ڕێكخراوى جیهانیى ته‌ندروستى، ستایشى هه‌رێمى كوردستان ده‌كات
پێشنیوەڕۆی ئەمڕۆ یه‌كشه‌ممه 2015/3/15 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز دكتۆر عەلاء عەلوان بەڕێوەبەری گشتیی ڕێكخراوی جیهانیى تەندروستی WHO و شاندێكی یاوەری كرد.
لە دیدارێكدا بەڕێز بەڕێوەبەری گشتیی WHO هەڵسەنگاندنێكی لەبارەی بارودۆخی تەندروستی لە هەرێمی كوردستان پێشكەش كرد و ئاماژەی بە كار و چالاكییەكانی وەزارەتی تەندروستی بەگشتی و بەڕێوەبەرایەتیی گشتیی تەندروستیی پارێزگای دهۆك بەتایبەتی كرد و ڕۆڵی وەزارەت و بەڕێوەبەرایەتیی گشتیی تەندروستیی دهۆكی بەرز نرخاند كە وێڕای ئەو بارودۆخە قورسەی لەسەر شانیانە، توانیویانە بە شێوەیەكی ڕێكوپێك و لە هه‌مان كاتدا خزمەتگوزاریی پزیشكی و تەندروستی پێشكەش بە ئاوارە و پەنابەران لە كەمپەكان و هاووڵاتیان بە شێوەیەكی گشتی بكەن.
بەڕێز بەڕێوەبەری گشتیی ڕێكخراوی WHO هەروەها تیشكی خستە سەر ئەوەی كە هەوڵی بەردەوام دەدەن بۆ بەدەستهێنان و پێشكەشكردنی سەرچاوەی زیاتری كۆمەك و هاوكاری بۆ هەرێمی كوردستان لە بواری تەندروستیدا و ڕوونیشی كردەوە كە لە دیدار و كۆبوونەوەكانیدا لەگەڵ حكوومەتی فیدراڵی عیراق، باس لە كار و چالاكییەكانی حكوومەتی هەرێمی كوردستان و وەزارەتی تەندروستی دەكات كە بێ جیاوازی خزمەتگوزاری بە هەموو لایەنێك دەگەیەنن و جەخت لەسەر ئەوەش دەكاتەوە كە هەرێمی كوردستان پێویستی بە هاوكاریی زیاترە و داوا له حكوومەتی فیدراڵی عیراق ده‌كات هاوكاریی زیاتری ته‌ندروستى و پزیشكی پێشكەش بە هەرێمی كوردستان بكات.
لای خۆیەوە بەڕێز سەرۆك وەزیران سوپاسی ئەم سەردانەی بەڕێز بەڕێوەبەری گشتیى WHOی كرد و سوپاسی هەڵسەنگاندنی بەڕێزیان بۆ كار و چالاكییەكانی وەزارەتی تەندروستی و بەڕێوەبەرایەتیی گشتیی تەندروستیی پارێزگای دهۆك كرد، كە لە هەوڵی بەردەوامدان بۆ پێشكەشكردنی خزمەتگوزاریی تەندروستی و پزیشكی بۆ ئاوارە و پەنابەران لە كەمپەكانی سەرتاسەری پارێزگای دهۆك و بەردەوامیش ده‌یانه‌وێ بە شێوەیەكی ڕێكوپێك، هاوكارییەكانیان باشتر و زیاتر بكەن. هەروەها سوپاسی ڕێكخراوی WHOی كرد بۆ ئەو هاوكاری و هەماهەنگیەی لەگەڵ دەزگا پەیوەندیدارەكانی بواری تەندروستی و پزیشكی لە هەرێمی كوردستان هەیانە.
نێچیرڤان بارزانى داواى هاوكارى له ژاپۆن ده‌كات
نیوەڕۆی ئەمڕۆ یه‌كشه‌ممه 2015/3/15 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز كێنتارۆ سۆنۆرا جێگری وەزیری دەرەوەی ژاپۆن كرد.
لە دیدارێكدا سەرەتا بەڕێز جێگری وەزیری دەرەوەی ژاپۆن سوپاسی حكوومەتی هەرێمی كوردستانی كرد بۆ ئیدانەكردنی كوشتنی بارمتە ژاپۆنییەكە لە لایەن ڕێكخراوی تیرۆریستی داعشەوە و سوپاس و پێزانینی سەرۆك وەزیران و حكوومەت و خەڵكی ژاپۆنی بۆ ئەم هەڵوێستەی هەرێمی كوردستان و حكوومەتی هەرێم دووپات كردەوە و پشتگیریی ژاپۆنی بۆ هەرێمی كوردستان دەربڕی.
