نێچیرڤان بارزانی: كەرتی تایبەت داینەمۆی سەرەكیی پێشكەوتنی وڵاتە
سەرلەبەیانیی ئەمڕۆ 5/6/2015 بەڕێز نێچیرڤان بارزانی سەرۆك وەزیرانی هەرێمی كوردستان بە ئامادەبوونی بەڕێز پارێزگاری دهۆك، هۆتێلی پێنج ئەستێرەی ڕیكسۆسی له دهۆك كردەوە كە لە لایەن كۆمپانیای یووبی هۆڵدینگی كەرتی تایبەتەوە دروست كراوە. دوای ڕێوڕەسمی كردنەوە، سەرۆك وەزیران بەش و پێكهاتەكانی هۆتێله‌كه‌ی بەسەر كردەوە كە بە شێوەیەكی مۆدێرن و بە كوالیتییەكی بەرز دروست كراوە.
دواتر بەڕێز سەرۆك وەزیرانی هەریمی كوردستان لە وتەیەكدا وێڕای دەستخۆشی لە خاوەنی پڕۆژەكە و كۆمپانیای جێبەجێكار، كردنەوەی ئەو هۆتێلەی بە هۆكارێكی دیكەی خزمەگەیاندن بە پارێزگای دهۆك ناوبرد. هه‌روه‌ها ڕەوشی ساڵانی نەوەدەكانی گێڕایەوە كە لە دهۆك سەرەڕای زەحمەتی زۆر، هەوڵیان دا كەرتی تایبەت هان بدەن بۆ ئەنجامدانی كۆمەڵێك پڕۆژەی وەبەرهێنان و گوتی: لەو سەردەمەدا بە هۆی هەڕەشەی ئەمنی و ئابڵۆقەی ئابووریی حكوومەتی ئەوكاتی عێراقەوە، لەو باوەڕەدا نەبوون كە ئەو پڕۆژانە لە پارێزگاكە و ناوچەكانی دیكەی كوردستان بە شێوەیەكی گشتی بەردەوام بن و سەركەوتن بە دەست بهێنن، بەڵام ئەو دۆخە دوای ساڵی 2003، و ڕووخانی ڕژێمی عێراق گۆڕانكاری بەسەردا هات و بڕوامان وابوو كە كەرتی تایبەت دەتوانێ ڕۆڵێكی گرنگ لە ئاوەدانكردنەوەی وڵاتدا بگێڕێت.
به‌ڕێز سه‌رۆك وەزیران كەرتی تایبەتی بە داینەمۆی سەرەكیی پێشكەوتنی وڵات لە ڕووی ئابووری و بازرگانییەوە له قه‌ڵه‌م دا كە بە هۆی بەشداریی جددیی ئەو كەرتەوە، وڵات پێشكەوتنی بەرچاو بە خۆیەوە دەبینێت. دروستكردنی ئەو هۆتێلەشی به نموونەیەكی كار و بۆ زەحمەتی زۆری كەرتی تایبەت لە پارێزگای دهۆك گەڕاندەوە كە دەروازەیەك بۆ كار لەو پارێزگایە دەكاتەوە. لەو ڕووەوە بە پێویستی زانی ئەگەر كەرتی تایبەت هاوكاریان بێت، ئەوا حكوومەتیش ئاسانكاری و هاوكارییان دەكات، ئەوەش بەرەوپێچشوونی زیاتری وڵاتی لێدەكەوێتەوە.
بەڕێز نێچیرڤان بارزانی لە وتەكەیدا ئاماژەی بە كەرتی تایبەت كرد كە لە دوای دەرچوونی یاسای وەبەرهێنان لە ساڵی 2004ەوە ڕۆڵی سەرەكیی خۆی بینیوە و خۆشحاڵیی خۆیشی نیشان دا بەوەی كە لە ئێستادا كەرتی تایبەت لە جیاتی پڕۆژەكانی نیشتەجێبوون، گرنگییەكی زیاتر بە بوارەكانی دیكەی وەك كشتوكاڵی و پیشەیی دەدات، دروستكرنی كارگەكانیشی بە هۆكارێكی باش وەسف كرد بۆ ڕەخساندنی هەلی كار بۆ هاووڵاتییان و وەك پڕۆژەیەكی گرنگیش، قازانجی ماددیی وەربەهێنەران لە ناوخۆی كوردستان ناچێتە دەرەوە.
سەرۆك وەزیران لێدوانێكی ساڵی 1998ی خۆی لە ڕێوڕەسمی كردنەوەی ئەوكاتی فرۆشگای مازی لە دهۆك وەبیر ئامادەبووان هێنایەوە كە تیایدا گوتبووی بڕیارمان داوە لەم وڵاتەدا بمێنینەوە و دەبێ ئاوەدانی بكەینەوە، چونكە ئێمە هیچمان لە وڵاتانی دیكەی دەوروبەرمان كەمتر نییە. لەو ڕووەوە حكوومەت ئاسانكاری بۆ كەرتی تایبەت دەكات و ئەوانیش پێویستە ڕۆڵی زیاتر لە ئاوەدانكردنەوەی كوردستاندا بگێڕن. هه‌روه‌ها ڕۆڵی بەڵێندەران و بازرگانانی كوردستانی بۆ هاوكاریی پێشمه‌رگه له شەڕی دژی چەكدارانی داعشدا بەرز نرخاند و ڕایگه‌یان فەرماندەكانی هێزی پێشمەرگە له پارێزگای دهۆك، سوپاسی ئه‌وانیان كردووه كه ئیمكانیاتی خۆیان خه‌رج كردووە و هاوكاریی پێشمەرگە و ئاوارەكانیان كردووە.
به‌ڕێز سەرۆك وەزیران هه‌روه‌ها باسی لەوە كرد كە لە كاتی ڕووبەڕووبوونی وڵات لەگەڵ كێشەیەك، پێویستە هەموو تاكێكی گەل هەست بە بەرپرسیارێتی بكات و ئەوەش جێگەی دڵخۆشییە كە ئێستا بە بەڵێندەر و پێشمەرگە و پۆلیس و سەرجەم تاكەكانی كوردستانەوە، لەگەڵ حكوومەت ئەو بەرپرسیارێتییەیان لەسەر شان هەڵگرتووە.
سەبارەت بە دۆخی دارایی و ئابووریش، به‌ڕێز نێچیرڤان بارزانی گوتی زۆر نزیكین لە چارەسەری كێشەكان. هه‌روه‌ها دووپاتی كرده‌وه كه هه‌رێمی كوردستان خوازیاری گەیشتنه بە چارەسەری و ڕوونی كرده‌وه كه ئەوەی بۆ هەرێمی كوردستان گرنگە، گەیشتنە بە ڕێككەوتن لەسەر بودجە.
ڕاشیگەیاند هه‌رێمی كوردستان ئه‌وله‌وییه‌تی ئه‌وه‌یه كێشه‌كانی له‌گه‌ڵ به‌غدا چاره‌سه‌ر بكات و گوتی ئێمە دەمانەوێ كێشەی دارایی و بودجە لەگەڵ بەغدا چارەسەر بكەین، بەڵام لە كاتی سووربوونی بەغدا له‌سه‌ر چارەسەرنەكردنی ئەو بابەتە، ئەوا ئێمە ناچار دەبین هەندێ ڕێگەی دیكە بگرینەبەر. بەغدا غه‌در لە هەرێمی كوردستان ده‌كات، گه‌ڕان به دوای چاره‌سه‌ری دیكه‌دا به هیچ شێوه‌یه‌ك پرسێكی سیاسی نییە و سیاسەتی ئێمە هاوكاریكردنی سەرۆك وەزیران عەببادییە و سیاسەتی پێشتریشمان هەروا بووە، ئه‌م پرسه به ته‌واوی پرسێكی ئابوورییه و ئەگەر لە ڕووی ئابوورییەوە تێگەیشتنێكی باش بۆ كێشەكانی هەرێمی كوردستان نەبێت، ئەوا ناچارین به دوای چاره‌سه‌ری دیكه‌دا بگه‌ڕێین.
