سەرۆك بارزانی سەردانی سیاسەتمەداری ناوداری كورد مامۆستا عەزیز موحەمەد دەكات
ئێوارەی ئەمڕۆ پێنجشەممە 5ـی 3ـی 2015 لە شاری هەولێر بەڕێز مەسعود بارزانی سەرۆكی هەرێمی كوردستان بە مەبەستی هەواڵپرسین و دیداری لەگەڵ كەسایەتی و سیاسەتمەداری ناوداری كوردستان و عێراق مامۆستا عەزیز موحەمەد سەردانی ماڵی مامۆستا عەزیز موحەمەد كرد.
لەم سەردانەدا سەرۆك بارزانی وێڕای هەواڵپرسین، ڕۆڵی مامۆستا عەزیز موحەمەدی لە ژیانی سیاسیی گەلی كوردستان و عێراق لە قۆناغە جیاجیاكان بەرز نرخاند و هیوای تەندروستی و خۆشی بۆ خواست.
سەرۆكی هەرێمی كوردستان پێشوازی لە وەزیری دەرەوەی كەنەدا دەكات
پێشنیوەڕۆی ئەمڕۆ 5ـی 3ـی 2105 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە ڕۆبێرت نیكڵسۆن وەزیری كاروباری دەرەوەی كەنەدا و شاندێكی یاوەری كرد كە لە بروونۆ ساكۆمانی یاڵیۆزی كەنەدا لە عێراق و ژمارەیەك بەرپرس و ڕاوێژكاری وەزارەتی دەرەوەی كەنەدا پێكهاتبوو.
لە دیدارەكەدا وەزیری دەرەوەی كەنەدا سوپاسی ئەو پێشوازییە گەرمەی كرد كە لە خۆی و شاندی وەزارەتی دەرەوەی كەنەدا كراوە و لە گوتەیەكدا وێڕای ئاماژەدان بە هەڕەشەكانی تیرۆریستان لەسەر ئاساییشی جیهانی ئەوەی خستەڕوو كە وڵاتەكەی زۆر زوو پابەندی هاوپەیمانێتیی نێودەوڵەتیی لەدژی تیرۆریستان بوو و بە شێوەیەكی كردەیی بەشداری لەم هاوپەیمانێتییەدا كرد. وەزیری دەرەوەی كەنەدا پشتگیریی وڵاتەكەی بۆ هەرێمی كوردستان دووپاتكردەوە و ڕایشیگەیاند كە كەنەدا بەشێوەیەكی درێژخایەن پابەند و بەردەوام دەبێ لە هاوكاریی سەربازیی و مرۆڤی بۆ هەرێمی كوردستان و هەروەها لە ئاییندەدا لە بوارەكانی تەكنەلۆژیای زانیاری و كشتوكاڵ و دارایی لەگەڵ كوردستاندا لە پەیوەندی و هەماهەنگیی درێژخایەن و بەردەوامدا دەبێت. لە بەشێكی دیكەی قسەكانیدا وەزیری دەرەوەی كەنەدا جەختی لەوە كردەوە كە وڵاتەكەی بەشداربوونی لە شەڕی دژی تیرۆر بە پشكی خۆی دەزانێ وەك بەرپرسیارێتی پاراستنی ئاساییشی جیهانی. هەروەها سوپاسی سەرۆك بارزانی و گەلی كوردستانی كرد كە بە بێ ڕەچاوكردنی ئایین و نەتەوە و بە بێ جیاوازی یارمەتیی ئاوارە و پەنابەرانیان داوە و ئەو بابەتەیش بووەتە جێگەی پێزانین و سەرسامیی جیهانیان.
لەبەرانبەردا سەرۆك بارزانی سوپاسی حكوومەت و گەلی كەنەدای كرد كە لە شەڕی تیرۆریستاندا پشتیوانی گەلی كوردستان و پێشمەرگە بوونە و ئاستی هەماهەنگی و ئەدای تیمە سەربازییەكانی وڵاتی كەنەدای لەم شەڕەدا بە زۆر باش وەسفكرد و ئەوەی خستەڕوو كە گەلی كوردستان هەرگیز ئەو پاڵپشتییەی وڵاتی كەنەدا لەبیر ناكات و پێزانینیان بۆ پشتیوانیی گەلی كەنەدا هەیە. سەرۆك بارزانی سوپاسی ئەمەریكا و وڵاتانی هاوپەیمانیشی كرد كە لە شەڕەكەدا هاوكاری پێشمەرگە بوونە و ئەو هاوكارییەی بە كاریگەر لەقەڵەمدا. هەروەها سەرۆك بارزانی ئاماژەیشی بە ئاوارەبوونی سەدانهەزار هاووڵاتی كرد كە لە ئەنجامی هەڕەشەی تیرۆریستان ئاوارە بوونە و ئەوەی خستەڕوو كە پێشمەرگە بە گیانی خۆی بەرگری لە ئاوارەكان كردووە و دەیانپارێزێت و یارمەتیدان و حەواندنەوەی ئاوارەكانیشی بە ئەركێكی مرۆڤی و نیشتیمانی زانی. سەرۆك بارزانی ئەوەیشی باس كرد كە باشترین ڕێگەی بۆ هاوكاریكردنی ئاوارەكان گەڕانەوەی ئاوارەكانە بۆ شوێنەكانیان و پاراستنیانە لە هەڕەشەكان. لەبارەی شەڕی تیرۆریستانیش سەرۆك بارزانی هێمای بەوەدا كە پێشمەرگە داعشی تووشی شكست كرد و ئوستوورەی داعشی شكاند و 15 هەزار كیلۆمەتری چوارگۆشەی لەژێر دەستی داعش ڕزگار كردووە.
لە بەشێكی دیكەی قسەكانیدا سەرۆك بارزانی پێشوازیی لە فراوانكردنی پەیوەندییەكانی نێوان هەرێمی كوردستان و كەنەدا كرد لە بوارە جیاجیاكان كرد و بە هەنگاوێكی دڵخۆشكەری زانی. هەروەها وێڕای ئاماژەدان بە بوونی جالیەی كوردی لە وڵاتی كەنەدا سوپاسی گەلی كەنەدایشی كرد كە لە ڕۆژانی تەنگانەدا باوەشی بۆ ژمارەیەكی زۆری هاووڵاتیی كورد كردووەتەوە و پەنای داون.