بەڕێز جێگری وەزیری دەرەوەی ژاپۆن هەروەها دووپاتی كردەوە كە حكوومەتی وڵاتەكەی پشتگیریی مرۆیی و كۆمەك پێشكەش بەو ئاوارە و پەنابەرانە دەكات كە بەهۆی ترسی تیرۆره‌وه هاتوونەتە هەرێمی كوردستان، بەتایبەتیش لە بوارەكانی تەندروستی و پەروەردە و خزمەتگوزارییە گشتییەكاندا، ئەوەشی ئاشكرا كرد كە وڵاتەكەی كۆمەڵێك پرۆژەی خزمەتگوزاری لە بوارە جیاجیاكاندا لە ناوچە جیاوازەكانی هەرێمی كوردستان ئەنجام دەدات. هه‌روه‌ها باسی لە سەردانی شاندێكی پەرلەمانی عیراق بۆ وڵاتەكەی كرد كە لە هەموو لایەنەكانی كورد و سوننە و شیعە پێكهاتبوو و لە وێش ژاپۆن ئامادەییی خۆی بۆ ئەنجامدانی كۆمەڵێك پرۆژەی خزمەتگوزاری لە عیراق و هەرێمی كوردستان نیشان داوە و ژمارەیەك لەو پرۆژانە لە پارێزگاكانی هەرێمی كوردستان ئەنجام دەدرێن.
لای خۆیەوە بەڕێز سەرۆك وەزیرانی هەرێمی كوردستان سوپاسی ئەم سەردانەی جێگری وەزیری دەرەوەی ژاپۆنی كرد بۆ هەرێمی كوردستان و سەردانەكەی لەم كاتەدا وەك پشتگیرییەك بۆ هەرێمی كوردستان لە قەڵه‌م دا. جەختی لەوەش كردەوە كە كوشتنی بارمتە ژاپۆنییەكە بەو شێوە وەحشیگەرییە، تراژیدیایەك بوو هەمووانی شۆك كرد و دووبارە سەرخۆشیی خۆی و حكوومەت و خەڵكی هەرێمی كوردستانی بە حكوومەت و گەلی ژاپۆن راگەیاند. پوختەیەكیشی دەربارەی بارودۆخی هەرێمی كوردستان و شەڕی دژی تیرۆر خستە ڕوو و تیایدا ئاماژەی بەوە دا كە پێشمەرگە لە پێشڕەوی و سەركەوتن و تیرۆریستانیش لە شكست و پاشەكشێی بەردەوامدان و پێشمەرگە كۆمەڵێك شوێن و پێگەی زۆر ستراتیژی لە دەستی تیرۆریستان دەرهێناوە.
هەروەها باسی لەوە كرد كە هەرێمی كوردستان پێشوازی لە زیاتر لە ملیۆنێك و پێنج سەد هەزار پەنابەر و ئاوارە كردووە و ئەمەش پاڵەپەستۆیەكی زۆری بۆ سەر حكوومەتی هەرێمی كوردستان دروست كردووە، بەتایبەتى كە حكوومەتی عیراق وەك پێویست هاوكاریی ئاوارە و پەنابەرانی نەكردووە و داوای كرد حكوومەتی ژاپۆن لە هاوكاری و كۆمەكە مرۆییەكانی بەردەوام بێت. جەختی لەوەش كردەوە كە هەرێمی كوردستان چاوی لەوەیە ژاپۆن لە بواری هەڵگرتنەوەی میندا بە دابینكردنی ئامێر و پێداویستیی و تەكنەلۆژیای نوێی بواری هەڵگرتنەوەی مین، هاوكاریی هەرێمی كوردستان بكات كە كاریگەرییەكی زۆری لەسەر بارودۆخی شەڕ و ڕووبەڕووبوونەوەی تیرۆر دەبێت، هه‌روه‌ها سوپاسی ژاپۆنی كرد بۆ ئەو پرۆژانەی كە لە هەرێمی كوردستان ئەنجامیان دەدات و ئەم هاوكاریانەی ژاپۆنی بەرز نرخاند.
حكومەتی هەرێمی كوردستان دڵنیایی لەبارەی رەوشی ئاسایشی هەرێم دووپاتدەكاتەوە
لە كۆبوونەوەیەكی نێوان حكومەتی هەرێمی كوردستان وئەندامانی سلكی دیپلۆماسی لەنوێنەر وكونسوڵ وكونسوڵی فەخری وڵاتانی بیانی لەهەرێمی كوردستاندا، قوباد تاڵەبانی جێگری سەرۆكی حكومەت دووپاتیكردەوە، رەوشی ئاسایش وئارامی هەرێمی كوردستان سەقامگیرە و هیچ بارودۆخێكی ناهەموار رووی نەداوە بۆ راگرتنی گەشتە ئاسمانیەكانی نێوان هەرێم ووڵاتانی جیهان.
لەمیانەی كۆبوونەوەیەكدا كە لەنێوان حكومەت وئەندامانی سلكی دیپلۆماسی بەڕێوەچوو، كە تیایدا فەلاح مستەفا بەرپرسی فەرمانگەی پەیوەندیەكانی دەرەوەی حكومەت ووسەفین دزەیی وتەبێژی فەرمی حكومەتی هەرێمی كوردستان و چەند بەرپرسێكی وەزارەتی پێشمەرگە وفڕۆكەخانەكانی هەرێم ئامادەی بوون جێگری سەرۆكی حكومەت تیشكی خستە سەر دوایین پەرەسەندنی سیاسی وئابوری وسەربازی هەرێمی كوردستان بەتایبەتی لەو قەیرانە داراییەی تیایدا دەژی وجگە لەوەش كە لەشەڕێكی سەختدایە لەگەڵ تیرۆریستانی داعش بە هەبوونی پاڵپشتیەكی ئاسمانی لەلایەن ژمارەیەك لەوڵاتانی جیهان بەرێبەرایەتی ئەمەریكا.