ئه‌نجومه‌نى وه‌زیران ته‌قینه‌وه‌كه‌ى دیاربه‌كر ئیدانه ده‌كات
به توندى ئیدانه‌ى ئه‌و ته‌قینه‌وه‌یه ده‌كه‌ین كه دوێنێ ئێواره گربوونه‌وه‌یه‌كى جه‌ماوه‌ریى HDPى له چوارچێوه‌ى هه‌ڵمه‌ته‌كانى بانگه‌شه‌ى هه‌ڵبژاردندا له شارى دیاربه‌كر كرده ئامانج و تیایدا چه‌ند هاووڵاتییه‌ك گیانیان له ده‌ست دا و به ده‌یانى دیكه‌ش بریندار بوون. وێڕاى پرسه و سه‌ره‌خۆشى و هاوخه‌میمان له‌گه‌ڵ خانه‌واده و كه‌سوكارى قوربانیان، هیواى زووچاكبوونه‌ش بۆ برینداران ده‌خوازین.
هیوادارین هه‌موو لایه‌نه‌كان دان به خۆیاندا بگرن، ڕێكاره یاساییه‌كان بگه‌نه ئه‌نجام و ئه‌م كاره ترسنۆكه نه‌بێته هۆى كاردانه‌وه‌ى نابه‌رپرسانه و له دوایین ڕۆژانى بانگه‌شه‌ى هه‌ڵبژارندا، كه‌شى گشتى و به‌ڕێوه‌چوونى پرۆسه‌ى ده‌نگدان نه‌شێوێنێت.
ئه‌نجومه‌نى وه‌زیرانى هه‌رێمى كوردستان
6-6-2015
نۆیەمین فیستیڤاڵی فیلمی کوردی و پێشبڕکێی "یەڵماز گۆننەی" لە لەندەن بەڕێوەدەچێت
مەنسوور جیهانی ـنۆیەمین خولی فیستیڤاڵی فیلمی کوردی لەندەن و پێنجەمین خولی پێشبڕکێی "یەڵماز گۆننەی بۆ کورتە فیلم" لە شاری لەندەن لە بەریتانیا بەڕێوەدەچێت.
نۆیەمین خولی فیستیڤاڵی فیلمی کوردی لەندەن و پێنجەمین خولی پێشبڕکێی "یەڵماز گۆنەی بۆ کورتە فیلم" بە بەشداری فیلمە کوردییەکان کە بەرھەمی سینەماکارانی کورد و بیانین، لە سێ بەشی فیلمی بڵندی سینەمایی، فیلمی دیکۆمێنتی (بەڵگەنامەیی)، ئەنیمەیشن و کورتە فیلم، بە ناوەرۆکی چیرۆکی و دیکۆمێنتی لە رۆژانی ١٣ تا ٢٢ی تەشرینی دووەم/ نۆڤەمبەر ٢٠١٥ لە سینەمای "پیکچەرھاوس"Picture House لە ناوچەی ھەکنێیHackney لە شاری لەندەن لە وڵاتی بەریتانیا بەڕێوەدەچێت و رۆژی ١/٦/٢٠١٥ دوایین مۆڵەتە بۆ ناردنی بەرھەمە سینەماییەکان بۆ بەشداری لەم فیستیڤاڵە.
پێشبڕکێی "یەڵماز گۆننەی بۆ کورتە فیلم" لە لایەن فیستیڤاڵی فیلمی کوردی لە لەندەنەوە، بۆ بەبیرداھێنانەوەی یادی دەرھێنەری گەورەی کورد "یەڵماز گۆننەی" سازدراوە.
بانگەوازی نۆیەمین خولی فیستیڤاڵی فیلمی کوردی لەندەن و پێنجەمین خولی پێشبڕکێی "یەڵماز گۆننەی بۆ کورتە فیلم" لە لایەن بەرپرسانی ئەم فیستیڤاڵە بڵاوکراوەتەوە و ھونەرمەندان و ھۆگران بۆ بەشداریکردن لەم فیستیڤاڵە بۆ وەرگرتنی زانیاری زیاتر بە زمانەکانی کوردی (سۆرانی و کرمانجی) و ئینگلیزی و پڕکردنەوەی فۆرمی ناردنی فیلمەکانیان، دەتوانن پەیوەندیی بە نوێنەرەکانی فیستیڤاڵ لە وڵاتانی جۆراوجۆر بکەن و ھەروەھا بۆ زانیاری زیاتر سەردانی ماڵپەڕی تایبەتی فیستیڤاڵەکە بە ناونیشانیwww.lkff.co.uk بکەن.
بەرپرسانی نۆیەمین خولی فیستیڤاڵی فیلمی کوردی لەندەن و پێنجەمین خولی پێشبڕکێی یەڵماز گۆننەی بۆ کورتە فیلم" داوا لە ھەموو دەرھێنەرە کوردەکان و ھەروەھا بە گشتیی دەرھێنەرەکانی سەرتاسەری دنیا دەکەن کە ئەو فیلمانەیان وا پەیوەندی بە کوردەوە ھەیە و ناوەرۆکەکەیان سەبارەت بە کورد و کوردستانە، لە سێ بەشی فیلمی بڵندی سینەمایی، فیلمی دیکۆمێنتی و ئەنیمەیشن و کورتە فیلم، لە جۆری درامی و دیکۆمێنتی و بە ژێرنووسی ئینگلیزی بۆ ھەڵبژاردنی ئیحتمالی لە بەرنامەی فیستیڤاڵدا و ھەروەھا بەشی پێشبڕکێی
کورتە فیلم تا رۆژی ١ حوزەیران / جوون (یۆنیۆ) ٢٠١٥ بە زووترین کات بۆ نووسینگەی فیستیڤاڵ لە شاری لەندەن یا بۆ نوێنەرەکانی فیستیڤاڵ لە وڵاتانی جۆراجۆر رەوانە بکەن.
سینەماکارانی کوردستانیئێرانیش بۆ ناردنی بەرھەمەکانیان دەتوانن پەیوەندیی بکەن بە کۆمپانیای سینەمایی "ستاک فیلم" لە شاری سنە بە بەرپرسیارییەتی "سەتار چەمەنی گوڵ" بە ناونیشانی: تەلەفۆن: 00989188709237 ئیمەیل: ئەم ئیمەیڵە پارێزراوە لە سپام, پێویستە جاڤا سکریپت چالاک بکەیت بۆ بینینی. و ھەروەھا خاتوو "ڤیدا ساڵحی" بە ناونیشانی تەلەفۆن: 00989188774755
ڤیستیڤاڵی فیلمی کوردی لەندەن لە سەرەتاوە یەکەم ڤیستیڤاڵە لەم شیوەیە، بەرەبەرە بووە بە گەورەترین پێشانگای فیلمی کوردیی لە دەرەوەی کوردستان. لەکاتێکدا کە بوونی کەلتوور و ھونەریی کورد و رۆژھەڵاتی ناوەڕاست لەژێردەستی ناحەزدایە ڤیستیڤاڵی فیلمی کوردی لە لەندەن لە ھەولداندایە بۆ ناساندنی فیلم، ھونەر، مۆسیقا و خواردنی کوردیی.
ئەمساڵ ڤیستیڤاڵەکە دەوڵەمەندترە بە ھاتنی کۆمەڵیک لە دەرھێنەرانی فیلم کە بەشدارن لە ڤۆرک شۆپ، سیمینار و کۆر، بۆ دەرھینانی ڤیستیڤالەکە لە ناو سینەما بۆ ناو کۆمەڵگا، وەک پیشاندانی چۆنییەتی دروست کردنی فیلم، گفتووگۆ و نزیک کردنەوەی کەسایەتییەکانی ناو فیلم بو ناو کۆمەلگا.