جێگەی ئاماژەپێكردنە لەم كۆبوونەوەیە قوباد تاڵەبانی جێگری سەرۆكی حكوومەت و فواد حوسێن سەرۆكی دیوانی سەرۆكایەتیی هەرێم و عەلی سندی وەزیری پلاندانان و فەلاح مستەفا بەرپرسی فەرمانگەی پەیوەندییەكانی حكوومەتی هەرێم و عەبدوڵڕەحمان ئەلحوسەینی باڵیۆزی عێراق لە كەنەدا ئامادە بوون.
جێگری سەرۆك وەزیران پێشوازی لەوەزیری بەرگری توركیا وشاندی یاوەری كرد
ئەمڕۆ 6ی مارت/ئادارـی 2015 قوباد تاڵەبانی جێگری سەرۆك وەزیرانی حكومەتی هەرێمی كوردستان، پێشوازی لە عیسمەت یەڵماز وەزیری بەرگری توركیا وشاندی یاوەری كرد.
لە دیدارەكەدا كە وەزیرانی پێشمەرگە وناوخۆی هەرێمی كوردستان ووتەبێژی فەرمی حكومەت وژمارەیەك لەبەرپرسانی حكومی هەردوولا ئامادەی بوون، بارودۆخی ئێستای عیراق وهەرێمی كوردستان لە رووبەڕووبوونەوەی تیرۆر گفتوگۆی فراوانی لەبارەوە كرا.
لایەنی توركی ئاماژەیان بەوەدا ئەوان سەردانی ناوەندی مەشق وراهێنانی پێشمەرگەیان كردووە لەسۆران بۆ ئاگاداربوون لەبەڕێوەچوونی مەشقی پێشمەرگە ئاماژەشیان بەوەدا ئەوان هەوڵی فراوانتركردنی ناوەندەكان دەدەن ولەیارمەتیدانی هەرێمی كوردستان لەڕووی مرۆیی وسەربازیەوە بەردەوام دەبن.
وەزیری بەرگری توركیا ئاماژەی بەوەدا ئاسایشی خاك وخەڵكی هەرێم بەئاسایشی خۆیان دەزانن وئەو هەڕەشەیەی تیرۆریستانی داعش بە هەڕەشە بۆ سەر خۆشیان دەزانن و بەپێویستیشی زانی پەیوەندیەكانی نێوان هەردوولا لەبواری سیاسی وئابوری وكۆمەڵایەتیش پەرەیان پێبدرێت.
قوباد تاڵەبانی سوپاسی حكومەتی توركیای كرد بۆ ئەو هاوكاریانە وخۆشحاڵی خۆی بەوە نیشاندا كە ئاستی پەیوەندیەكان لەساڵانی رابردوودا پێشكەوتنی بەرچاوی بەخۆیەوە بینیوە ودووپاتیكردەوە خەڵكی كوردستان چاوەڕوانی پەیوەندی باشتر لە توركیا دەكات.
ئیتالیا ئاستی هاوكارییه‌كانی بۆ هه‌رێمی كوردستان به‌رز ده‌كاته‌وه
له دووه‌مین ڕۆژی سه‌ردانه فه‌رمییه‌كه‌یدا بۆ ئیتالیا، نیوه‌ڕۆی ئه‌مڕۆ سێشه‌ممه ٣-٣-٢٠١٥، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان و شاندی یاوه‌ری له ڕۆما له لایه‌ن به‌ڕێز ’’پاوڵۆ جێنتیلۆنی’’ی وه‌زیری ده‌ره‌وه‌ی ئیتالیاوه پێشوازییان لێكرا.
له كۆبوونه‌وه‌یه‌كدا به‌ڕێز وه‌زیری ده‌ره‌وه‌ی ئیتالیا خۆشحاڵیی خۆی بۆ سه‌ردانی به‌ڕێز سه‌رۆك وه‌زیرانی هه‌رێمی كوردستان و شاندی یاوه‌ری بۆ ئیتالیا ده‌ربڕی و دووپاتی كرده‌وه كه ئه‌وان به‌رده‌وام ئاگایان له بارودۆخی ناوچه‌كه و هه‌رێمی كوردستان و عیراقه، به‌ڵام ئه‌م سه‌ردانه ده‌رفه‌تێكه بۆ ئه‌وه‌ی له شاندی هه‌رێمی كوردستان خۆیه‌وه، دوایین هه‌ڵسه‌نگاندنی بارودۆخه‌كه بزانن.
بره‌ودان به په‌یوه‌ندییه‌كانی هه‌رێمی كوردستان و ئیتالیا، پێشهاته‌كانی شه‌ڕی دژی تیرۆر و سه‌ركه‌وتن و پێشڕه‌وییه به‌رده‌وامه‌كانی پێشمه‌رگه، دۆخی مووسڵ و هه‌وڵ و پلانه‌كان بۆ ڕزگاركردنی ئه‌و شاره و گرنگیی به‌شداریی هه‌مه‌لایه‌نه و هه‌ماهه‌نگی له‌گه‌ڵ هاوپه‌یمانان بۆ ڕزگاركردنی، ڕه‌وشی ئاواره و په‌نابه‌ران له هه‌رێمی كوردستان، په‌یوه‌ندییه‌كانی هه‌ولێر و به‌غدا و دوایین ڕێككه‌وتنی نێوان هه‌ردوولا، گرنگیی به‌شداری و هاوبه‌شیی هه‌موو پێكهاته‌كان له پرۆسه‌ی سیاسیی عیراقدا و بارودۆخی سووریا و كاریگه‌ریی پێشهاته‌كانی ئه‌و وڵاته له ناوچه‌كه به‌گشتی، له كۆبوونه‌وه‌كه‌دا تاوتوێ كران.
