەكاندا دەربڕی.

لە بەردەوامیی قسەكانیدا بەڕێز نێچیرڤان بارزانی باسی لە بارودۆخی هەرێم بە شێوەیەكی گشتی و بەرەكانی شەڕی ڕووبەڕووبوونەوەی تیرۆرستانی داعش و ڕەوشی سیاسیی عێراق و ناوچەكە كرد و هەردوولا بیروڕایان لەبارەیانەوە ئاڵوگۆڕ كرد.