بە بونەی ئەم رووداوانەی کە بەسەر کوردستان و رۆژھەڵاتی ناوەڕاستدا ھاتووە ئەمساڵ ڤیستیڤاڵی فیلمی کوردی لە لەندەن تەرکیزی تایبەتی دەخاتە سەر ئەم بەرگرییە بێی وێنەی کوردیی رۆژئاوا و باشوور بەرامبەر بە داعش و ئەو بارودۆخە نەخوازراوەی کە بە سەریاندا ھاتووە.
ریوڕەسمی کردنەوەی ڤیستیڤالەکە بە مۆسقا و ھەڵپەرکێی و خواردنی کوردیی دەست پێی دەکات و بۆ حەوت رۆژ لە "ھەکنێی پیکچەرھاوس"Hackney Picture Houseبەردەوام دەبیت. و بە پیشاندانی فیلم و دابەشکردنی خەڵات بە سەر بەشداران کۆتایی دیت. لە پاشانیش لە شوێنێکی دیکە بۆ ماوەی ٢ رۆژ بەردەوام دەبێت.
بۆ پشگیریی و ھاوکاریی یان بە خۆبەخش بەشداربن لە ڤیستیڤاڵەکە بەم ناونیشانە پەیوەندیی بکەن بە: ئەم ئیمەیڵە پارێزراوە لە سپام, پێویستە جاڤا سکریپت چالاک بکەیت بۆ بینینی. ژمارەی میدیا: ٠٧٥٠٦٧٠٢٦٩٧
فیستیڤاڵی فیلمی کوردی لەندەن یەکێکە لە گەورەترین فیستیڤاڵەکانی فیلمی کوردی لە سەرتاسەری دنیا و ھەر دوو ساڵ جارێک بە نمایش کردنی بەرھەمی فیلمی بڵند، کورتە فیلم و فیلمی دیکۆمێنتی لە جۆری دیکۆمێنتی و درامی بە ناوەرۆکی کوردستان و کوردەکان
بەرھەمی سینەماکارانی کورد و بیانی لە شاری لەندەن لە بەریتانیا بەڕێوەدەچێت.
هاوخەمى سەرۆکى هەرێمى کوردستان گەیەنرایە جێگرى سەرۆکى ئەمەریکا
بەمەبەستى گەیاندنى پرسەنامەو هاوخەمى بەڕێز مسعود بارزانى سەرۆکى هەرێمى کوردستان و سەرۆکایەتى حکومەتى هەرێم بەبۆنەى کۆچى دوایى بو بایدن کوڕى بەڕێز جۆ بایدنى جێگرى سەرۆکى ئەمەریکا، دواى نێوەڕۆى ئەمڕۆ بەڕێزان د. فوئاد حوسێن سەرۆکى دیوانى سەرۆکایەتى هەرێم و فەلاح مستەفا بەرپرسى پەیوەندیەکانى دەرەوەى حکومەت بە نوێنەرایەتى سەرۆکى هەرێمى کوردستان و سەرۆکایەتى حکومەتى هەرێم سەردانى کونسوڵگەرى گشتى ئەمەریکایان لە هەولێر کرد و لەلایەن جۆزێف پێننیگتۆن کونسوڵى گشتى ئەمەریکا و بەرپرسانى کونسوڵگەرى پێشوازیان لێکرا.
سەرۆکى دیوانى سەرۆکایەتى هەرێم بەناوى جەنابى سەرۆکى هەرێم ویڕاى نیشاندانى هاوخەمى و سەرەخۆشى کردن لە جۆ بایدن و گەل و حکومەتى ئەمەریکا، ستایشى رۆلى بەرێز جۆ بایدن جێگرى سەرۆکى ویلایەتە یەکگرتووەکانى ئەمەریکاى کرد کە هەمیشە پشتگیرى لە ئەزموونى هەرێم و گەلى کوردستان کردووەو چەندین جار سەردانى هەرێمى کوردستانى کردووەو پشتگیرى وڵاتەکەى بۆ هەرێمى کوردستان دووپاتکردۆتەوە.
لە بەرامبەردا جۆزێف پێننیگتۆن کونسوڵى گشتى ئەمەریکا سوپاس و پێزانینى خۆى بۆ هاوخەمى و هاوسۆزى و ئەو سەردانەى بەرپرسانى هەرێم نیشانداو دڵنیاى کردن کە پەیامەکە دەگەیەننە واشنتن، بەڕێزیان جەختى لەسەر پەیوەندى پتەوو دۆستایەتى نزیکى هەردوولا کردەوە.
پەیامی نێچیرڤان بارزانی بۆ یەكێتیی نیشتمانیی كوردستان
بەبۆنەی 40ـه‌مین ساڵیادی دامەزراندنی یەكێتیی نیشتمانیی كوردستانه‌وه، بەڕێز نێچیرڤان بارزانی سەرۆك وه‌زیرانى هه‌رێمى كوردستان، پەیامێكی پیرۆزبایی ئاراستەی بەڕێز جەلال تاڵەبانی، سكرتێری گشتیی یەكێتیی نیشتمانیی كوردستان كرد، ئه‌مه دەقەكەیەتی:
بەڕێز جەنابی مام جەلال
سكرتێری گشتیی یەكێتیی نیشتمانیی كوردستان
بەبۆنەی تێپەڕبوونی 40 ساڵ بەسەر دامەزراندنی یەكێتیی نیشتمانیی كوردستاندا، پیرۆزبایی لە ئێوەی بەڕێز و خۆشەویست و مەكتەبی سیاسی و هەموو ئەندامان و جەماوەری یەكێتیی نیشتمانیی كوردستان دەكەم. هیوادارم یەكێتیی نیشتمانیی كوردستان و هەموو هێزە كوردستانییەكان بتوانن گەلی كوردستان بگەیه‌ننە ئەو ئامانجە باڵایانه‌ى كە لەپێناویاندا دامەزراون.
یەكێتیی نیشتمانیی كوردستان وەك پێویستییەكی خەبات دامەزرێندرا و لە دوای سەركەوتنی ڕاپەڕینیشەوە لەگەڵ پارتی دیموكراتی كوردستاندا، بووەتە خاوەنی گەورەترین شانازی لە مێژووی هاوچەرخی گەلی كوردستاندا، كە ئەویش دەستكردن بوو بە ئەزموونێكی دیموكراتیانە و هەڵبژاردنی پەرلەمان و دروستكردنی حكوومەتی هەرێمی كوردستان بوو.
یەكێتیی نیشتمانیی كوردستان لە هەموو كارەكانی حكوومەتی هەرێمی كوردستاندا هاوبەشی سەرەكی و بنچینەییە. لەگەڵ پارتی دیموكراتی كوردستان و پارتە بەشدارەكانی دیكەدا، خاوەنی شانازییەكانی پاراستنی دەستكەوتەكان و دووبارە ئاوەدانكردنەوەی كوردستان و دروستكردنی ژێرخانی ئابووریی كوردستانە كە ئەمڕۆ بەوهۆیەوە گەلی كوردستان توانیویەتی لە ناخۆشترین دۆخی بڕینی بودجەی هەرێمی كوردستان و ڕووبەڕووبوونەوەی مەترسیدارترین ڕێكخراوی چەكداریی تیرۆریستیدا لە جیهان، خۆڕاگری بنوێنێت.
هه‌موو پێشمەرگەكانى كوردستان لە چوارچێوەی وەزارەتی پێشمەرگە و هێزی پێشمەرگەی كوردستاندا، هەست و خوێنیان تێكەڵی یەكتر بووە بۆ پاراستنی كوردستان، ئەوەش دەبێ ئەمڕۆ زیاتر هاوپەیمانی و یەكدەستیی نێوان هێزە كوردستانییەكان لە بواری سیاسیدا زیاتر بكات.