به‌ڕێز وه‌زیری ده‌ره‌وه‌ی ئیتالیا پابه‌ندیی وڵاته‌كه‌ی به هاوكاری و پشتگیریی سه‌ربازی و مرۆیی و به‌ره‌وپێشبردنی په‌یوه‌ندییه‌كانی له‌گه‌ڵ هه‌رێمی كوردستان دووپات كرده‌وه و له‌مباره‌یه‌وه بڕیاری به‌رزكردنه‌وه‌ی نوێنه‌رایه‌تیی ئیتالیای له هه‌رێمی كوردستان بۆ كونسلخانه‌ی گشتی به نیشانه‌ی بایه‌خدانی ڕۆما به په‌یوه‌ندییه‌كانی له‌گه‌ڵ هه‌ولێر له قه‌ڵه‌م دا و جه‌ختی له‌وه كرده‌وه كه ئیتالیا به بایه‌خه‌وه ده‌ڕوانێته په‌یوه‌ندییه‌كانی له‌گه‌ڵ هه‌رێمی كوردستان و به هه‌موو به‌ڵێنه‌كانییه‌وه بۆ هاوكاری و پشتگیریی هه‌رێمی كوردستان، پابه‌نده.
ده‌رباره‌ی هاوكارییه مرۆیی و سه‌ربازییه‌كانیش، ڕایگه‌یاند: ئیتالیا له پشتگیریی سه‌ربازی به ناردنی چه‌ك و قه‌قه‌مه‌نی و ڕاهێنه‌رانی سه‌ربازی بۆ هه‌رێمی كوردستان به‌رده‌وام ده‌بێت و ئه‌وه‌ی تا ئێستا له ڕووی مرۆیی و سه‌ربازییه‌وه پێشكه‌ش به هه‌رێمی كوردستان كراوه، دوایین ئاستی هاوكارییه‌كان نه‌بووه. هه‌روه‌ها خۆشحاڵیی خۆی به ڕێككه‌وتنی نێوان هه‌ولێر و به‌غدا ده‌ربڕی و پشتگیریی وڵاته‌كه‌ی بۆ باشبوونی په‌یوه‌ندییه‌كانی هه‌ردوو حكوومه‌تی هه‌رێمی كوردستان و حكوومه‌تی فیدرالی عیراق دووپات كرده‌وه.
لای خۆیه‌وه به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان سوپاسی هه‌ڵوێست و پشتگیرییه‌كانی ئیتالیای كرد و ده‌ستخۆشی له بڕیاری به‌رزكردنه‌وه‌ی ئاستی نوێنه‌رایه‌تیی ئیتالیا له هه‌رێمی كوردستان بۆ كونسلخانه‌ی گشتی كرد و هه‌موو پشتگیری و هاوكارییه‌كی حكوومه‌تی هه‌رێمی بۆ سه‌ركه‌وتنی كاری كونسلخانه‌كه‌یان، نیشان دا. ده‌رباره‌ی په‌یوه‌نیش له‌گه‌ڵ به‌غدا، ته‌واوی پابه‌ندیی حكوومه‌تی هه‌رێمی كوردستانی به دوایین ڕێككه‌وتنی له‌گه‌ڵ حكوومه‌تی فیدرال و یاسای بودجه‌ی ساڵی ٢٠١٥-ه‌وه ده‌ربڕی و ئاماده‌ییی حكوومه‌تی هه‌رێمی كوردستانی بۆ چاره‌سه‌ركردنی هه‌موو كێشه‌كان له ڕێگه‌ی دیالۆگ و لێكگه‌یشتنه‌وه، دووپات كرده‌وه.
به‌ڕێز سه‌رۆك وه‌زیران هه‌روه‌ها تیشكی خسته سه‌ر ئه‌وه‌ی كه هه‌رێمی كوردستان به پێكه‌وه‌ژیان و ته‌بایی و كولتووری فره‌نه‌ته‌وه‌یی و فره‌ئایینی و ئه‌و پره‌نسیپانه‌وه پابه‌نده، كه به درێژاییی مێژوو له‌ناو پێكهاته جیاكانی كوردستاندا هه‌بوون و بێ جیاوازی به‌رگری له هه‌موو پێكهاته نه‌ته‌وه‌یی و ئایینییه‌كان ده‌كات، باسی له ڕۆڵی پێشمه‌رگه‌ش له پاراستن و به‌رگریكردن له هه‌موو ناوچه و پێكهاته‌كانی هه‌رێمی كوردستان كرد.
له كۆبوونه‌وه‌كه‌دا هه‌ر یه‌كه له به‌ڕێزان جێگری سه‌رۆك وه‌زیران، وه‌زیری ئه‌وقاف و كاروباری ئایینی، باڵیۆزی عیراق له ئیتالیا، به‌رپرسی فه‌رمانگه‌ی په‌یوه‌ندییه‌كانی ده‌ره‌وه، وته‌بێژی فه‌رمیی حكوومه‌ت و نوێنه‌ری حكوومه‌تی هه‌رێمی كوردستان له ئیتالیا، ئاماده بوون. دوای ئه‌وه‌ش به‌ڕێزان سه‌رۆك وه‌زیرانی هه‌رێمی كوردستان و وه‌زیری ده‌ره‌وه‌ی ئیتالیا له كۆنگره‌یه‌كی ڕۆژنامه‌وانیدا، وه‌ڵامی پرسیاری ڕۆژنامه‌نووسانیان دایه‌وه.
لە كۆنگرە رۆژنامەوانییەكەدا سەرەتا بەڕێز وەزیری دەرەوەی ئیتالیا بەخێرهاتنی بەڕێز نێچیرڤان بارزانی و شاندی یاوەری كرد و سەرۆك وەزیرانی هەرێمیش سوپاسی وەزیری دەرەوەی ئیتالیای كرد بۆ ئەو پێشوازییەی كە لێیان كراوە و گوتی: " من دەمەوێ لەو ده‌رفه‌ته‌دا سوپاسی گەلی كوردستان بە گەل و حكوومەتی ئیتالیا بگەیەنم. سەرۆك وەزیرانی ئیتالیا، یەكەم سەرۆك وەزیر بوو دوای هێرشی تیرۆریستانی داعش بۆ سەر هەرێم، سەردانی هەرێمی كوردستانی كرد و دوای ئەویش جەنابی وەزیری دەرەوە سەردانی كردین.