هاوكات جێگری سەرۆكی حكومەت نیگەرانی خۆی لە وەستاندنی گەشتی ئاسمانی چەند وڵاتێكی بۆ هەرێمی كوردستان بەبیانووی بارودۆخی ئەمنی وشەڕی ئازادكردنەوەی ناوچەكانی بەردەستی داعش نیشاندا وهیوای خواست لەڕێگەی كونسوڵ ونوێنەرانی وڵاتانی بیانی لەهەرێم ئەو پەیامە بەوڵاتانیان بگەیەندرێت كە هەرێمی كوردستان لەبارودۆخێكی ئارام وسەقامگیری ئەمنیدایە وگەشتە ئاسمانیەكانیش وەكو خۆیان بەشێوەیەكی ئاسایی بگەڕێنەوە.
قوباد تاڵەبانی ئاماژەی بە سەركەوتنەكانی ئەم دواییەی پێشمەرگەی دا كە توانیویانە بەشێكی زۆری خاكی كوردستان لەدەستی تیرۆریستان رزگار بكەن، ئاماژەی بەوەشدا ئێستا هەرێمی كوردستان نزیكەی 2 ملیۆن ئاوارەی بەخۆوە گرتووە بۆیە پێویستی بەیارمەتی نێودەوڵەتی هەیە بۆ یارمەتیدانی ئەم ئاوارانە.
هەر لەم كۆبوونەوەیەدا جێگری سەرۆكی حكومەت پابەندبوونی هەرێمی كوردستانی بە رێككەوتنی نێوان هەولێر وبەغدا نیشاندا كە لە كۆتاییەكانی ساڵی رابردوو ئیمزاكرا وجەختی لەسەر بەردەوامی گفتوگۆ كردەوە بۆ جێبەجێكردنی تەواوی رێككەوتنەكە.
پەیامی حکوومەتی هەرێمی کوردستان لە ساڵیادی کیمیابارانکردنی هەڵەبجەدا
ڕۆژی ١٦/٣ درێژترین ڕۆژی نێو یادەوەریی نەتەوەیی و نیشتیمانیمانە، ڕۆژێکە هێندەی سەدەیەک ئازار و قوربانیدانی میللەتێکی لەخۆ گرتووە، کە شەڕانگێزی و جینۆساید و قێزەونترین چەکی سەردەم، نەیتوانی بوون و ئیرادەی بسڕێتەوە. ڕۆژێک کە هێندەی زام و ئازارەکانی، هەستی شانازی و گەورەیی بە گەلەکەی دەبەخشێت.
گەر تا دوێنێ بە خەمبارییەوە گوتبێتمان هەڵەبجەی شەهید، ئەمڕۆ بە شانازییەوە دەڵێین پارێزگای هەڵەبجە، ئەم ڕاستییە زیاد لە مانایه‌كى سیاسی و کۆمەڵایەتی و مێژوویی و نیشتیمانی و کولتووری هەیە، ئاماژەیەکی ڕوونە بۆ خواستى ئەم گەلە لە بنیاتنان و ژیانی سەربەرزانە و توانای خۆڕاگری و مانەوە و بەرگریکردنی شەرەفمەندانە لە بوونی خۆی. بۆیە هەڵەبجە نه‌ك هه‌ر تەنها سیمبولی قوربانیدانمانە، بەڵکو هاوکات سیمبولی ئیرادەی هەڵسانەوە و بنیاتنان و مانەوە و خۆراگریی ئەم گەلەیە. بەڵێ ئەمڕۆ بە شانازییەوە دەڵێین: دەسەڵاتی دیکتاتۆری و کۆمەڵکوژی نەما و هەڵەبجە ما و دەمێنێ، جەللادەکانی هەڵەبجە بە ڕیسوایی تیا چوون و هەڵەبجەکەی ئێمە به سه‌ربه‌رزى مایه‌وه.
ڕۆڵە دڵسۆزەکانی هەڵەبجەی ئازیز .. کوردستانیانی خۆشەویست..
بەپارێزگابوونی هەڵەبجە، لە کارنامەی حکوومەتی هەرێمی کوردستاندا، هه‌ر به تەنها بڕیار و مەبەستێکی سیاسی نییە، بەڵکو بڕوا و ئیرادەیەکی نەگۆڕە بۆ پارێزگاری لە بوون و ناسنامەمان. هەربۆیە پلانی حکوومەتی هەرێمی کوردستان ئەوەیە کە لە ماوەیەکی کورتدا واقیعی بەپارێزگابوونی هەڵەبجە لەسەر هەموو ئاستە خزمەتگوزارییەکان و لە کایە جیاجیاکانی گەشەی ئابووری و شارستانی و کۆمەڵایەتی و فەرهەنگیدا ڕەنگ بداتەوە و بۆ ئه‌مه‌ش داواكارین لایه‌نه‌كان له‌سه‌ر ئه‌م بابه‌ته بگه‌نه ڕیككه‌وتن. وێڕای هەر تەنگژەیەکی ئابووری، پێشخستن و بووژاندنەوەی پارێزگای هەڵەبجە بە شێوەیەک کە لە ئاستی ناو و پێگەی هەڵەبجەدا بێت، لە کارە لەپێشینەکانی حکوومەتی هەرێمی کوردستانە، وەک چۆن خزمەتی زیاتری برینداران و قوربانییە زیندووەکانی هەڵەبجە، لەو کارە گرنگانەیە کە هەمیشە جێگەی بایەخمانە.