بە خوێندنەوەی بارودۆخی ناوچەكە و هاوكێشە سیاسییە تازەكان، ئەمڕۆ پێكەوەكاركردنی هێزە سیاسییەكانی كوردستان لە هەموو كات پێویستترە بۆ ئەوەی گەلی كوردستان لەو دووڕیانانەی هاتوونەتە بەردەمی، بتوانێ ڕێگە ڕاستەكان هەڵبژێرێت و ئەو دەرفەتانەی بۆ گەلی كوردستان هاتوونەتە پێشەوە، لەدەستیان نەدات. لە هەمان كاتدا بتوانێت بەسەر هەموو ئەو مەترسیانەدا سەربكەوێت كە ئێستا ڕووبەڕووی كوردستان و خەڵكەكەی بوونەتەوە و بەرەو سەركەوتن وەریانچەرخێنێت.
لە دوای ڕاپەڕینەوە ئەزموونی بەو شێوەیەمان هەبوون، ئێستاش هەر بە هاوكاری و هاوپەیمانیەتیی هێزە كوردستانییەكان، دەتوانرێت ئەوە بكرێت. بێگومان یەكێتیی نیشتمانیی كوردستان لەو بوارەدا خاوەن پێگە و هێزێكی سەرەكییە وهەموومان لەو بڕوایەداین كە لەم قۆناغەشدا یەكێتیی نیشتمانیی كوردستان، لە دیاریكردنی هەنگاوە نیشتمانییە هاوبەشەكاندا لەگەڵ هێزە كوردستانییەكان لە هەرێمی كوردستان، وەك پێكهێنەر و هاوبەش و بەڕێوەبەرێكی سەرەكیی حكوومەتی هەرێمی كوردستان، ڕۆڵی خۆی دەگێڕێت.
هه‌روه‌ها بێگومانین كە هاوپەیمانی و هاوكاریی نێوان هێزە سیاسییەكانی كوردستان، گەلی كوردستان بەرەو ئایندەیەكی سیاسیی گەشتر و خزمەتگوزاریی زۆرتر و خۆشگوزەرانییەكی باش دەبات. بۆیەش ئەو هاوپەیمانییە زۆر پێویستە بۆ خزمەتكردنی گەلی كوردستان و پشتیوانیكردنی حكوومەتی هەرێمی كوردستان.
جارێكی دیكە پیرۆزبایی لە ئێوەی بەڕێز و سەركردایەتی و هەموو جەماوەری یەكێتیی نیشتمانیی كوردستان دەكەین.
نێچیرڤان بارزانی
سەرۆك وه‌زیرانى هەرێمی كوردستان
31/5/2015
نێچیرڤان بارزانی داوا دەكات ئەمەریكا لە هاوكارییەكانی بۆ هەرێمی كوردستان بەردەوام بێت
ئەمڕۆ بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز ستیوارت جۆنز باڵیۆزی ئەمەریكا لە عێراق و شاندێكی یاوەری كرد.
لە دیدارێكدا بەڕێز جۆنز باسی دوا سەردانی بەڕێز مەسعوود بارزانی سەرۆكی هەرێمی كوردستان و شاندی یاوەری بۆ ئەمەریكا كرد و كۆبوونەوە و دیدار و گفتوگۆكانی سەردانەكەی بەرز نرخاند. ئینجا دوا پێشهاتەكانی ڕەوشی سیاسی لە بەغدا و ئۆپەراسیۆنە سەربازییەكان و هاوكاریی ئەمەریكا بۆ عێراق بە گشتی و بە تایبەتی بۆ هەرێمی كوردستانی خستە ڕوو و دووپاتی كردەوە كە وڵاتەكەی لە هاوكاریكردنی هێزی پێشمەرگە بەردەوام دەبێت هەروەك لە سەردانی سەرۆكی هەرێمی كوردستان بۆ ئەمەریكا، ئەو بابەتە گفتوگۆی لەسەر كرا و دووپات كرایەوە.
لە بەشێكی دیكەی قسەكانیدا باسی لە پەیوەندییەكانی نێوان هەولێر و بەغدا و ئەو كێشانەی لە بودجە و مووچەی فەرمانبەراندا دروست بوون كرد و پشتگیریی خۆی بۆ یاسای بودجە و ڕێككەوتنی نێوان هەرێمی كوردستان و بەغدا دووپات كردەوە. هەروەك ئاماژەی بە بارودۆخی ناوچەكە بە گشتی و هەڵسانگاندنی ڕووداوەكان و بەشداریكردنی لایەنەكانی سوننە لە پرۆسەی سیاسیی عێراق و ئازادكردنی ناوچە سوننییەكانی لەژێر دەستی داعش كرد.
لای خۆیەوە بەڕێز نێچیرڤان بارزانی سوپاسی ئەو سەردانەی باڵیۆزی ئەمەریكا لە عێراق و تێبینی و هەڵسەنگاندنەكانی كرد بۆ سەردانە سەركەوتووەكەی بەڕێز سەرۆكی هەرێمی كوردستان و شاندی یاوەری بۆ واشنتۆن و لەمبارەیەشەوە سوپاسی باڵیۆزخانەی ئەمەریكای كرد كە توانیان پرۆگرامێكی ڕێكوپێك بۆ ئەو سەردانە ئامادە بكەن.
لەبارەی هاوكاریی سەربازی بۆ هێزی پێشمەرگە و هاوكاریی حكوومەتی هەرێم بۆ بەهاناوەچوونی ئەو ژمارە زۆرەی ئاوارە و پەنابەران كە ڕوویان لە هەرێم كردووە، بەڕێز نێچیرڤان بارزانی هیوای خواست ئەمەریكا ئەم پرسانە بە هەند وەربگرێت و لە هاوكارییەكانی بەردەوام بێت.
سەبارەت بە پەیوەندییەكانی نێوان هەولێر و بەغدا و بە تایبەتی ڕێككەوتنی نێوان هەردوولا، بەڕێز سەرۆك وەزیران هەڵوێستی حكوومەتی هەرێمی كوردستانی دووپات كردەوە كە هەر لە سەرەتاوە هەرێم پابەندی ڕێككەوتنەكە بووە و ئەو ئەركانەی جێبەجێ كردووە كە كەوتوونەتە سەر شانی و چاوەڕێی ئەوەن لە ڕۆژانی داهاتوو بە ناردنی شایستە داراییەكانی هەرێمی كوردستان بە تەواوی، ئەوەی لەسەر شانییەتی لە ڕێككەوتنەكە جێبەجێی بكات.
نێچیرڤان بارزانی: دەبێت لە ڕووی پەروەردەیی و كلتووریشەوە شەڕی داعش بكرێت
ئەمڕۆ بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز مەتران مار ئەبرام موكن مەترانی ئەبرەشیەی هندستان و بریكاری باتریاركی گشتیی كەنیسەی ڕۆژهەڵاتی ئاشووری لە جیهان و شاندێكی یاوەری كرد كە لە ژمارەیەك مەترانی كەنیسەی ڕۆژهەڵاتی ئاشووری لە جیهان پێكهاتبوون.
لە دیدارێكدا شاندی میوان خۆشحاڵی خۆیان بە سەردانی هەرێمی كوردستان دەربڕی كە بۆ ئەنجامدانی هەڵبژاردنی پارتریاكی تازەی كەنیسەی ڕۆژهەڵاتی ئاشووریە لە جیهان و هەر بۆ ئەم مەبەستە لە ڕۆژانی داهاتوودا پارتریاكی تازەی كەنیسەكە لە هەولێر هەڵدەبژێردرن.
لە كۆبوونەوەكەدا هەروەها باس لە ڕەوشی ناوچەكە بە گشتی و شەڕی دژی تیرۆریستانی داعش لە سووریا و عێراق بە تایبەتی كرا و لەمبارەیەوە شاندی میوان سوپاس و پێزانینی خۆیان و هەوادارانی كەنیسەی ڕۆژهەڵاتی ئاشووریی بۆ هەرێمی كوردستان دەربڕی و ڕۆڵی پێشمەرگەی كوردستانیان بەرز نرخاند كە بەرگری لە خاك و خەڵك و پێكهاتەكانی كوردستان و ناوچەكە بە گشتی دەكات.