ئێمە سوپاسی پشتگیریی سەربازی و مرۆییی ئیتالیا دەكەین بۆ هەرێمی كوردستان و خۆشحاڵین بە پەرەپێدانی زیاتری پەیوەندییەكان لەگەڵ ڕۆما. لە ئەنجامی ئەو پشتگیرییە سەربازییەی كە لە لایەن ئەمەریكا و وڵاتانی ڕۆژئاواوە لێمان كرا، سەركەوتنی باشمان بەرامبەر داعش بەدەست هێناوە. ئەو شەڕەی ئەمڕۆ لەگەڵ داعش دەیكەین، تەنیا شەڕی كورد نییە؛ بەڵكو شەڕی هەموو مرۆڤایەتییە لە دژی ئەو تیرۆریستانە. پێشمەرگەكانی ئێمە لە شەڕی دژی داعشدا جددین و ئێمە وەك گەلی كورد هیوادارین وڵاتانی ڕۆژئاوا لەو ئەركەی كە ئەمڕۆ كورد لە دژی ئەو تیرۆریستانە بەڕێوەی دەبات، تێبگەن.”
لەبارەی هاوكارییە مرۆییەكانی ئیتالیا بۆ هەرێمی كوردستان، بەڕێز نێچیرڤان بارزانی گوتی: "لەگەڵ جەنابی وەزیری دەرەوە باسی ڕەوشی مرۆییی ئەو پەنابەرانەمان كرد كە بەهۆی هێرش و مەترسییەكانی تیرۆریستانی داعشه‌وه ئێستا زیاتر لە ملیۆنێك و پێنجسەد هەزار كەس ئاوارەی هەرێمی كوردستان بوونە و بەمەش لە ماوەیەكی نزیكدا ڕێژەی دانیشتوان لە هەرێمی كوردستان سەدا بیست و هەشت زیادی كردووە. ئەوەی لە توانای ئێمەدا هەبێت بۆ ئەو خەڵكە ئاوارەیە كە لە كورد و مەسیحی و شەبەك و عەرەب پێكهاتوون، بۆیان دەكەین. جارێكی دیكه سوپاسی حكوومەت و گەلی ئیتالیا دەكەین بۆ هاوكارییە مرۆییەكانیان و هیوادارین بە هاوكاریی هەموولایەك كۆتایی بەو تیرۆریستانە لە هەموو شوێنێك بهێنین."
لەبارەی هاوكارییە سەربازی و مرۆییەكانی ئیتالیا بۆ هەرێمی كوردستان و ئەو كێشە داراییەكانی نێوان هەولێر و بەغدا، هەریەك له بەڕێزان وەزیری دەرەوەی ئیتالیا و بەڕێز سەرۆك وەزیرانی هەرێمی كوردستان ئاماژه‌یان به‌وه دا كە لە كۆبوونەوەكەیاندا باسیان لەوە كردووە هاوكارییەكانی ئیتالیا بۆ هەرێمی كوردستان لە هەموو بوارەكاندا بەردەوام دەبێت، بە تایبەت هاوكارییە مرۆییەكان، چونكە خەڵكێكی زۆری ئاوارە لە هەرێم هەن و پێویستیی زۆریان بە هاوكاری هەیە. لە بارەی قەیرانی دارایی عێراق و هەرێمی كوردستانیشه‌وه، بەڕێز سەرۆك وەزیران گوتی: "قەیرانێكی جددی دارایی بەرۆكی ئێمەی گرتووە و لەگەڵ جەنابی وه‌زیری دەرەوەی ئیتالیاش ئەو بابەتەمان باس كرد. هەڵوێستی ئیتالیا لەم بارەوە ئەوەیە كە هەردوولامان، واتە هەرێمی كوردستان و بەغدا كێشەكانمان لە ناوخۆی وڵاتدا چارەسەر بكەین و جەنابی وەزیر ئێمەی هان دا كە كێشەكان لەگەڵ بەغدا لە ڕێگەی دایالۆگه‌وه، چارەسەر بكەین."
لە وەڵامی پرسیارێكدا لەبارەی قوناغی دوای چارەسەریی كێشەكانی نێوان هەرێمی كوردستان و بەغدا، بەڕێز نێچیرڤان بارزانی گوتی: " ئێمە لە عیراق پابەندی دەستووری هەمیشەیین كە سەدا هەشتای خەڵكی عیراق دەنگی بۆ داوە. ئەوەی كە گرینگە پێویستە بەغدا واقعبینانە سەیری كێشەكان بكات و ئێمە ئامادەین ئەو كێشانەمان لەسەر دەستوور و ئەوانی دیكەش، لە چوارچێوەی عیراقدا چارەسەر بكەین. ئەولەویەتی ئێستای ئێمە شەڕی دژی تیرۆریستانی داعشە و وەك كورد ئێمە لەبەرەی پێشەوەین و پێشمەرگە و گەلی ئێمە لە بەرەكانی پێشەوەی ئەو شەڕی دژی تیرۆریستاندان و بە یارمەتیی وڵاتانی هاوپەیمان، توانیومانە هەڕەشە و هێرشەكانی ئەو تیرۆریستانە لە شوێنی خۆیان ڕابگرین."
ئیتالیا له پشتگیریی مرۆیی و سه‌ربازی بۆ هه‌رێمی كوردستان به‌رده‌وام ده‌بێت
ئێواره‌ی ئه‌مڕۆ دووشه‌ممه 2015/3/2، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان و شاندی یاوه‌ری، له ڕۆما له لایه‌ن به‌ڕێز ’’مه‌تێیۆ ڕێنزی’’ سه‌رۆك وه‌زیرانی ئیتالیاوه پێشوازییان لێ كرا.