کوردستانیانی خۆشەویست..
وەک هەر جارێک و هەر یادێکی ١٦/٣مان، ئەمڕۆ لە یادی ٢٧ ساڵەی کیمیابارانی هەڵەبجەدا، سەری ڕێز و وەفا بۆ شەهیدانی هەڵەبجە و سەرجەم شەهیدان و قوربانیانی گەلەکەمان دادەنەوێنین، وەفاداریمان بۆ شەهیدان و قوربانیانی هەڵەبجە، بە ڕێگای ئاوەدانکردنەوە و بنیاتنان و پێشخستن و خزمەتکردنی زیاتری هەڵەبجە و دانیشتوانەکەیدا تێدەپەڕێت.
سڵاو لە پارێزگای هەڵەبجە و ڕۆڵە دڵسۆزەکانی، شکۆداربێت ئیرادەی مانەوە و بنیاتنان و پێشکەوتن، هەر سەربەرز و ئاوەدان و پێشکەوتوو بێت هەڵەبجەکەمان و کوردستانە ئازیزەکەمان.
ئه‌نجومه‌نى وه‌زیرانى هه‌رێمى كوردستان
15.3.2015
ئەرمەنستان كونسولخانەی خۆی لە هەولێر دەكاتەوە
پێشنیوەڕۆی ئەمڕۆ چوارشەممە 2015/3/18 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز لێڤۆن سارگسیان نوێنەری تایبەتی حكوومەتی ئەرمەنستان و بەڕێز كارین گرێگۆریان باڵیۆزی ئەو وڵاتە لە بەغدا كرد.
لە دیدارێكدا بەڕێز نوێنەری تایبەتی حكوومەتی ئەرمەنستان سڵاو و ڕێزی سەرۆك كۆمار و سەرۆك وەزیرانی وڵاتەكەی بە بەڕێز سەرۆك وەزیرانی هەرێمی كوردستانی ڕاگەیاند و تیشكی خستە سەر پەیوەندیی دێرینی نێوان هەردوو گەلی كورد و ئەرمەن و خاڵە هاوبەشەكانی نێوان هەردوو گەل كرد و ئامادەییی وڵاتەكەی بۆ دروستكردنی پەیوەندییەكی بەهێز و پتەو لە نێوان هەولێر و یەریڤاندا دەربڕی و بۆ ئەم مەبەستەش ئاماژەی بەوە كرد كە ئەوان ئامادەن كۆمسیۆنێكی هاوبەشی دۆستایەتی لە نێوان هەرێمی كوردستان و ئەرمەنستاندا دروست بكەن بە شێوەیەك كار لەسەر ژمارەیەك بابەتی وەك ڕۆشنبیری و بازرگانی و ئابووری و بوارەكانی دیكە لە نێوان هەردوولادا بكات.
شاندی میوان هەروەها ئەوەیان بە بەڕێز نێچیرڤان بارزانی ڕاگەیاند كە لە داهاتوویەكی نزیكدا كونسوڵخانەی ئەرمەنستان لە هەولێر دەكەنەوە و هەروەها هێڵی ئاسمانیی ئەرمەنستانیش لە نێوان هەولێر و یەریڤاندا دەست بە گەشتەكانی دەكات و ئاماژەیان بەوەش دا كە كەرتی تایبەتی ئەرمەنستان ئامادەیە لە هەرێمی كوردستان سەرمایەگوزاری بكات و بۆ ئەم مەبەستەش داوای هاوكاری و ئاسانكاری لە حكوومەتی هەرێمی كوردستان دەكەن.
لای خۆیەوە بەڕێز سەرۆك وەزیرانی هەرێمی كوردستان وێڕای بەخێرهێنانی شاندی میوان، سوپاس و پێزانینی خۆی بۆ سەرۆك كۆمار و سەرۆك وەزیرانی ئەرمەنستان دەربڕی و پێشوازی لە بڕیارەكەیان لە بارەی كردنەوەی كونسوڵخانەی وڵاتەكەیان لە هەولێر و دەستپێكردنی گەشتە ئاسمانییەكانی هێڵی ئاسمانیی ئەرمەنستان بۆ هەرێم كرد و پشتگیریی تەواوی خۆی بۆ دروستكردنی كۆمسیۆنی هاوبەشی دۆستایەتیی نێوان هەرێمی كوردستان و ئەرمەنستان دەربڕی و ئاماژەی بەوە كرد كە هەموو هاوكاری و كارئاسانییەك پێشكەش بەو كارسازان و سەرمایەدارانەی ئەرمەنستان دەكرێت كە دەخوازن وەبەرهێنان و سەرمایەگوزاری لە هەرێمی كوردستان بكەن و بۆ ئەم مەبەستەش ئەو كۆمسیۆنەی كە لە نێوان هەولێر و یەریڤاندا دروست دەكرێت، دەتوانێت ئەو بابەتانە بە شێوەیەكی ڕێكوپێك گفتوگۆ بكات و ئەو بوارانە دیاری بكات كە هەردوولا دەتوانن كاری لەسەر بكەن و حكوومەتی هەرێمیش ئامادەیە بەپێی یاساكانی سەرمایەگوزاری و وەبەرهێنان لە هەرێم، هاوكارییان بكات.