شاندەكە هەروەها ڕێز و پێزانینی خۆیان بۆ حكوومەت و خەڵكی كوردستان نیشان دا كە بە بێ جیاوازیی ئایینی و نەتەوەیی دەرگاكانی هەرێمی كوردستانیان بۆ ئاوارە و پەنابەرانی دەستی تیرۆر كردووەتەوە بە تایبەتیش ئاوارە و پەنابەرانی مەسیحی لە ناویشیاندا هەواداران و پەیڕەوانی كەنیسەی ڕۆژهەڵاتی ئاشووری كە لە سووریا و ناوچەكانی دیكەی عێراقەوە پەنابەر و ئاوارەی هەرێمی كوردستان بوونە.
شاندی میوان هەروەها سوپاس و پێزانینی خۆیان بۆ پشتگیریی حكوومەتی هەرێمی كوردستان لە بنیاتنانی كەنیسەیەك بۆ پەیڕەوانی كەنیسەی ڕۆژهەڵاتی ئاشووری لە هەولێر دەربڕی. هەروەك ڕۆڵ و مامەڵەی بەڕێز وەزیر و وەزارەتی ئەوقافی حكوومەتی هەرێمی كوردستانیان لەگەڵ پێكهاتە ئاینییەكانی هەرێمی كوردستان بەرز نرخاند.
لای خۆیەوە بەڕێز نێچیرڤان بارزانی سەرۆك وەزیرانی هەرێمی كوردستان وێڕای خۆشحاڵی و بەخێرهێنانی شاندەكە، دووپاتی كردەوە كە حكوومەت و خەڵكی هەرێمی كوردستان بە چاوی ڕێزەوە لە هەموو پێكهاتە نەتەوەیی و ئاینییەكان دەڕوانن و وێڕای ئەو بارە قورسەی كە لەسەر شانی حكوومەتی هەرێمی كوردستانە، بە هەموو توانایەكیەوە هاوكاریی ئاوارە و پەنابەران دەكات و پشتگیریی حكوومەتی هەرێمیشی بۆ بنیاتنانی كەنیسەیەك بۆ پەیڕەوانی كەنیسەی ڕۆژهەڵاتی ئاشووری لە كوردستان دووپات كردەوە و هەموو ئاسانكارییەكی لایەنە پەیوەندیدارەكانی حكوومەتی بۆ جێبەجێكردنی ئەو پڕۆژەیە دەربڕی.
لە بەشێكی دیكەی قسەكانیدا بەڕێز نێچیرڤان بارزانی باسی لە ڕووبەڕووبوونەوەی پێشمەرگەی كوردستان دژی تیرۆریستانی داعش كرد و دووپاتی كردەوە كە پێشمەرگە ئەمڕۆ لە هەرێمی كوردستان بەرگری لە تەواوی مرۆڤایەتی و ئازادی و خاك و خەڵكی ناوچەكە دەكات و جەختی لەوەش كردەوە كە شەڕی دژی تیرۆر تەحەدییەكی گەورەیە و ئاسان نییە، بۆیە بە تەنیا بە شێوازی سەربازی سەركەوتوو نابێ، بەڵكو دەبێت لە ڕووی پەروەردەیی و كلتووریشەوە شەڕی تیرۆر بكرێت و دەبێت نەوەی تازە لە ڕووی پەروەردەییەوە بە بیری یەكتر قبووڵكردن و ڕێزگرتن لە یەكتری و بیروباوەڕی بەرامبەر، پەروەردە بكرێن.
نێچیرڤان بارزانی یاریگای نێودەوڵەتیی زاخۆی كردەوە
ئێوارەی ئەمڕۆ چوارشەممە 3/6/2015 لە شاری زاخۆ بە ئامادەبوونی بەڕێز نێچیرڤان بارزانی سەرۆك وەزیرانی هەرێمی كوردستان و بەڕێزان عەبدولحسێن عەبتان وەزیری وەرزش و لاوانی عێراق و وەزیری رۆشنبیری هەرێمی كوردستان و سەرۆكی یەكێتی ئۆڵۆمپی عێراق و پارێزگاری دهۆك و بەرپرسانی حكوومی و حزبی لە ناوچەكە و جەماوەرێكی زۆر، لە ڕێوڕەسمێكدا یاریگای نێودەوڵەتیی تۆپی پێ لە زاخۆ كرایەوە.
لە ڕێوڕەسمی كردنەوەی یاریگای نێودەوڵەتیی زاخۆدا كە لەسەر ئاستی هەرێمی كوردستان و عێراق یارگایەكی هەرە مۆدێرن و جوانە، سەرەتا هەریەك لە بەڕێزان سەرۆكی یەكێتی ئۆڵۆمپی عێراق و وەزیری وەرزش و لاوانی عێراق و سەرۆكی یانەی زاخۆ و پارێزگاری دهۆك وتەیان پێشكەشكرد و دواتر بەڕێز نێچیرڤان بارزانی سەرۆك وەزیرانی هەرێمی كوردستان وتەیەكی پێشكەشكرد و تیایدا پیرۆزبایی لە خەڵكی كوردستان و عێراق بە شێوەیەكی گشتی و بە تایبەتی خەڵك و وەرزشوانانی زاخۆ كرد و ئاماژەی بەوە كرد كە كردنەوەی یاریگاكە بەشێكە لە سەركەوتنەكانی گەلی كورد كە پەیمانی بەخۆی داوە سەركەوێت و بەردەوام بێت لە پێشكەوتن و هەر بەردەوامیش دەبێت.
هەروەها كردنەوەی ئەو یاریگایەشی بە پاداشتێكی بچووك بۆ خەبات و تێكۆشان و قوربانیدانی گەورەی خەڵكی خۆڕاگری زاخۆ لە قەڵەمدا كە لە هەموو شۆڕش و ڕاپەڕینەكانی كوردستان قوربانی زۆری داوە و ئێستاش بە دەستێك لە بەرامبەر دڕندەترین رێكخراوی تیرۆرستی بەرگری لە خاك و خەڵكی كوردستان دەكەن و قوربانی دەدەن و بە دەستێكی دیكەش لە لایەنی مرۆڤییەوە پێشوازی لە دەیان هەزار ئاوارە دەكەن و هاوكارییان پێشكەش دەكەن، بۆیە زاخۆ و دەڤەرەكانی دیكەی سەر بە پارێزگای دهۆك و بادینان بە شێوەیەكی گشتی شایەنی كار و پرۆژە و خزمەتی باشتر و گەورەترن. هەروەك دەستخۆشی لە پارێزگار و دامودەزگەكانی سنوری پارێزگای دهۆكی كرد بۆ ئەو كارەی كە كردوویانە و سوپاسی كردن.
جەختی كردەوە كە بە كردنەوەی ئەم یاریگایە بۆ دۆست و دوژمنان سەلماندمان خەڵكی كوردستان ئیرادەی خۆی بۆ ژیان و پێشكەوت لەژێر هیچ فشار و زولم و تیرۆر و شەڕ و پیلانگێڕییەك لەدەست نادات و هەروەها نە دروستكردنی بەربەست و نە ئابلوقە و نە بڕینی مووچە و بودجە خواستی گەلی كورد بۆ بەرەو پێشەوەچوون و ئاوەدانی و سەركەوتن لاواز ناكات.
دواتر هاتە سەر باسی سەركەوتنەكانی پێشمەرگە و ئاماژەی بەوە كرد كە پێشمەرگە كارێكی وای كردووە لە هەموو جیهان دەنگی داوەتەوە و سڵاو و ڕێزی بۆ هەموو پێشمەرگەكان لە سەنگەرەكانی بەرگری لە كوردستان هەر لە خانەقین تا شنگال نارد و ئەو بەرگرییەی پێشمەرگەی بەرز و پیرۆز نرخاند.