له سه‌ره‌تای دیداره‌كه‌دا به‌ڕێز نێچیرڤان بارزانی سوپاس و پێزانینی خه‌ڵك و حكوومه‌تی هه‌رێمی كوردستانی بۆ پشتگیری و پشتیوانیی مرۆیی و سه‌ربازیی ئیتالیا بۆ هه‌رێمی كوردستان و سه‌ردانی هاوینی ڕابردووی به‌ڕێز سه‌رۆك وه‌زیرانی ئیتالیا بۆ هه‌ولێر دووپات كرده‌وه و كات و مانای سه‌ردانه‌كه‌ی به گرنگ و پشتیوانییه‌كی گه‌وره بۆ هه‌رێمی كوردستان له قه‌ڵه‌م دا. پاشان پوخته‌یه‌كی ده‌رباره‌ی ڕه‌وشی هه‌رێمی كوردستان و پێشڕه‌وی و سه‌ركه‌وتنه‌كانی به‌رده‌وامی پێشمه‌رگه و ڕه‌وشی ئاواره و په‌نابه‌رانی له هه‌رێمی كوردستان خسته ڕوو كه بارێكی قورسیان خستووه‌ته سه‌ر شانی حكوومه‌تی هه‌رێم و پێویستی به یارمه‌تی و هاوكاریی زیاتر هه‌یه.
لای خۆیه‌وه به‌ڕێز سه‌رۆك وه‌زیرانی ئیتالیا خۆشحاڵیی خۆی به سه‌ردانی به‌ڕێز سه‌رۆك وه‌زیرانی هه‌رێمی كوردستان و شاندی یاوه‌ری بۆ ڕۆما نیشان دا و گوتی: دڵنیاتان ده‌كه‌ینه‌وه كه پشتگیری و هاوكاریی مرۆیی و سه‌ربازیمان بۆ هه‌رێمی كوردستان به‌رده‌وام ده‌بێت و بۆ له‌ناوبردنی تیرۆر هه‌موو پشتگیرییه‌ك له هه‌رێمی كوردستان ده‌كه‌ین، ڕێز و پێزانینی وڵاته‌كه‌یشی بۆ ئازایه‌تیی پێشمه‌رگه له به‌ره‌نگاربوونه‌وه‌ی تیرۆرستاندا دووپات كرده‌وه كه وه‌ك گوتی: په‌یامی خۆڕاگری و ئازاییان دایه هه‌موو جیهان.
هه‌روه‌ها تیشكی خسته سه‌ر ته‌شه‌نه‌كردنی ڕێكخراوه تیرۆرستییه‌كان له شوێنه‌كانی دیكه‌ی جیهان و جه‌ختی له‌وه كرده‌وه كه ده‌بێ هه‌مووان پێكه‌وه به‌ره‌نگاری تیرۆر بیبنه‌وه و گوتی: ئیتالیا له هه‌موو ڕوویه‌كه‌وه و زیاتر له جاران هاوكاریی هه‌رێمی كوردستان ده‌كات، چونكه هه‌رێمی كوردستان به شوێنێكی ستراتیژی ده‌بینین و خۆمان به دۆستی گه‌لی كوردستان ده‌زانین، بۆیه‌شه ئیتالیا بڕیاری داوه ئاستی نوێنه‌رایه‌تیی خۆی له هه‌رێمی كوردستان بۆ كونسلخانه‌ی گشتی به‌رز بكاته‌وه و به‌مه‌ش ده‌مانه‌وێ په‌یامێك بده‌ینه هه‌مووان كه ئێستا ڕه‌وشی هه‌رێمی كوردستان له جاران باشتره و ڕایگه‌یاند: بۆ ئێمه گرنگه ئه‌و سه‌قامگیرییه‌ی له كوردستان هه‌یه، به‌رده‌وام بێت.
له به‌شێكی دیكه‌ی دیداره‌كه‌دا په‌یوه‌ندییه‌كانی نێوان هه‌ولێر و به‌غدا، بارودۆخی مووسڵ و ناوچه‌كه به‌گشتی و چۆنیه‌تیی به‌ره‌نگاربوونه‌وه‌ی تیرۆر و ئۆپه‌راسیۆنه سه‌ربازییه‌كان و په‌ره‌پێدانی پرۆسه‌ی سیاسی له عیراق و گرنگیی به‌شداری و هاوبه‌شیی هه‌موو پێكهاته‌كان له پرۆسه‌ی سیاسیی وڵاتدا تاوتوێ كرا، هه‌روه‌ها تیشك خرایه سه‌ر بارودۆخی سووریا و كاریگه‌ریی پێشهاته‌كانی ئه‌وێ له‌سه‌ر ڕه‌وشی عیراق و ناوچه‌كه به‌گشتی و جه‌خت له‌سه‌ر پێویستیی چاره‌سه‌رێكی سیاسیانه بۆ كێشه‌ی سووریا كرایه‌وه.
شاندی یاوه‌ری به‌ڕێز سه‌رۆك وه‌زیران، له هه‌ر یه‌كه له به‌ڕێزان جێگری سه‌رۆك وه‌زیران، وه‌زیری ئه‌وقاف و كاروباری ئایینی، به‌رپرسی فه‌رمانگه‌ی په‌یوه‌ندییه‌كانی ده‌ره‌وه، وته‌بێژی فه‌رمیی حكوومه‌ت و نوێنه‌ری حكوومه‌تی هه‌رێمی كوردستان له ئیتالیا، پێكهاتبوون.
وه‌زیری ده‌ره‌وه‌ی ڤاتیكان پێشوازی له نێچیرڤان بارزانی كرد
له به‌رده‌و‌امیی سه‌ردانه‌كه‌یدا بۆ ڤاتیكان، دوای نیوه‌ڕۆی ئه‌مڕۆ دووشه‌ممه 2015/3/2، به‌ڕێز نێچیرڤان و شاندی یاوه‌ری له‌گه‌ڵ به‌ڕێز پاوڵ ڕیچارد گاله‌گێڕ، وه‌زیری ده‌ره‌وه‌ی ڤاتیكان كۆبوونه‌وه.