بەڕێز نێچیرڤان بارزانی لە بەشێكی دیكەی قسەكانیدا جەختی لەسەر بایەخی پەیوەندییە سیاسی، ئابووری، كۆمەڵایەتی و زانستییەكانی نێوان هەرێم و ئەرمەنستاندا كردەوە، بەتایبەتی لە بواری ئاڵوگۆڕی شاند و دابینكردنی كبۆرسی خوێندن بۆ قوتابیانی هەرێمی كوردستان لە زانكۆكانی ئەرمینیا، كە ئەمەش دەچێتە چورچێوەی دروستكرنی پەیوەندیی دوولایەنە لە نێوان هەولێر و یەریڤاندا.
نێچیرڤان بارزانی: چاوەڕوانیی هاوكاریی زیاترمان لە كۆمەڵگەی نێودەوڵەتی هەیە
نیوەڕۆی ئەمڕۆ پێنجشەممە 2015/3/19 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە شاندێكی پەرلەمانتارانی پەرلەمانی یەكێتیی ئەورووپا كرد.
لە دیدارێكدا بارودۆخی ئێستای هەرێمی كوردستان، پرسی ئاوارەكان، بەرەكانی شەڕی دژی تیرۆریستانی داعش و پەیوەندییەكانی نێوان هەولێر و بەغدا تاوتوێ كران و شاندی میوان دەستخۆشییان لە حكوومەتی هەرێمی كوردستان كرد كە سەرەڕای ئەوەی تووشی قەیرانی بێ بودجەیی هاتووە و بارێكی قورسی لەسەر شانە، ئەركێكی گەورە و پیرۆزی مرۆیی ئەنجام داوە بە حەواندنەوەی سەدان هەزار ئاوارە كە لە ترسی تیرۆر لە دەڤەرەكانی دیكەی عیراقەوە ڕوویان لە هەرێمی كوردستان كردووە و توانیویەتی تا ڕادەیەكی باش پێداویستییەكانیان دابین بكات.
شاندی پەرلەمانی یەكێتیی ئەورووپا هەروەها باسیان لە بەرەكانی شەڕی دژی تیرۆریستانی داعش كرد و ئاماژەیان بەوە كرد ناوی پێشمەرگە بووەتە وشەیەكی گرنگ و گەشاوە لە سەرتاسەری ئەورووپا و جیهاندا كە بە هەموو شێوەیەك بەرگری لە بنەماكانی ئازادی و مرۆڤایەتی دەكات و فیداكارییەكانی پێشمەرگەیان بەرز نرخاند و هیوایان خواست ئەو شەڕە لە ماوەیەكی كورتدا بە سەركەوتنی پێشمەرگە و هێزە ئازادیخوازەكان دژی تیرۆر و تۆقاندن، كۆتایی پێ بێت. هەر لە دیدارەكەدا باسیان لە پێدوایستییەكانی هەرێمی كوردستان لە ڕووی مرۆیی و سەربازی و ڕێككەوتنی نێوان هەولێر و بەغدا كرد.
لە لایەن خۆیەوە بەڕێز نێچیرڤان بارزانی سوپاس و پێزانینی خەڵك و حكوومەتی هەرێمی كوردستانی بۆ هەڵوێستە ئەرێنییەكانی یەكێتیی ئەورووپا لە بەرامبەر هەرێم بە شاندی میوان ڕاگەیاند و ئاماژەی بەوە كرد كە خەڵك و حكوومەتی هەرێمی كوردستان لە پێشكەشكردنی هاوكاری بۆ پەنابەران و ئاوارەكانی دەستی تیرۆر بەردەوام دەبن، بەڵام ئەوەی كە لە كۆمەڵگەی نێودەوڵەتی بۆ بەهاناوەچوون و هاوكاریكردنی ئاوارەكان چاوەڕوان دەكرا، وەك پێویست نەبووە، بە تایبەتی كە چاوەڕوان دەكرێت لەگەڵ دەستپێكردنی شەڕی ئازادكردنی مووسڵ لە دەست تیرۆریستان، ژمارەیەكی زۆرتری ئاوارە ڕوو لە هەرێمی كوردستان بكەن، بۆیە چاوەڕوانی ئەوە دەكەین كۆمەڵگەی نێودەوڵەتی بە شێوەیەكی گشتی و بە تایبەتی یەكێتیی ئەورووپا چ ڕاستەوخۆ یان بە ڕێگەی ئاژانسەكانی سەر بە نەتەوە یەكگرتووەكان و ڕێكخراوە ناحكوومییەكان، خۆیان بۆ هاوكاریی پێویست ئامادە بكەن.
لە بەشێكی دیكەی قسەكانیدا بەڕێز سەرۆك وەزیرانی هەرێمی كوردستان بە وردی تیشكی خستە سەر بەرەكانی شەڕی هێزی پێشمەرگە دژی تیرۆریستانی داعش و ئاماژەی بە سەركەوتن و پێشڕەوییە بەردەوامەكانی پێشمەرگە كرد. سەبارەت بە پەیوەندییەكانی نێوان هەرێمی كوردستان و بەغداش باسی لەوە كرد كە هەرێم پابەندی ئەو ڕێككەوتنەیە كە لەگەڵ بەغدا هەیەتی، بەڵام پێویستە لە چوارچێوەی یاسای بودجەی ساڵی 2015دا بەغداش ئەركەكانی خۆی بەرامبەر هەرێمی كوردستان جێبەجێ بكات.