لە بارەی بە پارێزگا كردنی زاخۆش هەروەك جەماوەری ئامادەبوو بە دەنگی بەرز باسیان دەیانگوتەوە، بەڕێز سەرۆك وەزیرانی هەرێمی كوردستان دووپاتی كردەوە كە پێش ئێستاش ئەو بابەتە باسی لێوە كراوە و مافی بە پارێزگابوونی بە مافی خەڵكی زاخۆ زانی، بەڵام لە هەمان كاتدا ئاماژەی بەوە كرد كە ئەو بابەتە پێویستی بە پشووفراوانی هەیە چونكە تەنیا پەیوەست نییە بە بڕیاری كەسێك، بەڵكو پەیوەندی بە هەرێمی كوردستان و لایەنە سیاسییەكان و حكوومەتی عێراقیشەوە هەیە. ئەوەشی خستە ڕوو كە ئەوەی ئێستا لە توانا دایە بۆ ئەم بابەتە بكرێت ئەوەیە كە لە قۆناغی ئێستادا دەستەڵاتی فەرمانگەكانی زاخۆ زیاتر بكرێت و مەسەلەی بە پارێزگا كردنیش هەر لە بیری حكوومەت دەبێت.
لە كۆتاییدا خۆشحاڵی خۆی بۆ ئەو پۆلە ئافرەتە پێشمەرگانە دەربڕی كە لە ئەكادیمیای سەربازی زاخۆ پەروەردە كراون و لەناو یاریگاكەدا نمایشی جیاوازیان پێشكەشكرد، بە ئاماژەیەكی گرنگی لەقەڵەمدا كە پێویستە هەموو لایەك لە هەوڵ و تێكۆشان بەردەوام بێت بۆ خزمەتكردنی كوردستان و پشتگیریی ئافرەتانیشی بۆ بەرەوامی خەبات بە كارێكی پێویست زانی و پیرۆزبایی لێكردن و هیوای خواست نمونەیان زیاد بێت.
ئەمەش دەقی وتاری بەڕێز نێچیرڤان بارزانی سەرۆك وەزیرانی هەرێمی كوردستانی:
ئاماده‌بوویێت خۆشتڤی،
وه‌رزشڤان و وه‌رزشدۆستێت باژێڕێ عه‌زیرێ زاخۆ،
خه‌لكێ هێژایێ دەڤەرا زاخۆكا ده‌لال،
ئێڤاریا وە باش،
هون هه‌می ب خێر بێت سەرچاڤا...
ئەز گەلەك كەیفخۆشم ئەڤرۆ ل ڤێ ئێڤاریێ بەشدار دبم دگه‌ل هه‌وه بۆ ڤەكرنا یاریگەها زاخۆ ، كو ل سه‌ر ئاستێ هه‌رێما كوردستانێ و عیراقێ، یاریگه‌ها هه‌ری مۆدێرن و هه‌ری جوانه پیرۆز بیت ل شارێ زاخۆ. ڤه‌كرنا ڤێ وەرزشگەهێ ل هه‌می وه‌رزشڤانێت زاخۆ، ل خه‌لكێ دەڤەرا زاخۆیا دەلال و خۆشتڤی ، ل كوردستانێ، ل عێراقێ پیرۆز دكەین.
ئه‌ڤ یاریگه‌هه به‌شه‌كێ دیه ژ چیرۆكا سه‌ركه‌فتنا ملله‌تێ مە، كو ب درێژاهیا دیرۆكێ قوربانیی دا و سۆزا دگه‌ل خۆ دای، كو سه‌ركه‌ڤیت و دێ هه‌ر و هه‌ر پێشكه‌ڤیت.
دەنگا وە بڵندە بۆ پارێزگەهبوونی، ئەڤە بەری نها ژی مە بەحس كریە، ئەڤە حەقەكێ وەیە، خەباتا وە، خۆڕاگرییا وە، خزمەتا وە ل هەر ئاستەكێ ل قوربانیدانێ ل خەباتێ، ل ئابووریا ئەڤ وەلاتەی حەقێ وەیە، بەلێ دڤێت بێهنا وە دگەل ڤێ مژارێ یا فرە بیت، مەسەلێ پەیوەندی ب بڕیارا یەك كەسی ڤە نییە، بەلكو پەیوەندی یا ب هەرێما كوردستانێ و لایەنێت سیاسی و عێراقێ ڤە هەی. ئەو تشتێ ڤێ گاڤێ ئەز دكارم بێژم ئەوە كو ئەم سۆزێ ددەین دەستهڵاتا فەرمانگەهێت زاخۆ ئەم زێدە بكەین بۆ ڤێ قۆناغێ و بێگومان مەسەلا پارێزگەهبوونێ ژی دێ ل بیرا مە بیت.
ئەڤ یاریگەهە ئەڤرۆ ل زاخۆ هاتە ڤەكرن، پاداشته‌كێ بچویكه بۆ خه‌بات و تێكۆشین و قوربانیدانا مه‌زنا خه‌لكێ خۆڕاگرێ زاخۆ، كو د هه‌می شۆڕه‌ش و سه‌رهلدانێت كوردستانێدا، گیان و خوین و شه‌هید دانه و پێشكەشی كوردستانێ و ملله‌تێ كورد كرینه.
قه‌هره‌مانی و مێرخاسی یێت خه‌لكێ زاخۆ ل شۆڕه‌شا ئه‌یلوولا مەزن، ڕۆلێ وان د شۆڕه‌شا گولانێدا ڕۆله‌لێ مه‌زن و به‌رچاڤه، ئه‌ڤرۆ ژی كو كوردستان به‌رامبه‌ری دڕنده‌ترین رێكخستنا تیرۆرێ، به‌ڕه‌ڤانیێ ل كوردستانێ و كوردستانیان و ل هه‌می مرۆڤاهیێ دكه‌ت، دیسا خه‌لكێ زاخۆ و ڤێ ده‌ڤه‌را هێژا، خودانێت سه‌ربلندی و قه‌هرمانییه‌كا مه‌زنن، سه‌ركه‌فتنێت ئه‌ڤرۆ یێت كوردستانێ، ب خوینا گه‌شا ب ده‌هان شه‌هیدێت كوردستانێ ل وان دەڤەران ژی دەڤەرا زاخۆ هاتینە بدەستڤە ئینان.
ژبه‌ر هندێ زاخۆكا ده‌لال، باژێڕێ ژیانێ، هێژایی گه‌له‌ك و گه‌له‌ك خزمەتێن زێدەترە ل تشتێن كو ئەڤرۆ ئەم دبینین. هه‌ر خزمه‌ته‌كا بێتە كرن، هەر پڕۆژەیەكا بێتە بجهئینان بەرسڤەكە ژبۆ ماندیبوونا پێشمەرگە یێت مە یێت قەهرەمان یێت ڤێ دەڤەرێ، بەرسڤەكە بۆ خوینا شەهیدا، بەرسڤەكە بۆ ماندیبوونا دەڤەرا زاخۆ كو هەمیشە پێشەنگ بوونە ل پاراستنێ و بەرخوەدانێ و خەباتێ خوە ماندیكرنێ بۆ وان دەستكەفتێت كو مللەتێ مە خەبات بۆ كری و شەهد بۆ دای و خوین بۆ ڕێشتی.