له دیدارێكدا به‌ڕێز وه‌زیری ده‌ره‌وه‌ی ڤاتیكان خۆشحاڵیی خۆی به سه‌ردانی به‌ڕێز سه‌رۆك وه‌زیران و شاندی حكوومه‌تی هه‌رێمی كوردستان بۆ ڤاتیكان ده‌ربڕی و دووپاتی كرده‌وه كه به‌رده‌وام به‌دواداچوون ده‌كه‌ن و ئاگایان له ڕه‌وشی هه‌رێمی كوردستان و بارودۆخی هه‌نووكه‌ییی ناوچه‌كه هه‌یه، به‌ڵام خۆشحاڵه كه ئه‌مڕۆ له نزیكه‌وه و له شاندی حكوومه‌تی هه‌رێمی كوردستان خۆیه‌وه، گوێبیستی بارودۆخ و دوایین پێشهاته‌كانی هه‌رێمی كوردستان و عیراق و ناوچه‌كه ده‌بێت.
له دیداره‌كه‌دا دوایین پێشهاته‌كانی شه‌ڕی دژی تیرۆر و پێشڕه‌وه‌ییه به‌رده‌وامه‌كانی پێشمه‌رگه و شكست و پاشه‌كشه‌ی ڕۆژانه‌ی تیرۆرستان له شه‌ڕی دژی تیرۆردا تاوتوێ كرا، هه‌روه‌ها تیشك خرایه سه‌ر بارودۆخی ئاواره و په‌نابه‌ران له هه‌رێمی كوردستان و داكۆكی له‌سه‌ر پێویستیی پێشكه‌شكردنی كۆمه‌ك و هاوكاریی زیاتری وڵاتانی كۆمه‌كبه‌خش و كۆمه‌ڵگه‌ی نێوده‌وڵه‌تی بۆ ئاواره و په‌نابه‌ران له هه‌رێمی كوردستان و یارمه‌تیدانی حكوومه‌تی هه‌رێم له‌م بواره‌دا، كرایه‌وه.
به‌ڕێز وه‌زیری ده‌ره‌وه‌ی ڤاتیكان سوپاس و ستایشی وڵاته‌كه‌ی بۆ حكوومه‌ت و خه‌ڵكی هه‌رێمی كوردستان دووپات كرده‌وه كه به‌بێ جیاوازی، كوردستانیان كردووه‌ته په‌ناگه‌یه‌كی ئارام بۆ ئاواره و په‌نابه‌ران و هه‌موو كۆمه‌ك و هاوكارییه‌كیان پێشكه‌ش ده‌كه‌ن. هه‌روه‌ها ڕۆڵی هه‌رێمی كوردستانی له ڕووبه‌ڕووبوونه‌وه‌ی تیرۆر و به‌رگریكردن و پاراستنی ته‌واوی پێكهاته‌كان و ناوچه‌كانیان له مه‌ترسییه‌كانی تیرۆر، به‌رز و به مایه‌ی ڕێز و پێزانینی ڤاتیكان و كۆمه‌ڵگه‌ی نێوده‌وڵه‌تی زانی.
له دیداره‌كه‌دا بره‌ودان به په‌یوه‌ندییه‌كانی هه‌رێمی كوردستان و ڤاتیكان، به‌ره‌وپێشچوونی په‌یوه‌ندییه‌كانی هه‌رێمی كوردستان و وڵاتانی دراوسێ و چه‌ند پرسێكی دیكه‌ی مایه‌ی بایه‌خی هه‌ردوولا، تاوتوێ كران. شاندی یاوه‌ری به‌ڕێز سه‌رۆك وه‌زیران، له هه‌ر یه‌كه له به‌ڕێزان جێگری سه‌رۆك وه‌زیران، وه‌زیری ئه‌وقاف و كاروباری ئایینی، به‌رپرسی فه‌رمانگه‌ی په‌یوه‌ندییه‌كانی ده‌ره‌وه، وته‌بێژی فه‌رمیی حكوومه‌ت و نوێنه‌ری حكوومه‌تی هه‌رێمی كوردستان له ئیتالیا، پێكهاتبوون.
نێچیرڤان بارزانی و پاپای ڤاتیكان ڕه‌وشی هه‌رێمی كوردستان تاوتوێ ده‌كه‌ن
نیوه‌ڕۆی ئه‌مڕۆ دووشه‌ممه 2015/3/2 له ڤاتیكان، به‌ڕێز نێچیرڤان بارزانی سه‌رۆك وه‌زیرانى هه‌رێمی كوردستان و شاندی یاوه‌ری له لایه‌ن به‌ڕێز قه‌داسه‌تی پاپای ڤاتیكان پاپا فرانسیسه‌وه پێشوازییان لێ كرا.
له دیدارێكدا هه‌ردوولا خۆشحاڵیی خۆیان به‌م دیداره نیشان دا و بارودۆخی هه‌رێمی كوردستان و عیراق و ناوچه‌كه‌یان به گشتی تاوتوێ كرد و تیشكیان خسته سه‌ر دوایین پێشهاته‌كانی به‌ره‌نگاربوونه‌وه‌ی تیرۆر و شه‌ڕی دژی داعش و باس له گرنگیی پێكهێنانی هاوپه‌یمانیی نێوده‌وڵه‌تی بۆ ڕووبه‌ڕووبوونه‌وه‌ی تیرۆرستان كرا، كه نه‌ك ته‌نیا له‌سه‌ر هه‌رێمی كوردستان و عیراق و ناوچه‌كه، به‌ڵكوو له‌سه‌ر ته‌واوی جیهان و مرۆڤایه‌تی مه‌ترسییه‌كی ڕاسته‌قینه‌ن.