ئاڵوگۆڕكردنی بیروڕا لەسەر چەند بابەتێكی دیكەی مایەی بایەخی هەردوولا، بەشێكی دیكەی دیدارەكە بوو.
پەیامی پیرۆزبایی حکومەتی هەرێم بەبۆنەی جەژنی نەورۆزەوە
ئەمڕۆ لە سایەی خوێنی پیرۆزی شەهیدان و قارەمانیه‌تیی پێشمەرگە گیان لەسەردەستەکانی کوردستان، کە هه‌ر یه‌كێكیان وه‌ك كاوه‌یه‌كى ئاسنگه‌ر به‌رامبه‌ر زوحاكه‌كانى تاریكى وه‌ستاونه‌ته‌وه و لە سەنگەری شەرەفدا بەرامبەر بە هێزی تاریکی و شەڕانگێزی، پارێزگاری لە ئازادی و ئارامی و ئایندەی کوردستان دەکەن، نەورۆزی ئازادی و سەرکەوتن سه‌ركه‌وتن پیرۆز ده‌كه‌ین. نەورۆزی ئەمساڵمان کە نەورۆزی بەرخۆدان و بەرگریکردنە لە بوون و ناسنامەمان، دەبێ گیانی یەکڕیزیمان بەهێزتر بکات و زیاتر هانمان بدات بۆ بەرەنگاریی هەر مەترسی و کێشە و تەنگژەیەک، کە دووچاری کوردستانی ئازیزمان ببێتەوە.
کوردستانیانی خۆشەویست..
له‌م نەورۆزەدا، وەک چۆن ڕۆشناییی ئاگرێک نەتەوەیەکی لە چواردەوری خۆیدا کۆکردۆتەوە، ئاواش دەبێ ڕۆڵەکانی ئەم نەتەوەیە لە هەر وڵات و شوێنێکی جیهاندا بن، بە گیانی یەکێتی و لەخۆبوردەییەوە بۆ بەدیهێنانی پەیامی نه‌ورۆز، کە بوونێکی سەربەرزانە و ئازادانه‌یه، هەموو هەوڵ و کۆششێک بخەنە گەڕ.
لەم بۆنە پیرۆزەدا، گەرمترین پیرۆزبایی لە خانەوادەی سەربەرزی شەهیدان و پێشمەرگە قارەمانەکانی سەنگەری شەرەف و بەرگریمان دەکەین. نەورۆزی بەرخۆدان لە سەرجەم کوردستانیانی هەموو پارچەکانی کوردستانی ئازیز، پیرۆز دەکەین، پیرۆزبایی گەرمیشمان بۆ کوردانی تاراوگەنشین لەهەر شوێنێكی جیهاندا بن.
شکۆدار بێت نەورۆزی پێشمەرگە، جەژنی نەتەوەیی و سەری ساڵی نوێی کوردیمان.
دروود بۆ شەهیدانی ڕێگای ڕزگارى ئازادیى کوردستان.
ئه‌نجومه‌نى وه‌زیرانى هه‌رێمى كوردستان
20-3-2015
حکوومەتی هەرێمی کورددستان، شەهیدکردنی سێ پێشمەرگە دیلەکەی دەستی تیرۆریستانی داعش ئیدانە دەکات
هەواڵی شەهیدبوونی هەرسێ پێشمەرگەی قارەمانی گەلەکەمان، شەهیدان (هیشام نەبیل، پشتیوان عوسمان و ڕزگار حەمە ساڵح) بە دەستی تیرۆریستانی داعش، بەو شێوە دڕندە و نامرۆڤانەیە، هەموو کوردستانییان و مرۆڤدۆستانی دڵتەنگ و خەمبار کرد. دیلکوشتن بەو شێوازە وەحشیگەرییە، کە دوورە لە هەموو بەها و پرەنسیپێکی مرۆیی و ئایینی و ئەخلاقی، کارێکە تەنها لە فەرهەنگی داعش و تیرۆریستانی هاوشێوەیاندا جێگەی دەبێتەوە.
ئێمە لە کاتێکدا بە توندی ئەم تاوانە دڕندانەیە شەرمەزار و ڕیسوا دەکەین، دڵنیاین کە تیرۆریستان باجی گەورەی ئەم کارە دڕندانانەیان دەدەن و دەستی دادوەری هەر دەبێ بیانگاتێ. دەبێ تیرۆریستان بزانن کە به هیچ شێوه‌یه‌ك له خوێنی ڕۆڵەکانمان خۆش نابین و بەرامبەر بەم تاوانه‌یان، دەبێ چاوەڕوانی سزای گەورە بن.
سەری ڕێز و وەفا بۆ ئەم سێ شەهیدە قارەمانەمان و سەرجەم شەهیدانی کوردستان داده‌نوێنین و سەرەخۆشی لە خۆمان و خانەوادە سەربەرزەکانی (شەهید نەبیل) و (شەهید پشتیوان) و (شەهید ڕزگار) و سەرجەم کوردستانییان دەکەین.