ئه‌ڤرۆ ژی كو ئه‌م هه‌می پێكڤه ڤێ یاریگه‌هێ ڤه‌دكه‌ین، ئه‌م ب ڕێز و پێزانینه‌كا مه‌زن، گیانێ پیرۆزێ وان هه‌می شه‌هیدا، شه‌هیدێت شۆڕەشا ئه‌یلوولێ، شه‌هیدێت گولانێ، شه‌هیدێت ئه‌نفالا، گرتی و بێسه‌روشوینا، شه‌هیدێت ئه‌ڤرۆ یێت شه‌ڕێ دژه‌تیرۆرێ دئینینه‌ڤ بیرا خۆ، سه‌رێ خۆ ل به‌ر مه‌زناهیا گیانێ وان دچه‌مینین، سلاڤا بۆ گۆڕا وان ئازیزا دهنێرین و سۆزێ نەڤەدكەین كو لسەر ڕێكا وان دێ بەردەوام بین بۆ ئازادیا كوردستانێ.
هه‌ر د ڤێ هه‌لكه‌فتنێدا، تڤیا جامێریا خه‌لكێ زاخۆ و دهۆكێ و به‌هدینا ب گشتی ژبیر نه‌كه‌ین، كو گه‌له‌ك مه‌ردانه ده‌رگه‌هێ دل و مال و گوند و باژێڕ و ده‌ڤه‌را خۆ، بێ جوداهی بۆ خوشك و برایێت خۆ یێت ئاواره و په‌نابه‌رێت ژ هه‌می پێكهاتێت دینی و نه‌ته‌وه‌یی ڤه‌كرن و ب دلگه‌رمی پێشوازی ل وان كر، ب هه‌می ڕه‌نگا هاریكاریا وان كر، د جهێ خۆ دایە ب ناڤێ حكوومەتا هەرێما كوردستانێ سوپاسییەكا گەرم یا خەلكێ دەڤەرا زاخۆ و دهۆك و بادینا ب گشتی بكەین بۆ وێ جامێریا وان كری و دەرگەهێ خۆ ڤەكری ب وان عەزیزێت لێقەومایی ئەوێت كو بەرێ خۆ دایە دەڤەرا وان، سوپاس بۆ وە هەمیان، سوپاس بۆ زاخۆ، سوپاس بۆ دهۆك، سوپاس بۆ هەموو باژێڕێن دەڤەرا بادینا، ئاكرێ بەردەڕەش و ئامێدیێ و هەمی دەڤەران.
ب تایبه‌تی گه‌له‌ك و گه‌له‌ك سپاسیا هه‌می خه‌لكێ ده‌ڤه‌رێ دكه‌ین كو ده‌ستپێكا سالا خاندنێ، گه‌له‌ك ته‌حه‌مول كر و زارۆكێت وان بۆ ده‌مه‌كێ درێژ، ژ خوندنێ پاشكه‌ڤتن، چونكی هه‌می قوتابخانه ببوونه په‌ناگه‌ها خوشك و برایێت ئاواره و په‌نابه‌ر، ئەڤ خۆڕاگریا وە جهێ سوپاس و پێزانینێ یە.
هه‌روه‌سا من دڤێت ب ڤێ هەلكەتنێ سوپاسیا پارێزگەهێ دهۆكێ و دامودەزگەهێت وێ و بڕێڤەبەرێت گشتی ل دهۆكێ بكەین بۆ ئەو كارێ وان كری، بۆ ئەو خزمەتا وان كری د ڤێ هەیامێ دا، دەستخۆشیێ ل وان دكەم.
ئاماده‌بوویێت هێژا،
ژ لایه‌كێ دیڤه، ئه‌ڤرۆ كو ئەم ڤێ یاریگه‌هێ ڤه‌دكه‌ین، ئه‌م جاره‌كا دی بۆ هه‌می دۆستا و بۆ نه‌یارا ژی دسه‌لمینین، كو خه‌لكێ كوردستانێ به‌رامبه‌ر چ زه‌خت و زۆری و، به‌رامبه‌ر چ تیرۆر و شه‌ڕ و پیلانا ژی، ئیراده و خواستا خۆ یا بۆ ژیانێ و پێشكه‌ڤتنێ ژده‌ست ناده‌ت!، چ ئاسته‌نگ و دۆرپێچ و، چ بڕینا بودجه و مووچا، ئیسرارا مه یا بۆ به‌ره‌ڤ پێشڤه‌چوونێ و ئاڤاكرنێ و سه‌ركه‌فتنێ، لاواز ناكه‌ت، بەلكی ئیسرارا مە مكومتر دكەت بۆ سەركەفتن و گەهشتن ب وان ئارمانجا یێت كو شەهیدێت مە خوینا خۆ دای و پێشمەرگێ مە بۆ ماندی بووی و مللەتێ مە خەبات بۆ كری.
ئه‌ڤرۆ خۆراگری یا پێشمه‌رگێت مە، كارەكێ وەسا كریە كو ناڤێ پیرۆزێ پێشمەرگەی ل جیهانێ دەنگ ڤەدایە، لێرە ب ناڤێ وە سڵاڤ و ڕێزێت خۆ بۆ هەر پێشمەرگەیەكی ل خانەقیت تا دگەهیتە بەرۆكێت شەڕی ل شنگالێ دهنێرین و ب ناڤێ وە سڵاڤان بۆ وان دنێرین و دەستخۆشی و پیرۆزباهیێ ل وان دكەین بۆ وێ بەرگری و بەرخوادانا ئەڤرۆ ئەو دكەن بۆ پاراستنا دەستكەفتێت مللەتێ مە، بۆ پاراستنا خوینا شەهیدێت مە، بۆ پاراستنا ماندیبوونا مە، سڵاڤێت مە لێرە بۆ هەر پێشمەرگەیەكی ل شنگال تا خانەقین و كەركووك و هەمی دەڤەرێت كوردستانێ.
ئەڤرۆ ئەز گەلەك كەیفخۆش بووم یا كو من لڤیرە دیتی، كۆمەڵەكا گەنجێت رێكوپێك یێت ئافرەت من دیتن كو ل ئەكادەمیا زاخۆ یا لەشكەری هاتینە پەروەردەكرن، ئەڤە نیشانەیەكێ زۆر جوان و گرنگە كو دڤێت ئەم كارێ خۆ بەردەوام بكەین، بێگومان پشتەڤانیا ئافرەتان بۆ بەردەوامیا خەباتا مە تشتەكێ پێدڤی یە و ئەز پیرۆزباهیێ ل وە دكەم و هیڤیدارم نمونەیا وە زێدەتر ببیت.
جارەكا دی ئەز ڤەكرنا ڤێ یاریگەهێ ل خەڵكێ زاخۆ و كوردستان و هەمی عێراقێ پیرۆز دكەم.
ئێڤاریا وە باش و هون هەمی بخێر بێن و زۆر سوپاس....
نێچیرڤان بارزانی لە ڕەوشی بەرەكانی جەنگ دەكۆڵێتەوە
نیوەڕۆی ئەمڕۆ پێنجشەممە 4/6/2015 لە شاری دهۆك بەڕێز نێچیرڤان بارزانی سەرۆك وەزیرانی هەرێمی كوردستان لەگەڵ ژمارەیەك لە فەرماندە و پلەداران و بەرپرسانی سەربازی پێشمەرگە و پێشمەرگە خۆبەخشەكان لە میحوەر و بەرەكانی جەنگ لە ناوچەكانی ڕووبەڕووبوونەوەی تیرۆر لە سنووری هەردوو پارێزگای دهۆك و مووسڵ كۆبووەوە.
لە كۆبوونەوەكەدا فەرماندەكانی پێشمەرگە بە دوور و درێژی باسیان لە دۆخی ئێستای بەرەكانی جەنگ و ڕووبەڕووبوونەوەی تیرۆر كرد و تیشكیان خستە سەر دوایین پێشهاتە سەربازییەكانی ئەو سنوورە و ڕایانگەیاند كە پێشمەرگە بە ورەیەكی بەرزەوە لە بەرگریدایە بۆ پاراستنی سنوورەكانی ئەو ناوچەیە و بەردەوام پاشەكشێ بە تیرۆرستانی داعش دەكات و گورزی گەورەیان لێدەدات.