له دیداره‌كه‌دا به‌ڕێز نێچیرڤان بارزانی پوخته‌یه‌كی ده‌رباره‌ی پێكه‌وه‌ژیانی نه‌ته‌وه و ئایینه جیاكان و ڕه‌وشی ئاواره و په‌نابه‌ران له هه‌رێمی كوردستان به‌گشتی خسته ڕوو، كه له ئه‌نجامی هێرشی تیرۆرستانی داعشدا بۆ سه‌ر ناوچه‌كانیان له ده‌شتی نه‌ینه‌وا و شه‌نگال و ده‌وروبه‌ریان و ناوچه‌كانی دیكه‌ی هه‌رێمی كوردستان و عیراق، له هه‌موو پێكهاته نه‌ته‌وه‌یی و ئایینیه‌كانی مه‌سیحی، ئێزدی و موسڵمانان، ناچار بوون زێد و ماڵ و حاڵی خۆیان جێ بهێڵن و ڕوو بكه‌نه هه‌رێمی كوردستان. هه‌روه‌ها دووپاتی كرده‌وه كه خه‌ڵك و حكوومه‌تی هه‌رێمی كوردستان بێ جیاوازی و وه‌ك خوشك و برایانی خۆیان پێشوازییان لێ كردوون و هه‌رچی له توانای حكوومه‌تدا بێت بۆ هاوكاری و یارمه‌تیدانی ئه‌وان، هیچ درێغییه‌كیان نه‌كردووه.
به‌ڕێز سه‌رۆك وه‌زیران هه‌روه‌ها جه‌ختی له‌وه كرده‌وه هه‌رێمی كوردستان به هۆی زۆریی ژماره‌ی ئاواره و په‌نابه‌رانه‌وه له دۆخێكی زۆر سه‌ختدایه و باری حكوومه‌تی هه‌رێمی كوردستان زۆر قورسه، بۆیه داوای له قه‌داسه‌تی پاپا كرد كه هانی وڵاتانی كۆمه‌كبه‌خش و و كۆمه‌ڵگه‌ی نێوده‌وڵه‌تی بدات بۆ ئه‌وه‌ی باشتر به هانای ئاواره و په‌نابه‌رانه‌وه بێن و له ڕووی مرۆییه‌وه هاوكاریی هه‌رێمی كوردستان بكه‌ن.
له دیداره‌كه‌دا قه‌داسه‌تی پاپای ڤاتیكان سوپاس و ده‌ستخۆشی له حكوومه‌تی هه‌رێمی كوردستان كرد كه بێ جیاوازی به پیر ئاواره و په‌نابه‌رانه‌وه چووه و لانه و په‌ناگه‌ی داونه‌تێ و كۆمه‌ك و هاوكاری پێشكه‌ش كردوون. هه‌روه‌ها ستایشی ئه‌و پێكه‌وه‌ژیان و ته‌باییه‌ی كرد كه له دێرزه‌مانه‌وه له‌نێو پێكهاته نه‌ته‌وه‌یی و ئایینییه‌كانی كوردستاندا هه‌بووه و هه‌یه، ڕۆڵی هه‌رێمی كوردستانیشی له به‌ره‌نگاربوونه‌وه‌ی تیرۆر و پاراستنی خه‌ڵكی ناوچه‌كه‌دا، به مایه‌ی ڕێز و پێزانین له قه‌ڵه‌م دا.
له‌م دیداره‌دا شاندی یاوه‌ری به‌ڕێز سه‌رۆك وه‌زیران، هه‌ر یه‌كه له به‌ڕێزان جێگری سه‌رۆك وه‌زیران، وه‌زیری ئه‌وقاف و كاروباری ئایینی، به‌رپرسی فه‌رمانگه‌ی په‌یوه‌ندییه‌كانی ده‌ره‌وه، وته‌بێژی فه‌رمیی حكوومه‌ت و نوێنه‌ری حكوومه‌تی هه‌رێمی كوردستان له ئیتالیا، ئاماده بوون.
په‌یامی نێچیرڤان بارزانی بۆ كۆچی دواییی یاشار كه‌مال
کۆچی دواییی نووسەری گەورە و ناوداری کورد مامۆستا یاشار کەمال، زۆر خەمبار و دڵتەنگی کردین. یاشار کەمال قەڵەمێکی مەزن و داهێنەرێکی ناودار و پێشکەوتنخواز بوو، نەک بە تەنها بۆ کورد و گەلانی تورکیا، بەڵکوو دەنگی ژیاندۆستی و ویژدانی زیندووی سەردەمەکەی بوو، بانگی ئاشتی و پێکەوەژیان و برایی و ئازادی بوو. هەموو بەرهەمە ناوازەکانی و هەموو ئەو خەڵاتە سەنگینانەی پێی بەخشرا بوون، گەواهیی جوانیی ئەو پەیامە مرۆڤدۆستانەی ئەم نووسەرە مەزنەن، کە ماوەی زیاتر له نیو سەد هه‌وڵی ده‌دا بە گوێی مرۆڤایەتیدا، بدات.
کۆچی دواییی ئەم داهێنەرە پێشکەوتنخوازەی کورد، زیانێكی گەورەیە بۆ سەرجەم دنیای پێشکەوتنخواز و ئازاد، بەتایبەتی لەم سەردەمەدا کە بیر و پەیامی توندڕەوی و مەرگ و تاریكی، بە دڕندانەترین شێوە هەوڵی ناشیرینکردنی ژیان و سڕینەوەی بەها جوانەکانی مرۆڤایەتی دەدەن، ئەم سەردەمەی کە لە هەموو کاتێك زیاتر پێویستی بە دەنگ و ڕەنگی وەک یاشار کەمال هەیە.
بە ناوی خۆمان و حکوومەت و گەلی کوردستانەوە، پرسه و سەرەخۆشی ئاڕاستەی گەلی کوردستان و هەموو دۆستانی پەیامی ئاشتی و جوانی و ئازادییەکەی یەشار کەمال دەکەین. سەرەخۆشیی تایبەتیشمان بۆ خانەوادەی بەڕێزی بەهەشتی یەشار کەمال، کە هەمیشە دەنگی ئاشتی و ئازادی و پێکەوەژیان و پێشکەوتنخوازی بووە بۆ هەمو پێکهاتە جیاجیاکانی وڵاتەکەی و گەلانی ناوچەکە و ته‌واوی جیهان.