دروود بۆ گیانی پیرۆزی سەرجەم شەهیدانی کوردستان.
ئه‌نجومه‌نی وه‌زیرانی هه‌رێمی كوردستان
2015/3/22
نێچیرڤان بارزانی، پشتگیریی خۆی بۆ پرۆسه‌ی ئاشتی و چاره‌سه‌ری له توركیا دووپات ده‌كاته‌وه
ئه‌مڕۆ شه‌ممه 2015/3/21، له سه‌ره‌تای ده‌ستپێكردنی ڕێوڕه‌سمی پیرۆزكردنی جه‌ژنی نه‌ورۆزدا له ئامه‌د، په‌یامی به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان خوێندرایه‌وه، كه له وه‌ڵامی بانگهێشتكردنی به‌ڕێزیان بۆ ڕێوڕه‌سمه‌كه، ئاراسته‌ی هه‌ریه‌كه له به‌ڕێزان هاوسه‌رۆكانی HDP، DTK و DBPی كردبوو.
له په‌یامه‌كه‌یدا، به‌ڕێز نێچیرڤان بارزانی وێڕای سوپاسكردنیان بۆ بانگهێشتكردنی بۆ ڕێوڕه‌سمه‌كه، نه‌ورۆزی ئه‌وان و هه‌موو كوردستانیان پیرۆز ده‌كات و هیوا ده‌خوازێ جه‌ژنی نه‌ورۆز له‌گه‌ڵ خۆیدا بۆ ته‌واوی كورد و كوردستانیان و گه‌لانی ناوچه‌كه و جیهان، سه‌ركه‌وتن و شادی بهێنێت.
له په‌یامه‌كه‌یدا به‌ڕێز سه‌رۆك وه‌زیرانی هه‌رێمی كوردستان پشتگیریی خۆی بۆ پرۆسه‌ی ئاشتی و چاره‌سه‌ری و دوایین ئه‌و هه‌نگاوانه‌ی له‌م پێناوه‌دا نراون، دووپات ده‌كاته‌وه و ئاماده‌ییی هه‌موو هاوكارییه‌ك بۆ سه‌ركه‌وتنی ئاشتی نیشان ده‌دات.
سەرۆک بارزانی سەردانی ماڵی شەهید هوجام و سەنگەرەکانی پێشمەرگەی کرد
ئەمڕۆ ٢١ـی٣ـی ٢٠١٥ ، بەڕێز مەسعود بارزانی سەرۆکی هەرێمی کوردستان، بەمەبەستی یادکردنەوەی جەژنی نەتەوەیی نەورۆز لەگەڵ خانەوادەی سەربەرزی شەهدیان و پێشمەرگە قارەمانەکانی کوردستان سەردانی ماڵی شەهید هوجام و سەنگەرەکانی پێشمەرگەی کوردستانی لە دوو میحوەری ڕووبەڕووبوونەوەیی تیرۆریستان کرد.
سەرەتا سەرۆک بارزانی سەردانی ماڵی شەهید هوجامی کرد و لە وتەیەکدا بۆ خانەوادەی سەربەرزی شەهدی هوجام، سەرۆک بارزانی ڕایگەیاند: ئەمڕۆ بە فەرزم زانی بێمە لای ئێوە و لەبەرئەوەی نەدەکرا یەکە بەیەکە سەردانی هەموو ماڵە شەهیدان بکەم بۆیە لەجیاتی هەموو خانەوادەی سەربەرزی شەهیدانی کوردستان لەگەڵ ئێوە یادی نەورۆزی پیرۆز دەکەمەوە. سەرۆک بارزانی هەروەها ڕایگەیاند: ئێوە زۆر سەربەرزن و ئەو سەربەرزییەی خانەوادەی شەهیدان هەیانە دەست هەموو کەسێک ناکەوێت. شەهید هوجام، شەهیدی هەموو گەلی کوردستانە و بووە سیمبولێک بۆ بەرخودانی پێشمەرگە و تا دنیا هەیە لە دڵی گەلی کوردستاندا دەمێنێتەوە، شەهیدانی ئێمە لەپێناو دۆزێکی ڕەوادا گیانیان بەخشیوە کە پاراستنی کەرامەتی گەل و بەرگرییکردنە لە وڵاتەکەمان.
سەرۆک بارزانی جەختی کردەوە کە: گەلێک خاوەنی قارەمانی وەک شەهیدی هوجام بێت، سەرکەوتنی مسۆگەرە.
خانەوادەی شەهید هوجام دڵخۆشیی خۆیان بە سەردانی سەرۆک بارزانی ڕاگەیاند و تەئکیدیان کردەوە کە ڕۆڵە و کەسوکاری شەهید هوجام لەسەر ڕێبازی پێشمەرگانەی باوکیان بەردەوام دەبن.