هەروەها باسیان لە هاوكاری و هەماهەنگیی هێزەكانی هاوپەیمانیی نێودەوڵەتی دژی داعش لەگەڵ پێشمەرگە كرد كە بە بۆردومانی ئاسمانی لە ڕێگەی فڕۆكە جەنگییەكانەوە بەردەوام ئەو پێگە و بنكانەی داعش بە ئامانج دەگرن كە هەڕەشە لەسەر پێشمەرگە و ناوچەكە دروست دەكەن. لە پێناو باشكردنی بارودۆخی بەرەكانی جەنگیش، چەند داواكارییەكیان بەرەوڕووی بەڕێز سەرۆك وەزیران كردەوە.
لای خۆیەوە بەڕێز نێچیرڤان بارزانی سەرۆك وەزیرانی هەرێمی كوردستان وێڕای دەستخۆشی بۆ پێشمەرگەی كوردستان و پێشمەرگە خۆبەخشەكان كە بەردەوام هێرشەكانی تیرۆر تێكدەشكێنن، هەروەها سەرەخۆشی بۆ خانەوادەی ئەو پێشمەرگە قارەمانانە دووپات كردەوە كە لە شەڕی بەرگریكرن لە كوردستان لە دژی تیرۆریستان گیانیان بەخشیوە و شەهید بوون، ڕێز و پێزانینی خۆی و حكوومەتی هەرێمی كوردستانی بۆ خانەوادەی شەهیدان دەربڕی.
لە بەشێكی دیكەی دیدارەكەدا بەڕێز سەرۆك وەزیران باسێكی تێروتەسەلی لەسەر گرنگیی ڕۆڵی پێشمەرگە قارەمانەكانی كوردستان لە ڕووبەڕووبوونەوەی تیرۆر و پاراستنی بێ جیاوازی ناوچە جیاجیاكانی كوردستان كە ڕووبەڕووی شەڕی تیرۆر بوونەتەوە، پێشكەشكرد و ڕوونی كردەوە كە كۆمەڵگەی نێودەوڵەتی بە چاوی ڕێزەوە لە ڕۆڵی قارەمانانەی پێشمەرگە بۆ پاراستنی ناوچەكە و پێكهاتە ئایینی و نەتەوەییەكان دەڕوانێت. هەروەها دووپاتی كردەوە كە حكوومەتی هەرێمی كوردستان لە هەوڵی بەردەوامدایە بۆئەوەی لە ڕێگەی حكوومەتی عێراق و كۆمەڵگەی نێودەوڵەتی و هاوپەیمانی نێودەوڵەتییەوە تەواوی پێداویستییەكانی پێشمەرگە دابین بكات بۆئەوەی بتوانێت باشتر ڕووبەڕووی تیرۆریستان ببێتەوە و تێكیان بشكێنێت.
بەڕێز سەرۆك وەزیران دووبارە پرسە و سەرەخۆشی لە خانەوادەی پێشمەرگە شەهیدەكان كرد و دەستخۆشی لە چاونەترسی و نەبەردییەكانی پێشمەرگە قارەمانەكان كرد.
نێچیرڤان بارزانی ڕۆڵی دامودەزگاكانی حكوومەت لە دهۆك بەرز دەنرخێنێت
لە بەردەوامی سەردانەكەیدا بۆ پارێزگای دهۆك، نیوەڕۆی ئەمڕۆ پێنجشەممە 4/6/2015 بەڕێز نێچیرڤان بارزانی سەرۆك وەزیرانی هەرێمی كوردستان لەگەڵ بەڕێزان پارێزگار و بەڕێوەبەران و بەرپرسانی یەكە ئیدارییەكان و دامودەزگا حكوومییەكانی سنووری پارێزگای دهۆك كۆبووەوە.
لە كۆبوونەوەكەدا ئامادەبووان باسیان لە كێشە و گرفتەكانی دامودەزگا خزمەتگوزارییەكانی سنووری پارێزگاكەیان كرد و پێداویستییەكانی ئەو سنوورەیان لە هەموو كەرتە خزمەتگوزارییەكانی وەك ئاو، كارەبا، تەندروستی، پەروەردە، شارەوانییەكان، خۆراك و خواردەمەنی، ئاسایش و هێزەكانی ناوخۆ، ڕێگەوبان و تەواوی كەرتەكان خستە ڕوو.
هەروەها تیشكیان خستە سەر ئەو بارقورسییەی كە لەسەر دامودەزگا كارگێڕی و خزمەتگوزارییەكانی پارێزگای دهۆك لە ئەنجامی شەڕی دژی تیرۆر و هاتنی ئەو ژمارە زۆرەی ئاوارە و پەنابەران، دروست بووە.
لە لای خۆیەوە بەڕێز نێچیرڤان بارزانی سەرۆك وەزیرانی هەرێمی كوردستان سوپاس و پێزانینی خۆی و حكوومەتی هەرێمی كوردستانی بۆ ئەو كار و خزمەتگوزارییانە دووپات كردەوە كە دامودەزگا حكوومییەكانی پارێزگای دهۆك پێشكەش بە ئاوارە و پەنابەرانی كردووە و جەختی لەوە كردەوە كە حكوومەتی هەرێمی كوردستان هەموو هەوڵێك دەدات پێداویستییەكانی لایەنە پەیوەندارەكانی سنووری پارێزگاكە دابین بكات بۆ ئەوەی بتوانن خزمەتگوزاریی پێویست پێشكەش بە هاوڵاتیان و ئاوارە و پەنابەران بكەن و دام و دەزگاكانی حكوومەت وەك پێویست كار و ئەركەكانی خۆیان جێبەجێ بكەن.
More...
سەرۆكی هەرێمی كوردستان لەگەڵ سەرۆك كۆمار و سەرۆك وەزیرانی كۆماری چیك كۆبۆوە
سەرۆكی هەرێمی كوردستان لەگەڵ سەرۆك وەزیرانی هەنگاریا و بەرپرسانی ئەو وڵاتە كۆبۆوە
ڕاگه‌یه‌نراوی كۆبوونه‌وه‌ی هاوبه‌شی نوێنه‌رانی كوردستان له به‌غدا و سه‌رۆكایه‌تیی ئه‌نجومه‌نی وه‌زیرانی هه‌رێمی كوردستان
شوان عەتووف بە "ماڵ و کلیل" بەشداریی لە فیستیڤاڵی فیلمی کان دەکات
دوایین هەواڵەکان
- سه‌رۆك نێچيرڤان بارزانى پێشوازى له باڵيۆزى بهريتانيا كرد
- سەرۆکی حکومەتی هەرێمی کوردستان پێشوازی لە باڵیۆزی بەریتانیا لە عێراق دەکات
- عەباس غەزالی: نووسین و چاپکردنی "فەرھەنگیی زارەکیی موکریان" شانازییەکی بێ پایانە
- پەیامی پیرۆزبایی سەرۆکی حکومەتی هەرێمی کوردستان بەبۆنەی جەژنی نەورۆز
- سهرۆكى هه‌رێمى كوردستان نامهيهكى پيرۆزبايى له وهزيرى دهرهوەى توركياوه پێدهگات
- سه‌رۆك نێچيرڤان بارزانى و دوو گرووپى پهرلهمانتارانى ئهڵمانى كۆبوونهوه
- سه‌رۆك نێچيرڤان بارزانى و سه‌رۆك وهزيرانى ئهرمهنستان تاوتوێى پهيوهندييهكان دهكهن
- سه‌رۆك نێچيرڤان بارزانى له‌گه‌ڵ خاوهنشكۆ شاى ئوردن كۆبووهوه
- كارنامهى سه‌رۆك نێچيرڤان بارزانى له كۆنفرانسى ئاساييشى ميونشن تهواو بوو
- سه‌رۆك نێچيرڤان بارزانى: عێراق و هه‌رێمى كوردستان، پێويستييان به يهكێتيى ئهورووپايه