نێچیرڤان بارزانی
2015/3/1
په‌یامی كۆسره‌ت ره‌سول عه‌لی بۆ كۆچی دوایی رۆماننووسی گه‌وره‌ی كورد یه‌شار كه‌مال
به‌ناوی خوای گه‌وره‌و میهره‌بان
به‌داخه‌وه ئه‌مڕۆ هه‌واڵی كۆچی دوایی رۆماننووسی گه‌وره‌ی كورد یه‌شار كه‌مالم بیست و له ناخه‌وه هه‌ژاندمی و دڵگرانی كردم، لێره‌وه پرسه‌و سه‌ره‌خۆشی و خه‌مباری خۆم ئاراسته‌ی گه‌لی كورد و خانه‌واده‌ی یه‌شار ده‌كه‌م.
ئاشكرایه له پاڵ خه‌باتی سیاسی و چه‌كداری گه‌لی كوردمان، نووسه‌ران و رۆشنبیرانی كورد له رێگای نووسین و هه‌ڵوێسته‌كانیان هه‌وڵیانداوه دۆزی ره‌وای گه‌له‌كه‌مان به جیهان بناسێنن و داكۆكی له مافه ره‌واكانمان بكه‌ن.
رۆماننووسی گه‌وره یه‌شار كه‌مال له ته‌مه‌نی پڕ به‌خشش و دوور و درێژی خۆیدا و له دوو توێی به‌رهه‌مه ناوازه‌كانی هه‌میشه هه‌وڵی داوه پرسی گه‌لی كورد به جیهان بناسێنێ و هه‌وڵه جیهانییه‌كان بخرێنه‌گه‌ڕ بۆ گه‌یشتنی كورد به ئاواته‌كانی.
له كۆتاییداو له‌م كات و ساته خه‌مگینه‌دا، وێڕای خه‌مباری و دڵگرانیمان ده‌بێ ئه‌وه‌ش بڵێین كه له‌ده‌ستدانی یه‌شار كه‌مال كه‌لێنێكی گه‌وره‌ی خسته نێو ئه‌ده‌ب و فه‌رهه‌نگی گه‌له‌كه‌مان و ئه‌سته‌مه له مێژوودا یه‌شار كه‌مالێكی تر دووباره بێته‌وه.
كۆسره‌ت ره‌سول عه‌لی
جێگری سه‌رۆكی هه‌رێمی كوردستان
پەیامی سەرۆك بارزانی بەبۆنەی كۆچی دوایی یاشار كەمال
بەناوی خودای مەزن و دلۆڤان
بە بیستنی هەواڵی كۆچی دوایی ڕۆماننوسی ناوداری كورد یاشار كەمال زۆر خەمبار بووم. هەڵوێستی مرۆڤدۆستانە و نووسین و ڕۆمانەكانی یاشار كەمال كە دەرخەری واقعی كۆمەڵایەتی و سیاسی و كێشە و گرفتەكان و مەزلوومییەتی مرۆڤی كورد بوون، وەك گەنجینەیەكی بەهادار بۆ هەمیشە بە زیندوویی دەمێننەوە.
پەیام و هەڵوێستەكانی ئەم پیاوە مەزنە دژی چەوسانەوەی گەلان و، ڕەنگدانەوەی گیانی ئاشتیخوازی و پێكەوەژیانی گەلی كورد بوون. لەدەستدانی یاشار كەمال زیانێكی گەورەیە بۆ گەلی كوردستان. بەم بۆنە خەمناكەوە سەرەخۆشی لە گەلی كوردستان و ناوەندە فەرهەنگییەكان و ئەدەبدۆستان دەكەم و ڕۆحی خواڵێخۆشبوویش بە بەهەشتی بەرین شاد بێت.
انا لله و انا الیه راجعون
مسعود بارزانی
سەرۆكی هەرێمی كوردستان
1ـی 3ـی 2015
More...
سەرۆكی هەرێمی كوردستان پێشوازی لە سەرۆك و دەستەی كارگێڕیی دەزگای خێرخوازیی بارزانی دەكات
سەرۆكی هەرێمی كوردستان پێشوازی لە نێردەی تایبەتی سكرتێری گشتیی ڕێكخراوی نەتەوە یەكگرتووەكان كرد
نازم دەباغ: رێککەوتننامەی ئێران و عێراق بۆ ئاڵوگۆڕی زیندانیان جێبەجێدەکرێت
نازم دەباغ لە نەخۆشخانەی تاران فەرماندەیەکی پێشمەرگەی بەسەرکردەوە
دوایین هەواڵەکان
- سه‌رۆك نێچيرڤان بارزانى پێشوازى له باڵيۆزى بهريتانيا كرد
- سەرۆکی حکومەتی هەرێمی کوردستان پێشوازی لە باڵیۆزی بەریتانیا لە عێراق دەکات
- عەباس غەزالی: نووسین و چاپکردنی "فەرھەنگیی زارەکیی موکریان" شانازییەکی بێ پایانە
- پەیامی پیرۆزبایی سەرۆکی حکومەتی هەرێمی کوردستان بەبۆنەی جەژنی نەورۆز
- سهرۆكى ههرێمى كوردستان نامهيهكى پيرۆزبايى له وهزيرى دهرهوەى توركياوه پێدهگات
- سه‌رۆك نێچيرڤان بارزانى و دوو گرووپى پهرلهمانتارانى ئهڵمانى كۆبوونه‌وه
- سه‌رۆك نێچيرڤان بارزانى و سه‌رۆك وهزيرانى ئهرمهنستان تاوتوێى پهيوهندييهكان ده‌كه‌ن
- سه‌رۆك نێچيرڤان بارزانى له‌گه‌ڵ خاوهنشكۆ شاى ئوردن كۆبووهوه
- كارنامهى سه‌رۆك نێچيرڤان بارزانى له كۆنفرانسى ئاساييشى ميونشن تهواو بوو
- سه‌رۆك نێچيرڤان بارزانى: عێراق و ههرێمى كوردستان، پێويستييان به يهكێتيى ئهورووپايه