دواتر سەرۆک بارزانی سەردانی سەنگەرەکانی بەرگریی پێشمەرگە قارەمانەکانی کوردستانی کرد لە دوو میحوەری ڕووبەڕووبوونەوە لەگەڵ تیرۆریستان. سەرۆک بارزانی وێڕای بەخشینی ڕێنمایی و بەرچاوڕوونیی پێویست بۆ فەرماندە و پێشمەرگەکان، لە وتەیەکدا ئاماژەی بەوەکرد کە مەبەستی بووە لەگەڵ خانەوادەی سەربەرزی شەهیدان و پیشمەرگە قارەمانەکان یادی نەورۆز بکاتەوە. سەرۆک بارزانی ڕایگەیاند: سوپاس و پێزانینی خۆم بۆ ڕۆلێ قارەمانانەی فەرماندە و پێشمەرگە گیانلەسەر دەستەکانی کوردستان دەردەبڕم و ئازایەتی و بوێریی ئێوە سەری هەموومانی بەرز کردەوە.
سەرۆک بارزانی ئاماژەی بە مێژووی خەباتی ڕزگاریخوازی گەلی کورد کرد و ڕایگەیاند: به‌ر له 2715 ساڵ، كورد له پێناو سه‌ربه‌خۆیی و سه‌رفرازی تێكۆشاوه، هه‌ر له‌و رۆژه‌وه‌ی كاوه‌ی ئاسنگه‌ر سه‌ری زوحاكی پانكرده‌وه تاكو گه‌یشتۆته سەید عوبه‌یدوڵلای نه‌هری، شێخ عه‌بدولسه‌لامی بارزانی، شێخ سه‌عیدی پیران، سه‌ید ره‌زا، شێخ مه‌حموودی نه‌مر، پێشه‌وا قازی، شێخ ئه‌حمه‌دی بارزان و مه‌لا مسته‌فای بارزانی، ئه‌مڕۆش رۆڵه‌كانی ئه‌و قوتابخانه‌یه‌ی به‌رخودان له كۆبانێ تا شنگال و خانه‌قین مێژوویان دووباره و چەندبارە كرده‌وه، كه توانییان گه‌وره‌ترین رێكخراوی تیرۆریستی جیهان تێكبشكێنن و هه‌موو دنیا پێیان سه‌رسام بێت.
ئێمه هه‌موومان قوتابیی ئه‌و قوتابخانه‌یەین، كه وا پەروەردە کراوین کە ژیان لەو مەرگەدایە کە لەپێناوی گەل و نیشتیماندا بێت و مردنیش لە ژیانی بندەستیدایە.
سەرۆک بارزانی جەختیشی کردەوە کە ئێستا تیرۆریستان ڕۆژ لەدوای ڕۆژ زیاتر لاواز دەبن و ئەفسانەی داعش لەسەر دەستی پیشمەرگە تێک شکا و ئێستا توانای ئەوەیان نەماوە ببنە هەڕەشە لەسەر کوردستان.
سەرۆک بارزانی جارێکی دیکە ئامۆژگاریی پێشمەرگەکانی کرد کە پابەندی ڕەوشتی بەرزی کوردایەتی بن و نابێ بەهیچ شێوەیەک ڕێگە بدرێت بێ ڕێزی بە تەرمی کوژراوانی دوژمن بکرێت.
لە کۆتاییشدا سەرۆک بارزانی گەلی کوردستان و پێشمەرگە قارەمانەکانی دڵنیا کردەوە کە ئاڵای کوردستان هەر شەکاوە دەبێت و کوردستان هەر پارێزراو دەبێت.
More...
سەرۆکی ھەرێمی کوردستان پەیوەندییەکی تەلەفۆنی لە جێگری سەرۆکی ویلایەتە یەکگرتووەکانی ئەمەریکاوە پێگەیشت
سەرۆک بارزانی ئیدانەی شەهید کردنی سێ پێشمەرگەی دیلی دەستی تیرۆریستان دەکات
په‌یامی كۆسره‌ت ره‌سول عه‌لی به بۆنه‌ی هاتنی جه‌ژنی نه‌ورۆز
سەرۆکی ئەنجوومەنی وەزیرانی عێراق و جێگری سەرۆک کۆمار پیرۆزبایی ئاراستەی سەرۆک بارزانی دەکەن
دوایین هەواڵەکان
- سهركۆمارى توركيا بهردهواميى پشتگيريى وڵاتهكهى بۆ عێراق و هه‌رێمى كوردستان دووپات كرده‌وه
- پەیامی سەرۆک نێچیرڤان بارزانی لە ساڵیادی ڕۆژنامەگەریی کوردیدا
- نێچيرڤان بارزانى: دهبێ نيشتمان كۆكهرهوهى هه‌موومان بێت
- سه‌رۆك نێچيرڤان بارزانى له‌گه‌ڵ باڵيۆزى يهكێتيى ئهورووپا كۆبووهوه
- سهرۆكى هه‌رێمى كوردستان پێشوازى له باڵيۆزى فهرهنسا كرد
- سه‌رۆك نێچيرڤان بارزانى پێشوازى له باڵيۆزى بهريتانيا كرد
- سەرۆکی حکومەتی هەرێمی کوردستان پێشوازی لە باڵیۆزی بەریتانیا لە عێراق دەکات
- عەباس غەزالی: نووسین و چاپکردنی "فەرھەنگیی زارەکیی موکریان" شانازییەکی بێ پایانە
- پەیامی پیرۆزبایی سەرۆکی حکومەتی هەرێمی کوردستان بەبۆنەی جەژنی نەورۆز
- سهرۆكى هه‌رێمى كوردستان نامهيهكى پيرۆزبايى له وهزيرى دهرهوەى توركياوه پێدهگات